১. অপ্পমাদগাৰৱসুত্তং

৩২. অথ খো অঞ্ঞতৰা দেৱতা অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতা খো সা দেৱতা ভগৱন্তং এতদৱোচ –

‘‘সত্তিমে, ভন্তে, ধম্মা ভিক্খুনো অপৰিহানায সংৱত্তন্তি. কতমে সত্ত? সত্থুগাৰৱতা, ধম্মগাৰৱতা, সঙ্ঘগাৰৱতা, সিক্খাগাৰৱতা, সমাধিগাৰৱতা, অপ্পমাদগাৰৱতা, পটিসন্থাৰগাৰৱতা. ইমে খো, ভন্তে, সত্ত ধম্মা ভিক্খুনো অপৰিহানায সংৱত্তন্তী’’তি. ইদমৱোচ সা দেৱতা. সমনুঞ্ঞো সত্থা অহোসি. অথ খো সা দেৱতা ‘‘সমনুঞ্ঞো মে সত্থা’’তি ভগৱন্তং অভিৱাদেত্ৱা পদক্খিণং কত্ৱা তত্থেৱন্তৰধাযি.

অথ খো ভগৱা তস্সা ৰত্তিযা অচ্চযেন ভিক্খূ আমন্তেসি – ‘‘ইমং, ভিক্খৱে, ৰত্তিং অঞ্ঞতৰা দেৱতা অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেনাহং তেনুপসঙ্কমি; উপসঙ্কমিত্ৱা মং অভিৱাদেত্ৱা একমন্তং অট্ঠাসি. একমন্তং ঠিতা খো, ভিক্খৱে, সা দেৱতা মং এতদৱোচ – ‘সত্তিমে, ভন্তে, ধম্মা ভিক্খুনো অপৰিহানায সংৱত্তন্তি. কতমে সত্ত? সত্থুগাৰৱতা, ধম্মগাৰৱতা, সঙ্ঘগাৰৱতা, সিক্খাগাৰৱতা, সমাধিগাৰৱতা, অপ্পমাদগাৰৱতা, পটিসন্থাৰগাৰৱতা – ইমে খো, ভন্তে, সত্ত ধম্মা ভিক্খুনো অপৰিহানায সংৱত্তন্তী’তি. ইদমৱোচ, ভিক্খৱে, সা দেৱতা. ইদং ৱত্ৱা মং অভিৱাদেত্ৱা পদক্খিণং কত্ৱা তত্থেৱন্তৰধাযী’’তি.

‘‘সত্থুগৰু ধম্মগৰু, সঙ্ঘে চ তিব্বগাৰৱো;

সমাধিগৰু আতাপী [সমাধিগাৰৱতাপি চ (ক.)], সিক্খায তিব্বগাৰৱো.

‘‘অপ্পমাদগৰু ভিক্খু, পটিসন্থাৰগাৰৱো;

অভব্বো পৰিহানায, নিব্বানস্সেৱ সন্তিকে’’তি. পঠমং;