༡༡. ཨེ་ཀཱ་ད་ས་ཀ་ཝཱ་རོ
༣༣༡. ཨེ་ཀཱ་ད པུ་གྒ་ལཱ ཨ་ནུ་པ་ས་མྤ་ནྣཱ ན ཨུ་པ་ས་མྤཱ་དེ་ཏ་བྦཱ, ཨུ་པ་ས་མྤ་ནྣཱ ནཱ་སེ་ཏ་བྦཱ. ཨེ་ཀཱ་ད་ས པཱ་དུ་ཀཱ ཨ་ཀ་པྤི་ཡཱ. ཨེ་ཀཱ་ད་ས པ་ཏྟཱ ཨ་ཀ་པྤི་ཡཱ. ཨེ་ཀཱ་ད་ས ཙཱི་ཝ་རཱ་ནི ཨ་ཀ་པྤི་ཡཱ་ནི. ཨེ་ཀཱ་ད་ས ཡཱ་ཝ་ཏ་ཏི་ཡ་ཀཱ. བྷི་ཀྑུ་ནཱི་ནཾ ཨེ་ཀཱ་ད་ས ཨ་ནྟ་རཱ་ཡི་ཀཱ དྷ་མྨཱ པུ་ཙྪི་ཏ་བྦཱ. ཨེ་ཀཱ་ད་ས ཙཱི་ཝ་རཱ་ནི ཨ་དྷི་ཊྛཱ་ཏ་བྦཱ་ནི. ཨེ་ཀཱ་ད་ས ཙཱི་ཝ་རཱ་ནི ན ཝི་ཀ་པྤེ་ཏ་བྦཱ་ནི. ཨེ་ཀཱ་ད་སེ ཨ་རུ་ཎུ་གྒ་མ་ནེ ནི་སྶ་གྒི་ཡཾ ཧོ་ཏི. ཨེ་ཀཱ་ད་ས ག་ཎྛི་ཀཱ ཀ་པྤི་ཡཱ. ཨེ་ཀཱ་ད་ས ཝི་དྷཱ [ཝཱི་ཐཱ (སྱཱ.)] ཀ་པྤི་ཡཱ. ཨེ་ཀཱ་ད་ས པ་ཐ་ཝཱི ཨ་ཀ་པྤི་ཡཱ. ཨེ་ཀཱ་ད་ས པ་ཐ་ཝཱི ཀ་པྤི་ཡཱ. ཨེ་ཀཱ་ད་ས ནི་སྶ་ཡ་པ་ཊི་པྤ་སྶ་དྡྷི་ཡོ. ཨེ་ཀཱ་ད་ས པུ་གྒ་ལཱ ཨ་ཝ་ནྡི་ཡཱ. ཨེ་ཀཱ་ད་ས པ་ར་མཱ་ནི. ཨེ་ཀཱ་ད་ས ཝ་རཱ་ནི ཡཱ་ཙིཾ་སུ. ཨེ་ཀཱ་ད་ས སཱི་མཱ་དོ་སཱ. ཨ་ཀྐོ་ས་ཀ་པ་རི་བྷཱ་ས་ཀེ པུ་གྒ་ལེ ཨེ་ཀཱ་ད་སཱ་དཱི་ན་ཝཱ པཱ་ཊི་ཀ་ངྑཱ. [ཨ. ནི. ༡༡.༡༥; མི. པ. ༤.༤.༦] མེ་ཏྟཱ་ཡ ཙེ་ཏོ་ཝི་མུ་ཏྟི་ཡཱ ཨཱ་སེ་ཝི་ཏཱ་ཡ བྷཱ་ཝི་ཏཱ་ཡ བ་ཧུ་ལཱི་ཀ་ཏཱ་ཡ ཡཱ་ནཱི་ཀ་ཏཱ་ཡ ཝ་ཏྠུ་ཀ་ཏཱ་ཡ ཨ་ནུ་ཊྛི་ཏཱ་ཡ པ་རི་ཙི་ཏཱ་ཡ སུ་ས་མཱ་ར་དྡྷཱ་ཡ ཨེ་ཀཱ་ད་སཱ་ནི་སཾ་སཱ པཱ་ཊི་ཀ་ངྑཱ. སུ་ཁཾ སུ་པ་ཏི, སུ་ཁཾ པ་ཊི་བུ་ཛ྄ཛྷ་ཏི, ན པཱ་པ་ཀཾ སུ་པི་ནཾ པ་སྶ་ཏི, མ་ནུ་སྶཱ་ནཾ པི་ཡོ ཧོ་ཏི, ཨ་མ་ནུ་སྶཱ་ནཾ པི་ཡོ ཧོ་ཏི, དེ་ཝ་ཏཱ ར་ཀྑ་ནྟི, ནཱ་སྶ ཨ་གྒི ཝཱ ཝི་སཾ ཝཱ ས་ཏྠཾ ཝཱ ཀ་མ་ཏི, ཏུ་ཝ་ཊྚཾ ཙི་ཏྟཾ ས་མཱ་དྷི་ཡ་ཏི, མུ་ཁ་ཝ་ཎྞོ ཝི་པྤ་སཱི་ད་ཏི, ཨ་ས་མྨཱུ་ལ༹ྷོ ཀཱ་ལ་ངྐ་རོ་ཏི, ཨུ་ཏྟ་རི ཨ་པྤ་ཊི་ཝི་ཛ྄ཛྷ་ནྟོ བྲ་ཧྨ་ལོ་ཀཱུ་པ་གོ ཧོ་ཏི – མེ་ཏྟཱ་ཡ ཙེ་ཏོ་ཝི་མུ་ཏྟི་ཡཱ ཨཱ་སེ་ཝི་ཏཱ་ཡ བྷཱ་ཝི་ཏཱ་ཡ བ་ཧུ་ལཱི་ཀ་ཏཱ་ཡ ཡཱ་ནཱི་ཀ་ཏཱ་ཡ ཝ་ཏྠུ་ཀ་ཏཱ་ཡ ཨ་ནུ་ཊྛི་ཏཱ་ཡ པ་རི་ཙི་ཏཱ་ཡ སུ་ས་མཱ་ར་དྡྷཱ་ཡ ཨི་མེ ཨེ་ཀཱ་ད་སཱ་ནི་སཾ་སཱ པཱ་ཊི་ཀ་ངྑཱ་ཏི.
ཨེ་ཀཱ་ད་ས་ཀཾ ནི་ཊྛི་ཏཾ.
ཏ་སྶུ་དྡཱ་ནཾ –
ནཱ་སེ་ཏ་བྦཱ པཱ་དུ་ཀཱ ཙ, པ་ཏྟཱ ཙ ཙཱི་ཝ་རཱ་ནི ཙ;
ཏ་ཏི་ཡཱ པུ་ཙྪི་ཏ་བྦཱ ཙ, ཨ་དྷི་ཊྛཱ་ན་ཝི་ཀ་པྤ་ནཱ.
ཨ་རུ་ཎཱ ག་ཎྛི་ཀཱ ཝི་དྷཱ, ཨ་ཀ་པྤི་ཡཱ ཙ ཀ་པྤི་ཡཾ;
ནི་སྶ་ཡཱ་ཝ་ནྡི་ཡཱ ཙེ་ཝ, པ་ར་མཱ་ནི ཝ་རཱ་ནི ཙ;
སཱི་མཱ་དོ་སཱ ཙ ཨ་ཀྐོ་སཱ, མེ་ཏྟཱ་ཡེ་ཀཱ་ད་སཱ ཀ་ཏཱ་ཏི.
ཨེ་ཀུ་ཏྟ་རི་ཀ་ན་ཡོ.
ཏ་སྶུ་དྡཱ་ནཾ –
ཨེ་ཀ་ཀཱ ཙ དུ་ཀཱ ཙེ་ཝ, ཏི་ཀཱ ཙ ཙ་ཏུ་པ་ཉྩ་ཀཱ;
ཚ་ས་ཏྟ་ཊྛ་ན་ཝ་ཀཱ ཙ, ད་ས ཨེ་ཀཱ་ད་སཱ་ནི ཙ.
ཧི་ཏཱ་ཡ ས་བྦ་ས་ཏྟཱ་ནཾ, ཉཱ་ཏ་དྷ་མྨེ་ན ཏཱ་དི་ནཱ;
ཨེ་ཀུ་ཏྟ་རི་ཀཱ ཝི་མ་ལཱ, མ་ཧཱ་ཝཱི་རེ་ན དེ་སི་ཏཱ་ཏི.
ཨེ་ཀུ་ཏྟ་རི་ཀ་ན་ཡོ ནི་ཊྛི་ཏོ.