༧. ཏ་ཏུ་ཏྟ་རི་སི་ཀྑཱ་པ་དཾ
༥༢༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཨ་ཙྪི་ནྣ་ཙཱི་ཝ་ར་ཀེ བྷི་ཀྑཱུ ཨུ་པ་ས་ངྐ་མི་ཏྭཱ ཨེ་ཝཾ ཝ་ད་ནྟི – ‘‘བྷ་ག་ཝ་ཏཱ, ཨཱ་ཝུ་སོ, ཨ་ནུ་ཉྙཱ་ཏཾ – ‘ཨ་ཙྪི་ནྣ་ཙཱི་ཝ་ར་སྶ ཝཱ ན་ཊྛ་ཙཱི་ཝ་ར་སྶ ཝཱ ཨ་ཉྙཱ་ཏ་ཀཾ ག་ཧ་པ་ཏིཾ ཝཱ ག་ཧ་པ་ཏཱ་ནིཾ ཝཱ ཙཱི་ཝ་རཾ ཝི་ཉྙཱ་པེ་ཏུཾ’; ཝི་ཉྙཱ་པེ་ཐ, ཨཱ་ཝུ་སོ, ཙཱི་ཝ་ར’’ནྟི. ‘‘ཨ་ལཾ, ཨཱ་ཝུ་སོ, ལ་དྡྷཾ ཨ་མྷེ་ཧི ཙཱི་ཝ་ར’’ནྟི. ‘‘མ་ཡཾ ཨཱ་ཡ་སྨ་ནྟཱ་ནཾ ཝི་ཉྙཱ་པེ་མཱ’’ཏི. ‘‘ཝི་ཉྙཱ་པེ་ཐ, ཨཱ་ཝུ་སོ’’ཏི. ཨ་ཐ ཁོ ཚ་བྦ་གྒི་ཡཱ བྷི་ཀྑཱུ ག་ཧ་པ་ཏི་ཀེ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙུཾ – ‘‘ཨ་ཙྪི་ནྣ་ཙཱི་ཝ་ར་ཀཱ, ཨཱ་ཝུ་སོ, བྷི་ཀྑཱུ ཨཱ་ག་ཏཱ. དེ་ཐ ནེ་སཾ ཙཱི་ཝ་རཱ་ནཱི’’ཏི, བ་ཧུཾ ཙཱི་ཝ་རཾ ཝི་ཉྙཱ་པེ་སུཾ.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ པུ་རི་སོ ས་བྷཱ་ཡཾ ནི་སི་ནྣོ ཨ་ཉྙ་ཏ་རཾ པུ་རི་སཾ ཨེ་ཏ་ད་ཝོ་ཙ – ‘‘ཨ་ཙྪི་ནྣ་ཙཱི་ཝ་ར་ཀཱ ཨ་ཡྻོ བྷི་ཀྑཱུ ཨཱ་ག་ཏཱ. ཏེ་སཾ མ་ཡཱ ཙཱི་ཝ་རཾ དི་ནྣ’’ནྟི. སོ་པི ཨེ་ཝ་མཱ་ཧ – ‘‘མ་ཡཱ་པི དི་ནྣ’’ནྟི. ཨ་པ་རོ་པི ཨེ་ཝ་མཱ་ཧ – ‘‘མ་ཡཱ་པི དི་ནྣ’’ནྟི. ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ན མ་ཏྟཾ ཛཱ་ནི་ཏྭཱ བ་ཧུཾ ཙཱི་ཝ་རཾ ཝི་ཉྙཱ་པེ་སྶ་ནྟི, དུ་སྶ་ཝཱ་ཎི་ཛྫཾ ཝཱ ས་མ་ཎཱ ས་ཀྱ་པུ་ཏྟི་ཡཱ ཀ་རི་སྶ་ནྟི, པ་གྒཱ་ཧི་ཀ་སཱ་ལཾ [པ་ཊ་གྒཱ་ཧི་ཀ་སཱ་ལཾ (?)] ཝཱ པ་སཱ་རེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ན མ་ཏྟཾ ཛཱ་ནི་ཏྭཱ བ་ཧུཾ ཙཱི་ཝ་རཾ ཝི་ཉྙཱ་པེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ན མ་ཏྟཾ ཛཱ་ནི་ཏྭཱ བ་ཧུཾ ཙཱི་ཝ་རཾ ཝི་ཉྙཱ་པེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ན མ་ཏྟཾ ཛཱ་ནི་ཏྭཱ བ་ཧུཾ ཙཱི་ཝ་རཾ ཝི་ཉྙཱ་པེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༢༣. ‘‘ཏ་ཉྩེ ཨ་ཉྙཱ་ཏ་ཀོ ག་ཧ་པ་ཏི ཝཱ ག་ཧ་པ་ཏཱ་ནཱི ཝཱ བ་ཧཱུ་ཧི ཙཱི་ཝ་རེ་ཧི ཨ་བྷི་ཧ་ཊྛུཾ པ་ཝཱ་རེ་ཡྻ ས་ནྟ་རུ་ཏྟ་ར་པ་ར་མཾ ཏེ་ན བྷི་ཀྑུ་ནཱ ཏ་ཏོ ཙཱི་ཝ་རཾ སཱ་དི་ཏ་བྦཾ. ཏ་ཏོ ཙེ ཨུ་ཏྟ་རི སཱ་དི་ཡེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༥༢༤. ཏ་ཉྩེཏི ཨ་ཙྪི་ནྣ་ཙཱི་ཝ་ར་ཀཾ བྷི་ཀྑུཾ.
ཨ་ཉྙཱ་ཏ་ཀོ ནཱ་མ མཱ་ཏི་ཏོ ཝཱ པི་ཏི་ཏོ ཝཱ ཡཱ་ཝ ས་ཏྟ་མཱ པི་ཏཱ་མ་ཧ་ཡུ་གཱ ཨ་ས་མྦ་དྡྷོ.
ག་ཧ་པ་ཏི ནཱ་མ ཡོ ཀོ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.
ག་ཧ་པ་ཏཱ་ནཱི ནཱ་མ ཡཱ ཀཱ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.
བ་ཧཱུ་ཧི ཙཱི་ཝ་རེ་ཧཱིཏི བ་ཧུ་ཀེ་ཧི ཙཱི་ཝ་རེ་ཧི.
ཨ་བྷི་ཧ་ཊྛུཾ པ་ཝཱ་རེ་ཡྻཱཏི ཡཱ་ཝ་ཏ་ཀཾ ཨི་ཙྪ་སི ཏཱ་ཝ་ཏ་ཀཾ ག་ཎྷཱ་ཧཱི་ཏི.
ས་ནྟ་རུ་ཏྟ་ར་པ་ར་མཾ ཏེ་ན བྷི་ཀྑུ་ནཱ ཏ་ཏོ ཙཱི་ཝ་རཾ སཱ་དི་ཏ་བྦནྟི ས་ཙེ ཏཱི་ཎི ན་ཊྛཱ་ནི ཧོ་ནྟི དྭེ སཱ་དི་ཏ་བྦཱ་ནི, དྭེ ན་ཊྛཱ་ནི ཨེ་ཀཾ སཱ་དི་ཏ་བྦཾ, ཨེ་ཀཾ ན་ཊྛཾ ན ཀི་ཉྩི སཱ་དི་ཏ་བྦཾ.
ཏ་ཏོ ཙེ ཨུ་ཏྟ་རི སཱ་དི་ཡེ་ཡྻཱཏི ཏ་ཏུ་ཏྟ་རི ཝི་ཉྙཱ་པེ་ཏི, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ཙཱི་ཝ་རཾ ཨ་ཉྙཱ་ཏ་ཀཾ ག་ཧ་པ་ཏི་ཀཾ ཨུ་པ་ས་ངྐ་མི་ཏྭཱ ཏ་ཏུ་ཏྟ་རི ཝི་ཉྙཱ་པི་ཏཾ ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༥༢༥. ཨ་ཉྙཱ་ཏ་ཀེ ཨ་ཉྙཱ་ཏ་ཀ་ས་ཉྙཱི ཏ་ཏུ་ཏྟ་རི ཙཱི་ཝ་རཾ ཝི་ཉྙཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙཱ་ཏ་ཀེ ཝེ་མ་ཏི་ཀོ ཏ་ཏུ་ཏྟ་རི ཙཱི་ཝ་རཾ ཝི་ཉྙཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙཱ་ཏ་ཀེ ཉཱ་ཏ་ཀ་ས་ཉྙཱི ཏ་ཏུ་ཏྟ་རི ཙཱི་ཝ་རཾ ཝི་ཉྙཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ.
ཉཱ་ཏ་ཀེ ཨ་ཉྙཱ་ཏ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཉཱ་ཏ་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཉཱ་ཏ་ཀེ ཉཱ་ཏ་ཀ་ས་ཉྙཱི, ཨ་ནཱ་པ་ཏྟི.
༥༢༦. ཨ་ནཱ་པ་ཏྟི – ‘‘སེ་ས་ཀཾ ཨཱ་ཧ་རི་སྶཱ་མཱི’’ཏི ཧ་ར་ནྟོ ག་ཙྪ་ཏི, ‘‘སེ་ས་ཀཾ ཏུ་ཡ྄ཧེ་ཝ ཧོ་ཏཱུ’’ཏི དེ་ནྟི, ན ཨ་ཙྪི་ནྣ་ཀཱ་ར་ཎཱ དེ་ནྟི, ན ན་ཊྛ་ཀཱ་ར་ཎཱ དེ་ནྟི, ཉཱ་ཏ་ཀཱ་ནཾ, པ་ཝཱ་རི་ཏཱ་ནཾ, ཨ་ཏྟ་ནོ དྷ་ནེ་ན, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཏ་ཏུ་ཏྟ་རི་སི་ཀྑཱ་པ་དཾ ནི་ཊྛི་ཏཾ ས་ཏྟ་མཾ.