༡. ཀ་མྨ་ཝ་གྒོ
༤༨༢. ཙ་ཏྟཱ་རི ཀ་མྨཱ་ནི. ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ – ཨི་མཱ་ནི ཙ་ཏྟཱ་རི ཀ་མྨཱ་ནི. ཀ་ཏི་ཧཱ་ཀཱ་རེ་ཧི ཝི་པ་ཛྫ་ནྟི? ཨི་མཱ་ནི ཙ་ཏྟཱ་རི ཀ་མྨཱ་ནི པ་ཉྩ་ཧཱ་ཀཱ་རེ་ཧི ཝི་པ་ཛྫ་ནྟི – ཝ་ཏྠུ་ཏོ ཝཱ ཉ་ཏྟི་ཏོ ཝཱ ཨ་ནུ་སྶཱ་ཝ་ན་ཏོ ཝཱ སཱི་མ་ཏོ ཝཱ པ་རི་ས་ཏོ ཝཱ.
༤༨༣. ཀ་ཐཾ ཝ་ཏྠུ་ཏོ ཀ་མྨཱ་ནི ཝི་པ་ཛྫ་ནྟི? ས་མྨུ་ཁཱ་ཀ་ར་ཎཱི་ཡཾ ཀ་མྨཾ ཨ་ས་མྨུ་ཁཱ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; པ་ཊི་པུ་ཙྪཱ་ཀ་ར་ཎཱི་ཡཾ ཀ་མྨཾ ཨ་པ་ཊི་པུ་ཙྪཱ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; པ་ཊི་ཉྙཱ་ཡ ཀ་ར་ཎཱི་ཡཾ ཀ་མྨཾ ཨ་པ་ཊི་ཉྙཱ་ཡ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ས་ཏི་ཝི་ན་ཡཱ་ར་ཧ་སྶ ཨ་མཱུ་ལ༹ྷ་ཝི་ན་ཡཾ དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཨ་མཱུ་ལ༹ྷ་ཝི་ན་ཡཱ་ར་ཧ་སྶ ཏ་སྶ་པཱ་པི་ཡ་སི་ཀཱ་ཀ་མྨཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཏ་སྶ་པཱ་པི་ཡ་སི་ཀཱ་ཀ་མྨཱ་ར་ཧ་སྶ ཏ་ཛྫ་ནཱི་ཡ་ཀ་མྨཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཏ་ཛྫ་ནཱི་ཡ་ཀ་མྨཱ་ར་ཧ་སྶ ནི་ཡ་སྶ་ཀ་མྨཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ནི་ཡ་སྶ་ཀ་མྨཱ་ར་ཧ་སྶ པ་བྦཱ་ཛ་ནཱི་ཡ་ཀ་མྨཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; པ་བྦཱ་ཛ་ནཱི་ཡ་ཀ་མྨཱ་ར་ཧ་སྶ པ་ཊི་སཱ་ར་ཎཱི་ཡ་ཀ་མྨཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; པ་ཊི་སཱ་ར་ཎཱི་ཡ་ཀ་མྨཱ་ར་ཧ་སྶ ཨུ་ཀྑེ་པ་ནཱི་ཡ་ཀ་མྨཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཨུ་ཀྑེ་པ་ནཱི་ཡ་ཀ་མྨཱ་ར་ཧ་སྶ པ་རི་ཝཱ་སཾ དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; པ་རི་ཝཱ་སཱ་ར་ཧཾ མཱུ་ལཱ་ཡ པ་ཊི་ཀ་སྶ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; མཱུ་ལཱ་ཡ་པ་ཊི་ཀ་སྶ་ནཱ་ར་ཧ་སྶ མཱ་ན་ཏྟཾ དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; མཱ་ན་ཏྟཱ་ར་ཧཾ ཨ་བྦྷེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཨ་བྦྷཱ་ནཱ་ར་ཧཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཨ་ནུ་པོ་ས་ཐེ ཨུ་པོ་ས་ཐཾ ཀ་རོ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ; ཨ་པ་ཝཱ་ར་ཎཱ་ཡ པ་ཝཱ་རེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཨེ་ཝཾ ཝ་ཏྠུ་ཏོ ཀ་མྨཱ་ནི ཝི་པ་ཛྫ་ནྟི.
༤༨༤. ཀ་ཐཾ ཉ་ཏྟི་ཏོ ཀ་མྨཱ་ནི ཝི་པ་ཛྫ་ནྟི? པ་ཉྩ་ཧཱ་ཀཱ་རེ་ཧི ཉ་ཏྟི་ཏོ ཀ་མྨཱ་ནི ཝི་པ་ཛྫ་ནྟི – ཝ་ཏྠུཾ ན པ་རཱ་མ་ས་ཏི, ས་ངྒྷཾ ན པ་རཱ་མ་ས་ཏི, པུ་གྒ་ལཾ ན པ་རཱ་མ་ས་ཏི, ཉ་ཏྟིཾ ན པ་རཱ་མ་ས་ཏི, པ་ཙྪཱ ཝཱ ཉ་ཏྟིཾ ཋ་པེ་ཏི – ཨི་མེ་ཧི པ་ཉྩ་ཧཱ་ཀཱ་རེ་ཧི ཉ་ཏྟི་ཏོ ཀ་མྨཱ་ནི ཝི་པ་ཛྫ་ནྟི.
༤༨༥. ཀ་ཐཾ ཨ་ནུ་སྶཱ་ཝ་ན་ཏོ ཀ་མྨཱ་ནི ཝི་པ་ཛྫ་ནྟི? པ་ཉྩ་ཧཱ་ཀཱ་རེ་ཧི ཨ་ནུ་སྶཱ་ཝ་ན་ཏོ ཀ་མྨཱ་ནི ཝི་པ་ཛྫ་ནྟི – ཝ་ཏྠུཾ ན པ་རཱ་མ་ས་ཏི, ས་ངྒྷཾ ན པ་རཱ་མ་ས་ཏི, པུ་གྒ་ལཾ ན པ་རཱ་མ་ས་ཏི, སཱ་ཝ་ནཾ ཧཱ་པེ་ཏི, ཨ་ཀཱ་ལེ ཝཱ སཱ་ཝེ་ཏི – ཨི་མེ་ཧི པ་ཉྩ་ཧཱ་ཀཱ་རེ་ཧི ཨ་ནུ་སྶཱ་ཝ་ན་ཏོ ཀ་མྨཱ་ནི ཝི་པ་ཛྫ་ནྟི.
༤༨༦. ཀ་ཐཾ སཱི་མ་ཏོ ཀ་མྨཱ་ནི ཝི་པ་ཛྫ་ནྟི? ཨེ་ཀཱ་ད་ས་ཧི ཨཱ་ཀཱ་རེ་ཧི སཱི་མ་ཏོ ཀ་མྨཱ་ནི ཝི་པ་ཛྫ་ནྟི – ཨ་ཏི་ཁུ་དྡ་ཀཾ སཱི་མཾ ས་མྨ་ནྣ་ཏི, ཨ་ཏི་མ་ཧ་ཏིཾ སཱི་མཾ ས་མྨ་ནྣ་ཏི, ཁ་ཎྜ་ནི་མི་ཏྟཾ སཱི་མཾ ས་མྨ་ནྣ་ཏི, ཚཱ་ཡཱ་ནི་མི་ཏྟཾ སཱི་མཾ ས་མྨ་ནྣ་ཏི, ཨ་ནི་མི་ཏྟཾ སཱི་མཾ ས་མྨ་ནྣ་ཏི, བ་ཧི་སཱི་མེ ཋི་ཏོ སཱི་མཾ ས་མྨ་ནྣ་ཏི, ན་དི་ཡཱ སཱི་མཾ ས་མྨ་ནྣ་ཏི, ས་མུ་དྡེ སཱི་མཾ ས་མྨ་ནྣ་ཏི, ཛཱ་ཏ་སྶ་རེ སཱི་མཾ ས་མྨ་ནྣ་ཏི, སཱི་མཱ་ཡ སཱི་མཾ ས་མྦྷི་ནྡ་ཏི, སཱི་མཱ་ཡ སཱི་མཾ ཨ་ཛ྄ཛྷོ་ཏྠ་ར་ཏི – ཨི་མེ་ཧི ཨེ་ཀཱ་ད་ས་ཧི ཨཱ་ཀཱ་རེ་ཧི སཱི་མ་ཏོ ཀ་མྨཱ་ནི ཝི་པ་ཛྫ་ནྟི.
༤༨༧. ཀ་ཐཾ པ་རི་ས་ཏོ ཀ་མྨཱ་ནི ཝི་པ་ཛྫ་ནྟི? དྭཱ་ད་ས་ཧི ཨཱ་ཀཱ་རེ་ཧི པ་རི་ས་ཏོ ཀ་མྨཱ་ནི ཝི་པ་ཛྫ་ནྟི – ཙ་ཏུ་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨ་ནཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི, ཙ་ཏུ་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི, ཙ་ཏུ་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི. པ་ཉྩ་ཝ་གྒ་ཀ་ར་ཎེ ཀ་མྨེ…པེ… ད་ས་ཝ་གྒ་ཀ་ར་ཎེ ཀ་མྨེ…པེ… ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨ་ནཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི, ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ, ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི, ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ, ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨཱ་ཧ་ཊོ ཧོ་ཏི ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི – ཨི་མེ་ཧི དྭཱ་ད་ས་ཧི ཨཱ་ཀཱ་རེ་ཧི པ་རི་ས་ཏོ ཀ་མྨཱ་ནི ཝི་པ་ཛྫ་ནྟི.
༤༨༨. ཙ་ཏུ་ཝ་གྒ་ཀ་ར་ཎེ ཀ་མྨེ ཙ་ཏྟཱ་རོ བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ. པ་ཉྩ་ཝ་གྒ་ཀ་ར་ཎེ ཀ་མྨེ པ་ཉྩ བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ. ད་ས་ཝ་གྒ་ཀ་ར་ཎེ ཀ་མྨེ ད་ས བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ. ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཝཱི་ས་ཏི བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ.
༤༨༩. ཙ་ཏྟཱ་རི ཀ་མྨཱ་ནི – ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ. ཨི་མཱ་ནི ཙ་ཏྟཱ་རི ཀ་མྨཱ་ནི ཀ་ཏི་ཧཱ་ཀཱ་རེ་ཧི ཝི་པ་ཛྫ་ནྟི? ཨི་མཱ་ནི ཙ་ཏྟཱ་རི ཀ་མྨཱ་ནི པ་ཉྩ་ཧཱ་ཀཱ་རེ་ཧི ཝི་པ་ཛྫ་ནྟི – ཝ་ཏྠུ་ཏོ ཝཱ ཉ་ཏྟི་ཏོ ཝཱ ཨ་ནུ་སྶཱ་ཝ་ན་ཏོ ཝཱ སཱི་མ་ཏོ ཝཱ པ་རི་ས་ཏོ ཝཱ.
༤༩༠. ཀ་ཐཾ ཝ་ཏྠུ་ཏོ ཀ་མྨཱ་ནི ཝི་པ་ཛྫ་ནྟི? པ་ཎྜ་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཐེ་ཡྻ་སཾ་ཝཱ་ས་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཏི་ཏྠི་ཡ་པ་ཀྐ་ནྟ་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཏི་ར་ཙྪཱ་ན་ག་ཏཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. མཱ་ཏུ་གྷཱ་ཏ་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. པི་ཏུ་གྷཱ་ཏ་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཨ་ར་ཧ་ནྟ་གྷཱ་ཏ་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. བྷི་ཀྑུ་ནི་དཱུ་ས་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ས་ངྒྷ་བྷེ་ད་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ལོ་ཧི་ཏུ་པྤཱ་ད་ཀཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཨུ་བྷ་ཏོ་བྱ་ཉྫ་ནཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཨཱུ་ན་ཝཱི་ས་ཏི་ཝ་སྶཾ པུ་གྒ་ལཾ ཨུ་པ་ས་མྤཱ་དེ་ཏི, ཝ་ཏྠུ་ཝི་པ་ནྣཾ ཨ་དྷ་མྨ་ཀ་མྨཾ. ཨེ་ཝཾ ཝ་ཏྠུ་ཏོ ཀ་མྨཱ་ནི ཝི་པ་ཛྫ་ནྟི.
༤༩༡. ཀ་ཐཾ ཉ་ཏྟི་ཏོ ཀ་མྨཱ་ནི ཝི་པ་ཛྫ་ནྟི? པ་ཉྩ་ཧཱ་ཀཱ་རེ་ཧི ཉ་ཏྟི་ཏོ ཀ་མྨཱ་ནི ཝི་པ་ཛྫ་ནྟི. ཝ་ཏྠུཾ ན པ་རཱ་མ་ས་ཏི, ས་ངྒྷཾ ན པ་རཱ་མ་ས་ཏི, པུ་གྒ་ལཾ ན པ་རཱ་མ་ས་ཏི, ཉ་ཏྟིཾ ན པ་རཱ་མ་ས་ཏི, པ་ཙྪཱ ཝཱ ཉ་ཏྟིཾ ཋ་པེ་ཏི – ཨི་མེ་ཧི པ་ཉྩ་ཧཱ་ཀཱ་རེ་ཧི ཉ་ཏྟི་ཏོ ཀ་མྨཱ་ནི ཝི་པ་ཛྫ་ནྟི.
༤༩༢. ཀ་ཐཾ ཨ་ནུ་སྶཱ་ཝ་ན་ཏོ ཀ་མྨཱ་ནི ཝི་པ་ཛྫ་ནྟི? པ་ཉྩ་ཧཱ་ཀཱ་རེ་ཧི ཨ་ནུ་སྶཱ་ཝ་ན་ཏོ ཀ་མྨཱ་ནི ཝི་པ་ཛྫ་ནྟི – ཝ་ཏྠུཾ ན པ་རཱ་མ་ས་ཏི, ས་ངྒྷཾ ན པ་རཱ་མ་ས་ཏི, པུ་གྒ་ལཾ ན པ་རཱ་མ་ས་ཏི, སཱ་ཝ་ནཾ ཧཱ་པེ་ཏི, ཨ་ཀཱ་ལེ ཝཱ སཱ་ཝེ་ཏི – ཨི་མེ་ཧི པ་ཉྩ་ཧཱ་ཀཱ་རེ་ཧི ཨ་ནུ་སྶཱ་ཝ་ན་ཏོ ཀ་མྨཱ་ནི ཝི་པ་ཛྫ་ནྟི.
༤༩༣. ཀ་ཐཾ སཱི་མ་ཏོ ཀ་མྨཱ་ནི ཝི་པ་ཛྫ་ནྟི? ཨེ་ཀཱ་ད་ས་ཧི ཨཱ་ཀཱ་རེ་ཧི སཱི་མ་ཏོ ཀ་མྨཱ་ནི ཝི་པ་ཛྫ་ནྟི. ཨ་ཏི་ཁུ་དྡ་ཀཾ སཱི་མཾ ས་མྨ་ནྣ་ཏི, ཨ་ཏི་མ་ཧ་ཏིཾ སཱི་མཾ ས་མྨ་ནྣ་ཏི, ཁ་ཎྜ་ནི་མི་ཏྟཾ སཱི་མཾ ས་མྨ་ནྣ་ཏི, ཚཱ་ཡཱ་ནི་མི་ཏྟཾ སཱི་མཾ ས་མྨ་ནྣ་ཏི, ཨ་ནི་མི་ཏྟཾ སཱི་མཾ ས་མྨ་ནྣ་ཏི, བ་ཧི་སཱི་མེ ཋི་ཏོ སཱི་མཾ ས་མྨ་ནྣ་ཏི, ན་དི་ཡཱ སཱི་མཾ ས་མྨ་ནྣ་ཏི, ས་མུ་དྡེ སཱི་མཾ ས་མྨ་ནྣ་ཏི, ཛཱ་ཏ་སྶ་རེ སཱི་མཾ ས་མྨ་ནྣ་ཏི, སཱི་མཱ་ཡ སཱི་མཾ ས་མྦྷི་ནྡ་ཏི, སཱི་མཱ་ཡ སཱི་མཾ ཨ་ཛ྄ཛྷོ་ཏྠ་ར་ཏི – ཨི་མེ་ཧི ཨེ་ཀཱ་ད་ས་ཧི ཨཱ་ཀཱ་རེ་ཧི སཱི་མ་ཏོ ཀ་མྨཱ་ནི ཝི་པ་ཛྫ་ནྟི.
༤༩༤. ཀ་ཐཾ པ་རི་ས་ཏོ ཀ་མྨཱ་ནི ཝི་པ་ཛྫ་ནྟི? དྭཱ་ད་ས་ཧི ཨཱ་ཀཱ་རེ་ཧི པ་རི་ས་ཏོ ཀ་མྨཱ་ནི ཝི་པ་ཛྫ་ནྟི – ཙ་ཏུ་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨ་ནཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི, ཙ་ཏུ་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི. ཙ་ཏུ་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨཱ་ཧ་ཊོ ཧོ་ཏི ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི. པ་ཉྩ་ཝ་གྒ་ཀ་ར་ཎེ ཀ་མྨེ…པེ… ད་ས་ཝ་གྒ་ཀ་ར་ཎེ ཀ་མྨེ…པེ… ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨ་ནཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི. ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨ་ནཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི. ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཡཱ་ཝ་ཏི་ཀཱ བྷི་ཀྑཱུ ཀ་མྨ་པ་ཏྟཱ ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ པ་ཊི་ཀྐོ་ས་ནྟི – ཨི་མེ་ཧི དྭཱ་ད་ས་ཧི ཨཱ་ཀཱ་རེ་ཧི པ་རི་ས་ཏོ ཀ་མྨཱ་ནི ཝི་པ་ཛྫ་ནྟི.
༤༩༥. ཨ་པ་ལོ་ཀ་ན་ཀ་མྨཾ ཀ་ཏི ཋཱ་ནཱ་ནི ག་ཙྪ་ཏི? ཉ་ཏྟི་ཀ་མྨཾ ཀ་ཏི ཋཱ་ནཱ་ནི ག་ཙྪ་ཏི? ཉ་ཏྟི་དུ་ཏི་ཡ་ཀ་མྨཾ ཀ་ཏི ཋཱ་ནཱ་ནི ག་ཙྪ་ཏི? ཉ་ཏྟི་ཙ་ཏུ་ཏྠ་ཀ་མྨཾ ཀ་ཏི ཋཱ་ནཱ་ནི ག་ཙྪ་ཏི? ཨ་པ་ལོ་ཀ་ན་ཀ་མྨཾ པ་ཉྩ ཋཱ་ནཱ་ནི ག་ཙྪ་ཏི. ཉ་ཏྟི་ཀ་མྨཾ ན་ཝ ཋཱ་ནཱ་ནི ག་ཙྪ་ཏི. ཉ་ཏྟི་དུ་ཏི་ཡ་ཀ་མྨཾ ས་ཏྟ ཋཱ་ནཱ་ནི ག་ཙྪ་ཏི. ཉ་ཏྟི་ཙ་ཏུ་ཏྠ་ཀ་མྨཾ ས་ཏྟ ཋཱ་ནཱ་ནི ག་ཙྪ་ཏི.
༤༩༦. ཨ་པ་ལོ་ཀ་ན་ཀ་མྨཾ ཀ་ཏ་མཱ་ནི པ་ཉྩ ཋཱ་ནཱ་ནི ག་ཙྪ་ཏི? ཨོ་སཱ་ར་ཎཾ, ནི་སྶཱ་ར་ཎཾ, བྷ་ཎྜུ་ཀ་མྨཾ, བྲ་ཧྨ་ད་ཎྜཾ, ཀ་མྨ་ལ་ཀྑ་ཎ་ཉྙེ་ཝ པ་ཉྩ་མཾ – ཨ་པ་ལོ་ཀ་ན་ཀ་མྨཾ ཨི་མཱ་ནི པ་ཉྩ ཋཱ་ནཱ་ནི ག་ཙྪ་ཏི. ཉ་ཏྟི་ཀ་མྨཾ ཀ་ཏ་མཱ་ནི ན་ཝ ཋཱ་ནཱ་ནི ག་ཙྪ་ཏི? ཨོ་སཱ་ར་ཎཾ, ནི་སྶཱ་ར་ཎཾ, ཨུ་པོ་ས་ཐཾ, པ་ཝཱ་ར་ཎཾ, ས་མྨུ་ཏིཾ, དཱ་ནཾ, པ་ཊི་གྒ་ཧཾ, པ་ཙྩུ་ཀྐ་ཌྜྷ་ནཾ, ཀ་མྨ་ལ་ཀྑ་ཎ་ཉྙེ་ཝ ན་ཝ་མཾ – ཉ་ཏྟི་ཀ་མྨཾ ཨི་མཱ་ནི ན་ཝ ཋཱ་ནཱ་ནི ག་ཙྪ་ཏི. ཉ་ཏྟི་དུ་ཏི་ཡ་ཀ་མྨཾ ཀ་ཏ་མཱ་ནི ས་ཏྟ ཋཱ་ནཱ་ནི ག་ཙྪ་ཏི? ཨོ་སཱ་ར་ཎཾ, ནི་སྶཱ་ར་ཎཾ, ས་མྨུ་ཏིཾ, དཱ་ནཾ, ཨུ་དྡྷ་ར་ཎཾ, དེ་ས་ནཾ, ཀ་མྨ་ལ་ཀྑ་ཎ་ཉྙེ་ཝ ས་ཏྟ་མཾ – ཉ་ཏྟི་དུ་ཏི་ཡ་ཀ་མྨཾ ཨི་མཱ་ནི ས་ཏྟ ཋཱ་ནཱ་ནི ག་ཙྪ་ཏི. ཉ་ཏྟི་ཙ་ཏུ་ཏྠ་ཀ་མྨཾ ཀ་ཏ་མཱ་ནི ས་ཏྟ ཋཱ་ནཱ་ནི ག་ཙྪ་ཏི? ཨོ་སཱ་ར་ཎཾ, ནི་སྶཱ་ར་ཎཾ, ས་མྨུ་ཏིཾ, དཱ་ནཾ, ནི་གྒ་ཧཾ, ས་མ་ནུ་བྷཱ་ས་ནཾ, ཀ་མྨ་ལ་ཀྑ་ཎ་ཉྙེ་ཝ ས་ཏྟ་མཾ – ཉ་ཏྟི་ཙ་ཏུ་ཏྠ་ཀ་མྨཾ ཨི་མཱ་ནི ས་ཏྟ ཋཱ་ནཱ་ནི ག་ཙྪ་ཏི.
༤༩༧. ཙ་ཏུ་ཝ་གྒ་ཀ་ར་ཎེ ཀ་མྨེ ཙ་ཏྟཱ་རོ བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ. པ་ཉྩ་ཝ་གྒ་ཀ་ར་ཎེ ཀ་མྨེ པ་ཉྩ བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ. ད་ས་ཝ་གྒ་ཀ་ར་ཎེ ཀ་མྨེ ད་ས བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ. ཝཱི་ས་ཏི་ཝ་གྒ་ཀ་ར་ཎེ ཀ་མྨེ ཝཱི་ས་ཏི བྷི་ཀྑཱུ པ་ཀ་ཏ་ཏྟཱ ཀ་མྨ་པ་ཏྟཱ, ཨ་ཝ་སེ་སཱ པ་ཀ་ཏ་ཏྟཱ ཚ་ནྡཱ་ར་ཧཱ. ཡ་སྶ ས་ངྒྷོ ཀ་མྨཾ ཀ་རོ་ཏི སོ ནེ་ཝ ཀ་མྨ་པ་ཏྟོ ནཱ་པི ཚ་ནྡཱ་ར་ཧོ, ཨ་པི ཙ ཀ་མྨཱ་ར་ཧོ.
ཀ་མྨ་ཝ་གྒོ ནི་ཊྛི་ཏོ པ་ཋ་མོ.