৫. পঞ্হপুচ্ছাসুত্তং

১৬৫. তত্ৰ খো আযস্মা সাৰিপুত্তো ভিক্খূ আমন্তেসি…পে… ‘‘যো হি কোচি, আৱুসো, পৰং পঞ্হং পুচ্ছতি, সব্বো সো পঞ্চহি ঠানেহি, এতেসং ৱা অঞ্ঞতৰেন. কতমেহি পঞ্চহি? মন্দত্তা মোমূহত্তা [মোমুহত্তা (সী.)] পৰং পঞ্হং পুচ্ছতি, পাপিচ্ছো ইচ্ছাপকতো পৰং পঞ্হং পুচ্ছতি, পৰিভৱং পৰং পঞ্হং পুচ্ছতি, অঞ্ঞাতুকামো পৰং পঞ্হং পুচ্ছতি, অথ ৱা পনেৱংচিত্তো [অথ ৱা পকুপ্পন্তো (সী. পী.)] পৰং পঞ্হং পুচ্ছতি – ‘সচে মে পঞ্হং পুট্ঠো সম্মদেৱ ব্যাকৰিস্সতি ইচ্চেতং কুসলং, নো চে [নো চ (স্যা.)] মে পঞ্হং পুট্ঠো সম্মদেৱ ব্যাকৰিস্সতি অহমস্স সম্মদেৱ ব্যাকৰিস্সামী’তি. যো হি কোচি, আৱুসো, পৰং পঞ্হং পুচ্ছতি, সব্বো সো ইমেহি পঞ্চহি ঠানেহি, এতেসং ৱা অঞ্ঞতৰেন. অহং খো পনাৱুসো, এৱংচিত্তো পৰং পঞ্হং পুচ্ছামি – ‘সচে মে পঞ্হং পুট্ঠো সম্মদেৱ ব্যাকৰিস্সতি ইচ্চেতং কুসলং, নো চে মে পঞ্হং পুট্ঠো সম্মদেৱ ব্যাকৰিস্সতি, অহমস্স সম্মদেৱ ব্যাকৰিস্সামী’’তি. পঞ্চমং.