৮. দুতিযআহুনেয্যসুত্তং

৫৮. ‘‘অট্ঠহি, ভিক্খৱে, ধম্মেহি সমন্নাগতো ভিক্খু আহুনেয্যো হোতি…পে… অনুত্তৰং পুঞ্ঞক্খেত্তং লোকস্স. কতমেহি অট্ঠহি? ইধ, ভিক্খৱে, ভিক্খু সীলৱা হোতি …পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৱিদ্ধা; আৰদ্ধৱীৰিযো ৱিহৰতি থামৱা দড়্হপৰক্কমো অনিক্খিত্তধুৰো কুসলেসু ধম্মেসু; আৰঞ্ঞিকো হোতি পন্তসেনাসনো; অৰতিৰতিসহো হোতি, উপ্পন্নং অৰতিং অভিভুয্য অভিভুয্য ৱিহৰতি; ভযভেৰৱসহো হোতি, উপ্পন্নং ভযভেৰৱং অভিভুয্য অভিভুয্য ৱিহৰতি; চতুন্নং ঝানানং আভিচেতসিকানং দিট্ঠধম্মসুখৱিহাৰানং নিকামলাভী হোতি অকিচ্ছলাভী অকসিৰলাভী; আসৱানং খযা…পে… সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, অট্ঠহি ধম্মেহি সমন্নাগতো ভিক্খু আহুনেয্যো…পে… অনুত্তৰং পুঞ্ঞক্খেত্তং লোকস্সা’’তি. অট্ঠমং.