১১. তিকৱগ্গো

১. ৰাগসুত্তং

১০৭. ‘‘তযোমে, ভিক্খৱে, ধম্মা. কতমে তযো? ৰাগো, দোসো, মোহো. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? ৰাগস্স পহানায অসুভা ভাৱেতব্বা, দোসস্স পহানায মেত্তা ভাৱেতব্বা, মোহস্স পহানায পঞ্ঞা ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. পঠমং.

২. দুচ্চৰিতসুত্তং

১০৮. ‘‘তযোমে, ভিক্খৱে, ধম্মা. কতমে তযো? কাযদুচ্চৰিতং, ৱচীদুচ্চৰিতং, মনোদুচ্চৰিতং. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? কাযদুচ্চৰিতস্স পহানায কাযসুচৰিতং ভাৱেতব্বং, ৱচীদুচ্চৰিতস্স পহানায ৱচীসুচৰিতং ভাৱেতব্বং, মনোদুচ্চৰিতস্স পহানায মনোসুচৰিতং ভাৱেতব্বং. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. দুতিযং.

৩. ৱিতক্কসুত্তং

১০৯. ‘‘তযোমে, ভিক্খৱে, ধম্মা. কতমে তযো? কামৱিতক্কো, ব্যাপাদৱিতক্কো, ৱিহিংসাৱিতক্কো. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? কামৱিতক্কস্স পহানায নেক্খম্মৱিতক্কো ভাৱেতব্বো, ব্যাপাদৱিতক্কস্স পহানায অব্যাপাদৱিতক্কো ভাৱেতব্বো, ৱিহিংসাৱিতক্কস্স পহানায অৱিহিংসাৱিতক্কো ভাৱেতব্বো. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. ততিযং.

৪. সঞ্ঞাসুত্তং

১১০. ‘‘তযোমে, ভিক্খৱে, ধম্মা. কতমে তযো? কামসঞ্ঞা, ব্যাপাদসঞ্ঞা, ৱিহিংসাসঞ্ঞা. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? কামসঞ্ঞায পহানায নেক্খম্মসঞ্ঞা ভাৱেতব্বা, ব্যাপাদসঞ্ঞায পহানায অব্যাপাদসঞ্ঞা ভাৱেতব্বা, ৱিহিংসাসঞ্ঞায পহানায অৱিহিংসাসঞ্ঞা ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. চতুত্থং.

৫. ধাতুসুত্তং

১১১. ‘‘তযোমে, ভিক্খৱে, ধম্মা. কতমে তযো? কামধাতু, ব্যাপাদধাতু, ৱিহিংসাধাতু. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? কামধাতুযা পহানায নেক্খম্মধাতু ভাৱেতব্বা, ব্যাপাদধাতুযা পহানায অব্যাপাদধাতু ভাৱেতব্বা, ৱিহিংসাধাতুযা পহানায অৱিহিংসাধাতু ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. পঞ্চমং.

৬. অস্সাদসুত্তং

১১২. ‘‘তযোমে, ভিক্খৱে, ধম্মা. কতমে তযো? অস্সাদদিট্ঠি, অত্তানুদিট্ঠি, মিচ্ছাদিট্ঠি. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? অস্সাদদিট্ঠিযা পহানায অনিচ্চসঞ্ঞা ভাৱেতব্বা, অত্তানুদিট্ঠিযা পহানায অনত্তসঞ্ঞা ভাৱেতব্বা, মিচ্ছাদিট্ঠিযা পহানায সম্মাদিট্ঠি ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. ছট্ঠং.

৭. অৰতিসুত্তং

১১৩. ‘‘তযোমে, ভিক্খৱে, ধম্মা. কতমে তযো? অৰতি, ৱিহিংসা [ৱিহেসা (ক.)], অধম্মচৰিযা. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? অৰতিযা পহানায মুদিতা ভাৱেতব্বা, ৱিহিংসায পহানায অৱিহিংসা ভাৱেতব্বা, অধম্মচৰিযায পহানায ধম্মচৰিযা ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. সত্তমং.

৮. সন্তুট্ঠিতাসুত্তং

১১৪. ‘‘তযোমে, ভিক্খৱে, ধম্মা. কতমে তযো? অসন্তুট্ঠিতা, অসম্পজঞ্ঞং, মহিচ্ছতা. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? অসন্তুট্ঠিতায পহানায সন্তুট্ঠিতা ভাৱেতব্বা, অসম্পজঞ্ঞস্স পহানায সম্পজঞ্ঞং ভাৱেতব্বং, মহিচ্ছতায পহানায অপ্পিচ্ছতা ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. অট্ঠমং.

৯. দোৱচস্সতাসুত্তং

১১৫. ‘‘তযোমে, ভিক্খৱে, ধম্মা. কতমে তযো? দোৱচস্সতা, পাপমিত্ততা, চেতসো ৱিক্খেপো. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? দোৱচস্সতায পহানায সোৱচস্সতা ভাৱেতব্বা, পাপমিত্ততায পহানায কল্যাণমিত্ততা ভাৱেতব্বা, চেতসো ৱিক্খেপস্স পহানায আনাপানস্সতি ভাৱেতব্বা. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. নৱমং.

১০. উদ্ধচ্চসুত্তং

১১৬. ‘‘তযোমে, ভিক্খৱে, ধম্মা. কতমে তযো? উদ্ধচ্চং, অসংৱৰো, পমাদো. ইমে খো, ভিক্খৱে, তযো ধম্মা. ইমেসং খো, ভিক্খৱে, তিণ্ণং ধম্মানং পহানায তযো ধম্মা ভাৱেতব্বা. কতমে তযো? উদ্ধচ্চস্স পহানায সমথো ভাৱেতব্বো, অসংৱৰস্স পহানায সংৱৰো ভাৱেতব্বো, পমাদস্স পহানায অপ্পমাদো ভাৱেতব্বো. ইমেসং খো, ভিক্খৱে, তিণ্ণং ধম্মানং পহানায ইমে তযো ধম্মা ভাৱেতব্বা’’তি. দসমং.

তিকৱগ্গো একাদসমো. [পঠমো (স্যা.)]