৪. দুতিযসোৱচস্সতাসুত্তং

৩৫. ‘‘ইমং, ভিক্খৱে, ৰত্তিং অঞ্ঞতৰা দেৱতা অভিক্কন্তায ৰত্তিযা অভিক্কন্তৱণ্ণা…পে… ‘সত্তিমে, ভন্তে, ধম্মা ভিক্খুনো অপৰিহানায সংৱত্তন্তি. কতমে সত্ত? সত্থুগাৰৱতা, ধম্মগাৰৱতা, সঙ্ঘগাৰৱতা, সিক্খাগাৰৱতা, সমাধিগাৰৱতা, সোৱচস্সতা, কল্যাণমিত্ততা. ইমে খো, ভন্তে, সত্ত ধম্মা ভিক্খুনো অপৰিহানায সংৱত্তন্তী’তি. ইদমৱোচ, ভিক্খৱে, সা দেৱতা. ইদং ৱত্ৱা মং অভিৱাদেত্ৱা পদক্খিণং কত্ৱা তত্থেৱন্তৰধাযী’’তি.

এৱং ৱুত্তে আযস্মা সাৰিপুত্তো ভগৱন্তং এতদৱোচ – ‘‘ইমস্স খো অহং, ভন্তে, ভগৱতা সংখিত্তেন ভাসিতস্স এৱং ৱিত্থাৰেন অত্থং আজানামি. ইধ, ভন্তে, ভিক্খু অত্তনা চ সত্থুগাৰৱো হোতি, সত্থুগাৰৱতায চ ৱণ্ণৱাদী. যে চঞ্ঞে ভিক্খূ ন সত্থুগাৰৱা তে চ সত্থুগাৰৱতায সমাদপেতি. যে চঞ্ঞে ভিক্খূ সত্থুগাৰৱা তেসঞ্চ ৱণ্ণং ভণতি ভূতং তচ্ছং কালেন. অত্তনা চ ধম্মগাৰৱো হোতি…পে… সঙ্ঘগাৰৱো হোতি… সিক্খাগাৰৱো হোতি… সমাধিগাৰৱো হোতি… সুৱচো হোতি… কল্যাণমিত্তো হোতি, কল্যাণমিত্ততায চ ৱণ্ণৱাদী. যে চঞ্ঞে ভিক্খূ ন কল্যাণমিত্তা তে চ কল্যাণমিত্ততায সমাদপেতি. যে চঞ্ঞে ভিক্খূ কল্যাণমিত্তা তেসঞ্চ ৱণ্ণং ভণতি ভূতং তচ্ছং কালেনাতি. ইমস্স খো অহং, ভন্তে, ভগৱতা সংখিত্তেন ভাসিতস্স এৱং ৱিত্থাৰেন অত্থং আজানামী’’তি.

‘‘সাধু সাধু, সাৰিপুত্ত! সাধু খো ত্ৱং, সাৰিপুত্ত, ইমস্স মযা সংখিত্তেন ভাসিতস্স এৱং ৱিত্থাৰেন অত্থং আজানাসি. ইধ, সাৰিপুত্ত, ভিক্খু অত্তনা চ সত্থুগাৰৱো হোতি, সত্থুগাৰৱতায চ ৱণ্ণৱাদী. যে চঞ্ঞে ভিক্খূ ন সত্থুগাৰৱা তে চ সত্থুগাৰৱতায সমাদপেতি. যে চঞ্ঞে ভিক্খূ সত্থুগাৰৱা তেসঞ্চ ৱণ্ণং ভণতি ভূতং তচ্ছং কালেন. অত্তনা চ ধম্মগাৰৱো হোতি…পে… সঙ্ঘগাৰৱো হোতি… সিক্খাগাৰৱো হোতি… সমাধিগাৰৱো হোতি… সুৱচো হোতি… কল্যাণমিত্তো হোতি, কল্যাণমিত্ততায চ ৱণ্ণৱাদী. যে চঞ্ঞে ভিক্খূ ন কল্যাণমিত্তা তে চ কল্যাণমিত্ততায সমাদপেতি. যে চঞ্ঞে ভিক্খূ কল্যাণমিত্তা তেসঞ্চ ৱণ্ণং ভণতি ভূতং তচ্ছং কালেনাতি. ইমস্স খো, সাৰিপুত্ত, মযা সংখিত্তেন ভাসিতস্স এৱং ৱিত্থাৰেন অত্থো দট্ঠব্বো’’তি. চতুত্থং.