১. সংখিত্তসুত্তং

১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘পঞ্চিমানি, ভিক্খৱে, সেখবলানি [সেক্খবলানি (ক.)]. কতমানি পঞ্চ? সদ্ধাবলং, হিৰীবলং [হিৰিবলং (সী. পী.)], ওত্তপ্পবলং, ৱীৰিযবলং [ৱিৰিযবলং (সী. স্যা. কং. পী.)], পঞ্ঞাবলং – ইমানি খো, ভিক্খৱে, পঞ্চ সেখবলানি.

‘‘তস্মাতিহ, ভিক্খৱে, এৱং সিক্খিতব্বং – ‘সদ্ধাবলেন সমন্নাগতা ভৱিস্সাম সেখবলেন, হিৰীবলেন সমন্নাগতা ভৱিস্সাম সেখবলেন, ওত্তপ্পবলেন সমন্নাগতা ভৱিস্সাম সেখবলেন, ৱীৰিযবলেন সমন্নাগতা ভৱিস্সাম সেখবলেন, পঞ্ঞাবলেন সমন্নাগতা ভৱিস্সাম সেখবলেনা’তি. এৱঞ্হি ৱো, ভিক্খৱে, সিক্খিতব্ব’’ন্তি. ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি. পঠমং.