༡. པཱ་རཱ་ཛི་ཀ་ཀ་ཎྜཾ

༡. ཡཾ ཏེ་ན བྷ་ག་ཝ་ཏཱ ཛཱ་ན་ཏཱ པ་སྶ་ཏཱ ཨ་ར་ཧ་ཏཱ ས་མྨཱ་ས་མྦུ་དྡྷེ་ན པ་ཋ་མཾ པཱ་རཱ་ཛི་ཀཾ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ, ཀི་སྨིཾ ཝ་ཏྠུ་སྨིཾ? ཨ་ཏྠི ཏ་ཏྠ པ་ཉྙ་ཏྟི, ཨ་ནུ་པ་ཉྙ་ཏྟི, ཨ་ནུ་པྤ་ནྣ་པ་ཉྙ་ཏྟི? ས་བྦ་ཏྠ་པ་ཉྙ་ཏྟི, པ་དེ་ས་པ་ཉྙ་ཏྟི? སཱ་དྷཱ་ར་ཎ་པ་ཉྙ་ཏྟི, ཨ་སཱ་དྷཱ་ར་ཎ་པ་ཉྙ་ཏྟི? ཨེ་ཀ་ཏོ་པ་ཉྙ་ཏྟི, ཨུ་བྷ་ཏོ་པ་ཉྙ་ཏྟི? པ་ཉྩ་ནྣཾ པཱ་ཏི་མོ་ཀྑུ་དྡེ་སཱ་ནཾ ཀ་ཏྠོ་ག་དྷཾ ཀ་ཏྠ པ་རི་ཡཱ་པ་ནྣཾ? ཀ་ཏ་མེ་ན ཨུ་དྡེ་སེ་ན ཨུ་དྡེ་སཾ ཨཱ་ག་ཙྪ་ཏི? ཙ་ཏུ་ནྣཾ ཝི་པ་ཏྟཱི་ནཾ ཀ་ཏ་མཱ ཝི་པ་ཏྟི? ས་ཏྟ་ནྣཾ ཨཱ་པ་ཏྟི་ཀྑ་ནྡྷཱ་ནཾ ཀ་ཏ་མོ ཨཱ་པ་ཏྟི་ཀྑ་ནྡྷོ? ཚ་ནྣཾ ཨཱ་པ་ཏྟི་ས་མུ་ཊྛཱ་ནཱ་ནཾ ཀ་ཏི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏི? ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏ་མཾ ཨ་དྷི་ཀ་ར་ཎཾ? ས་ཏྟ་ནྣཾ ས་མ་ཐཱ་ནཾ ཀ་ཏི་ཧི ས་མ་ཐེ་ཧི ས་མྨ་ཏི? ཀོ ཏ་ཏྠ ཝི་ན་ཡོ, ཀོ ཏ་ཏྠ ཨ་བྷི་ཝི་ན་ཡོ? ཀིཾ ཏ་ཏྠ པཱ་ཏི་མོ་ཀྑཾ, ཀིཾ ཏ་ཏྠ ཨ་དྷི་པཱ་ཏི་མོ་ཀྑཾ? ཀཱ ཝི་པ་ཏྟི? ཀཱ ས་མྤ་ཏྟི? ཀཱ པ་ཊི་པ་ཏྟི? ཀ་ཏི ཨ་ཏྠ་ཝ་སེ པ་ཊི་ཙྩ བྷ་ག་ཝ་ཏཱ པ་ཋ་མཾ པཱ་རཱ་ཛི་ཀཾ པ་ཉྙ་ཏྟཾ? ཀེ སི་ཀྑ་ནྟི? ཀེ སི་ཀྑི་ཏ་སི་ཀྑཱ? ཀ་ཏྠ ཋི་ཏཾ? ཀེ དྷཱ་རེ་ནྟི? ཀ་སྶ ཝ་ཙ་ནཾ? ཀེ་ནཱ་བྷ་ཏ་ནྟི?

༢. ཡཾ ཏེ་ན བྷ་ག་ཝ་ཏཱ ཛཱ་ན་ཏཱ པ་སྶ་ཏཱ ཨ་ར་ཧ་ཏཱ ས་མྨཱ་ས་མྦུ་དྡྷེ་ན པ་ཋ་མཾ པཱ་རཱ་ཛི་ཀཾ ཀ་ཏྠ པ་ཉྙ་ཏྟ་ནྟི? ཝེ་སཱ་ལི་ཡཾ པ་ཉྙ་ཏྟཾ. ཀཾ ཨཱ་ར་བྦྷཱ་ཏི? སུ་དི་ནྣཾ ཀ་ལ་ནྡ་པུ་ཏྟཾ ཨཱ་ར་བྦྷ. ཀི་སྨིཾ ཝ་ཏྠུ་སྨི་ནྟི? སུ་དི་ནྣོ ཀ་ལ་ནྡ་པུ་ཏྟོ པུ་རཱ་ཎ་དུ་ཏི་ཡི་ཀཱ་ཡ མེ་ཐུ་ནཾ དྷ་མྨཾ པ་ཊི་སེ་ཝི, ཏ་སྨིཾ ཝ་ཏྠུ་སྨིཾ. ཨ་ཏྠི ཏ་ཏྠ པ་ཉྙ་ཏྟི, ཨ་ནུ་པ་ཉྙ་ཏྟི, ཨ་ནུ་པྤ་ནྣ་པ་ཉྙ་ཏྟཱི་ཏི? ཨེ་ཀཱ པ་ཉྙ་ཏྟི, དྭེ ཨ་ནུ་པ་ཉྙ་ཏྟི་ཡོ. ཨ་ནུ་པྤ་ནྣ་པ་ཉྙ་ཏྟི ཏ་སྨིཾ ན་ཏྠི. ས་བྦ་ཏྠ་པ་ཉྙ་ཏྟི, པ་དེ་ས་པ་ཉྙ་ཏྟཱི་ཏི? ས་བྦ་ཏྠ་པ་ཉྙ་ཏྟི. སཱ་དྷཱ་ར་ཎ་པ་ཉྙ་ཏྟི, ཨ་སཱ་དྷཱ་ར་ཎ་པ་ཉྙ་ཏྟཱི་ཏི? སཱ་དྷཱ་ར་ཎ་པ་ཉྙ་ཏྟི. ཨེ་ཀ་ཏོ་པ་ཉྙ་ཏྟི, ཨུ་བྷ་ཏོ་པ་ཉྙ་ཏྟཱི་ཏི? ཨུ་བྷ་ཏོ་པ་ཉྙ་ཏྟི. པ་ཉྩ་ནྣཾ པཱ་ཏི་མོ་ཀྑུ་དྡེ་སཱ་ནཾ ཀ་ཏྠོ་ག་དྷཾ ཀ་ཏྠ པ་རི་ཡཱ་པ་ནྣ་ནྟི? ནི་དཱ་ནོ་ག་དྷཾ, ནི་དཱ་ན་པ་རི་ཡཱ་པ་ནྣཾ. ཀ་ཏ་མེ་ན ཨུ་དྡེ་སེ་ན ཨུ་དྡེ་སཾ ཨཱ་ག་ཙྪ་ཏཱི་ཏི? དུ་ཏི་ཡེ་ན ཨུ་དྡེ་སེ་ན ཨུ་དྡེ་སཾ ཨཱ་ག་ཙྪ་ཏི. ཙ་ཏུ་ནྣཾ ཝི་པ་ཏྟཱི་ནཾ ཀ་ཏ་མཱ ཝི་པ་ཏྟཱི་ཏི? སཱི་ལ་ཝི་པ་ཏྟི. ས་ཏྟ་ནྣཾ ཨཱ་པ་ཏྟི་ཀྑ་ནྡྷཱ་ནཾ ཀ་ཏ་མོ ཨཱ་པ་ཏྟི་ཀྑ་ནྡྷོ་ཏི? པཱ་རཱ་ཛི་ཀཱ་པ་ཏྟི་ཀྑ་ནྡྷོ. ཚ་ནྣཾ ཨཱ་པ་ཏྟི་ས་མུ་ཊྛཱ་ནཱ་ནཾ ཀ་ཏི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏཱི་ཏི? ཨེ་ཀེ་ན ས་མུ་ཊྛཱ་ནེ་ན ས་མུ་ཊྛཱ་ཏི – ཀཱ་ཡ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཝཱ་ཙ་ཏོ. ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཀ་ཏ་མཾ ཨ་དྷི་ཀ་ར་ཎ་ནྟི? ཨཱ་པ་ཏྟཱ་དྷི་ཀ་ར་ཎཾ. ས་ཏྟ་ནྣཾ ས་མ་ཐཱ་ནཾ ཀ་ཏི་ཧི ས་མ་ཐེ་ཧི ས་མྨ་ཏཱི་ཏི? དྭཱི་ཧི ས་མ་ཐེ་ཧི ས་མྨ་ཏི – ས་མྨུ་ཁཱ་ཝི་ན་ཡེ་ན ཙ པ་ཊི་ཉྙཱ་ཏ་ཀ་ར་ཎེ་ན ཙ. ཀོ ཏ་ཏྠ ཝི་ན་ཡོ, ཀོ ཏ་ཏྠ ཨ་བྷི་ཝི་ན་ཡོ་ཏི? པ་ཉྙ་ཏྟི ཝི་ན་ཡོ, ཝི་བྷ་ཏྟི ཨ་བྷི་ཝི་ན་ཡོ. ཀིཾ ཏ་ཏྠ པཱ་ཏི་མོ་ཀྑཾ, ཀིཾ ཏ་ཏྠ ཨ་དྷི་པཱ་ཏི་མོ་ཀྑ་ནྟི? པ་ཉྙ་ཏྟི པཱ་ཏི་མོ་ཀྑཾ, ཝི་བྷ་ཏྟི ཨ་དྷི་པཱ་ཏི་མོ་ཀྑཾ. ཀཱ ཝི་པ་ཏྟཱི་ཏི? ཨ་སཾ་ཝ་རོ ཝི་པ་ཏྟི. ཀཱ ས་མྤ་ཏྟཱི་ཏི? སཾ་ཝ་རོ ས་མྤ་ཏྟི. ཀཱ པ་ཊི་པ་ཏྟཱི་ཏི? ན ཨེ་ཝ་རཱུ་པཾ ཀ་རི་སྶཱ་མཱི་ཏི ཡཱ་ཝ་ཛཱི་ཝཾ ཨཱ་པཱ་ཎ་ཀོ་ཊི་ཀཾ ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ. [ཨ. ནི. ༡༠.༣༡] ཀ་ཏི ཨ་ཏྠ་ཝ་སེ པ་ཊི་ཙྩ བྷ་ག་ཝ་ཏཱ པ་ཋ་མཾ པཱ་རཱ་ཛི་ཀཾ པ་ཉྙ་ཏྟ་ནྟི? ད་ས ཨ་ཏྠ་ཝ་སེ པ་ཊི་ཙྩ བྷ་ག་ཝ་ཏཱ པ་ཋ་མཾ པཱ་རཱ་ཛི་ཀཾ པ་ཉྙ་ཏྟཾ – ས་ངྒྷ་སུ་ཊྛུ་ཏཱ་ཡ, ས་ངྒྷ་ཕཱ་སུ་ཏཱ་ཡ, དུ་མྨ་ངྐཱུ་ནཾ པུ་གྒ་ལཱ་ནཾ ནི་གྒ་ཧཱ་ཡ, པེ་ས་ལཱ་ནཾ བྷི་ཀྑཱུ་ནཾ ཕཱ་སུ་ཝི་ཧཱ་རཱ་ཡ, དི་ཊྛ་དྷ་མྨི་ཀཱ་ནཾ ཨཱ་ས་ཝཱ་ནཾ སཾ་ཝ་རཱ་ཡ, ས་མྤ་རཱ་ཡི་ཀཱ་ནཾ ཨཱ་ས་ཝཱ་ནཾ པ་ཊི་གྷཱ་ཏཱ་ཡ, ཨ་པྤ་ས་ནྣཱ་ནཾ པ་སཱ་དཱ་ཡ, པ་ས་ནྣཱ་ནཾ བྷི་ཡྻོ་བྷཱ་ཝཱ་ཡ, ས་དྡྷ་མྨ་ཊྛི་ཏི་ཡཱ, ཝི་ན་ཡཱ་ནུ་གྒ་ཧཱ་ཡ. ཀེ སི་ཀྑ་ནྟཱི་ཏི? སེ་ཀྑཱ ཙ པུ་ཐུ་ཛྫ་ན་ཀ་ལྱཱ་ཎ་ཀཱ ཙ སི་ཀྑ་ནྟི. ཀེ སི་ཀྑི་ཏ་སི་ཀྑཱ་ཏི? ཨ་ར་ཧ་ནྟོ སི་ཀྑི་ཏ་སི་ཀྑཱ. ཀ་ཏྠ ཋི་ཏ་ནྟི? སི་ཀྑཱ་ཀཱ་མེ་སུ ཋི་ཏཾ. ཀེ དྷཱ་རེ་ནྟཱི་ཏི? ཡེ་སཾ ཝ་ཏྟ་ཏི ཏེ དྷཱ་རེ་ནྟི. ཀ་སྶ ཝ་ཙ་ན་ནྟི? བྷ་ག་ཝ་ཏོ ཝ་ཙ་ནཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ. ཀེ་ནཱ་བྷ་ཏ་ནྟི? པ་ར་མྤ་རཱ་བྷ་ཏཾ –

༣. ཨུ་པཱ་ལི དཱ་ས་ཀོ ཙེ་ཝ, སོ་ཎ་ཀོ སི་གྒ་ཝོ ཏ་ཐཱ;

མོ་གྒ་ལི་པུ་ཏྟེ་ན [མོ་གྒ་ལཱི་པུ་ཏྟེ་ན (སྱཱ.)] པ་ཉྩ་མཱ, ཨེ་ཏེ ཛ་མྦུ་སི་རི་ཝ྄ཧ་ཡེ [ཛ་མྦུ་ས་རི་ཝ྄ཧ་ཡེ (སཱ་ར་ཏྠ)].

ཏ་ཏོ མ་ཧི་ནྡོ ཨི་ཊྚི་ཡོ [ཨི་ཊྛི་ཡོ (སཱི.)], ཨུ་ཏྟི་ཡོ ས་མྦ་ལོ [ཨུ་ཊྚི་ཡོ ས་མྤ་ལོ (ཨི་ཏི་པི)] ཏ་ཐཱ;

བྷ་དྡ་ནཱ་མོ ཙ པ་ཎྜི་ཏོ.

ཨེ་ཏེ ནཱ་གཱ མ་ཧཱ་པ་ཉྙཱ, ཛ་མྦུ་དཱི་པཱ ཨི་དྷཱ་ག་ཏཱ;

ཝི་ན་ཡཾ ཏེ ཝཱ་ཙ་ཡིཾ་སུ, པི་ཊ་ཀཾ ཏ་མྦ་པ་ཎྞི་ཡཱ.

ནི་ཀཱ་ཡེ པ་ཉྩ ཝཱ་ཙེ་སུཾ, ས་ཏྟ ཙེ་ཝ པ་ཀ་ར་ཎེ;

ཏ་ཏོ ཨ་རི་ཊྛོ མེ་དྷཱ་ཝཱི, ཏི་སྶ་ད་ཏྟོ ཙ པ་ཎྜི་ཏོ.

ཝི་སཱ་ར་དོ ཀཱ་ལ༹་སུ་མ་ནོ, ཐེ་རོ ཙ དཱི་གྷ་ནཱ་མ་ཀོ;

དཱི་གྷ་སུ་མ་ནོ ཙ པ་ཎྜི་ཏོ.

པུ་ན་དེ་ཝ [པུ་ན་རེ་ཝ (སྱཱ.)] ཀཱ་ལ༹་སུ་མ་ནོ, ནཱ་ག་ཏྠེ་རོ ཙ བུ་དྡྷ་ར་ཀྑི་ཏོ;

ཏི་སྶ་ཏྠེ་རོ ཙ མེ་དྷཱ་ཝཱི, དེ་ཝ་ཏྠེ་རོ [རེ་ཝ་ཏྠེ་རོ (ཨི་ཏི་པི)] ཙ པ་ཎྜི་ཏོ.

པུ་ན་དེ་ཝ སུ་མ་ནོ མེ་དྷཱ་ཝཱི, ཝི་ན་ཡེ ཙ ཝི་སཱ་ར་དོ;

བ་ཧུ་སྶུ་ཏོ ཙཱུ་ལ༹་ནཱ་གོ, ག་ཛོ་ཝ དུ་པྤ་དྷཾ་སི་ཡོ.

དྷ་མྨ་པཱ་ལི་ཏ་ནཱ་མོ ཙ, རོ་ཧ་ཎེ [རོ་ཧ་ཎོ (སཱི.)] སཱ་དྷུ་པཱུ་ཛི་ཏོ;

ཏ་སྶ སི་སྶོ མ་ཧཱ་པ་ཉྙོ ཁེ་མ་ནཱ་མོ ཏི་པེ་ཊ་ཀོ.

དཱི་པེ ཏཱ་ར་ཀ་རཱ་ཛཱ་ཝ པ་ཉྙཱ་ཡ ཨ་ཏི་རོ་ཙ་ཐ;

ཨུ་པ་ཏི་སྶོ ཙ མེ་དྷཱ་ཝཱི, ཕུ་སྶ་དེ་ཝོ མ་ཧཱ་ཀ་ཐཱི.

པུ་ན་དེ་ཝ སུ་མ་ནོ མེ་དྷཱ་ཝཱི, པུ་པྥ་ནཱ་མོ བ་ཧུ་སྶུ་ཏོ;

མ་ཧཱ་ཀ་ཐཱི མ་ཧཱ་སི་ཝོ, པི་ཊ་ཀེ ས་བྦ་ཏྠ ཀོ་ཝི་དོ.

པུ་ན་དེ་ཝ ཨུ་པཱ་ལི མེ་དྷཱ་ཝཱི, ཝི་ན་ཡེ ཙ ཝི་སཱ་ར་དོ;

མ་ཧཱ་ནཱ་གོ མ་ཧཱ་པ་ཉྙོ, ས་དྡྷ་མྨ་ཝཾ་ས་ཀོ་ཝི་དོ.

པུ་ན་དེ་ཝ ཨ་བྷ་ཡོ མེ་དྷཱ་ཝཱི, པི་ཊ་ཀེ ས་བྦ་ཏྠ ཀོ་ཝི་དོ;

ཏི་སྶ་ཏྠེ་རོ ཙ མེ་དྷཱ་ཝཱི, ཝི་ན་ཡེ ཙ ཝི་སཱ་ར་དོ.

ཏ་སྶ སི་སྶོ མ་ཧཱ་པ་ཉྙོ, པུ་པྥ་ནཱ་མོ བ་ཧུ་སྶུ་ཏོ;

སཱ་ས་ནཾ ཨ་ནུ་ར་ཀྑ་ནྟོ, ཛ་མྦུ་དཱི་པེ པ་ཏི་ཊྛི་ཏོ.

ཙཱུ་ལཱ༹་བྷ་ཡོ ཙ མེ་དྷཱ་ཝཱི, ཝི་ན་ཡེ ཙ ཝི་སཱ་ར་དོ;

ཏི་སྶ་ཏྠེ་རོ ཙ མེ་དྷཱ་ཝཱི, ས་དྡྷ་མྨ་ཝཾ་ས་ཀོ་ཝི་དོ.

ཙཱུ་ལ༹་དེ་ཝོ [ཕུ་སྶ་དེ་ཝོ (སཱི.)] ཙ མེ་དྷཱ་ཝཱི, ཝི་ན་ཡེ ཙ ཝི་སཱ་ར་དོ;

སི་ཝ་ཏྠེ་རོ ཙ མེ་དྷཱ་ཝཱི, ཝི་ན་ཡེ ས་བྦ་ཏྠ ཀོ་ཝི་དོ.

ཨེ་ཏེ ནཱ་གཱ མ་ཧཱ་པ་ཉྙཱ, ཝི་ན་ཡ་ཉྙཱུ མ་གྒ་ཀོ་ཝི་དཱ;

ཝི་ན་ཡཾ དཱི་པེ པ་ཀཱ་སེ་སུཾ, པི་ཊ་ཀཾ ཏ་མྦ་པ་ཎྞི་ཡཱ་ཏི.

༤. ཡཾ ཏེ་ན བྷ་ག་ཝ་ཏཱ ཛཱ་ན་ཏཱ པ་སྶ་ཏཱ ཨ་ར་ཧ་ཏཱ ས་མྨཱ་ས་མྦུ་དྡྷེ་ན དུ་ཏི་ཡཾ པཱ་རཱ་ཛི་ཀཾ ཀ་ཏྠ པ་ཉྙ་ཏྟ་ནྟི? རཱ་ཛ་ག་ཧེ པ་ཉྙ་ཏྟཾ. ཀཾ ཨཱ་ར་བྦྷཱ་ཏི? དྷ་ནི་ཡཾ ཀུ་མྦྷ་ཀཱ་ར་པུ་ཏྟཾ ཨཱ་ར་བྦྷ. ཀི་སྨིཾ ཝ་ཏྠུ་སྨི་ནྟི? དྷ་ནི་ཡོ ཀུ་མྦྷ་ཀཱ་ར་པུ་ཏྟོ ར་ཉྙོ དཱ་རཱུ་ནི ཨ་དི་ནྣཾ ཨཱ་དི་ཡི, ཏ་སྨིཾ ཝ་ཏྠུ་སྨིཾ. ཨེ་ཀཱ པ་ཉྙ་ཏྟི, ཨེ་ཀཱ ཨ་ནུ་པ་ཉྙ་ཏྟི. ཚ་ནྣཾ ཨཱ་པ་ཏྟི་ས་མུ་ཊྛཱ་ནཱ་ནཾ ཀ་ཏི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏཱི་ཏི? ཏཱི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏི – སི་ཡཱ ཀཱ་ཡ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཝཱ་ཙ་ཏོ; སི་ཡཱ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཀཱ་ཡ་ཏོ; སི་ཡཱ ཀཱ་ཡ་ཏོ ཙ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི…པེ….

༥. ཏ་ཏི་ཡཾ པཱ་རཱ་ཛི་ཀཾ ཀ་ཏྠ པ་ཉྙ་ཏྟ་ནྟི? ཝེ་སཱ་ལི་ཡཾ པ་ཉྙ་ཏྟཾ. ཀཾ ཨཱ་ར་བྦྷཱ་ཏི? ས་མྦ་ཧུ་ལེ བྷི་ཀྑཱུ ཨཱ་ར་བྦྷ. ཀི་སྨིཾ ཝ་ཏྠུ་སྨི་ནྟི? ས་མྦ་ཧུ་ལཱ བྷི་ཀྑཱུ ཨ་ཉྙ་མ་ཉྙཾ ཛཱི་ཝི་ཏཱ ཝོ་རོ་པེ་སུཾ, ཏ་སྨིཾ ཝ་ཏྠུ་སྨིཾ. ཨེ་ཀཱ པ་ཉྙ་ཏྟི, ཨེ་ཀཱ ཨ་ནུ་པ་ཉྙ་ཏྟི. ཚ་ནྣཾ ཨཱ་པ་ཏྟི་ས་མུ་ཊྛཱ་ནཱ་ནཾ ཀ་ཏི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏཱི་ཏི? ཏཱི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏི – སི་ཡཱ ཀཱ་ཡ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཝཱ་ཙ་ཏོ; སི་ཡཱ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཀཱ་ཡ་ཏོ; སི་ཡཱ ཀཱ་ཡ་ཏོ ཙ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི…པེ….

༦. ཙ་ཏུ་ཏྠཾ པཱ་རཱ་ཛི་ཀཾ ཀ་ཏྠ པ་ཉྙ་ཏྟ་ནྟི? ཝེ་སཱ་ལི་ཡཾ པ་ཉྙ་ཏྟཾ. ཀཾ ཨཱ་ར་བྦྷཱ་ཏི? ཝ་གྒུ་མུ་དཱ་ཏཱི་རི་ཡེ བྷི་ཀྑཱུ ཨཱ་ར་བྦྷ. ཀི་སྨིཾ ཝ་ཏྠུ་སྨི་ནྟི? ཝ་གྒུ་མུ་དཱ་ཏཱི་རི་ཡཱ བྷི་ཀྑཱུ གི་ཧཱི་ནཾ ཨ་ཉྙ་མ་ཉྙ་སྶ ཨུ་ཏྟ་རི་མ་ནུ་སྶ་དྷ་མྨ་སྶ ཝ་ཎྞཾ བྷཱ་སིཾ་སུ, ཏ་སྨིཾ ཝ་ཏྠུ་སྨིཾ. ཨེ་ཀཱ པ་ཉྙ་ཏྟི, ཨེ་ཀཱ ཨ་ནུ་པ་ཉྙ་ཏྟི. ཚ་ནྣཾ ཨཱ་པ་ཏྟི་ས་མུ་ཊྛཱ་ནཱ་ནཾ ཀ་ཏི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏཱི་ཏི? ཏཱི་ཧི ས་མུ་ཊྛཱ་ནེ་ཧི ས་མུ་ཊྛཱ་ཏི – སི་ཡཱ ཀཱ་ཡ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཝཱ་ཙ་ཏོ; སི་ཡཱ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཀཱ་ཡ་ཏོ; སི་ཡཱ ཀཱ་ཡ་ཏོ ཙ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི…པེ….

ཙ་ཏྟཱ་རོ པཱ་རཱ་ཛི་ཀཱ ནི་ཊྛི་ཏཱ.

ཏ་སྶུ་དྡཱ་ནཾ –

མེ་ཐུ་ནཱ་དི་ནྣཱ་དཱ་ན་ཉྩ, མ་ནུ་སྶ་ཝི་གྒ་ཧུ་ཏྟ་རི;

པཱ་རཱ་ཛི་ཀཱ་ནི ཙ་ཏྟཱ་རི, ཚེ་ཛྫ་ཝ་ཏྠཱུ ཨ་སཾ་ས་ཡཱ་ཏི.