১. আৱাসিকসুত্তং

২৩১. ‘‘পঞ্চহি, ভিক্খৱে, ধম্মেহি সমন্নাগতো আৱাসিকো ভিক্খু অভাৱনীযো হোতি. কতমেহি পঞ্চহি? ন আকপ্পসম্পন্নো হোতি ন ৱত্তসম্পন্নো; ন বহুস্সুতো হোতি ন সুতধৰো; ন পটিসল্লেখিতা [সল্লেখিতা (ক. সী.)] হোতি ন পটিসল্লানাৰামো; ন কল্যাণৱাচো হোতি ন কল্যাণৱাক্কৰণো; দুপ্পঞ্ঞো হোতি জড়ো এড়মূগো. ইমেহি খো, ভিক্খৱে, পঞ্চহি ধম্মেহি সমন্নাগতো আৱাসিকো ভিক্খু অভাৱনীযো হোতি.

‘‘পঞ্চহি, ভিক্খৱে, ধম্মেহি সমন্নাগতো আৱাসিকো ভিক্খু ভাৱনীযো হোতি. কতমেহি পঞ্চহি? আকপ্পসম্পন্নো হোতি ৱত্তসম্পন্নো; বহুস্সুতো হোতি সুতধৰো; পটিসল্লেখিতা হোতি পটিসল্লানাৰামো; কল্যাণৱাচো হোতি কল্যাণৱাক্কৰণো; পঞ্ঞৱা হোতি অজড়ো অনেড়মূগো. ইমেহি খো, ভিক্খৱে, পঞ্চহি ধম্মেহি সমন্নাগতো আৱাসিকো ভিক্খু ভাৱনীযো হোতী’’তি. পঠমং.