৮. অৰহত্তৱগ্গো

১. দুক্খসুত্তং

৭৫. ‘‘ছহি, ভিক্খৱে, ধম্মেহি সমন্নাগতো ভিক্খু দিট্ঠেৱ ধম্মে দুক্খং ৱিহৰতি সৱিঘাতং সউপাযাসং সপৰিড়াহং, কাযস্স ভেদা পৰং মৰণা দুগ্গতি পাটিকঙ্খা. কতমেহি ছহি? কামৱিতক্কেন, ব্যাপাদৱিতক্কেন, ৱিহিংসাৱিতক্কেন, কামসঞ্ঞায, ব্যাপাদসঞ্ঞায, ৱিহিংসাসঞ্ঞায – ইমেহি, খো, ভিক্খৱে, ছহি ধম্মেহি সমন্নাগতো ভিক্খু দিট্ঠেৱ ধম্মে দুক্খং ৱিহৰতি সৱিঘাতং সউপাযাসং সপৰিড়াহং, কাযস্স ভেদা পৰং মৰণা দুগ্গতি পাটিকঙ্খা.

‘‘ছহি, ভিক্খৱে, ধম্মেহি সমন্নাগতো ভিক্খু দিট্ঠেৱ ধম্মে সুখং ৱিহৰতি অৱিঘাতং অনুপাযাসং অপৰিড়াহং, কাযস্স ভেদা পৰং মৰণা সুগতি পাটিকঙ্খা. কতমেহি ছহি? নেক্খম্মৱিতক্কেন, অব্যাপাদৱিতক্কেন, অৱিহিংসাৱিতক্কেন, নেক্খম্মসঞ্ঞায, অব্যাপাদসঞ্ঞায, অৱিহিংসাসঞ্ঞায – ইমেহি, খো, ভিক্খৱে, ছহি ধম্মেহি সমন্নাগতো ভিক্খু দিট্ঠেৱ ধম্মে সুখং ৱিহৰতি অৱিঘাতং অনুপাযাসং অপৰিড়াহং, কাযস্স ভেদা পৰং মৰণা সুগতি পাটিকঙ্খা’’তি. পঠমং.

২. অৰহত্তসুত্তং

৭৬. ‘‘ছ, ভিক্খৱে, ধম্মে অপ্পহায অভব্বো অৰহত্তং সচ্ছিকাতুং. কতমে ছ? মানং, ওমানং, অতিমানং, অধিমানং, থম্ভং, অতিনিপাতং. ইমে খো, ভিক্খৱে, ছ ধম্মে অপ্পহায অভব্বো অৰহত্তং সচ্ছিকাতুং.

‘‘ছ, ভিক্খৱে, ধম্মে পহায ভব্বো অৰহত্তং সচ্ছিকাতুং. কতমে ছ? মানং, ওমানং, অতিমানং, অধিমানং, থম্ভং, অতিনিপাতং. ইমে খো, ভিক্খৱে, ছ ধম্মে পহায ভব্বো অৰহত্তং সচ্ছিকাতু’’ন্তি. দুতিযং.

৩. উত্তৰিমনুস্সধম্মসুত্তং

৭৭. ‘‘ছ, ভিক্খৱে, ধম্মে অপ্পহায অভব্বো উত্তৰিমনুস্সধম্মং অলমৰিযঞাণদস্সনৱিসেসং সচ্ছিকাতুং. কতমে ছ? মুট্ঠস্সচ্চং, অসম্পজঞ্ঞং, ইন্দ্ৰিযেসু অগুত্তদ্ৱাৰতং, ভোজনে অমত্তঞ্ঞুতং, কুহনং, লপনং. ইমে খো, ভিক্খৱে, ছ ধম্মে অপ্পহায অভব্বো উত্তৰিমনুস্সধম্মং অলমৰিযঞাণদস্সনৱিসেসং সচ্ছিকাতুং.

‘‘ছ, ভিক্খৱে, ধম্মে পহায ভব্বো উত্তৰিমনুস্সধম্মং অলমৰিযঞাণদস্সনৱিসেসং সচ্ছিকাতুং. কতমে ছ? মুট্ঠস্সচ্চং, অসম্পজঞ্ঞং, ইন্দ্ৰিযেসু অগুত্তদ্ৱাৰতং, ভোজনে অমত্তঞ্ঞুতং, কুহনং, লপনং. ইমে খো, ভিক্খৱে, ছ ধম্মে পহায ভব্বো উত্তৰিমনুস্সধম্মং অলমৰিযঞাণদস্সনৱিসেসং সচ্ছিকাতু’’ন্তি. ততিযং.

৪. সুখসোমনস্সসুত্তং

৭৮. ‘‘ছহি, ভিক্খৱে, ধম্মেহি সমন্নাগতো ভিক্খু দিট্ঠেৱ ধম্মে সুখসোমনস্সবহুলো ৱিহৰতি, যোনি চস্স আৰদ্ধা হোতি আসৱানং খযায. কতমেহি ছহি? ইধ, ভিক্খৱে, ভিক্খু ধম্মাৰামো হোতি, ভাৱনাৰামো হোতি, পহানাৰামো হোতি, পৱিৱেকাৰামো হোতি, অব্যাপজ্ঝাৰামো হোতি, নিপ্পপঞ্চাৰামো হোতি. ইমেহি খো, ভিক্খৱে, ছহি ধম্মেহি সমন্নাগতো ভিক্খু দিট্ঠেৱ ধম্মে সুখসোমনস্সবহুলো ৱিহৰতি, যোনি চস্স আৰদ্ধা হোতি আসৱানং খযাযা’’তি. চতুত্থং.

৫. অধিগমসুত্তং

৭৯. ‘‘ছহি, ভিক্খৱে, ধম্মেহি সমন্নাগতো ভিক্খু অভব্বো অনধিগতং ৱা কুসলং ধম্মং অধিগন্তুং, অধিগতং ৱা কুসলং ধম্মং ফাতিং কাতুং [ফাতিকত্তুং (সী.), ফাতিকাতুং (স্যা. কং. পী.)]. কতমেহি ছহি? ইধ, ভিক্খৱে, ভিক্খু ন আযকুসলো চ হোতি, ন অপাযকুসলো চ হোতি, ন উপাযকুসলো চ হোতি, অনধিগতানং কুসলানং ধম্মানং অধিগমায ন ছন্দং জনেতি, অধিগতে কুসলে ধম্মে ন আৰক্খতি [সাৰক্খতি (সী. স্যা. কং. পী)], সাতচ্চকিৰিযায ন সম্পাদেতি. ইমেহি খো, ভিক্খৱে, ছহি ধম্মেহি সমন্নাগতো ভিক্খু অভব্বো অনধিগতং ৱা কুসলং ধম্মং অধিগন্তুং, অধিগতং ৱা কুসলং ধম্মং ফাতিং কাতুং.

‘‘ছহি, ভিক্খৱে, ধম্মেহি সমন্নাগতো ভিক্খু ভব্বো অনধিগতং ৱা কুসলং ধম্মং অধিগন্তুং, অধিগতং ৱা কুসলং ধম্মং ফাতিং কাতুং. কতমেহি ছহি? ইধ, ভিক্খৱে, ভিক্খু আযকুসলো চ হোতি, অপাযকুসলো চ হোতি, উপাযকুসলো চ হোতি, অনধিগতানং কুসলানং ধম্মানং অধিগমায ছন্দং জনেতি, অধিগতে কুসলে ধম্মে আৰক্খতি, সাতচ্চকিৰিযায সম্পাদেতি. ইমেহি খো, ভিক্খৱে, ছহি ধম্মেহি সমন্নাগতো ভিক্খু ভব্বো অনধিগতং ৱা কুসলং ধম্মং অধিগন্তুং, অধিগতং ৱা কুসলং ধম্মং ফাতিং কাতু’’ন্তি. পঞ্চমং.

৬. মহন্তত্তসুত্তং

৮০. ‘‘ছহি, ভিক্খৱে, ধম্মেহি সমন্নাগতো ভিক্খু নচিৰস্সেৱ মহন্তত্তং [মহত্তং (স্যা. কং.)] ৱেপুল্লত্তং পাপুণাতি ধম্মেসু. কতমেহি ছহি? ইধ, ভিক্খৱে, ভিক্খু আলোকবহুলো চ হোতি যোগবহুলো চ ৱেদবহুলো চ অসন্তুট্ঠিবহুলো চ অনিক্খিত্তধুৰো চ কুসলেসু ধম্মেসু উত্তৰি চ পতাৰেতি [পকৰোতি (ক.)]. ইমেহি খো, ভিক্খৱে, ছহি ধম্মেহি সমন্নাগতো ভিক্খু নচিৰস্সেৱ মহন্তত্তং ৱেপুল্লত্তং পাপুণাতি ধম্মেসূ’’তি. ছট্ঠং.

৭. পঠমনিৰযসুত্তং

৮১. ‘‘ছহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি ছহি? পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, পাপিচ্ছো চ, মিচ্ছাদিট্ঠি চ. ইমেহি খো, ভিক্খৱে, ছহি ধম্মেহি সমন্নাগতো যথাভতং নিক্খিত্তো এৱং নিৰযে.

‘‘ছহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি ছহি? পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, অপ্পিচ্ছো চ, সম্মাদিট্ঠি চ. ইমেহি খো, ভিক্খৱে, ছহি ধম্মেহি সমন্নাগতো যথাভতং নিক্খিত্তো এৱং সগ্গে’’তি. সত্তমং.

৮. দুতিযনিৰযসুত্তং

৮২. ‘‘ছহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি ছহি [মুসাৱাদী হোতি, পিসুণৱাচা হোতি, ফৰুসৱাচো হোতি, সম্ফপ্পলাপী হোতি, (সী. স্যা. পী.) এৱং সুক্কপক্খেপি]? পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি [মুসাৱাদী হোতি, পিসুণৱাচা হোতি, ফৰুসৱাচো হোতি, সম্ফপ্পলাপী হোতি, (সী. স্যা. পী.) এৱং সুক্কপক্খেপি], লুদ্ধো চ, পগব্ভো চ. ইমেহি খো, ভিক্খৱে, ছহি ধম্মেহি সমন্নাগতো যথাভতং নিক্খিত্তো এৱং নিৰযে.

‘‘ছহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি ছহি? পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, অলুদ্ধো চ, অপ্পগব্ভো চ. ইমেহি খো ভিক্খৱে ছহি ধম্মেহি সমন্নাগতো যথাভতং নিক্খিত্তো এৱং সগ্গে’’তি. অট্ঠমং.

৯. অগ্গধম্মসুত্তং

৮৩. ‘‘ছহি, ভিক্খৱে, ধম্মেহি সমন্নাগতো ভিক্খু অভব্বো অগ্গং ধম্মং অৰহত্তং সচ্ছিকাতুং. কতমেহি ছহি? ইধ, ভিক্খৱে, ভিক্খু অস্সদ্ধো হোতি, অহিৰিকো হোতি, অনোত্তপ্পী হোতি, কুসীতো হোতি, দুপ্পঞ্ঞো হোতি, কাযে চ জীৱিতে চ সাপেক্খো হোতি. ইমেহি খো, ভিক্খৱে, ছহি ধম্মেহি সমন্নাগতো ভিক্খু অভব্বো অগ্গং ধম্মং অৰহত্তং সচ্ছিকাতুং.

‘‘ছহি, ভিক্খৱে, ধম্মেহি সমন্নাগতো ভিক্খু ভব্বো অগ্গং ধম্মং অৰহত্তং সচ্ছিকাতুং. কতমেহি ছহি? ইধ, ভিক্খৱে, ভিক্খু সদ্ধো হোতি, হিৰিমা হোতি, ওত্তপ্পী হোতি, আৰদ্ধৱীৰিযো হোতি, পঞ্ঞৱা হোতি, কাযে চ জীৱিতে চ অনপেক্খো হোতি. ইমেহি খো, ভিক্খৱে, ছহি ধম্মেহি সমন্নাগতো ভিক্খু ভব্বো অগ্গং ধম্মং অৰহত্তং সচ্ছিকাতু’’ন্তি. নৱমং.

১০. ৰত্তিদিৱসসুত্তং

৮৪. ‘‘ছহি, ভিক্খৱে, ধম্মেহি সমন্নাগতস্স ভিক্খুনো যা ৰত্তি ৱা দিৱসো ৱা আগচ্ছতি হানিযেৱ পাটিকঙ্খা কুসলেসু ধম্মেসু, নো ৱুদ্ধি. কতমেহি ছহি? ইধ, ভিক্খৱে, ভিক্খু মহিচ্ছো হোতি, ৱিঘাতৱা, অসন্তুট্ঠো, ইতৰীতৰচীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন, অস্সদ্ধো হোতি, দুস্সীলো হোতি, কুসীতো হোতি, মুট্ঠস্সতি হোতি, দুপ্পঞ্ঞো হোতি. ইমেহি খো, ভিক্খৱে, ছহি ধম্মেহি সমন্নাগতস্স ভিক্খুনো যা ৰত্তি ৱা দিৱসো ৱা আগচ্ছতি হানিযেৱ পাটিকঙ্খা কুসলেসু ধম্মেসু, নো ৱুদ্ধি.

‘‘ছহি, ভিক্খৱে, ধম্মেহি সমন্নাগতস্স ভিক্খুনো যা ৰত্তি ৱা দিৱসো ৱা আগচ্ছতি ৱুদ্ধিযেৱ পাটিকঙ্খা কুসলেসু ধম্মেসু, নো পৰিহানি. কতমেহি ছহি? ইধ, ভিক্খৱে, ভিক্খু ন মহিচ্ছো হোতি, অৱিঘাতৱা, সন্তুট্ঠো, ইতৰীতৰচীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন, সদ্ধো হোতি, সীলৱা হোতি, আৰদ্ধৱীৰিযো হোতি, সতিমা হোতি, পঞ্ঞৱা হোতি. ইমেহি খো, ভিক্খৱে, ছহি ধম্মেহি সমন্নাগতস্স ভিক্খুনো যা ৰত্তি ৱা দিৱসো ৱা আগচ্ছতি ৱুদ্ধিযেৱ পাটিকঙ্খা, কুসলেসু ধম্মেসু নো পৰিহানী’’তি. দসমং.

অৰহত্তৱগ্গো অট্ঠমো. [ততিযো (স্যা. ক.)]