৮. ৱেসাৰজ্জসুত্তং

৮. ‘‘চত্তাৰিমানি, ভিক্খৱে, তথাগতস্স ৱেসাৰজ্জানি, যেহি ৱেসাৰজ্জেহি সমন্নাগতো তথাগতো আসভং ঠানং পটিজানাতি, পৰিসাসু সীহনাদং নদতি, ব্ৰহ্মচক্কং পৱত্তেতি. কতমানি চত্তাৰি? ‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধা’তি তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতীতি নিমিত্তমেতং, ভিক্খৱে, ন সমনুপস্সামি. এতমহং [এতম্পহং (সী. স্যা. কং. পী.)], ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি.

‘‘‘খীণাসৱস্স তে পটিজানতো ইমে আসৱা অপৰিক্খীণা’তি তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতীতি নিমিত্তমেতং, ভিক্খৱে, ন সমনুপস্সামি. এতমহং, ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি.

‘‘‘যে খো পন তে অন্তৰাযিকা ধম্মা ৱুত্তা তে পটিসেৱতো নালং অন্তৰাযাযা’তি তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতীতি নিমিত্তমেতং, ভিক্খৱে, ন সমনুপস্সামি. এতমহং, ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি.

‘‘‘যস্স খো পন তে অত্থায ধম্মো দেসিতো সো ন নিয্যাতি তক্কৰস্স সম্মা দুক্খক্খযাযা’তি তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতীতি নিমিত্তমেতং, ভিক্খৱে, ন সমনুপস্সামি. এতমহং, ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি. ইমানি খো, ভিক্খৱে, চত্তাৰি তথাগতস্স ৱেসাৰজ্জানি, যেহি ৱেসাৰজ্জেহি সমন্নাগতো তথাগতো আসভং ঠানং পটিজানাতি, পৰিসাসু সীহনাদং নদতি, ব্ৰহ্মচক্কং পৱত্তেতী’’তি.

‘‘যে কেচিমে ৱাদপথা পুথুস্সিতা,

যং নিস্সিতা সমণব্ৰাহ্মণা চ;

তথাগতং পত্ৱা ন তে ভৱন্তি,

ৱিসাৰদং ৱাদপথাতিৱত্তং [ৱাদপথাভিৱত্তিনং (সী.), ৱাদপথাতি ৱুত্তং (পী. ক.)].

‘‘যো ধম্মচক্কং অভিভুয্য কেৱলী [কেৱলং (স্যা.), কেৱলো (ক.)],

পৱত্তযী সব্বভূতানুকম্পী;

তং তাদিসং দেৱমনুস্সসেট্ঠং,

সত্তা নমস্সন্তি ভৱস্স পাৰগু’’ন্তি. অট্ঠমং;