১১. চতুত্থঅভব্বট্ঠানসুত্তং

৯৫. ‘‘ছযিমানি, ভিক্খৱে, অভব্বট্ঠানানি. কতমানি ছ? অভব্বো দিট্ঠিসম্পন্নো পুগ্গলো সযংকতং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো পৰংকতং [পৰকতং (সী. স্যা.)] সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো সযংকতঞ্চ পৰংকতঞ্চ সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অসযংকাৰং অধিচ্চসমুপ্পন্নং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অপৰংকাৰং অধিচ্চসমুপ্পন্নং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অসযংকাৰঞ্চ অপৰংকাৰঞ্চ অধিচ্চসমুপ্পন্নং সুখদুক্খং পচ্চাগন্তুং. তং কিস্স হেতু? তথা হিস্স, ভিক্খৱে, দিট্ঠিসম্পন্নস্স পুগ্গলস্স হেতু চ সুদিট্ঠো হেতুসমুপ্পন্না চ ধম্মা. ইমানি খো, ভিক্খৱে, ছ অভব্বট্ঠানানী’’তি. একাদসমং.

সীতিৱগ্গো নৱমো. [চতুত্থো (স্যা. ক.)]