১২. সামঞ্ঞৱগ্গো

১. কাযানুপস্সীসুত্তং

১১৭. ‘‘ছ, ভিক্খৱে, ধম্মে অপ্পহায অভব্বো কাযে কাযানুপস্সী ৱিহৰিতুং. কতমে ছ? কম্মাৰামতং, ভস্সাৰামতং, নিদ্দাৰামতং, সঙ্গণিকাৰামতং, ইন্দ্ৰিযেসু অগুত্তদ্ৱাৰতং, ভোজনে অমত্তঞ্ঞুতং. ইমে খো, ভিক্খৱে, ছ ধম্মে অপ্পহায অভব্বো কাযে কাযানুপস্সী ৱিহৰিতুং.

‘‘ছ, ভিক্খৱে, ধম্মে পহায ভব্বো কাযে কাযানুপস্সী ৱিহৰিতুং. কতমে ছ? কম্মাৰামতং, ভস্সাৰামতং, নিদ্দাৰামতং, সঙ্গণিকাৰামতং, ইন্দ্ৰিযেসু অগুত্তদ্ৱাৰতং, ভোজনে অমত্তঞ্ঞুতং – ইমে খো, ভিক্খৱে, ছ ধম্মে পহায ভব্বো কাযে কাযানুপস্সী ৱিহৰিতু’’ন্তি. পঠমং.

২. ধম্মানুপস্সীসুত্তং

১১৮. ‘‘ছ, ভিক্খৱে, ধম্মে অপ্পহায অভব্বো অজ্ঝত্তং কাযে…পে… বহিদ্ধা কাযে…পে… অজ্ঝত্তবহিদ্ধা কাযে…পে… অজ্ঝত্তং ৱেদনাসু…পে… বহিদ্ধা ৱেদনাসু…পে… অজ্ঝত্তবহিদ্ধা ৱেদনাসু…পে… অজ্ঝত্তং চিত্তে…পে… বহিদ্ধা চিত্তে…পে… অজ্ঝত্তবহিদ্ধা চিত্তে…পে… অজ্ঝত্তং ধম্মেসু…পে… বহিদ্ধা ধম্মেসু…পে… অজ্ঝত্তবহিদ্ধা ধম্মেসু ধম্মানুপস্সী ৱিহৰিতুং. কতমে ছ? কম্মাৰামতং, ভস্সাৰামতং, নিদ্দাৰামতং, সঙ্গণিকাৰামতং, ইন্দ্ৰিযেসু অগুত্তদ্ৱাৰতং, ভোজনে অমত্তঞ্ঞুতং. ইমে খো, ভিক্খৱে, ছ ধম্মে পহায ভব্বো অজ্ঝত্তবহিদ্ধা ধম্মেসু ধম্মানুপস্সী ৱিহৰিতু’’ন্তি. দুতিযং.

৩. তপুস্সসুত্তং

১১৯. ‘‘ছহি, ভিক্খৱে, ধম্মেহি সমন্নাগতো তপুস্সো [তপস্সো (পী.) অ. নি. ১.২৪৮] গহপতি তথাগতে নিট্ঠঙ্গতো অমতদ্দসো অমতং সচ্ছিকত্ৱা ইৰিযতি. কতমেহি ছহি? বুদ্ধে অৱেচ্চপ্পসাদেন, ধম্মে অৱেচ্চপ্পসাদেন, সঙ্ঘে অৱেচ্চপ্পসাদেন, অৰিযেন সীলেন, অৰিযেন ঞাণেন, অৰিযায ৱিমুত্তিযা. ইমেহি খো, ভিক্খৱে, ছহি ধম্মেহি সমন্নাগতো তপুস্সো গহপতি তথাগতে নিট্ঠঙ্গতো অমতদ্দসো অমতং সচ্ছিকত্ৱা ইৰিযতী’’তি. ততিযং.

৪-২৩. ভল্লিকাদিসুত্তানি

১২০-১৩৯. ‘‘ছহি, ভিক্খৱে, ধম্মেহি সমন্নাগতো ভল্লিকো গহপতি…পে… সুদত্তো গহপতি অনাথপিণ্ডিকো… চিত্তো গহপতি মচ্ছিকাসণ্ডিকো… হত্থকো আড়ৱকো… মহানামো সক্কো… উগ্গো গহপতি ৱেসালিকো… উগ্গতো গহপতি… সূৰম্বট্ঠো [সূৰো অম্বট্ঠো (ক.)] … জীৱকো কোমাৰভচ্চো… নকুলপিতা গহপতি… তৱকণ্ণিকো গহপতি… পূৰণো গহপতি… ইসিদত্তো গহপতি… সন্ধানো [সন্তানো (ক.)] গহপতি… ৱিচযো [ৱিজযো (সী. স্যা. পী.)] গহপতি… ৱিজযমাহিকো [ৱজ্জিযমহিতো (সী. স্যা. পী.)] গহপতি… মেণ্ডকো গহপতি … ৱাসেট্ঠো উপাসকো… অৰিট্ঠো উপাসকো… সাৰগ্গো [সাদত্তো (স্যা.)] উপাসকো তথাগতে নিট্ঠঙ্গতো অমতদ্দসো অমতং সচ্ছিকত্ৱা ইৰিযতি. কতমেহি ছহি? বুদ্ধে অৱেচ্চপ্পসাদেন, ধম্মে অৱেচ্চপ্পসাদেন, সঙ্ঘে অৱেচ্চপ্পসাদেন, অৰিযেন সীলেন, অৰিযেন ঞাণেন, অৰিযায ৱিমুত্তিযা. ইমেহি খো, ভিক্খৱে, ছহি ধম্মেহি সমন্নাগতো সাৰগ্গো উপাসকো তথাগতে নিট্ঠঙ্গতো অমতদ্দসো অমতং সচ্ছিকত্ৱা ইৰিযতী’’তি. তেৱীসতিমং.

সামঞ্ঞৱগ্গো দ্ৱাদসমো.