༥. ཙཱི་ཝ་ར་པ་ཊི་གྒ་ཧ་ཎ་སི་ཀྑཱ་པ་དཾ
༥༠༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཨུ་པྤ་ལ་ཝ་ཎྞཱ བྷི་ཀྑུ་ནཱི སཱ་ཝ་ཏྠི་ཡཾ ཝི་ཧ་ར་ཏི. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠིཾ པི་ཎྜཱ་ཡ པཱ་ཝི་སི. སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པྤ་ཊི་ཀྐ་ནྟཱ ཡེ་ན ཨ་ནྡྷ་ཝ་ནཾ ཏེ་ནུ་པ་ས་ངྐ་མི དི་ཝཱ་ཝི་ཧཱ་རཱ་ཡ. ཨ་ནྡྷ་ཝ་ནཾ ཨ་ཛ྄ཛྷོ་གཱ་ཧེ་ཏྭཱ ཨ་ཉྙ་ཏ་ར་སྨིཾ རུ་ཀྑ་མཱུ་ལེ དི་ཝཱ་ཝི་ཧཱ་རཾ ནི་སཱི་དི. ཏེ་ན ཁོ པ་ན ས་མ་ཡེ་ན ཙོ་རཱ ཀ་ཏ་ཀ་མྨཱ གཱ་ཝིཾ ཝ་དྷི་ཏྭཱ མཾ་སཾ ག་ཧེ་ཏྭཱ ཨ་ནྡྷ་ཝ་ནཾ པ་ཝི་སིཾ་སུ. ཨ་དྡ་སཱ ཁོ ཙོ་ར་གཱ་མ་ཎི་ཀོ ཨུ་པྤ་ལ་ཝ་ཎྞཾ བྷི་ཀྑུ་ནིཾ ཨ་ཉྙ་ཏ་ར་སྨིཾ རུ་ཀྑ་མཱུ་ལེ དི་ཝཱ་ཝི་ཧཱ་རཾ ནི་སི་ནྣཾ. དི་སྭཱ་ན་སྶ ཨེ་ཏ་ད་ཧོ་སི – ‘‘ས་ཙེ མེ པུ་ཏྟ་བྷཱ་ཏུ་ཀཱ པ་སྶི་སྶ་ནྟི ཝི་ཧེ་ཋི་སྶ་ནྟི ཨི་མཾ བྷི་ཀྑུ་ནི’’ནྟི ཨ་ཉྙེ་ན མ་གྒེ་ན ཨ་ག་མཱ་སི. ཨ་ཐ ཁོ སོ ཙོ་ར་གཱ་མ་ཎི་ཀོ མཾ་སེ པ་ཀྐེ ཝ་ར་མཾ་སཱ་ནི ག་ཧེ་ཏྭཱ པ་ཎྞ་པུ་ཊཾ [པ་ཎྞེ་ན པུ་ཊཾ (སྱཱ.)] བ་ནྡྷི་ཏྭཱ ཨུ་པྤ་ལ་ཝ་ཎྞཱ་ཡ བྷི་ཀྑུ་ནི་ཡཱ ཨ་ཝི་དཱུ་རེ རུ་ཀྑེ ཨཱ་ལ་གྒེ་ཏྭཱ – ‘‘ཡོ པ་སྶ་ཏི ས་མ་ཎོ ཝཱ བྲཱ་ཧྨ་ཎོ ཝཱ དི་ནྣཾ་ཡེ་ཝ ཧ་ར་ཏཱུ’’ཏི, ཝ་ཏྭཱ པ་ཀྐཱ་མི. ཨ་སྶོ་སི ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི ས་མཱ་དྷི་མྷཱ ཝུ་ཊྛ་ཧི་ཏྭཱ ཏ་སྶ ཙོ་ར་གཱ་མ་ཎི་ཀ་སྶ ཨི་མཾ ཝཱ་ཙཾ བྷཱ་ས་མཱ་ན་སྶ. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི ཏཾ མཾ་སཾ ག་ཧེ་ཏྭཱ ཨུ་པ་སྶ་ཡཾ ཨ་ག་མཱ་སི. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི ཏ་སྶཱ ར་ཏྟི་ཡཱ ཨ་ཙྩ་ཡེ་ན ཏཾ མཾ་སཾ ས་མྤཱ་དེ་ཏྭཱ ཨུ་ཏྟ་རཱ་ས་ངྒེ་ན བྷ་ཎྜི་ཀཾ བ་ནྡྷི་ཏྭཱ ཝེ་ཧཱ་སཾ ཨ་བྦྷུ་གྒ་ནྟྭཱ ཝེ་ལུ༹་ཝ་ནེ པ་ཙྩུ་ཊྛཱ་སི [པ་ཙྩུ་པ་ཊྛཱ་སི (?)].
ཏེ་ན ཁོ པ་ན ས་མ་ཡེ་ན བྷ་ག་ཝཱ གཱ་མཾ པི་ཎྜཱ་ཡ པ་ཝི་ཊྛོ ཧོ་ཏི. ཨཱ་ཡ་སྨཱ ཨུ་དཱ་ཡཱི ཨོ་ཧི་ཡྻ་ཀོ ཧོ་ཏི ཝི་ཧཱ་ར་པཱ་ལོ. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི ཡེ་ནཱ་ཡ་སྨཱ ཨུ་དཱ་ཡཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨུ་དཱ་ཡིཾ ཨེ་ཏ་ད་ཝོ་ཙ – ‘‘ཀ་ཧཾ, བྷ་ནྟེ, བྷ་ག་ཝཱ’’ཏི? ‘‘པ་ཝི་ཊྛོ, བྷ་གི་ནི, བྷ་ག་ཝཱ གཱ་མཾ པི་ཎྜཱ་ཡཱ’’ཏི. ‘‘ཨི་མཾ, བྷ་ནྟེ, མཾ་སཾ བྷ་ག་ཝ་ཏོ དེ་ཧཱི’’ཏི. ‘‘ས་ནྟ་པྤི་ཏོ ཏ་ཡཱ, བྷ་གི་ནི, བྷ་ག་ཝཱ མཾ་སེ་ན. ས་ཙེ མེ ཏྭཾ ཨ་ནྟ་ར་ཝཱ་ས་ཀཾ ད་དེ་ཡྻཱ་སི, ཨེ་ཝཾ ཨ་ཧ་མྤི ས་ནྟ་པྤི་ཏོ བྷ་ཝེ་ཡྻཾ ཨ་ནྟ་ར་ཝཱ་ས་ཀེ་ནཱ’’ཏི. ‘‘མ་ཡཾ ཁོ, བྷ་ནྟེ, མཱ་ཏུ་གཱ་མཱ ནཱ་མ ཀི་ཙྪ་ལཱ་བྷཱ. ཨི་ད་ཉྩ མེ ཨ་ནྟི་མཾ པ་ཉྩ་མཾ ཙཱི་ཝ་རཾ. ནཱ་ཧཾ ད་སྶཱ་མཱི’’ཏི. ‘‘སེ་ཡྻ་ཐཱ་པི, བྷ་གི་ནི, པུ་རི་སོ ཧ་ཏྠིཾ ད་ཏྭཱ ཀ་ཙྪེ ས་ཛྫེ་ཡྻ [ཝི་སྶ་ཛྫེ་ཡྻ (སྱཱ.)] ཨེ་ཝ་མེ་ཝ ཁོ ཏྭཾ བྷ་གི་ནི བྷ་ག་ཝ་ཏོ མཾ་སཾ ད་ཏྭཱ མ་ཡི ཨ་ནྟ་ར་ཝཱ་ས་ཀེ ས་ཛྫ་སཱི’’ཏི [ཨ་ནྟ་ར་ཝཱ་ས་ཀཾ ན ས་ཛྫ་སཱི་ཏི (ཀ.), མ་ཡ྄ཧཾ ཨ་ནྟ་ར་ཝཱ་ས་ཀཾ ཝི་སྶ་ཛྫེ་ཧཱི་ཏི (སྱཱ.)]. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི ཨཱ་ཡ་སྨ་ཏཱ ཨུ་དཱ་ཡི་ནཱ ནི་པྤཱི་ལི༹་ཡ་མཱ་ནཱ ཨ་ནྟ་ར་ཝཱ་ས་ཀཾ ད་ཏྭཱ ཨུ་པ་སྶ་ཡཾ ཨ་ག་མཱ་སི. བྷི་ཀྑུ་ནི་ཡོ ཨུ་པྤ་ལ་ཝ་ཎྞཱ་ཡ བྷི་ཀྑུ་ནི་ཡཱ པ་ཏྟ་ཙཱི་ཝ་རཾ པ་ཊི་གྒ་ཎྷ་ནྟི་ཡོ ཨུ་པྤ་ལ་ཝ་ཎྞཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ཀ་ཧཾ ཏེ, ཨ་ཡྻེ, ཨ་ནྟ་ར་ཝཱ་ས་ཀོ’’ཏི? ཨུ་པྤ་ལ་ཝ་ཎྞཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑུ་ནི་ཡོ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻོ ཨུ་དཱ་ཡཱི བྷི་ཀྑུ་ནི་ཡཱ ཙཱི་ཝ་རཾ པ་ཊི་གྒ་ཧེ་སྶ་ཏི ཀི་ཙྪ་ལཱ་བྷོ མཱ་ཏུ་གཱ་མོ’’ཏི. ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་དཱ་ཡཱི བྷི་ཀྑུ་ནི་ཡཱ ཙཱི་ཝ་རཾ པ་ཊི་གྒ་ཧེ་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་དཱ་ཡིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, ཨུ་དཱ་ཡི, བྷི་ཀྑུ་ནི་ཡཱ ཙཱི་ཝ་རཾ པ་ཊི་གྒ་ཧེ་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ‘‘ཉཱ་ཏི་ཀཱ ཏེ, ཨུ་དཱ་ཡི, ཨ་ཉྙཱ་ཏི་ཀཱ’’ཏི? ‘‘ཨ་ཉྙཱ་ཏི་ཀཱ, བྷ་ག་ཝཱ’’ཏི. ‘‘ཨ་ཉྙཱ་ཏ་ཀོ, མོ་གྷ་པུ་རི་ས, ཨ་ཉྙཱ་ཏི་ཀཱ་ཡ ན ཛཱ་ནཱ་ཏི པ་ཏི་རཱུ་པཾ ཝཱ ཨ་པྤ་ཏི་རཱུ་པཾ ཝཱ ས་ནྟཾ ཝཱ ཨ་ས་ནྟཾ ཝཱ. ཏ་ཏྠ ནཱ་མ ཏྭཾ, མོ་གྷ་པུ་རི་ས, ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཧ་ཏྠ་ཏོ ཙཱི་ཝ་རཾ པ་ཊི་གྒ་ཧེ་སྶ་སི! ནེ་ཏཾ མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༠༩. ‘‘ཡོ པ་ན བྷི་ཀྑུ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཧ་ཏྠ་ཏོ ཙཱི་ཝ་རཾ པ་ཊི་གྒ་ཎྷེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༥༡༠. ཏེ་ན ཁོ པ་ན ས་མ་ཡེ་ན བྷི་ཀྑཱུ ཀུ་ཀྐུ་ཙྩཱ་ཡ་ནྟཱ བྷི་ཀྑུ་ནཱི་ནཾ པཱ་རི་ཝ་ཏྟ་ཀ་ཙཱི་ཝ་རཾ ན པ་ཊི་གྒ་ཎྷ་ནྟི. བྷི་ཀྑུ་ནི་ཡོ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཨ་མྷཱ་ཀཾ པཱ་རི་ཝ་ཏྟ་ཀ་ཙཱི་ཝ་རཾ ན པ་ཊི་གྒ་ཧེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏཱ་སཾ བྷི་ཀྑུ་ནཱི་ནཾ ཨུ་ཛ྄ཛྷཱ་ཡ་ནྟཱི་ནཾ ཁི་ཡྻ་ནྟཱི་ནཾ ཝི་པཱ་ཙེ་ནྟཱི་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པ་ཉྩ་ནྣཾ པཱ་རི་ཝ་ཏྟ་ཀཾ པ་ཊི་གྒ་ཧེ་ཏུཾ – བྷི་ཀྑུ་སྶ, བྷི་ཀྑུ་ནི་ཡཱ, སི་ཀྑ་མཱ་ནཱ་ཡ, སཱ་མ་ཎེ་ར་སྶ, སཱ་མ་ཎེ་རི་ཡཱ. ཨ་ནུ་ཛཱ་ནཱ་མི, བྷི་ཀྑ་ཝེ, ཨི་མེ་སཾ པ་ཉྩ་ནྣཾ པཱ་རི་ཝ་ཏྟ་ཀཾ པ་ཊི་གྒ་ཧེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ.
༥༡༡. ‘‘ཡོ པ་ན བྷི་ཀྑུ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཧ་ཏྠ་ཏོ ཙཱི་ཝ་རཾ པ་ཊི་གྒ་ཎྷེ་ཡྻ, ཨ་ཉྙ་ཏྲ པཱ་རི་ཝ་ཏྟ་ཀཱ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༥༡༢. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨ་ཉྙཱ་ཏི་ཀཱ ནཱ་མ མཱ་ཏི་ཏོ ཝཱ པི་ཏི་ཏོ ཝཱ ཡཱ་ཝ ས་ཏྟ་མཱ པི་ཏཱ་མ་ཧ་ཡུ་གཱ ཨ་ས་མྦ་དྡྷཱ.
བྷི་ཀྑུ་ནཱི ནཱ་མ ཨུ་བྷ་ཏོ་ས་ངྒྷེ ཨུ་པ་ས་མྤ་ནྣཱ.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཝི་ཀ་པྤ་ནུ་པ་གཾ པ་ཙྪི་མཾ.
ཨ་ཉྙ་ཏྲ པཱ་རི་ཝ་ཏྟ་ཀཱཏི ཋ་པེ་ཏྭཱ པཱ་རི་ཝ་ཏྟ་ཀཾ.
པ་ཊི་གྒ་ཎྷཱ་ཏི, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ…པེ… ཨི་དཾ མེ, བྷ་ནྟེ, ཙཱི་ཝ་རཾ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཧ་ཏྠ་ཏོ པ་ཊི་གྒ་ཧི་ཏཾ, ཨ་ཉྙ་ཏྲ པཱ་རི་ཝ་ཏྟ་ཀཱ, ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༥༡༣. ཨ་ཉྙཱ་ཏི་ཀཱ་ཡ ཨ་ཉྙཱ་ཏི་ཀ་ས་ཉྙཱི ཙཱི་ཝ་རཾ པ་ཊི་གྒ་ཎྷཱ་ཏི, ཨ་ཉྙ་ཏྲ པཱ་རི་ཝ་ཏྟ་ཀཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙཱ་ཏི་ཀཱ་ཡ ཝེ་མ་ཏི་ཀོ ཙཱི་ཝ་རཾ པ་ཊི་གྒ་ཎྷཱ་ཏི, ཨ་ཉྙ་ཏྲ པཱ་རི་ཝ་ཏྟ་ཀཱ, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཉྙཱ་ཏི་ཀཱ་ཡ ཉཱ་ཏི་ཀ་ས་ཉྙཱི ཙཱི་ཝ་རཾ པ་ཊི་གྒ་ཎྷཱ་ཏི, ཨ་ཉྙ་ཏྲ པཱ་རི་ཝ་ཏྟ་ཀཱ, ནི་སྶ་གྒི་ཡཾ པཱ་ཙི་ཏྟི་ཡཾ.
ཨེ་ཀ་ཏོ་ཨུ་པ་ས་མྤ་ནྣཱ་ཡ ཧ་ཏྠ་ཏོ ཙཱི་ཝ་རཾ པ་ཊི་གྒ་ཎྷཱ་ཏི, ཨ་ཉྙ་ཏྲ པཱ་རི་ཝ་ཏྟ་ཀཱ, ཨཱ་པ་ཏྟི དུ་ཀྐ་ཊ་སྶ. ཉཱ་ཏི་ཀཱ་ཡ ཨ་ཉྙཱ་ཏི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཉཱ་ཏི་ཀཱ་ཡ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཉཱ་ཏི་ཀཱ་ཡ ཉཱ་ཏི་ཀ་ས་ཉྙཱི, ཨ་ནཱ་པ་ཏྟི.
༥༡༤. ཨ་ནཱ་པ་ཏྟི ཉཱ་ཏི་ཀཱ་ཡ, པཱ་རི་ཝ་ཏྟ་ཀཾ པ་རི་ཏྟེ་ན ཝཱ ཝི་པུ་ལཾ, ཝི་པུ་ལེ་ན ཝཱ པ་རི་ཏྟཾ, བྷི་ཀྑུ ཝི་སྶཱ་སཾ ག་ཎྷཱ་ཏི, ཏཱ་ཝ་ཀཱ་ལི་ཀཾ ག་ཎྷཱ་ཏི, ཙཱི་ཝ་རཾ ཋ་པེ་ཏྭཱ ཨ་ཉྙཾ པ་རི་ཀྑཱ་རཾ ག་ཎྷཱ་ཏི, སི་ཀྑ་མཱ་ནཱ་ཡ, སཱ་མ་ཎེ་རི་ཡཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཙཱི་ཝ་ར་པ་ཊི་གྒ་ཧ་ཎ་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.