(১৩) ৩. পৰিসুদ্ধৱগ্গো

১. পঠমসুত্তং

১২৩. ‘‘দসযিমে, ভিক্খৱে, ধম্মা পৰিসুদ্ধা পৰিযোদাতা, নাঞ্ঞত্ৰ সুগতৱিনযা. কতমে দস? সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি, সম্মাঞাণং, সম্মাৱিমুত্তি – ইমে খো, ভিক্খৱে, দস ধম্মা পৰিসুদ্ধা পৰিযোদাতা, নাঞ্ঞত্ৰ সুগতৱিনযা’’তি. পঠমং.

২. দুতিযসুত্তং

১২৪. ‘‘দসযিমে, ভিক্খৱে, ধম্মা অনুপ্পন্না উপ্পজ্জন্তি, নাঞ্ঞত্ৰ সুগতৱিনযা. কতমে দস? সম্মাদিট্ঠি …পে… সম্মাৱিমুত্তি – ইমে খো, ভিক্খৱে, দস ধম্মা অনুপ্পন্না উপ্পজ্জন্তি, নাঞ্ঞত্ৰ সুগতৱিনযা’’তি. দুতিযং.

৩. ততিযসুত্তং

১২৫. ‘‘দসযিমে, ভিক্খৱে, ধম্মা মহপ্ফলা মহানিসংসা, নাঞ্ঞত্ৰ সুগতৱিনযা. কতমে দস? সম্মাদিট্ঠি…পে… সম্মাৱিমুত্তি – ইমে খো, ভিক্খৱে, দস ধম্মা মহপ্ফলা মহানিসংসা, নাঞ্ঞত্ৰ সুগতৱিনযা’’তি. ততিযং.

৪. চতুত্থসুত্তং

১২৬. ‘‘দসযিমে, ভিক্খৱে, ধম্মা ৰাগৱিনযপৰিযোসানা হোন্তি দোসৱিনযপৰিযোসানা হোন্তি মোহৱিনযপৰিযোসানা হোন্তি, নাঞ্ঞত্ৰ সুগতৱিনযা. কতমে দস? সম্মাদিট্ঠি…পে… সম্মাৱিমুত্তি – ইমে খো, ভিক্খৱে, দস ধম্মা ৰাগৱিনযপৰিযোসানা হোন্তি দোসৱিনযপৰিযোসানা হোন্তি মোহৱিনযপৰিযোসানা হোন্তি, নাঞ্ঞত্ৰ সুগতৱিনযা’’তি. চতুত্থং.

৫. পঞ্চমসুত্তং

১২৭. ‘‘দসযিমে, ভিক্খৱে, ধম্মা একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্তন্তি, নাঞ্ঞত্ৰ সুগতৱিনযা. কতমে দস? সম্মাদিট্ঠি…পে… সম্মাৱিমুত্তি – ইমে খো, ভিক্খৱে, দস ধম্মা একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্তন্তি, নাঞ্ঞত্ৰ সুগতৱিনযা’’তি. পঞ্চমং.

৬. ছট্ঠসুত্তং

১২৮. ‘‘দসযিমে, ভিক্খৱে, ধম্মা ভাৱিতা বহুলীকতা অনুপ্পন্না উপ্পজ্জন্তি, নাঞ্ঞত্ৰ সুগতৱিনযা. কতমে দস? সম্মাদিট্ঠি …পে… সম্মাৱিমুত্তি – ইমে খো, ভিক্খৱে, দস ধম্মা ভাৱিতা বহুলীকতা অনুপ্পন্না উপ্পজ্জন্তি, নাঞ্ঞত্ৰ সুগতৱিনযা’’তি. ছট্ঠং.

৭. সত্তমসুত্তং

১২৯. ‘‘দসযিমে, ভিক্খৱে, ধম্মা ভাৱিতা বহুলীকতা মহপ্ফলা হোন্তি মহানিসংসা, নাঞ্ঞত্ৰ সুগতৱিনযা. কতমে দস? সম্মাদিট্ঠি…পে… সম্মাৱিমুত্তি – ইমে খো, ভিক্খৱে, দস ধম্মা ভাৱিতা বহুলীকতা মহপ্ফলা হোন্তি মহানিসংসা, নাঞ্ঞত্ৰ সুগতৱিনযা’’তি. সত্তমং.

৮. অট্ঠমসুত্তং

১৩০. ‘‘দসযিমে, ভিক্খৱে, ধম্মা ভাৱিতা বহুলীকতা ৰাগৱিনযপৰিযোসানা হোন্তি দোসৱিনযপৰিযোসানা হোন্তি মোহৱিনযপৰিযোসানা হোন্তি, নাঞ্ঞত্ৰ সুগতৱিনযা. কতমে দস? সম্মাদিট্ঠি…পে… সম্মাৱিমুত্তি – ইমে খো, ভিক্খৱে, দস ধম্মা ভাৱিতা বহুলীকতা ৰাগৱিনযপৰিযোসানা হোন্তি দোসৱিনযপৰিযোসানা হোন্তি মোহৱিনযপৰিযোসানা হোন্তি, নাঞ্ঞত্ৰ সুগতৱিনযা’’তি. অট্ঠমং.

৯. নৱমসুত্তং

১৩১. ‘‘দসযিমে, ভিক্খৱে, ধম্মা ভাৱিতা বহুলীকতা একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্তন্তি, নাঞ্ঞত্ৰ সুগতৱিনযা. কতমে দস? সম্মাদিট্ঠি…পে… সম্মাৱিমুত্তি – ইমে খো, ভিক্খৱে, দস ধম্মা ভাৱিতা বহুলীকতা একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্তন্তি, নাঞ্ঞত্ৰ সুগতৱিনযা’’তি. নৱমং.

১০. দসমসুত্তং

১৩২. ‘‘দসযিমে, ভিক্খৱে, মিচ্ছত্তা. কতমে দস? মিচ্ছাদিট্ঠি, মিচ্ছাসঙ্কপ্পো, মিচ্ছাৱাচা, মিচ্ছাকম্মন্তো, মিচ্ছাআজীৱো, মিচ্ছাৱাযামো, মিচ্ছাসতি, মিচ্ছাসমাধি, মিচ্ছাঞাণং, মিচ্ছাৱিমুত্তি – ইমে খো, ভিক্খৱে, দস মিচ্ছত্তা’’তি. দসমং.

১১. একাদসমসুত্তং

১৩৩. ‘‘দসযিমে, ভিক্খৱে, সম্মত্তা. কতমে দস? সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি, সম্মাঞাণং, সম্মাৱিমুত্তি – ইমে খো, ভিক্খৱে, দস সম্মত্তা’’তি. একাদসমং.

পৰিসুদ্ধৱগ্গো ততিযো.