༡. ཨ་ཝི་པྤ་ཝཱ་ས་པ་ཉྷཱ
༤༧༩. ཨ་སཾ་ཝཱ་སོ བྷི་ཀྑཱུ་ཧི ཙ བྷི་ཀྑུ་ནཱི་ཧི ཙ;
ས་མྦྷོ་གོ ཨེ་ཀ་ཙྩོ ཏ་ཧིཾ ན ལ་བྦྷ་ཏི;
ཨ་ཝི་པྤ་ཝཱ་སེ་ན ཨ་ནཱ་པ་ཏྟི;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ཨ་ཝི་སྶ་ཛྫི་ཡཾ ཨ་ཝེ་བྷ་ངྒི་ཡཾ;
པ་ཉྩ ཝུ་ཏྟཱ མ་ཧེ་སི་ནཱ;
ཝི་སྶ་ཛྫ་ནྟ་སྶ པ་རི་བྷུ་ཉྫ་ནྟ་སྶ ཨ་ནཱ་པ་ཏྟི;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ད་ས པུ་གྒ་ལེ ན ཝ་དཱ་མི, ཨེ་ཀཱ་ད་ས ཝི་ཝ་ཛྫི་ཡ;
ཝུ་ཌྜྷཾ ཝ་ནྡ་ནྟ་སྶ ཨཱ་པ་ཏྟི, པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ན ཨུ་ཀྑི་ཏྟ་ཀོ ན ཙ པ་ན པཱ་རི་ཝཱ་སི་ཀོ;
ན ས་ངྒྷ་བྷི་ནྣོ ན ཙ པ་ན པ་ཀྑ་ས་ངྐ་ནྟོ;
ས་མཱ་ན་སཾ་ཝཱ་ས་ཀ་བྷཱུ་མི་ཡཱ ཋི་ཏོ;
ཀ་ཐཾ ནུ སི་ཀྑཱ་ཡ ཨ་སཱ་དྷཱ་ར་ཎོ སི་ཡཱ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ཨུ་པེ་ཏི དྷ་མྨཾ པ་རི་པུ་ཙྪ་མཱ་ནོ, ཀུ་ས་ལཾ ཨ་ཏྠཱུ་པ་ས་ཉྷི་ཏཾ;
ན ཛཱི་ཝ་ཏི ན མ་ཏོ ན ནི་བྦུ་ཏོ, ཏཾ པུ་གྒ་ལཾ ཀ་ཏ་མཾ ཝ་ད་ནྟི བུ་དྡྷཱ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ཨུ་བྦྷ་ཀྑ་ཀེ ན ཝ་དཱ་མི, ཨ་དྷོ ནཱ་བྷིཾ ཝི་ཝ་ཛྫི་ཡ;
མེ་ཐུ་ན་དྷ་མྨ་པ་ཙྩ་ཡཱ, ཀ་ཐཾ པཱ་རཱ་ཛི་ཀོ སི་ཡཱ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
བྷི་ཀྑུ ས་ཉྙཱ་ཙི་ཀཱ་ཡ ཀུ་ཊིཾ ཀ་རོ་ཏི;
ཨ་དེ་སི་ཏ་ཝ་ཏྠུ་ཀཾ པ་མཱ་ཎཱ་ཏི་ཀྐ་ནྟཾ;
སཱ་ར་མྦྷཾ ཨ་པ་རི་ཀྐ་མ་ནཾ ཨ་ནཱ་པ་ཏྟི;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
བྷི་ཀྑུ ས་ཉྙཱ་ཙི་ཀཱ་ཡ ཀུ་ཊིཾ ཀ་རོ་ཏི;
དེ་སི་ཏ་ཝ་ཏྠུ་ཀཾ པ་མཱ་ཎི་ཀཾ;
ཨ་ནཱ་ར་མྦྷཾ ས་པ་རི་ཀྐ་མ་ནཾ ཨཱ་པ་ཏྟི;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ན ཀཱ་ཡི་ཀཾ ཀི་ཉྩི པ་ཡོ་ག་མཱ་ཙ་རེ;
ན ཙཱ་པི ཝཱ་ཙཱ་ཡ པ་རེ བྷ་ཎེ་ཡྻ;
ཨཱ་པ་ཛྫེ་ཡྻ ག་རུ་ཀཾ ཚེ་ཛྫ་ཝ་ཏྠུཾ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ན ཀཱ་ཡི་ཀཾ ཝཱ་ཙ་སི་ཀ་ཉྩ ཀི་ཉྩི;
མ་ན་སཱ་པི ས་ནྟོ ན ཀ་རེ་ཡྻ པཱ་པཾ;
སོ ནཱ་སི་ཏོ ཀི་ནྟི སུ་ནཱ་སི་ཏོ བྷ་ཝེ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ཨ་ནཱ་ལ་པ་ནྟོ མ་ནུ་ཛེ་ན ཀེ་ན་ཙི;
ཝཱ་ཙཱ་གི་རཾ ནོ ཙ པ་རེ བྷ་ཎེ་ཡྻ;
ཨཱ་པ་ཛྫེ་ཡྻ ཝཱ་ཙ་སི་ཀཾ ན ཀཱ་ཡི་ཀཾ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
སི་ཀྑཱ་པ་དཱ བུ་དྡྷ་ཝ་རེ་ན ཝ་ཎྞི་ཏཱ;
ས་ངྒྷཱ་དི་སེ་སཱ ཙ་ཏུ་རོ བྷ་ཝེ་ཡྻུཾ;
ཨཱ་པ་ཛྫེ་ཡྻ ཨེ་ཀ་པ་ཡོ་གེ་ན ས་བྦེ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ཨུ་བྷོ ཨེ་ཀ་ཏོ ཨུ་པ་ས་མྤ་ནྣཱ;
ཨུ་བྷི་ནྣཾ ཧ་ཏྠ་ཏོ ཙཱི་ཝ་རཾ པ་ཊི་གྒ་ཎྷེ་ཡྻ;
སི་ཡཱ ཨཱ་པ་ཏྟི་ཡོ ནཱ་ནཱ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.
ཙ་ཏུ་རོ ཛ་ནཱ སཾ་ཝི་དྷཱ་ཡ;
ག་རུ་བྷ་ཎྜཾ ཨ་ཝཱ་ཧ་རུཾ;
ཏ་ཡོ པཱ་རཱ་ཛི་ཀཱ ཨེ་ཀོ ན པཱ་རཱ་ཛི་ཀོ;
པ་ཉྷཱ མེ་སཱ ཀུ་ས་ལེ་ཧི ཙི་ནྟི་ཏཱ.