জিনচৰিতয |ও০.০০০১|

নমো তস্স ভগৱতো অৰহতো সম্মাসম্বুদ্ধস্স

১. উত্তমং উত্তমঙ্গেন নমস্সিত্ৱা মহেসিনো;

নিব্বাণমধুদং পাদপঙ্কজং সজ্জনালিনং.

২. মহামোহতমং লোকে ধংসেন্তং ধম্মভাকৰং;

পাতুভূতং মহাতেজং ধম্মৰাজোদযাচলে.

৩. জন্তুচিত্তসৰে জাতং পসাদকুমুদং সদা;

বোধেন্তং সঙ্ঘৱন্দঞ্চ সিলোৰুকিৰণুজ্জলং.

৪. তহিং, তহিং সুৱিত্থিণ্ণং জিনস্স চৰিতং হিতং;

পৱক্খামি সমাসেন সদা’নুস্সৰণত্থিকো.

৫. পণিতং তং সৰন্তানং দুল্লভম্পি সিৱংপদং;

অদুল্লভং ভৱে ভোগপটিলাভম্হি কা কথা?

৬. তস্মা তং ভঞ্ঞমানং মে চিত্তৱুত্তপদক্কমং;

সুন্দৰং মধুৰং সুদ্ধং সোতুসোতৰসাযনং.

৭. সোতহত্থপুটা সম্মা গহেত্ৱান নিৰন্তৰং;

অজৰামৰমি’চ্ছন্তা সাধৱো পৰিভুঞ্জথ.

৮. কপ্পসতসহস্সস্স চতুন্নং চা’পি মত্থকে;

অসঙ্খেয্যানমা’ৱাসং সব্বদা পুঞ্ঞকামিনং.

৯. |ও০.০০০২|

নানাৰতনসম্পন্নং নানাজনসমাকুলং;

ৱিচিত্তাপণ সংকিণ্ণং তোৰণ গ্ঘিক ভূসিতং.

১০. যুত্তং দসহি সদ্দেহি দেৱিন্দপুৰসন্নিভং;

পুৰং অমৰসঙ্খাতং অহোসী ৰুচিৰং ৱৰং.

১১. তহিং ব্ৰাহ্মন্ৱযে জাতো সব্বলোকাভিপূজিতো;

মহাদযো মহাপঞ্ঞো অভিৰূপো মনোৰমো.

১২. সুমেধো নাম নামেন ৱেদসাগৰপাৰগূ;

কুমাৰো’সি গৰূনং সো অৱসানে জিনংকুৰো.

১৩. ৰাসিৱড্ঢকমচ্চেন দস্সিতং অমিতং ধনং;

অনেকসতগব্ভেসু নিচিতং তং উদিক্খিয.

১৪. ধনসন্নিচযং কত্ৱা অহো ময্হং পিতাদযো;

গতা মাসকমে’কম্পি নেৱা’দায দিৱং ইতি.

১৫. সংৱেগমু’পযাতো’ৱচীমন্তেসী’তি গুণাকৰো;

ধনসাৰং ইহং গয্হ গন্তুং যুত্তন্তি মে পন.

১৬. ৰহোগতো নিসীদিত্ৱা সুন্দৰে নিজমন্দিৰে;

দেহে দোসো উদিক্খন্তো ওৱদন্তো’পি অত্তনো.

১৭. ভেদনং তনুনোদুক্খং দুক্খো তস্সো’দযো’পি চ;

জাতিধম্মো জৰাধম্মো ৱ্যাধিধম্মো অহং ইতি.

১৮. এৱমা’দীহি দেহস্মিং দিস্ৱা দোসে অনেকধা;

পুৰে ভেৰিং চৰাপেত্ৱা আৰোচেত্ৱান ৰাজিনো.

১৯. ভেৰিনাদসুগন্ধেন যাচকালিসমাগতে;

দানকিঞ্জক্খওঘেন সত্তাহং পীনযী ততো.

২০. দানগ্গহিমবিন্দূনং নিপাতেনা’পি ধংসনং;

অযাতং তং ৱিলোকেত্ৱা ৰতনম্বুজকাননং.

২১. ৰুদতো ঞাতিসঙ্ঘস্স জলিতানলকাননা;

গজিন্দো ৱিয গেহম্হা নিক্খমিত্ৱা মনোৰমা.

২২. |ও০.০০০৩|

মহন্তং সো মহাৱীৰো উপগঞ্ছি হিমালযং;

হৰিচন্দনকপ্পূৰাগৰুগন্ধেহি ৱাসিতং.

২৩. সুফল্লচম্পকাসোকপাটলীতিলকেহি চ;

পূগপুন্নাগনাগাদিপাদপেহি চ মণ্ডিতং.

২৪. সীহৱ্যগ্ঘতৰচ্ছেহি ইভদীপিকপীহি চ;

তুৰঙ্গমাদিনেকেহি মিগেহি চ সমাকুলং.

২৫. সাড়িকাৰৱিহংসেহি হংসকোঞ্চসুৱেহি চ;

কপোতকৰৱীকাদিসকুন্তেহি চ কূজিতং.

২৬. যক্খৰক্খসগন্ধব্বদেৱদানৱকেহি চ;

সিদ্ধৱিজ্জাধৰাদীহি ভূতেহি চ নিসেৱিতং.

২৭. মনোসীলিন্দনীলোৰুচাৰুপব্বতপন্তিহি;

সজ্ঝুহেমাদিনেকেহি ভূধৰেহি চ ভাসুৰং.

২৮. সুৱণ্ণমণিসোপাননেকতিত্থসৰেহি চ;

সোভিতং তত্থ কীড়ন্তনেকদেৱঙ্গনাহি চ.

২৯. সীতসীকৰসঞ্ছন্ননিজ্ঝৰানং সতেহি চ;

কিণ্ণৰোৰগৰঙ্গেহি ৰম্মেহি ৱিৰাজিতং.

৩০. সিখণ্ডিসণ্ডনচ্চেহি লতানং মণ্ডপেহি চ;

সেতৱালুকসঞ্ছন্নমালকেহি চ মণ্ডিতং.

৩১. সুৱণ্ণমণিমুত্তাদি অনেকৰতনাকৰং;

ইচ্ছন্তানং জনালীনং পুঞ্ঞকিঞ্জক্খমা’লযং.

৩২. তম’জ্ঝোগয্হ সো ধীৰো সহস্সক্খেন মাপিতে;

দিস্ৱা ইসিপৰিক্খাৰে পণ্ণসালৱৰে তহিং.

৩৩. ইসিৱেসং গহেত্ৱান ৱিহৰন্তো সমাহিতো;

সত্তাহ’ব্ভন্তৰে পঞ্চ অভিঞ্ঞ’ট্ঠৱিধা’পি চ.

৩৪. উপ্পাদেত্ৱা সমাপত্তিসুখেনে’চ তপোধনো;

নভসা দিৱসে’কস্মিং গচ্ছন্তো জনতং ইসি.

৩৫. |ও০.০০০৪|

সোধেন্তম’ঞ্জসং দিস্ৱা ওতৰিত্ৱা নভা তহিং;

ইতি তং জনতং পুচ্ছি কস্মা সোধেথ অঞ্জসং.

৩৬. সুমেধ ত্ৱং নজানাসি দীপঙ্কৰতথাগতো;

সম্বোধিমু’ত্তমং পত্ৱা ধম্মচক্কম’নুত্তৰং.

৩৭. পৱত্তেত্ৱান লোকস্স কৰোন্তো ধম্মসঙ্গহং;

ৰম্মং ৰম্মপুৰং পত্ৱা ৱসতী’হ সুদস্সনে.

৩৮. ভিক্খুসতসহস্সেহি চতূহি ৱিমলেহি তং;

নিমন্তযিম্হ দানেন মযং লোকেকনাযক.

৩৯. তস্স আগমনত্থায মগ্গং সোধেম চক্খুম;

ইতি সোতস্স সো তস্স সুখং দেন্তো জনো’ব্ৰৱিং.

৪০. বুদ্ধো’তি ৱচনং সুত্ৱা পীতিযো’দগ্গমানসো;

সকভাৱেন সণ্ঠাতুং নেৱসক্খি গুণাকৰো.

৪১. তেনা’ৰদ্ধঞ্জসা ধীৰো যাচিত্ৱান পদেসকং;

লভিত্ৱা ৱিসমং ঠানং সমং কাতুং সমাৰভি.

৪২. না’লঙ্কতেযেৱ তহিং পদেসে,

লোকেকনাথো সনৰামৰেহি;

সম্পূজিতো লোকহিতো মহেসি,

ৱসীহি সদ্ধিং পটিপজ্জি মগ্গং.

৪৩. ছব্বণ্ণৰংসিজালেহি পজ্জলন্তং তথাগতং;

আগচ্ছন্তং তহি দিস্ৱা মোদমানো ৱিচিন্তযি.

৪৪. যন্নূনি’মস্স ধীৰস্স সেতুং কত্ৱান কদ্দমে;

সকত্তানং নিপজ্জযে সসঙ্ঘস্স মহেসিনো.

৪৫. দীঘৰত্তাম’লং তং মে হিতায চ সুখায চ;

ইচ্চে’ৱং চিন্তযিত্ৱান নিপন্নো’সো জিনঙ্কুৰো.

৪৬. পবোধেত্ৱান দিস্ৱান চাৰুলোচনপঙ্কজে;

পুন’পে’ৱং ৱিচিন্তেসি নিপন্নো ধিতিমা তহিং.

৪৭. |ও০.০০০৫|

ইচ্ছেয্যং চে’হম’জ্জে’ৱ হন্ত্ৱা’নন্তৰণে ভৱে;

সঙ্ঘস্স নৱকো হুত্ৱা পৱিসেয্যং পুৰং ৱৰং.

৪৮. কিম’ঞ্ঞাতকৱেসেন ক্লেসনিব্বাপণেন মে;

অযং বুদ্ধো’ৱ’হং বুদ্ধো হুত্ৱা লোকে অনুত্তৰো.

৪৯. জনতং ধম্মনাৱায তাৰেত্ৱান ভৱণ্ণৱাৱ;

নিব্বাণপুৰমা’নেত্ৱা সেয্যং মে পৰিনিব্বুতং.

৫০. ইচ্চে’ৱং চিন্তযিত্ৱান নিপন্নো কদ্দমে তহিং;

সুৱণ্ণকদলিক্খন্ধসন্নিভো সো’তি সোভতি.

৫১. ছব্বণ্ণৰংসীহি ৱিৰাজমানং,

দিস্ৱা মনুঞ্ঞং সুগতত্তভাৱং;

সঞ্জাতপীতীহি উদগ্গচিত্তো,

সম্বোধিযা ছন্দম’কাসি ধীৰো.

৫২. আগন্ত্ৱান তহিং ঠানং ইসিং পঙ্কে নিপন্নকং;

লোকস্স সেতুভূতো’পি সেতুভূতং তম’ত্তনো.

৫৩. দিস্ৱা উস্সীসকে তস্স ঠত্ৱা লোকেকসেতুনো;

লোকেকলোচনো ধীৰো দীপঙ্কৰতথাগতো.

৫৪. গোতমো নাম নামেন সম্বুদ্ধো’যং অনাগতে;

ভৱিস্সতীতি ৱ্যাকাসি সাৱকে চ পুৰাদিকে.

৫৫. ইদং ৱত্ৱান কত্ৱান সসঙ্ঘো তং পদক্খিণং;

পূজেসি অট্ঠমুট্ঠিহি কুসুমেহি গুণপ্পিযো.

৫৬. ইতি কাতূন পাযাসি সসঙ্ঘো লোকনাযকোৱ;

ৰম্মকং নাম নগৰং ৰম্মাৰামালযালযং

৫৭. জিনস্স ৱচনং সুত্ৱা উট্ঠহিত্ৱান পঙ্কতো;

মুদিতো দেৱসঙ্ঘেহি কুসুমাদীহি পূজিতো.

৫৮. পল্লঙ্কমা’ভুজিত্ৱান নিসীদি কুসুমাসনে;

মহাতপো মহাপঞ্ঞো সুমেধো দমিতিন্দ্ৰিযো.

৫৯. |ও০.০০০৬|

দেৱা দসসহস্সেসু চক্কৱাড়েসু মোদিতা;

অভিত্ৱৱিংসু তং ধীৰং নিসিন্নং কুসুমাসনে.

৬০. নিসিন্নো উপধাৰেসি ধম্মে বুদ্ধকৰে তদা;

কিমুদ্ধং ৱা অধো ৱা’পি দিসাসু ৱিদিসাসু চ.

৬১. ইচ্চে’ৱং ৱিচিনন্তো সো সকলং ধম্মধাতুকং;

অদ্দক্খি সকসন্তানে পঠমং দানপাৰমিং.

৬২. এৱমে’ৱং গৱেসন্তো উত্তৰিং পাৰমী ৱিদূ;

সব্বা পাৰমিযো দিস্ৱা অত্তনো ঞাণচক্খুনা.

৬৩. সংসাৰে সংসৰন্তো সো বহুং দুক্খং তিতিক্খিয;

গৱেসন্তো’মতং সন্তো পূৰেত্ৱা দানপাৰমিং.

৬৪. সত্তনং কপ্পৰুক্খো’ৱ চিন্তামণি’ৱ কামদো;

ইচ্ছিতিচ্ছিতমন্নাদিং দদন্তো দদতং ৱৰো.

৬৫. তাৰকাহি বহুং কত্ৱা নভে চাৰুৱিলোচনে;

উপ্পাটেত্ৱা দদং ধীৰো যাচকানং পমোদিতো.

৬৬. মহিযা পংসুতো চা’পি সমুদ্দোদকতো’ধিকং;

দদং সৰীৰমংসঞ্চ লোহিতম্পি চ অত্তনো.

৬৭. মোলিনা’লঙ্কতে সীসে’ধিকং কত্ৱা সিনেৰুতো;

কম্পযিত্ৱা মহিং দেন্তো সুতে চা’পি সকঙ্গতাৱ.

৬৮. সীলনেক্কম্মপঞ্ঞাদী পূৰেত্ৱা সব্বপাৰমী;

ৱেস্সন্তৰত্তভাৱে’ ৱম্পত্ৱা তম্ভা চুতো পন.

৬৯. উপ্পজ্জিত্ৱা সুৰাৱাসে সুন্দৰে তুসিতে পুৰে;

ৱসন্তো সুচিৰং কালং ভুত্ৱানা’তন্তসম্পদং.

৭০. কতঞ্জলীহি দেৱেহি যাচিতো দিপদুত্তমো;