২. সিক্খাপদপেয্যালং

১. ভিক্খুসুত্তং

২৮৬. ‘‘পঞ্চহি, ভিক্খৱে, ধম্মেহি সমন্নাগতো ভিক্খু যথাভতং নিক্খিত্তো এৱং নিৰযে. কতমেহি পঞ্চহি? পাণাতিপাতী হোতি, অদিন্নাদাযী হোতি, অব্ৰহ্মচাৰী হোতি, মুসাৱাদী হোতি, সুৰামেৰযমজ্জপমাদট্ঠাযী হোতি. ইমেহি খো, ভিক্খৱে, পঞ্চহি ধম্মেহি সমন্নাগতো ভিক্খু যথাভতং নিক্খিত্তো এৱং নিৰযে.

‘‘পঞ্চহি, ভিক্খৱে, ধম্মেহি সমন্নাগতো ভিক্খু যথাভতং নিক্খিত্তো এৱং সগ্গে. কতমেহি পঞ্চহি? পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, অব্ৰহ্মচৰিযা পটিৱিৰতো হোতি, মুসাৱাদা পটিৱিৰতো হোতি, সুৰামেৰযমজ্জপমাদট্ঠানা পটিৱিৰতো হোতি. ইমেহি খো, ভিক্খৱে, পঞ্চহি ধম্মেহি সমন্নাগতো ভিক্খু যথাভতং নিক্খিত্তো এৱং সগ্গে’’তি. পঠমং.

২-৭. ভিক্খুনীসুত্তাদিছক্কং

২৮৭-২৯২. ‘‘পঞ্চহি, ভিক্খৱে, ধম্মেহি সমন্নাগতা ভিক্খুনী…পে… সিক্খমানা… সামণেৰো… সামণেৰী… উপাসকো… উপাসিকা যথাভতং নিক্খিত্তা এৱং নিৰযে. কতমেহি পঞ্চহি? পাণাতিপাতিনী হোতি, অদিন্নাদাযিনী হোতি, কামেসুমিচ্ছাচাৰিনী হোতি, মুসাৱাদিনী হোতি, সুৰামেৰযমজ্জপমাদট্ঠাযিনী হোতি. ইমেহি খো, ভিক্খৱে, পঞ্চহি ধম্মেহি সমন্নাগতা উপাসিকা যথাভতং নিক্খিত্তা এৱং নিৰযে.

‘‘পঞ্চহি, ভিক্খৱে, ধম্মেহি সমন্নাগতা উপাসিকা যথাভতং নিক্খিত্তা এৱং সগ্গে. কতমেহি পঞ্চহি? পাণাতিপাতা পটিৱিৰতা হোতি, অদিন্নাদানা পটিৱিৰতা হোতি, কামেসুমিচ্ছাচাৰা পটিৱিৰতা হোতি, মুসাৱাদা পটিৱিৰতা হোতি, সুৰামেৰযমজ্জপমাদট্ঠানা পটিৱিৰতা হোতি. ইমেহি খো, ভিক্খৱে, পঞ্চহি ধম্মেহি সমন্নাগতা উপাসিকা যথাভতং নিক্খিত্তা এৱং সগ্গে’’তি. সত্তমং.

৮. আজীৱকসুত্তং

২৯৩. ‘‘পঞ্চহি, ভিক্খৱে, ধম্মেহি সমন্নাগতো আজীৱকো যথাভতং নিক্খিত্তো এৱং নিৰযে. কতমেহি পঞ্চহি? পাণাতিপাতী হোতি, অদিন্নাদাযী হোতি, অব্ৰহ্মচাৰী হোতি, মুসাৱাদী হোতি, সুৰামেৰযমজ্জপমাদট্ঠাযী হোতি. ইমেহি খো, ভিক্খৱে, পঞ্চহি ধম্মেহি সমন্নাগতো আজীৱকো যথাভতং নিক্খিত্তো এৱং নিৰযে’’তি. অট্ঠমং.

৯-১৭. নিগণ্ঠসুত্তাদিনৱকং

২৯৪-৩০২. ‘‘পঞ্চহি, ভিক্খৱে, ধম্মেহি সমন্নাগতো নিগণ্ঠো…পে… মুণ্ডসাৱকো… জটিলকো… পৰিব্বাজকো… মাগণ্ডিকো… তেদণ্ডিকো… আৰুদ্ধকো… গোতমকো… দেৱধম্মিকো যথাভতং নিক্খিত্তো এৱং নিৰযে. কতমেহি পঞ্চহি? পাণাতিপাতী হোতি, অদিন্নাদাযী হোতি…পে… সুৰামেৰযমজ্জপমাদট্ঠাযী হোতি. ইমেহি খো, ভিক্খৱে, পঞ্চহি ধম্মেহি সমন্নাগতো দেৱধম্মিকো যথাভতং নিক্খিত্তো এৱং নিৰযে’’তি. সত্তৰসমং.

সিক্খাপদপেয্যালং নিট্ঠিতং.