༡༦. སཾ་ས་ཊྛ་ཝཱ་རོ

༣༠༦. ཨ་དྷི་ཀ་ར་ཎ་ནྟི ཝཱ ས་མ་ཐཱ་ཏི ཝཱ ཨི་མེ དྷ་མྨཱ སཾ་ས་ཊྛཱ ཨུ་དཱ་ཧུ ཝི་སཾ་ས་ཊྛཱ? ལ་བྦྷཱ ཙ པ་ནི་མེ་སཾ དྷ་མྨཱ་ནཾ ཝི་ནི་བྦྷུ་ཛི་ཏྭཱ ཝི་ནི་བྦྷུ་ཛི་ཏྭཱ [ཝི་ནི་བྦྷུ་ཛྫི་ཏྭཱ ཝི་ནི་བྦྷུ་ཛྫི་ཏྭཱ (ཀ.), ཊཱི་ཀཱ་ཡཾ ཨེ་ཀ་པ་ད་མེ་ཝ དི་སྶ་ཏི] ནཱ་ནཱ་ཀ་ར་ཎཾ པ་ཉྙཱ་པེ་ཏུ་ནྟི?

ཨ་དྷི་ཀ་ར་ཎ་ནྟི ཝཱ ས་མ་ཐཱ་ཏི ཝཱ ཨི་མེ དྷ་མྨཱ ཝི་སཾ་ས་ཊྛཱ, ནོ སཾ་ས་ཊྛཱ. ལ་བྦྷཱ ཙ པ་ནི་མེ་སཾ དྷ་མྨཱ་ནཾ ཝི་ནི་བྦྷུ་ཛི་ཏྭཱ ཝི་ནི་བྦྷུ་ཛི་ཏྭཱ ནཱ་ནཱ་ཀ་ར་ཎཾ པ་ཉྙཱ་པེ་ཏུ་ནྟི. སོ – ‘‘མཱ ཧེ་ཝ’’ནྟི་སྶ ཝ་ཙ་ནཱི་ཡོ. ཨ་དྷི་ཀ་ར་ཎ་ནྟི ཝཱ ས་མ་ཐཱ་ཏི ཝཱ ཨི་མེ དྷ་མྨཱ སཾ་ས་ཊྛཱ, ནོ ཝི་སཾ་ས་ཊྛཱ. ནོ ཙ ལ་བྦྷཱ [ན ཙ ལ་བྦྷཱ (ཀ.)] ཨི་མེ་སཾ དྷ་མྨཱ་ནཾ ཝི་ནི་བྦྷུ་ཛི་ཏྭཱ ཝི་ནི་བྦྷུ་ཛི་ཏྭཱ ནཱ་ནཱ་ཀ་ར་ཎཾ པ་ཉྙཱ་པེ་ཏུཾ. ཏཾ ཀི་སྶ ཧེ་ཏུ? ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཨ་དྷི་ཀ་ར་ཎཱ་ནི, ས་ཏྟ ས་མ་ཐཱ. ཨ་དྷི་ཀ་ར་ཎཱ ས་མ་ཐེ་ཧི ས་མྨ་ནྟི, ས་མ་ཐཱ ཨ་དྷི་ཀ་ར་ཎེ་ཧི ས་མྨ་ནྟི. ཨེ་ཝཾ, ཨི་མེ དྷ་མྨཱ སཾ་ས་ཊྛཱ ནོ ཝི་སཾ་ས་ཊྛཱ; ནོ ཙ ལ་བྦྷཱ ཨི་མེ་སཾ དྷ་མྨཱ་ནཾ ཝི་ནི་བྦྷུ་ཛི་ཏྭཱ ཝི་ནི་བྦྷུ་ཛི་ཏྭཱ ནཱ་ནཱ་ཀ་ར་ཎཾ པ་ཉྙཱ་པེ་ཏུ’’ནྟི.

སཾ་ས་ཊྛ་ཝཱ་རོ ནི་ཊྛི་ཏོ སོ་ལ༹་ས་མོ.