(২২) ২. সামঞ্ঞৱগ্গো

২২১. ‘‘দসহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি দসহি? পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, পিসুণৱাচো হোতি, ফৰুসৱাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি – ইমেহি খো, ভিক্খৱে, দসহি ধম্মেহি সমন্নাগতো যথাভতং নিক্খিত্তো এৱং নিৰযে.

‘‘দসহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি দসহি? পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, পিসুণায ৱাচায পটিৱিৰতো হোতি, ফৰুসায ৱাচায পটিৱিৰতো হোতি, সম্ফপ্পলাপা পটিৱিৰতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি – ইমেহি খো, ভিক্খৱে, দসহি ধম্মেহি সমন্নাগতো যথাভতং নিক্খিত্তো এৱং সগ্গে’’তি.

২২২. ‘‘ৱীসতিযা, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি ৱীসতিযা? অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি; অত্তনা চ অদিন্নাদাযী হোতি, পৰঞ্চ অদিন্নাদানে সমাদপেতি; অত্তনা চ কামেসুমিচ্ছাচাৰী হোতি, পৰঞ্চ কামেসুমিচ্ছাচাৰে সমাদপেতি; অত্তনা চ মুসাৱাদী হোতি, পৰঞ্চ মুসাৱাদে সমাদপেতি; অত্তনা চ পিসুণৱাচো হোতি, পৰঞ্চ পিসুণায ৱাচায সমাদপেতি; অত্তনা চ ফৰুসৱাচো হোতি, পৰঞ্চ ফৰুসায ৱাচায সমাদপেতি; অত্তনা চ সম্ফপ্পলাপী হোতি, পৰঞ্চ সম্ফপ্পলাপে সমাদপেতি; অত্তনা চ অভিজ্ঝালু হোতি, পৰঞ্চ অভিজ্ঝায সমাদপেতি; অত্তনা চ ব্যাপন্নচিত্তো হোতি, পৰঞ্চ ব্যাপাদে সমাদপেতি; অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি – ইমেহি খো, ভিক্খৱে, ৱীসতিযা ধম্মেহি সমন্নাগতো যথাভতং নিক্খিত্তো এৱং নিৰযে.

‘‘ৱীসতিযা, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি ৱীসতিযা? অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি; অত্তনা চ অদিন্নাদানা পটিৱিৰতো হোতি, পৰঞ্চ অদিন্নাদানা ৱেৰমণিযা সমাদপেতি; অত্তনা চ কামেসুমিচ্ছাচাৰা পটিৱিৰতো হোতি, পৰঞ্চ কামেসুমিচ্ছাচাৰা ৱেৰমণিযা সমাদপেতি; অত্তনা চ মুসাৱাদা পটিৱিৰতো হোতি, পৰঞ্চ মুসাৱাদা ৱেৰমণিযা সমাদপেতি; অত্তনা চ পিসুণায ৱাচায পটিৱিৰতো হোতি, পৰঞ্চ পিসুণায ৱাচায ৱেৰমণিযা সমাদপেতি; অত্তনা চ ফৰুসায ৱাচায পটিৱিৰতো হোতি, পৰঞ্চ ফৰুসায ৱাচায ৱেৰমণিযা সমাদপেতি; অত্তনা চ সম্ফপ্পলাপা পটিৱিৰতো হোতি, পৰঞ্চ সম্ফপ্পলাপা ৱেৰমণিযা সমাদপেতি; অত্তনা চ অনভিজ্ঝালু হোতি, পৰঞ্চ অনভিজ্ঝায সমাদপেতি; অত্তনা চ অব্যাপন্নচিত্তো হোতি, পৰঞ্চ অব্যাপাদে সমাদপেতি; অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি – ইমেহি খো, ভিক্খৱে, ৱীসতিযা ধম্মেহি সমন্নাগতো যথাভতং নিক্খিত্তো এৱং সগ্গে’’তি.

২২৩. ‘‘তিংসায, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি তিংসায? অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি, পাণাতিপাতে চ সমনুঞ্ঞো হোতি; অত্তনা চ অদিন্নাদাযী হোতি, পৰঞ্চ অদিন্নাদানে সমাদপেতি, অদিন্নাদানে চ সমনুঞ্ঞো হোতি; অত্তনা চ কামেসুমিচ্ছাচাৰী হোতি, পৰঞ্চ কামেসুমিচ্ছাচাৰে সমাদপেতি, কামেসুমিচ্ছাচাৰে চ সমনুঞ্ঞো হোতি; অত্তনা চ মুসাৱাদী হোতি, পৰঞ্চ মুসাৱাদে সমাদপেতি, মুসাৱাদে চ সমনুঞ্ঞো হোতি; অত্তনা চ পিসুণৱাচো হোতি, পৰঞ্চ পিসুণায ৱাচায সমাদপেতি, পিসুণায ৱাচায চ সমনুঞ্ঞো হোতি; অত্তনা চ ফৰুসৱাচো হোতি, পৰঞ্চ ফৰুসায ৱাচায সমাদপেতি, ফৰুসায ৱাচায চ সমনুঞ্ঞো হোতি; অত্তনা চ সম্ফপ্পলাপী হোতি, পৰঞ্চ সম্ফপ্পলাপে সমাদপেতি, সম্ফপ্পলাপে চ সমনুঞ্ঞো হোতি; অত্তনা চ অভিজ্ঝালু হোতি, পৰঞ্চ অভিজ্ঝায সমাদপেতি, অভিজ্ঝায চ সমনুঞ্ঞো হোতি; অত্তনা চ ব্যাপন্নচিত্তো হোতি, পৰঞ্চ ব্যাপাদে সমাদপেতি, ব্যাপাদে চ সমনুঞ্ঞো হোতি; অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি, মিচ্ছাদিট্ঠিযা চ সমনুঞ্ঞো হোতি – ইমেহি খো, ভিক্খৱে, তিংসায ধম্মেহি সমন্নাগতো যথাভতং নিক্খিত্তো এৱং নিৰযে.

‘‘তিংসায, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি তিংসায? অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি, পাণাতিপাতা ৱেৰমণিযা চ সমনুঞ্ঞো হোতি; অত্তনা চ অদিন্নাদানা পটিৱিৰতো হোতি, পৰঞ্চ অদিন্নাদানা ৱেৰমণিযা সমাদপেতি, অদিন্নাদানা ৱেৰমণিযা চ সমনুঞ্ঞো হোতি; অত্তনা চ কামেসুমিচ্ছাচাৰা পটিৱিৰতো হোতি, পৰঞ্চ কামেসুমিচ্ছাচাৰা ৱেৰমণিযা সমাদপেতি, কামেসুমিচ্ছাচাৰা ৱেৰমণিযা চ সমনুঞ্ঞো হোতি; অত্তনা চ মুসাৱাদা পটিৱিৰতো হোতি, পৰঞ্চ মুসাৱাদা ৱেৰমণিযা সমাদপেতি, মুসাৱাদা ৱেৰমণিযা চ সমনুঞ্ঞো হোতি; অত্তনা চ পিসুণায ৱাচায পটিৱিৰতো হোতি, পৰঞ্চ পিসুণায ৱাচায ৱেৰমণিযা সমাদপেতি, পিসুণায ৱাচায ৱেৰমণিযা চ সমনুঞ্ঞো হোতি; অত্তনা চ ফৰুসায ৱাচায পটিৱিৰতো হোতি, পৰঞ্চ ফৰুসায ৱাচায ৱেৰমণিযা সমাদপেতি, ফৰুসায ৱাচায ৱেৰমণিযা চ সমনুঞ্ঞো হোতি; অত্তনা চ সম্ফপ্পলাপা পটিৱিৰতো হোতি, পৰঞ্চ সম্ফপ্পলাপা ৱেৰমণিযা সমাদপেতি, সম্ফপ্পলাপা ৱেৰমণিযা চ সমনুঞ্ঞো হোতি; অত্তনা চ অনভিজ্ঝালু হোতি, পৰঞ্চ অনভিজ্ঝায সমাদপেতি, অনভিজ্ঝায চ সমনুঞ্ঞো হোতি; অত্তনা চ অব্যাপন্নচিত্তো হোতি, পৰঞ্চ অব্যাপাদে সমাদপেতি, অব্যাপাদে চ সমনুঞ্ঞো হোতি; অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি, সম্মাদিট্ঠিযা চ সমনুঞ্ঞো হোতি – ইমেহি খো, ভিক্খৱে, তিংসায ধম্মেহি সমন্নাগতো যথাভতং নিক্খিত্তো এৱং সগ্গে’’তি.

২২৪. ‘‘চত্তাৰীসায, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি চত্তাৰীসায? অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি, পাণাতিপাতে চ সমনুঞ্ঞো হোতি, পাণাতিপাতস্স চ ৱণ্ণং ভাসতি; অত্তনা চ অদিন্নাদাযী হোতি, পৰঞ্চ অদিন্নাদানে সমাদপেতি, অদিন্নাদানে চ সমনুঞ্ঞো হোতি, অদিন্নাদানস্স চ ৱণ্ণং ভাসতি; অত্তনা চ কামেসুমিচ্ছাচাৰী হোতি, পৰঞ্চ কামেসুমিচ্ছাচাৰে সমাদপেতি, কামেসুমিচ্ছাচাৰে চ সমনুঞ্ঞো হোতি, কামেসুমিচ্ছাচাৰস্স চ ৱণ্ণং ভাসতি; অত্তনা চ মুসাৱাদী হোতি, পৰঞ্চ মুসাৱাদে সমাদপেতি, মুসাৱাদে চ সমনুঞ্ঞো হোতি, মুসাৱাদস্স চ ৱণ্ণং ভাসতি; অত্তনা চ পিসুণৱাচো হোতি, পৰঞ্চ পিসুণায ৱাচায সমাদপেতি, পিসুণায ৱাচায চ সমনুঞ্ঞো হোতি, পিসুণায ৱাচায চ ৱণ্ণং ভাসতি; অত্তনা চ ফৰুসৱাচো হোতি, পৰঞ্চ ফৰুসায ৱাচায সমাদপেতি, ফৰুসায ৱাচায চ সমনুঞ্ঞো হোতি, ফৰুসায ৱাচায চ ৱণ্ণং ভাসতি; অত্তনা চ সম্ফপ্পলাপী হোতি, পৰঞ্চ সম্ফপ্পলাপে সমাদপেতি, সম্ফপ্পলাপে চ সমনুঞ্ঞো হোতি, সম্ফপ্পলাপস্স চ ৱণ্ণং ভাসতি; অত্তনা চ অভিজ্ঝালু হোতি, পৰঞ্চ অভিজ্ঝায সমাদপেতি, অভিজ্ঝায চ সমনুঞ্ঞো হোতি, অভিজ্ঝায চ ৱণ্ণং ভাসতি; অত্তনা চ ব্যাপন্নচিত্তো হোতি, পৰঞ্চ ব্যাপাদে সমাদপেতি, ব্যাপাদে চ সমনুঞ্ঞো হোতি, ব্যাপাদস্স চ ৱণ্ণং ভাসতি; অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি, মিচ্ছাদিট্ঠিযা চ সমনুঞ্ঞো হোতি, মিচ্ছাদিট্ঠিযা চ ৱণ্ণং ভাসতি – ইমেহি খো, ভিক্খৱে, চত্তাৰীসায ধম্মেহি সমন্নাগতো যথাভতং নিক্খিত্তো এৱং নিৰযে.

‘‘চত্তাৰীসায, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি চত্তাৰীসায? অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি, পাণাতিপাতা ৱেৰমণিযা চ সমনুঞ্ঞো হোতি, পাণাতিপাতা ৱেৰমণিযা চ ৱণ্ণং ভাসতি; অত্তনা চ অদিন্নাদানা পটিৱিৰতো হোতি, পৰঞ্চ অদিন্নাদানা ৱেৰমণিযা সমাদপেতি, অদিন্নাদানা ৱেৰমণিযা চ সমনুঞ্ঞো হোতি, অদিন্নাদানা ৱেৰমণিযা চ ৱণ্ণং ভাসতি; অত্তনা চ কামেসুমিচ্ছাচাৰা পটিৱিৰতো হোতি, পৰঞ্চ কামেসুমিচ্ছাচাৰা ৱেৰমণিযা সমাদপেতি, কামেসুমিচ্ছাচাৰা ৱেৰমণিযা চ সমনুঞ্ঞো হোতি, কামেসুমিচ্ছাচাৰা ৱেৰমণিযা চ ৱণ্ণং ভাসতি; অত্তনা চ মুসাৱাদা পটিৱিৰতো হোতি, পৰঞ্চ মুসাৱাদা ৱেৰমণিযা সমাদপেতি, মুসাৱাদা ৱেৰমণিযা চ সমনুঞ্ঞো হোতি, মুসাৱাদা ৱেৰমণিযা চ ৱণ্ণং ভাসতি; অত্তনা চ পিসুণায ৱাচায পটিৱিৰতো হোতি, পৰঞ্চ পিসুণায ৱাচায ৱেৰমণিযা সমাদপেতি, পিসুণায ৱাচায ৱেৰমণিযা চ সমনুঞ্ঞো হোতি, পিসুণায ৱাচায ৱেৰমণিযা চ ৱণ্ণং ভাসতি; অত্তনা চ ফৰুসায ৱাচায পটিৱিৰতো হোতি, পৰঞ্চ ফৰুসায ৱাচায ৱেৰমণিযা চ সমাদপেতি, ফৰুসায ৱাচায ৱেৰমণিযা চ সমনুঞ্ঞো হোতি, ফৰুসায ৱাচায ৱেৰমণিযা চ ৱণ্ণং ভাসতি; অত্তনা চ সম্ফপ্পলাপা পটিৱিৰতো হোতি, পৰঞ্চ সম্ফপ্পলাপা ৱেৰমণিযা সমাদপেতি, সম্ফপ্পলাপা ৱেৰমণিযা চ সমনুঞ্ঞো হোতি, সম্ফপ্পলাপা ৱেৰমণিযা চ ৱণ্ণং ভাসতি; অত্তনা চ অনভিজ্ঝালু হোতি, পৰঞ্চ অনভিজ্ঝায সমাদপেতি, অনভিজ্ঝায চ সমনুঞ্ঞো হোতি, অনভিজ্ঝায চ ৱণ্ণং ভাসতি; অত্তনা চ অব্যাপন্নচিত্তো হোতি, পৰঞ্চ অব্যাপাদে সমাদপেতি, অব্যাপাদে চ সমনুঞ্ঞো হোতি, অব্যাপাদস্স চ ৱণ্ণং ভাসতি; অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি, সম্মাদিট্ঠিযা চ সমনুঞ্ঞো হোতি, সম্মাদিট্ঠিযা চ ৱণ্ণং ভাসতি – ইমেহি খো, ভিক্খৱে, চত্তাৰীসায ধম্মেহি সমন্নাগতো যথাভতং নিক্খিত্তো এৱং সগ্গে’’তি.

২২৫-২২৮. ‘‘দসহি, ভিক্খৱে, ধম্মেহি সমন্নাগতো খতং উপহতং অত্তানং পৰিহৰতি…পে… অক্খতং অনুপহতং অত্তানং পৰিহৰতি…পে… ৱীসতিযা, ভিক্খৱে…পে… তিংসায, ভিক্খৱে…পে… চত্তাৰীসায, ভিক্খৱে, ধম্মেহি সমন্নাগতো খতং উপহতং অত্তানং পৰিহৰতি…পে….

২২৯-২৩২. ‘‘দসহি, ভিক্খৱে, ধম্মেহি সমন্নাগতো ইধেকচ্চো কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জতি…পে… ইধেকচ্চো কাযস্স ভেদা পৰং মৰণা সুগতিং সগ্গং লোকং উপপজ্জতি. ৱীসতিযা, ভিক্খৱে…পে… তিংসায, ভিক্খৱে,…পে… চত্তাৰীসায, ভিক্খৱে, ধম্মেহি সমন্নাগতো ইধেকচ্চো কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জতি…পে… ইধেকচ্চো কাযস্স ভেদা পৰং মৰণা সুগতিং সগ্গং লোকং উপপজ্জতি’’.

২৩৩-২৩৬. ‘‘দসহি, ভিক্খৱে, ধম্মেহি সমন্নাগতো বালো ৱেদিতব্বো…পে… পণ্ডিতো ৱেদিতব্বো…পে… ৱীসতিযা, ভিক্খৱে…পে… তিংসায, ভিক্খৱে…পে… চত্তাৰীসায, ভিক্খৱে, ধম্মেহি সমন্নাগতো বালো ৱেদিতব্বো…পে… পণ্ডিতো ৱেদিতব্বো …পে… ইমেহি খো, ভিক্খৱে, চত্তাৰীসায ধম্মেহি সমন্নাগতো পণ্ডিতো ৱেদিতব্বো’’তি.

সামঞ্ঞৱগ্গো দুতিযো.