༢༠. ས་མུ་ཊྛཱ་པ་ན་ཝཱ་རོ
༣༡༤. ཝི་ཝཱ་དཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི? ཝི་ཝཱ་དཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ན ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི; ཨ་པི་ཙ, ཝི་ཝཱ་དཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི. ཡ་ཐཱ ཀ་ཐཾ ཝི་ཡ? [ཙཱུ་ལ༹་ཝ. ༢༡༥; པ་རི. ༣༤༨ ཨཱ་ད་ཡོ] ཨི་དྷ བྷི་ཀྑཱུ ཝི་ཝ་ད་ནྟི – ‘‘དྷ་མྨོ་ཏི ཝཱ, ཨ་དྷ་མྨོ་ཏི ཝཱ, ཝི་ན་ཡོ་ཏི ཝཱ, ཨ་ཝི་ན་ཡོ་ཏི ཝཱ, ཨ་བྷཱ་སི་ཏཾ ཨ་ལ་པི་ཏཾ ཏ་ཐཱ་ག་ཏེ་ནཱ་ཏི ཝཱ, བྷཱ་སི་ཏཾ ལ་པི་ཏཾ ཏ་ཐཱ་ག་ཏེ་ནཱ་ཏི ཝཱ, ཨ་ནཱ་ཙི་ཎྞཾ ཏ་ཐཱ་ག་ཏེ་ནཱ་ཏི ཝཱ, ཨཱ་ཙི་ཎྞཾ ཏ་ཐཱ་ག་ཏེ་ནཱ་ཏི ཝཱ, ཨ་པ་ཉྙ་ཏྟཾ ཏ་ཐཱ་ག་ཏེ་ནཱ་ཏི ཝཱ, པ་ཉྙ་ཏྟཾ ཏ་ཐཱ་ག་ཏེ་ནཱ་ཏི ཝཱ, ཨཱ་པ་ཏྟཱི་ཏི ཝཱ, ཨ་ནཱ་པ་ཏྟཱི་ཏི ཝཱ, ལ་ཧུ་ཀཱ ཨཱ་པ་ཏྟཱི་ཏི ཝཱ, ག་རུ་ཀཱ ཨཱ་པ་ཏྟཱི་ཏི ཝཱ, སཱ་ཝ་སེ་སཱ ཨཱ་པ་ཏྟཱི་ཏི ཝཱ, ཨ་ན་ཝ་སེ་སཱ ཨཱ་པ་ཏྟཱི་ཏི ཝཱ, དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ’’. ཡཾ ཏ་ཏྠ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ནཱ་ནཱ་ཝཱ་དོ ཨ་ཉྙ་ཐཱ་ཝཱ་དོ ཝི་པ་ཙྩ་ཏཱ་ཡ ཝོ་ཧཱ་རོ མེ་དྷ་ཀཾ [མེ་དྷ་གཾ (ཀ.)], ཨི་དཾ ཝུ་ཙྩ་ཏི ཝི་ཝཱ་དཱ་དྷི་ཀ་ར་ཎཾ. ཝི་ཝཱ་དཱ་དྷི་ཀ་ར་ཎེ ས་ངྒྷོ ཝི་ཝ་ད་ཏི. ཝི་ཝཱ་དཱ་དྷི་ཀ་ར་ཎཾ ཝི་ཝ་ད་མཱ་ནོ ཨ་ནུ་ཝ་ད་ཏི. ཨ་ནུ་ཝཱ་དཱ་དྷི་ཀ་ར་ཎཾ ཨ་ནུ་ཝ་ད་མཱ་ནོ ཨཱ་པ་ཏྟིཾ ཨཱ་པ་ཛྫ་ཏི ཨཱ་པ་ཏྟཱ་དྷི་ཀ་ར་ཎཾ. ཏཱ་ཡ ཨཱ་པ་ཏྟི་ཡཱ ས་ངྒྷོ ཀ་མྨཾ ཀ་རོ་ཏི ཀི་ཙྩཱ་དྷི་ཀ་ར་ཎཾ. ཨེ་ཝཾ ཝི་ཝཱ་དཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི.
༣༡༥. ཨ་ནུ་ཝཱ་དཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི? ཨ་ནུ་ཝཱ་དཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ན ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི; ཨ་པི་ཙ, ཨ་ནུ་ཝཱ་དཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི. ཡ་ཐཱ ཀ་ཐཾ ཝི་ཡ? [ཙཱུ་ལ༹་ཝ. ༢༡༥; པ་རི. ༣༤༨ ཨཱ་ད་ཡོ] ཨི་དྷ བྷི་ཀྑཱུ བྷི་ཀྑུཾ ཨ་ནུ་ཝ་ད་ནྟི སཱི་ལ་ཝི་པ་ཏྟི་ཡཱ ཝཱ ཨཱ་ཙཱ་ར་ཝི་པ་ཏྟི་ཡཱ ཝཱ དི་ཊྛི་ཝི་པ་ཏྟི་ཡཱ ཝཱ ཨཱ་ཛཱི་ཝ་ཝི་པ་ཏྟི་ཡཱ ཝཱ. ཡོ ཏ་ཏྠ ཨ་ནུ་ཝཱ་དོ ཨ་ནུ་ཝ་ད་ནཱ ཨ་ནུ་ལླ་པ་ནཱ ཨ་ནུ་བྷ་ཎ་ནཱ ཨ་ནུ་ས་མྤ་ཝ་ངྐ་ཏཱ ཨ་བྦྷུ་སྶ་ཧ་ན་ཏཱ ཨ་ནུ་བ་ལ་པྤ་དཱ་ནཾ, ཨི་དཾ ཝུ་ཙྩ་ཏི ཨ་ནུ་ཝཱ་དཱ་དྷི་ཀ་ར་ཎཾ. ཨ་ནུ་ཝཱ་དཱ་དྷི་ཀ་ར་ཎེ ས་ངྒྷོ ཝི་ཝ་ད་ཏི. ཝི་ཝཱ་དཱ་དྷི་ཀ་ར་ཎཾ ཝི་ཝ་ད་མཱ་ནོ ཨ་ནུ་ཝ་ད་ཏི. ཨ་ནུ་ཝཱ་དཱ་དྷི་ཀ་ར་ཎཾ ཨ་ནུ་ཝ་ད་མཱ་ནོ ཨཱ་པ་ཏྟིཾ ཨཱ་པ་ཛྫ་ཏི ཨཱ་པ་ཏྟཱ་དྷི་ཀ་ར་ཎཾ. ཏཱ་ཡ ཨཱ་པ་ཏྟི་ཡཱ ས་ངྒྷོ ཀ་མྨཾ ཀ་རོ་ཏི ཀི་ཙྩཱ་དྷི་ཀ་ར་ཎཾ. ཨེ་ཝཾ ཨ་ནུ་ཝཱ་དཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི.
༣༡༦. ཨཱ་པ་ཏྟཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི? ཨཱ་པ་ཏྟཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ན ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི; ཨ་པི་ཙ, ཨཱ་པ་ཏྟཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི. ཡ་ཐཱ ཀ་ཐཾ ཝི་ཡ? པ་ཉྩ་པི ཨཱ་པ་ཏྟི་ཀྑ་ནྡྷཱ ཨཱ་པ་ཏྟཱ་དྷི་ཀ་ར་ཎཾ, ས་ཏྟ་པི ཨཱ་པ་ཏྟི་ཀྑ་ནྡྷཱ ཨཱ་པ་ཏྟཱ་དྷི་ཀ་ར་ཎཾ, ཨི་དཾ ཝུ་ཙྩ་ཏི ཨཱ་པ་ཏྟཱ་དྷི་ཀ་ར་ཎཾ. ཨཱ་པ་ཏྟཱ་དྷི་ཀ་ར་ཎེ ས་ངྒྷོ ཝི་ཝ་ད་ཏི. ཝི་ཝཱ་དཱ་དྷི་ཀ་ར་ཎཾ ཝི་ཝ་ད་མཱ་ནོ ཨ་ནུ་ཝ་ད་ཏི. ཨ་ནུ་ཝཱ་དཱ་དྷི་ཀ་ར་ཎཾ ཨ་ནུ་ཝ་ད་མཱ་ནོ ཨཱ་པ་ཏྟིཾ ཨཱ་པ་ཛྫ་ཏི ཨཱ་པ་ཏྟཱ་དྷི་ཀ་ར་ཎཾ. ཏཱ་ཡ ཨཱ་པ་ཏྟི་ཡཱ ས་ངྒྷོ ཀ་མྨཾ ཀ་རོ་ཏི ཀི་ཙྩཱ་དྷི་ཀ་ར་ཎཾ. ཨེ་ཝཾ ཨཱ་པ་ཏྟཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི.
༣༡༧. ཀི་ཙྩཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི? ཀི་ཙྩཱ་དྷི་ཀ་ར་ཎཾ ཙ་ཏུ་ནྣཾ ཨ་དྷི་ཀ་ར་ཎཱ་ནཾ ན ཀ་ཏ་མཾ ཨ་དྷི་ཀ་ར་ཎཾ ས་མུ་ཊྛཱ་པེ་ཏི, ཨ་པི་ཙ ཀི་ཙྩཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི. ཡ་ཐཱ ཀ་ཐཾ ཝི་ཡ? ཡཱ ས་ངྒྷ་སྶ ཀི་ཙྩ་ཡ་ཏཱ ཀ་ར་ཎཱི་ཡ་ཏཱ ཨ་པ་ལོ་ཀ་ན་ཀ་མྨཾ ཉ་ཏྟི་ཀ་མྨཾ ཉ་ཏྟི་དུ་ཏི་ཡ་ཀ་མྨཾ ཉ་ཏྟི་ཙ་ཏུ་ཏྠ་ཀ་མྨཾ, ཨི་དཾ ཝུ་ཙྩ་ཏི ཀི་ཙྩཱ་དྷི་ཀ་ར་ཎཾ. ཀི་ཙྩཱ་དྷི་ཀ་ར་ཎེ ས་ངྒྷོ ཝི་ཝ་ད་ཏི. ཝི་ཝཱ་དཱ་དྷི་ཀ་ར་ཎཾ ཝི་ཝ་ད་མཱ་ནོ ཨ་ནུ་ཝ་ད་ཏི. ཨ་ནུ་ཝཱ་དཱ་དྷི་ཀ་ར་ཎཾ ཨ་ནུ་ཝ་ད་མཱ་ནོ ཨཱ་པ་ཏྟིཾ ཨཱ་པ་ཛྫ་ཏི ཨཱ་པ་ཏྟཱ་དྷི་ཀ་ར་ཎཾ. ཏཱ་ཡ ཨཱ་པ་ཏྟི་ཡཱ ས་ངྒྷོ ཀ་མྨཾ ཀ་རོ་ཏི ཀི་ཙྩཱ་དྷི་ཀ་ར་ཎཾ. ཨེ་ཝཾ ཀི་ཙྩཱ་དྷི་ཀ་ར་ཎ་པ་ཙྩ་ཡཱ ཙ་ཏྟཱ་རོ ཨ་དྷི་ཀ་ར་ཎཱ ཛཱ་ཡ་ནྟི.
ས་མུ་ཊྛཱ་པ་ན་ཝཱ་རོ ནི་ཊྛི་ཏོ ཝཱི་ས་ཏི་མོ.