২৩. ৰাগপেয্যালং

২৩৭. ‘‘ৰাগস্স, ভিক্খৱে, অভিঞ্ঞায দস ধম্মা ভাৱেতব্বা. কতমে দস? অসুভসঞ্ঞা, মৰণসঞ্ঞা, আহাৰে পটিকূলসঞ্ঞা, সব্বলোকে অনভিৰতসঞ্ঞা, অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা, পহানসঞ্ঞা, ৱিৰাগসঞ্ঞা, নিৰোধসঞ্ঞা – ৰাগস্স, ভিক্খৱে, অভিঞ্ঞায ইমে দস ধম্মা ভাৱেতব্বা’’তি.

২৩৮. ‘‘ৰাগস্স, ভিক্খৱে, অভিঞ্ঞায দস ধম্মা ভাৱেতব্বা. কতমে দস? অনিচ্চসঞ্ঞা, অনত্তসঞ্ঞা, আহাৰে পটিকূলসঞ্ঞা, সব্বলোকে অনভিৰতসঞ্ঞা, অট্ঠিকসঞ্ঞা, পুড়ৱকসঞ্ঞা [পুলৱকসঞ্ঞা (সী.) পুড়ুৱকসঞ্ঞা (ক.)], ৱিনীলকসঞ্ঞা, ৱিপুব্বকসঞ্ঞা, ৱিচ্ছিদ্দকসঞ্ঞা, উদ্ধুমাতকসঞ্ঞা – ৰাগস্স, ভিক্খৱে, অভিঞ্ঞায ইমে দস ধম্মা ভাৱেতব্বা’’তি.

২৩৯. ‘‘ৰাগস্স, ভিক্খৱে, অভিঞ্ঞায দস ধম্মা ভাৱেতব্বা. কতমে দস? সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি, সম্মাঞাণং, সম্মাৱিমুত্তি – ৰাগস্স, ভিক্খৱে, অভিঞ্ঞায ইমে দস ধম্মা ভাৱেতব্বা’’তি.

২৪০-২৬৬. ‘‘ৰাগস্স, ভিক্খৱে, পৰিঞ্ঞায…পে… পৰিক্খযায… পহানায… খযায… ৱযায… ৱিৰাগায… নিৰোধায… ( ) [(উপসমায) (সী. স্যা. পী.) অঞ্ঞেসং পন নিপাতানং পৰিযোসানে ইদং পদং ন দিস্সতি] চাগায… পটিনিস্সগ্গায…পে… ইমে দস ধম্মা ভাৱেতব্বা.

২৬৭-৭৪৬. ‘‘দোসস্স …পে… মোহস্স… কোধস্স… উপনাহস্স… মক্খস্স… পড়াসস্স… ইস্সায… মচ্ছৰিযস্স… মাযায… সাঠেয্যস্স… থম্ভস্স… সাৰম্ভস্স… মানস্স… অতিমানস্স… মদস্স… পমাদস্স পৰিঞ্ঞায…পে… পৰিক্খযায… পহানায … খযায… ৱযায… ৱিৰাগায… নিৰোধায… ( ) [(উপসমায) (সী. স্যা. পী.) অঞ্ঞেসং পন নিপাতানং পৰিযোসানে ইদং পদং ন দিস্সতি] চাগায… পটিনিস্সগ্গায…পে… ইমে দস ধম্মা ভাৱেতব্বা’’তি.

ৰাগপেয্যালং নিট্ঠিতং.