১. আৰঞ্ঞিকসুত্তং

১৮১. ‘‘পঞ্চিমে, ভিক্খৱে, আৰঞ্ঞিকা [আৰঞ্ঞতা (সব্বত্থ) পৰি. ৪৪৩ পস্সিতব্বং]. কতমে পঞ্চ? মন্দত্তা মোমূহত্তা আৰঞ্ঞিকো হোতি, পাপিচ্ছো ইচ্ছাপকতো আৰঞ্ঞিকো হোতি, উম্মাদা চিত্তক্খেপা আৰঞ্ঞিকো হোতি, ৱণ্ণিতং বুদ্ধেহি বুদ্ধসাৱকেহীতি আৰঞ্ঞিকো হোতি, অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ [ইদমট্ঠিতংযেৱ (সী. পী.)] নিস্সায আৰঞ্ঞিকো হোতি. ইমে খো, ভিক্খৱে, পঞ্চ আৰঞ্ঞিকা. ইমেসং খো, ভিক্খৱে, পঞ্চন্নং আৰঞ্ঞিকানং য্ৱাযং আৰঞ্ঞিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায আৰঞ্ঞিকো হোতি, অযং ইমেসং পঞ্চন্নং আৰঞ্ঞিকানং অগ্গো চ সেট্ঠো চ মোক্খো [পামোক্খো (অ. নি. ৪.৯৫; ১০.৯১)] চ উত্তমো চ পৱৰো চ.

‘‘সেয্যথাপি, ভিক্খৱে, গৱা খীৰং, খীৰম্হা দধি, দধিম্হা নৱনীতং, নৱনীতম্হা সপ্পি, সপ্পিম্হা সপ্পিমণ্ডো, সপ্পিমণ্ডো [সপ্পিম্হা সপ্পিমণ্ডো (ক.) সং. নি. ৩.৬৬২] তত্থ অগ্গমক্খাযতি; এৱমেৱং খো, ভিক্খৱে, ইমেসং পঞ্চন্নং আৰঞ্ঞিকানং য্ৱাযং আৰঞ্ঞিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায আৰঞ্ঞিকো হোতি, অযং ইমেসং পঞ্চন্নং আৰঞ্ঞিকানং অগ্গো চ সেট্ঠো চ মোক্খো চ উত্তমো চ পৱৰো চা’’তি. পঠমং.