৬. পুঞ্ঞকিৰিযৱত্থুসুত্তং

৩৬. ‘‘তীণিমানি, ভিক্খৱে, পুঞ্ঞকিৰিযৱত্থূনি. কতমানি তীণি? দানমযং পুঞ্ঞকিৰিযৱত্থু [পুঞ্ঞকিৰিযৱত্থুং (সী. পী.) এৱমুপৰিপি], সীলমযং পুঞ্ঞকিৰিযৱত্থু, ভাৱনামযং পুঞ্ঞকিৰিযৱত্থু. ইধ, ভিক্খৱে, একচ্চস্স দানমযং পুঞ্ঞকিৰিযৱত্থু পৰিত্তং কতং হোতি, সীলমযং পুঞ্ঞকিৰিযৱত্থু পৰিত্তং কতং হোতি, ভাৱনামযং পুঞ্ঞকিৰিযৱত্থুং [পুঞ্ঞকিৰিযৱত্থু (স্যা.)] নাভিসম্ভোতি. সো কাযস্স ভেদা পৰং মৰণা মনুস্সদোভগ্যং উপপজ্জতি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু মত্তসো কতং হোতি, সীলমযং পুঞ্ঞকিৰিযৱত্থু মত্তসো কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা মনুস্সসোভগ্যং উপপজ্জতি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু অধিমত্তং কতং হোতি, সীলমযং পুঞ্ঞকিৰিযৱত্থু অধিমত্তং কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা চাতুমহাৰাজিকানং দেৱানং সহব্যতং উপপজ্জতি. তত্ৰ, ভিক্খৱে, চত্তাৰো মহাৰাজানো দানমযং পুঞ্ঞকিৰিযৱত্থুং অতিৰেকং কৰিত্ৱা, সীলমযং পুঞ্ঞকিৰিযৱত্থুং অতিৰেকং কৰিত্ৱা, চাতুমহাৰাজিকে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু অধিমত্তং কতং হোতি, সীলমযং পুঞ্ঞকিৰিযৱত্থু অধিমত্তং কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা তাৱতিংসানং দেৱানং সহব্যতং উপপজ্জতি. তত্ৰ, ভিক্খৱে, সক্কো দেৱানমিন্দো দানমযং পুঞ্ঞকিৰিযৱত্থুং অতিৰেকং কৰিত্ৱা সীলমযং পুঞ্ঞকিৰিযৱত্থুং অতিৰেকং কৰিত্ৱা তাৱতিংসে দেৱে দসহি ঠানেহি অধিগণ্হাতি – দিব্বেন আযুনা…পে… দিব্বেহি ফোট্ঠব্বেহি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু অধিমত্তং কতং হোতি, সীলমযং পুঞ্ঞকিৰিযৱত্থু অধিমত্তং কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা যামানং দেৱানং সহব্যতং উপপজ্জতি. তত্ৰ, ভিক্খৱে, সুযামো দেৱপুত্তো দানমযং পুঞ্ঞকিৰিযৱত্থুং অতিৰেকং কৰিত্ৱা, সীলমযং পুঞ্ঞকিৰিযৱত্থুং অতিৰেকং কৰিত্ৱা, যামে দেৱে দসহি ঠানেহি অধিগণ্হাতি – দিব্বেন আযুনা…পে… দিব্বেহি ফোট্ঠব্বেহি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু অধিমত্তং কতং হোতি, সীলমযং পুঞ্ঞকিৰিযৱত্থু অধিমত্তং কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা তুসিতানং দেৱানং সহব্যতং উপপজ্জতি. তত্ৰ, ভিক্খৱে, সন্তুসিতো দেৱপুত্তো দানমযং পুঞ্ঞকিৰিযৱত্থুং অতিৰেকং কৰিত্ৱা, সীলমযং পুঞ্ঞকিৰিযৱত্থুং অতিৰেকং কৰিত্ৱা, তুসিতে দেৱে দসহি ঠানেহি অধিগণ্হাতি – দিব্বেন আযুনা…পে… দিব্বেহি ফোট্ঠব্বেহি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু অধিমত্তং কতং হোতি, সীলমযং পুঞ্ঞকিৰিযৱত্থু অধিমত্তং কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা নিম্মানৰতীনং দেৱানং সহব্যতং উপপজ্জতি. তত্ৰ, ভিক্খৱে, সুনিম্মিতো দেৱপুত্তো দানমযং পুঞ্ঞকিৰিযৱত্থুং অতিৰেকং কৰিত্ৱা, সীলমযং পুঞ্ঞকিৰিযৱত্থুং অতিৰেকং কৰিত্ৱা, নিম্মানৰতীদেৱে দসহি ঠানেহি অধিগণ্হাতি – দিব্বেন আযুনা…পে… দিব্বেহি ফোট্ঠব্বেহি.

‘‘ইধ পন, ভিক্খৱে, একচ্চস্স দানমযং পুঞ্ঞকিৰিযৱত্থু অধিমত্তং কতং হোতি, সীলমযং পুঞ্ঞকিৰিযৱত্থু অধিমত্তং কতং হোতি, ভাৱনামযং পুঞ্ঞকিৰিযৱত্থুং নাভিসম্ভোতি. সো কাযস্স ভেদা পৰং মৰণা পৰনিম্মিতৱসৱত্তীনং দেৱানং সহব্যতং উপপজ্জতি. তত্ৰ, ভিক্খৱে, ৱসৱত্তী দেৱপুত্তো দানমযং পুঞ্ঞকিৰিযৱত্থুং অতিৰেকং কৰিত্ৱা, সীলমযং পুঞ্ঞকিৰিযৱত্থুং অতিৰেকং কৰিত্ৱা, পৰনিম্মিতৱসৱত্তীদেৱে দসহি ঠানেহি অধিগণ্হাতি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহি. ইমানি খো, ভিক্খৱে, তীণি পুঞ্ঞকিৰিযৱত্থূনী’’তি. ছট্ঠং.