১. সঙ্খিত্তূপোসথসুত্তং

৪১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘অট্ঠঙ্গসমন্নাগতো, ভিক্খৱে, উপোসথো উপৱুত্থো মহপ্ফলো হোতি মহানিসংসো মহাজুতিকো মহাৱিপ্ফাৰো. কথং উপৱুত্থো চ, ভিক্খৱে, অট্ঠঙ্গসমন্নাগতো উপোসথো মহপ্ফলো হোতি মহানিসংসো মহাজুতিকো মহাৱিপ্ফাৰো? ইধ, ভিক্খৱে, অৰিযসাৱকো ইতি পটিসঞ্চিক্খতি – ‘যাৱজীৱং অৰহন্তো পাণাতিপাতং পহায পাণাতিপাতা পটিৱিৰতা নিহিতদণ্ডা নিহিতসত্থা লজ্জী দযাপন্না, সব্বপাণভূতহিতানুকম্পিনো ৱিহৰন্তি. অহং পজ্জ ইমঞ্চ ৰত্তিং ইমঞ্চ দিৱসং পাণাতিপাতং পহায পাণাতিপাতা পটিৱিৰতো নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৱিহৰামি. ইমিনাপঙ্গেন [ইমিনাপি অঙ্গেন (সী. পী.) অ. নি. ৩.৭১] অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা পঠমেন অঙ্গেন সমন্নাগতো হোতি.

‘‘‘যাৱজীৱং অৰহন্তো অদিন্নাদানং পহায অদিন্নাদানা পটিৱিৰতা দিন্নাদাযী দিন্নপাটিকঙ্খী, অথেনেন সুচিভূতেন অত্তনা ৱিহৰন্তি. অহং পজ্জ ইমঞ্চ ৰত্তিং ইমঞ্চ দিৱসং অদিন্নাদানং পহায অদিন্নাদানা পটিৱিৰতো দিন্নাদাযী দিন্নপাটিকঙ্খী, অথেনেন সুচিভূতেন অত্তনা ৱিহৰামি. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা দুতিযেন অঙ্গেন সমন্নাগতো হোতি.

‘‘‘যাৱজীৱং অৰহন্তো অব্ৰহ্মচৰিযং পহায ব্ৰহ্মচাৰিনো আৰাচাৰিনো ৱিৰতা মেথুনা গামধম্মা. অহং পজ্জ ইমঞ্চ ৰত্তিং ইমঞ্চ দিৱসং অব্ৰহ্মচৰিযং পহায ব্ৰহ্মচাৰী আৰাচাৰী [অনাচাৰী (ক.)] ৱিৰতো মেথুনা গামধম্মা. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা ততিযেন অঙ্গেন সমন্নাগতো হোতি.

‘‘‘যাৱজীৱং অৰহন্তো মুসাৱাদং পহায মুসাৱাদা পটিৱিৰতা সচ্চৱাদিনো সচ্চসন্ধা থেতা পচ্চযিকা অৱিসংৱাদকো লোকস্স. অহং পজ্জ ইমঞ্চ ৰত্তিং ইমঞ্চ দিৱসং মুসাৱাদং পহায মুসাৱাদা পটিৱিৰতো সচ্চৱাদী সচ্চসন্ধো থেতো পচ্চযিকো অৱিসংৱাদকো লোকস্স. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা চতুত্থেন অঙ্গেন সমন্নাগতো হোতি.

‘‘‘যাৱজীৱং অৰহন্তো সুৰামেৰযমজ্জপমাদট্ঠানং পহায সুৰামেৰযমজ্জপমাদট্ঠানা পটিৱিৰতা. অহং পজ্জ ইমঞ্চ ৰত্তিং ইমঞ্চ দিৱসং সুৰামেৰযমজ্জপমাদট্ঠানং পহায সুৰামেৰযমজ্জপমাদট্ঠানা পটিৱিৰতো. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা পঞ্চমেন অঙ্গেন সমন্নাগতো হোতি.

‘‘‘যাৱজীৱং অৰহন্তো একভত্তিকা ৰত্তূপৰতা ৱিৰতা ৱিকালভোজনা. অহং পজ্জ ইমঞ্চ ৰত্তিং ইমঞ্চ দিৱসং একভত্তিকো ৰত্তূপৰতো ৱিৰতো ৱিকালভোজনা. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা ছট্ঠেন অঙ্গেন সমন্নাগতো হোতি.

‘‘‘যাৱজীৱং অৰহন্তো নচ্চগীতৱাদিতৱিসূকদস্সনমালাগন্ধৱিলেপনধাৰণমণ্ডনৱিভূসনট্ঠানং পহায নচ্চগীতৱাদিতৱিসূকদস্সনমালাগন্ধৱিলেপনধাৰণমণ্ডনৱিভূসনট্ঠানা পটিৱিৰতা. অহং পজ্জ ইমঞ্চ ৰত্তিং ইমঞ্চ দিৱসং নচ্চগীতৱাদিতৱিসূকদস্সনমালাগন্ধৱিলেপনধাৰণমণ্ডনৱিভূসনট্ঠানং পহায নচ্চগীতৱাদিতৱিসূকদস্সনমালাগন্ধৱিলেপনধাৰণমণ্ডনৱিভূসনট্ঠানা পটিৱিৰতো. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা সত্তমেন অঙ্গেন সমন্নাগতো হোতি.

‘‘‘যাৱজীৱং অৰহন্তো উচ্চাসযনমহাসযনং পহায উচ্চাসযনমহাসযনা পটিৱিৰতা নীচসেয্যং কপ্পেন্তি – মঞ্চকে ৱা তিণসন্থাৰকে ৱা. অহং পজ্জ ইমঞ্চ ৰত্তিং ইমঞ্চ দিৱসং উচ্চাসযনমহাসযনং পহায উচ্চাসযনমহাসযনা পটিৱিৰতো নীচসেয্যং কপ্পেমি – মঞ্চকে ৱা তিণসন্থাৰকে ৱা. ইমিনাপঙ্গেন অৰহতং অনুকৰোমি, উপোসথো চ মে উপৱুত্থো ভৱিস্সতী’তি. ইমিনা অট্ঠমেন অঙ্গেন সমন্নাগতো হোতি. এৱং উপৱুত্থো খো, ভিক্খৱে, অট্ঠঙ্গসমন্নাগতো উপোসথো মহপ্ফলো হোতি মহানিসংসো মহাজুতিকো মহাৱিপ্ফাৰো’’তি. পঠমং.