১. দুক্খসুত্তং

৭৫. ‘‘ছহি, ভিক্খৱে, ধম্মেহি সমন্নাগতো ভিক্খু দিট্ঠেৱ ধম্মে দুক্খং ৱিহৰতি সৱিঘাতং সউপাযাসং সপৰিড়াহং, কাযস্স ভেদা পৰং মৰণা দুগ্গতি পাটিকঙ্খা. কতমেহি ছহি? কামৱিতক্কেন, ব্যাপাদৱিতক্কেন, ৱিহিংসাৱিতক্কেন, কামসঞ্ঞায, ব্যাপাদসঞ্ঞায, ৱিহিংসাসঞ্ঞায – ইমেহি, খো, ভিক্খৱে, ছহি ধম্মেহি সমন্নাগতো ভিক্খু দিট্ঠেৱ ধম্মে দুক্খং ৱিহৰতি সৱিঘাতং সউপাযাসং সপৰিড়াহং, কাযস্স ভেদা পৰং মৰণা দুগ্গতি পাটিকঙ্খা.

‘‘ছহি, ভিক্খৱে, ধম্মেহি সমন্নাগতো ভিক্খু দিট্ঠেৱ ধম্মে সুখং ৱিহৰতি অৱিঘাতং অনুপাযাসং অপৰিড়াহং, কাযস্স ভেদা পৰং মৰণা সুগতি পাটিকঙ্খা. কতমেহি ছহি? নেক্খম্মৱিতক্কেন, অব্যাপাদৱিতক্কেন, অৱিহিংসাৱিতক্কেন, নেক্খম্মসঞ্ঞায, অব্যাপাদসঞ্ঞায, অৱিহিংসাসঞ্ঞায – ইমেহি, খো, ভিক্খৱে, ছহি ধম্মেহি সমন্নাগতো ভিক্খু দিট্ঠেৱ ধম্মে সুখং ৱিহৰতি অৱিঘাতং অনুপাযাসং অপৰিড়াহং, কাযস্স ভেদা পৰং মৰণা সুগতি পাটিকঙ্খা’’তি. পঠমং.