৪. হিমৱন্তসুত্তং

২৪. ‘‘ছহি, ভিক্খৱে, ধম্মেহি সমন্নাগতো ভিক্খু হিমৱন্তং পব্বতৰাজং পদালেয্য, কো পন ৱাদো ছৱায অৱিজ্জায! কতমেহি ছহি? ইধ, ভিক্খৱে, ভিক্খু সমাধিস্স সমাপত্তিকুসলো হোতি, সমাধিস্স ঠিতিকুসলো হোতি, সমাধিস্স ৱুট্ঠানকুসলো হোতি, সমাধিস্স কল্লিতকুসলো [কল্লতাকুসলো (স্যা. কং. ক.) সং. নি. ৩.৬৬৫ পস্সিতব্বং] হোতি, সমাধিস্স গোচৰকুসলো হোতি, সমাধিস্স অভিনীহাৰকুসলো হোতি. ইমেহি খো, ভিক্খৱে, ছহি ধম্মেহি সমন্নাগতো ভিক্খু হিমৱন্তং পব্বতৰাজং পদালেয্য, কো পন ৱাদো ছৱায অৱিজ্জাযা’’তি! চতুত্থং.