(১৫) ৫. আভাৱগ্গো

১. আভাসুত্তং

১৪১. ‘‘চতস্সো ইমা, ভিক্খৱে, আভা. কতমা চতস্সো? চন্দাভা, সূৰিযাভা, অগ্গাভা, পঞ্ঞাভা – ইমা খো, ভিক্খৱে, চতস্সো আভা. এতদগ্গং, ভিক্খৱে, ইমাসং চতুন্নং [চতস্সন্নং (স্যা. কং.) সদ্দনীতিপদমালা পস্সিতব্বা] আভানং যদিদং পঞ্ঞাভা’’তি. পঠমং.

২. পভাসুত্তং

১৪২. ‘‘চতস্সো ইমা, ভিক্খৱে, পভা. কতমা চতস্সো? চন্দপ্পভা, সূৰিযপ্পভা, অগ্গিপ্পভা, পঞ্ঞাপভা – ইমা খো, ভিক্খৱে, চতস্সো পভা. এতদগ্গং, ভিক্খৱে, ইমাসং চতুন্নং পভানং যদিদং পঞ্ঞাপভা’’তি. দুতিযং.

৩. আলোকসুত্তং

১৪৩. ‘‘চত্তাৰোমে, ভিক্খৱে, আলোকা. কতমে চত্তাৰো? চন্দালোকো, সূৰিযালোকো, অগ্গালোকো, পঞ্ঞালোকো – ইমে খো, ভিক্খৱে, চত্তাৰো আলোকা. এতদগ্গং, ভিক্খৱে, ইমেসং চতুন্নং আলোকানং যদিদং পঞ্ঞালোকো’’তি. ততিযং.

৪. ওভাসসুত্তং

১৪৪. ‘‘চত্তাৰোমে, ভিক্খৱে, ওভাসা. কতমে চত্তাৰো? চন্দোভাসো, সূৰিযোভাসো, অগ্গোভাসো, পঞ্ঞোভাসো – ইমে খো, ভিক্খৱে, চত্তাৰো ওভাসা. এতদগ্গং, ভিক্খৱে, ইমেসং চতুন্নং ওভাসানং যদিদং পঞ্ঞোভাসো’’তি. চতুত্থং.

৫. পজ্জোতসুত্তং

১৪৫. ‘‘চত্তাৰোমে, ভিক্খৱে, পজ্জোতা. কতমে চত্তাৰো? চন্দপজ্জোতো, সূৰিযপজ্জোতো, অগ্গিপজ্জোতো, পঞ্ঞাপজ্জোতো – ইমে খো, ভিক্খৱে, চত্তাৰো পজ্জোতা. এতদগ্গং, ভিক্খৱে, ইমেসং চতুন্নং পজ্জোতানং যদিদং পঞ্ঞাপজ্জোতো’’তি. পঞ্চমং.

৬. পঠমকালসুত্তং

১৪৬. ‘‘চত্তাৰোমে, ভিক্খৱে, কালা. কতমে চত্তাৰো? কালেন ধম্মস্সৱনং, কালেন ধম্মসাকচ্ছা, কালেন সম্মসনা [কালেন সমথো (সী. স্যা. কং. পী.)], কালেন ৱিপস্সনা – ইমে খো, ভিক্খৱে, চত্তাৰো কালা’’তি. ছট্ঠং.

৭. দুতিযকালসুত্তং

১৪৭. ‘‘চত্তাৰোমে, ভিক্খৱে, কালা সম্মা ভাৱিযমানা সম্মা অনুপৰিৱত্তিযমানা অনুপুব্বেন আসৱানং খযং পাপেন্তি. কতমে চত্তাৰো? কালেন ধম্মস্সৱনং, কালেন ধম্মসাকচ্ছা, কালেন সম্মসনা, কালেন ৱিপস্সনা – ইমে খো, ভিক্খৱে, চত্তাৰো কালা সম্মা ভাৱিযমানা সম্মা অনুপৰিৱত্তিযমানা অনুপুব্বেন আসৱানং খযং পাপেন্তি.

‘‘সেয্যথাপি, ভিক্খৱে, উপৰিপব্বতে থুল্লফুসিতকে দেৱে ৱস্সন্তে তং উদকং যথানিন্নং পৱত্তমানং পব্বতকন্দৰপদৰসাখা পৰিপূৰেতি; পব্বতকন্দৰপদৰসাখা পৰিপূৰা কুসোব্ভে পৰিপূৰেন্তি; কুসোব্ভা পৰিপূৰা মহাসোব্ভে পৰিপূৰেন্তি; মহাসোব্ভা পৰিপূৰা কুন্নদিযো পৰিপূৰেন্তি; কুন্নদিযো পৰিপূৰা মহানদিযো পৰিপূৰেন্তি; মহানদিযো পৰিপূৰা সমুদ্দং [সমুদ্দং সাগৰং (সী. পী. ক.), সমুদ্দসাগৰং (স্যা. কং.)] পৰিপূৰেন্তি. এৱমেৱং খো, ভিক্খৱে, ইমে চত্তাৰো কালা সম্মা ভাৱিযমানা সম্মা অনুপৰিৱত্তিযমানা অনুপুব্বেন আসৱানং খযং পাপেন্তী’’তি. সত্তমং.

৮. দুচ্চৰিতসুত্তং

১৪৮. ‘‘চত্তাৰিমানি, ভিক্খৱে, ৱচীদুচ্চৰিতানি. কতমানি চত্তাৰি? মুসাৱাদো, পিসুণা ৱাচা, ফৰুসা ৱাচা, সম্ফপ্পলাপো – ইমানি খো, ভিক্খৱে, চত্তাৰি ৱচীদুচ্চৰিতানী’’তি. অট্ঠমং.

৯. সুচৰিতসুত্তং

১৪৯. ‘‘চত্তাৰিমানি, ভিক্খৱে, ৱচীসুচৰিতানি. কতমানি চত্তাৰি? সচ্চৱাচা, অপিসুণা ৱাচা, সণ্হা ৱাচা, মন্তভাসা – ইমানি খো, ভিক্খৱে, চত্তাৰি ৱচীসুচৰিতানী’’তি. নৱমং.

১০. সাৰসুত্তং

১৫০. ‘‘চত্তাৰোমে, ভিক্খৱে, সাৰা. কতমে চত্তাৰো? সীলসাৰো, সমাধিসাৰো, পঞ্ঞাসাৰো, ৱিমুত্তিসাৰো – ইমে খো, ভিক্খৱে, চত্তাৰো সাৰা’’তি. দসমং.

আভাৱগ্গো পঞ্চমো.