১২. ধম্মিকসুত্তং

৫৪. একং সমযং ভগৱা ৰাজগহে ৱিহৰতি গিজ্ঝকূটে পব্বতে. তেন খো পন সমযেন আযস্মা ধম্মিকো জাতিভূমিযং আৱাসিকো হোতি সব্বসো জাতিভূমিযং সত্তসু আৱাসেসু. তত্ৰ সুদং আযস্মা ধম্মিকো আগন্তুকে ভিক্খূ অক্কোসতি পৰিভাসতি ৱিহিংসতি ৱিতুদতি ৰোসেতি ৱাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পৰিভাসিযমানা ৱিহেসিযমানা ৱিতুদিযমানা ৰোসিযমানা ৱাচায পক্কমন্তি, ন সণ্ঠন্তি [ন সণ্ঠহন্তি (সী.)], ৰিঞ্চন্তি আৱাসং.

অথ খো জাতিভূমকানং [জাতিভূমিকানং (স্যা. পী. ক.)] উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন. অথ চ পন আগন্তুকা ভিক্খূ পক্কমন্তি, ন সণ্ঠন্তি, ৰিঞ্চন্তি আৱাসং. কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, ৰিঞ্চন্তি আৱাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি পৰিভাসতি ৱিহিংসতি ৱিতুদতি ৰোসেতি ৱাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পৰিভাসিযমানা ৱিহেসিযমানা ৱিতুদিযমানা ৰোসিযমানা ৱাচায পক্কমন্তি, ন সণ্ঠন্তি, ৰিঞ্চন্তি আৱাসং. যংনূন মযং আযস্মন্তং ধম্মিকং পব্বাজেয্যামা’’তি.

অথ খো জাতিভূমকা উপাসকা যেন আযস্মা ধম্মিকো তেনুপসঙ্কমিংসু; উপসঙ্কমিত্ৱা আযস্মন্তং ধম্মিকং এতদৱোচুং – ‘‘পক্কমতু, ভন্তে, আযস্মা ধম্মিকো ইমম্হা আৱাসা; অলং তে ইধ ৱাসেনা’’তি. অথ খো আযস্মা ধম্মিকো তম্হা আৱাসা অঞ্ঞং আৱাসং অগমাসি. তত্ৰপি সুদং আযস্মা ধম্মিকো আগন্তুকে ভিক্খূ অক্কোসতি পৰিভাসতি ৱিহিংসতি ৱিতুদতি ৰোসেতি ৱাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পৰিভাসিযমানা ৱিহেসিযমানা ৱিতুদিযমানা ৰোসিযমানা ৱাচায পক্কমন্তি, ন সণ্ঠন্তি, ৰিঞ্চন্তি আৱাসং.

অথ খো জাতিভূমকানং উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন. অথ চ পন আগন্তুকা ভিক্খূ পক্কমন্তি, ন সণ্ঠন্তি, ৰিঞ্চন্তি আৱাসং. কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, ৰিঞ্চন্তি আৱাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি পৰিভাসতি ৱিহিংসতি ৱিতুদতি ৰোসেতি ৱাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পৰিভাসিযমানা ৱিহেসিযমানা ৱিতুদিযমানা ৰোসিযমানা ৱাচায পক্কমন্তি, ন সণ্ঠন্তি, ৰিঞ্চন্তি আৱাসং. যংনূন মযং আযস্মন্তং ধম্মিকং পব্বাজেয্যামা’’তি.

অথ খো জাতিভূমকা উপাসকা যেনাযস্মা ধম্মিকো তেনুপসঙ্কমিংসু; উপসঙ্কমিত্ৱা আযস্মন্তং ধম্মিকং এতদৱোচুং – ‘‘পক্কমতু, ভন্তে, আযস্মা ধম্মিকো ইমম্হাপি আৱাসা; অলং তে ইধ ৱাসেনা’’তি. অথ খো আযস্মা ধম্মিকো তম্হাপি আৱাসা অঞ্ঞং আৱাসং অগমাসি. তত্ৰপি সুদং আযস্মা ধম্মিকো আগন্তুকে ভিক্খূ অক্কোসতি পৰিভাসতি ৱিহিংসতি ৱিতুদতি ৰোসেতি ৱাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পৰিভাসিযমানা ৱিহেসিযমানা ৱিতুদিযমানা ৰোসিযমানা ৱাচায পক্কমন্তি, ন সণ্ঠন্তি, ৰিঞ্চন্তি আৱাসং.

অথ খো জাতিভূমকানং উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন. অথ চ পন আগন্তুকা ভিক্খূ পক্কমন্তি, ন সণ্ঠন্তি, ৰিঞ্চন্তি আৱাসং. কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, ৰিঞ্চন্তি আৱাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি…পে…. যংনূন মযং আযস্মন্তং ধম্মিকং পব্বাজেয্যাম সব্বসো জাতিভূমিযং সত্তহি আৱাসেহী’’তি. অথ খো জাতিভূমকা উপাসকা যেনাযস্মা ধম্মিকো তেনুপসঙ্কমিংসু; উপসঙ্কমিত্ৱা আযস্মন্তং ধম্মিকং এতদৱোচুং – ‘‘পক্কমতু, ভন্তে, আযস্মা ধম্মিকো সব্বসো জাতিভূমিযং সত্তহি আৱাসেহী’’তি. অথ খো আযস্মতো ধম্মিকস্স এতদহোসি – ‘‘পব্বাজিতো খোম্হি জাতিভূমকেহি উপাসকেহি সব্বসো জাতিভূমিযং সত্তহি আৱাসেহি. কহং নু খো দানি গচ্ছামী’’তি? অথ খো আযস্মতো ধম্মিকস্স এতদহোসি – ‘‘যংনূনাহং যেন ভগৱা তেনুপসঙ্কমেয্য’’ন্তি.

অথ খো আযস্মা ধম্মিকো পত্তচীৱৰমাদায যেন ৰাজগহং তেন পক্কামি. অনুপুব্বেন যেন ৰাজগহং গিজ্ঝকূটো পব্বতো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো আযস্মন্তং ধম্মিকং ভগৱা এতদৱোচ – ‘‘হন্দ কুতো নু ত্ৱং, ব্ৰাহ্মণ ধম্মিক, আগচ্ছসী’’তি? ‘‘পব্বাজিতো অহং, ভন্তে, জাতিভূমকেহি উপাসকেহি সব্বসো জাতিভূমিযং সত্তহি আৱাসেহী’’তি. ‘‘অলং, ব্ৰাহ্মণ ধম্মিক, কিং তে ইমিনা, যং তং ততো ততো পব্বাজেন্তি, সো ত্ৱং ততো ততো পব্বাজিতো মমেৱ সন্তিকে আগচ্ছসি’’.

‘‘ভূতপুব্বং, ব্ৰাহ্মণ ধম্মিক, সামুদ্দিকা ৱাণিজা তীৰদস্সিং সকুণং গহেত্ৱা নাৱায সমুদ্দং অজ্ঝোগাহন্তি. তে অতীৰদক্খিণিযা [অতীৰদস্সনিযা (স্যা.), অতীৰদস্সিযা (ক.)] নাৱায তীৰদস্সিং সকুণং মুঞ্চন্তি. সো গচ্ছতেৱ পুৰত্থিমং দিসং, গচ্ছতি পচ্ছিমং দিসং, গচ্ছতি উত্তৰং দিসং, গচ্ছতি দক্খিণং দিসং, গচ্ছতি উদ্ধং, গচ্ছতি অনুদিসং. সচে সো সমন্তা তীৰং পস্সতি, তথাগতকোৱ [তথাগতো (ক.) দী. নি. ১.৪৯৭ পস্সিতব্বং] হোতি. সচে পন সো সমন্তা তীৰং ন পস্সতি তমেৱ নাৱং পচ্চাগচ্ছতি. এৱমেৱং খো, ব্ৰাহ্মণ ধম্মিক, যং তং ততো ততো পব্বাজেন্তি সো ত্ৱং ততো ততো পব্বাজিতো মমেৱ সন্তিকে আগচ্ছসি.

‘‘ভূতপুব্বং, ব্ৰাহ্মণ ধম্মিক, ৰঞ্ঞো কোৰব্যস্স সুপ্পতিট্ঠো নাম নিগ্ৰোধৰাজা অহোসি পঞ্চসাখো সীতচ্ছাযো মনোৰমো. সুপ্পতিট্ঠস্স খো পন, ব্ৰাহ্মণ ধম্মিক, নিগ্ৰোধৰাজস্স দ্ৱাদসযোজনানি অভিনিৱেসো অহোসি, পঞ্চ যোজনানি মূলসন্তানকানং. সুপ্পতিট্ঠস্স খো পন, ব্ৰাহ্মণ ধম্মিক, নিগ্ৰোধৰাজস্স তাৱ মহন্তানি ফলানি অহেসুং; সেয্যথাপি নাম আড়্হকথালিকা. এৱমস্স সাদূনি ফলানি অহেসুং; সেয্যথাপি নাম খুদ্দং মধুং অনেলকং. সুপ্পতিট্ঠস্স খো পন, ব্ৰাহ্মণ ধম্মিক, নিগ্ৰোধৰাজস্স একং খন্ধং ৰাজা পৰিভুঞ্জতি সদ্ধিং ইত্থাগাৰেন, একং খন্ধং বলকাযো পৰিভুঞ্জতি, একং খন্ধং নেগমজানপদা পৰিভুঞ্জন্তি, একং খন্ধং সমণব্ৰাহ্মণা পৰিভুঞ্জন্তি, একং খন্ধং মিগা [মিগপক্খিনো (সী. স্যা. পী.)] পৰিভুঞ্জন্তি. সুপ্পতিট্ঠস্স খো পন, ব্ৰাহ্মণ ধম্মিক, নিগ্ৰোধৰাজস্স ন কোচি ফলানি ৰক্খতি, ন চ সুদং [ন চ পুন (ক.)] অঞ্ঞমঞ্ঞস্স ফলানি হিংসন্তি.

‘‘অথ খো, ব্ৰাহ্মণ ধম্মিক, অঞ্ঞতৰো পুৰিসো সুপ্পতিট্ঠস্স নিগ্ৰোধৰাজস্স যাৱদত্থং ফলানি ভক্খিত্ৱা সাখং ভঞ্জিত্ৱা পক্কামি. অথ খো, ব্ৰাহ্মণ ধম্মিক, সুপ্পতিট্ঠে নিগ্ৰোধৰাজে অধিৱত্থায দেৱতায এতদহোসি – ‘অচ্ছৰিযং ৱত, ভো, অব্ভুতং ৱত, ভো! যাৱ পাপো মনুস্সো [যাৱ পাপমনুস্সো (স্যা.), যাৱতা পাপমনুস্সো (ক.)], যত্ৰ হি নাম সুপ্পতিট্ঠস্স নিগ্ৰোধৰাজস্স যাৱদত্থং ফলানি ভক্খিত্ৱা সাখং ভঞ্জিত্ৱা পক্কমিস্সতি, যংনূন সুপ্পতিট্ঠো নিগ্ৰোধৰাজা আযতিং ফলং ন দদেয্যা’তি. অথ খো, ব্ৰাহ্মণ ধম্মিক, সুপ্পতিট্ঠো নিগ্ৰোধৰাজা আযতিং ফলং ন অদাসি.

‘‘অথ খো, ব্ৰাহ্মণ ধম্মিক, ৰাজা কোৰব্যো যেন সক্কো দেৱানমিন্দো তেনুপসঙ্কমি; উপসঙ্কমিত্ৱা সক্কং দেৱানমিন্দং এতদৱোচ – ‘যগ্ঘে, মাৰিস, জানেয্যাসি সুপ্পতিট্ঠো নিগ্ৰোধৰাজা ফলং ন দেতী’তি? অথ খো, ব্ৰাহ্মণ ধম্মিক, সক্কো দেৱানমিন্দো তথাৰূপং ইদ্ধাভিসঙ্খাৰং অভিসঙ্খাসি [অভিসঙ্খাৰেসি (স্যা. ক.)], যথা ভুসা ৱাতৱুট্ঠি আগন্ত্ৱা সুপ্পতিট্ঠং নিগ্ৰোধৰাজং পৱত্তেসি [পাতেসি (সী. পী.)] উম্মূলমকাসি. অথ খো, ব্ৰাহ্মণ ধম্মিক, সুপ্পতিট্ঠে নিগ্ৰোধৰাজে অধিৱত্থা দেৱতা দুক্খী দুম্মনা অস্সুমুখী ৰুদমানা একমন্তং অট্ঠাসি.

‘‘অথ খো, ব্ৰাহ্মণ ধম্মিক, সক্কো দেৱানমিন্দো যেন সুপ্পতিট্ঠে নিগ্ৰোধৰাজে অধিৱত্থা দেৱতা তেনুপসঙ্কমি; উপসঙ্কমিত্ৱা সুপ্পতিট্ঠে নিগ্ৰোধৰাজে অধিৱত্থং দেৱতং এতদৱোচ – ‘কিং নু ত্ৱং, দেৱতে, দুক্খী দুম্মনা অস্সুমুখী ৰুদমানা একমন্তং ঠিতা’তি? ‘তথা হি পন মে, মাৰিস, ভুসা ৱাতৱুট্ঠি আগন্ত্ৱা ভৱনং পৱত্তেসি উম্মূলমকাসী’তি. ‘অপি নু ত্ৱং, দেৱতে, ৰুক্খধম্মে ঠিতায ভুসা ৱাতৱুট্ঠি আগন্ত্ৱা ভৱনং পৱত্তেসি উম্মূলমকাসী’তি? ‘কথং পন, মাৰিস, ৰুক্খো ৰুক্খধম্মে ঠিতো হোতী’তি? ‘ইধ, দেৱতে, ৰুক্খস্স মূলং মূলত্থিকা হৰন্তি, তচং তচত্থিকা হৰন্তি, পত্তং পত্তত্থিকা হৰন্তি, পুপ্ফং পুপ্ফত্থিকা হৰন্তি, ফলং ফলত্থিকা হৰন্তি. ন চ তেন দেৱতায অনত্তমনতা ৱা অনভিনন্দি [অনভিৰদ্ধি (সী.)] ৱা কৰণীযা. এৱং খো, দেৱতে, ৰুক্খো ৰুক্খধম্মে ঠিতো হোতী’তি. ‘অট্ঠিতাযেৱ খো মে, মাৰিস, ৰুক্খধম্মে ভুসা ৱাতৱুট্ঠি আগন্ত্ৱা ভৱনং পৱত্তেসি উম্মূলমকাসী’তি. ‘সচে খো ত্ৱং, দেৱতে, ৰুক্খধম্মে তিট্ঠেয্যাসি, সিযা [সিযাপি (সী. পী.)] তে ভৱনং যথাপুৰে’তি? ‘ঠস্সামহং, [তিট্ঠেয্যামহং (স্যা.)] মাৰিস, ৰুক্খধম্মে, হোতু মে ভৱনং যথাপুৰে’’’তি.

‘‘অথ খো, ব্ৰাহ্মণ ধম্মিক, সক্কো দেৱানমিন্দো তথাৰূপং ইদ্ধাভিসঙ্খাৰং অভিসঙ্খাসি [অভিসঙ্খাৰি (স্যা. ক.)], যথা ভুসা ৱাতৱুট্ঠি আগন্ত্ৱা সুপ্পতিট্ঠং নিগ্ৰোধৰাজং উস্সাপেসি, সচ্ছৱীনি মূলানি অহেসুং. এৱমেৱং খো, ব্ৰাহ্মণ ধম্মিক, অপি নু তং সমণধম্মে ঠিতং জাতিভূমকা উপাসকা পব্বাজেসুং সব্বসো জাতিভূমিযং সত্তহি আৱাসেহী’’তি? ‘‘কথং পন, ভন্তে, সমণো সমণধম্মে ঠিতো হোতী’’তি? ‘‘ইধ, ব্ৰাহ্মণ ধম্মিক, সমণো অক্কোসন্তং ন পচ্চক্কোসতি, ৰোসন্তং ন পটিৰোসতি, ভণ্ডন্তং ন পটিভণ্ডতি. এৱং খো, ব্ৰাহ্মণ ধম্মিক, সমণো সমণধম্মে ঠিতো হোতী’’তি. ‘‘অট্ঠিতংযেৱ মং, ভন্তে, সমণধম্মে জাতিভূমকা উপাসকা পব্বাজেসুং সব্বসো জাতিভূমিযং সত্তহি আৱাসেহী’’তি.

[অ. নি. ৭.৬৬; ৭.৭৩] ‘‘ভূতপুব্বং, ব্ৰাহ্মণ ধম্মিক, সুনেত্তো নাম সত্থা অহোসি তিত্থকৰো কামেসু ৱীতৰাগো. সুনেত্তস্স খো পন, ব্ৰাহ্মণ ধম্মিক, সত্থুনো অনেকানি সাৱকসতানি অহেসুং. সুনেত্তো সত্থা সাৱকানং ব্ৰহ্মলোকসহব্যতায ধম্মং দেসেসি. যে খো পন, ব্ৰাহ্মণ ধম্মিক, সুনেত্তস্স সত্থুনো ব্ৰহ্মলোকসহব্যতায ধম্মং দেসেন্তস্স চিত্তানি ন পসাদেসুং তে কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জিংসু. যে খো পন, ব্ৰাহ্মণ ধম্মিক, সুনেত্তস্স সত্থুনো ব্ৰহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পৰং মৰণা সুগতিং সগ্গং লোকং উপপজ্জিংসু.

‘‘ভূতপুব্বং, ব্ৰাহ্মণ ধম্মিক, মূগপক্খো নাম সত্থা অহোসি…পে… অৰনেমি নাম সত্থা অহোসি… কুদ্দালকো নাম সত্থা অহোসি… হত্থিপালো নাম সত্থা অহোসি… জোতিপালো নাম সত্থা অহোসি তিত্থকৰো কামেসু ৱীতৰাগো. জোতিপালস্স খো পন, ব্ৰাহ্মণ ধম্মিক, সত্থুনো অনেকানি সাৱকসতানি অহেসুং. জোতিপালো সত্থা সাৱকানং ব্ৰহ্মলোকসহব্যতায ধম্মং দেসেসি. যে খো পন, ব্ৰাহ্মণ ধম্মিক, জোতিপালস্স সত্থুনো ব্ৰহ্মলোকসহব্যতায ধম্মং দেসেন্তস্স চিত্তানি ন পসাদেসুং তে কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জিংসু. যে খো পন, ব্ৰাহ্মণ ধম্মিক, জোতিপালস্স সত্থুনো ব্ৰহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পৰং মৰণা সুগতিং সগ্গং লোকং উপপজ্জিংসু.

‘‘তং কিং মঞ্ঞসি, ব্ৰাহ্মণ ধম্মিক, যো ইমে ছ সত্থাৰে তিত্থকৰে কামেসু ৱীতৰাগে, অনেকসতপৰিৱাৰে সসাৱকসঙ্ঘে পদুট্ঠচিত্তো অক্কোসেয্য পৰিভাসেয্য, বহুং সো অপুঞ্ঞং পসৱেয্যা’’তি? ‘‘এৱং, ভন্তে’’. ‘‘যো খো, ব্ৰাহ্মণ ধম্মিক, ইমে ছ সত্থাৰে তিত্থকৰে কামেসু ৱীতৰাগে অনেকসতপৰিৱাৰে সসাৱকসঙ্ঘে পদুট্ঠচিত্তো অক্কোসেয্য পৰিভাসেয্য, বহুং সো অপুঞ্ঞং পসৱেয্য. যো একং দিট্ঠিসম্পন্নং পুগ্গলং পদুট্ঠচিত্তো অক্কোসতি পৰিভাসতি, অযং ততো বহুতৰং অপুঞ্ঞং পসৱতি. তং কিস্স হেতু? নাহং, ব্ৰাহ্মণ ধম্মিক, ইতো বহিদ্ধা এৱৰূপিং খন্তিং [এৱৰূপং খন্তং (স্যা.)] ৱদামি, যথামং সব্ৰহ্মচাৰীসু. তস্মাতিহ, ব্ৰাহ্মণ ধম্মিক, এৱং সিক্খিতব্বং – ‘ন নো সমসব্ৰহ্মচাৰীসু [ন নো আমসব্ৰহ্মচাৰীসু (স্যা.), ন নো সব্ৰহ্মচাৰীসু (সী. পী.)] চিত্তানি পদুট্ঠানি ভৱিস্সন্তী’’’তি. এৱঞ্হি তে, ব্ৰাহ্মণ ধম্মিক, সিক্খিতব্বন্তি.

‘‘সুনেত্তো মূগপক্খো চ, অৰনেমি চ ব্ৰাহ্মণো;

কুদ্দালকো অহু সত্থা, হত্থিপালো চ মাণৱো.

‘‘জোতিপালো চ গোৱিন্দো, অহু সত্তপুৰোহিতো;

অহিংসকা [অভিসেকা (স্যা.)] অতীতংসে, ছ সত্থাৰো যসস্সিনো.

‘‘নিৰামগন্ধা কৰুণেধিমুত্তা [ৱিমুত্তা (সী. স্যা. পী.)], কামসংযোজনাতিগা [কামসংযোজনাতিতা (স্যা.)];

কামৰাগং ৱিৰাজেত্ৱা, ব্ৰহ্মলোকূপগা অহুং [অহু (বহূসু), অহূ (ক. সী.)].

‘‘অহেসুং সাৱকা তেসং, অনেকানি সতানিপি;

নিৰামগন্ধা কৰুণেধিমুত্তা, কামসংযোজনাতিগা;

কামৰাগং ৱিৰাজেত্ৱা, ব্ৰহ্মলোকূপগা অহুং [অহু (বহূসু), অহূ (ক. সী.)].

‘‘যেতে ইসী বাহিৰকে, ৱীতৰাগে সমাহিতে;

পদুট্ঠমনসঙ্কপ্পো, যো নৰো পৰিভাসতি;

বহুঞ্চ সো পসৱতি, অপুঞ্ঞং তাদিসো নৰো.

‘‘যো চেকং দিট্ঠিসম্পন্নং, ভিক্খুং বুদ্ধস্স সাৱকং;

পদুট্ঠমনসঙ্কপ্পো, যো নৰো পৰিভাসতি;

অযং ততো বহুতৰং, অপুঞ্ঞং পসৱে নৰো.

‘‘ন সাধুৰূপং আসীদে, দিট্ঠিট্ঠানপ্পহাযিনং;

সত্তমো পুগ্গলো এসো, অৰিযসঙ্ঘস্স ৱুচ্চতি.

‘‘অৱীতৰাগো কামেসু, যস্স পঞ্চিন্দ্ৰিযা মুদূ;

সদ্ধা সতি চ ৱীৰিযং, সমথো চ ৱিপস্সনা.

‘‘তাদিসং ভিক্খুমাসজ্জ, পুব্বেৱ উপহঞ্ঞতি;

অত্তানং উপহন্ত্ৱান, পচ্ছা অঞ্ঞং ৱিহিংসতি.

‘‘যো চ ৰক্খতি অত্তানং, ৰক্খিতো তস্স বাহিৰো;

তস্মা ৰক্খেয্য অত্তানং, অক্খতো পণ্ডিতো সদা’’তি. দ্ৱাদসমং;

ধম্মিকৱগ্গো পঞ্চমো.