༡. པ་ཏྟ་སི་ཀྑཱ་པ་དཾ
༥༩༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ བ་ཧཱུ པ་ཏྟེ ས་ནྣི་ཙ་ཡཾ ཀ་རོ་ནྟི. མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ བ་ཧཱུ པ་ཏྟེ ས་ནྣི་ཙ་ཡཾ ཀ་རི་སྶ་ནྟི, པ་ཏྟ་ཝཱ་ཎི་ཛྫཾ ཝཱ ས་མ་ཎཱ ས་ཀྱ་པུ་ཏྟི་ཡཱ ཀ་རི་སྶ་ནྟི ཨཱ་མ་ཏྟི་ཀཱ་པ་ཎཾ ཝཱ པ་སཱ་རེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཨ་ཏི་རེ་ཀ་པ་ཏྟཾ དྷཱ་རེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཨ་ཏི་རེ་ཀ་པ་ཏྟཾ དྷཱ་རེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཨ་ཏི་རེ་ཀ་པ་ཏྟཾ དྷཱ་རེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ …པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༩༩. ‘‘ཡོ པ་ན བྷི་ཀྑུ ཨ་ཏི་རེ་ཀ་པ་ཏྟཾ དྷཱ་རེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༦༠༠. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨཱ་ན་ནྡ་སྶ ཨ་ཏི་རེ་ཀ་པ་ཏྟོ ཨུ་པྤ་ནྣོ ཧོ་ཏི. ཨཱ་ཡ་སྨཱ ཙ ཨཱ་ན་ནྡོ ཏཾ པ་ཏྟཾ ཨཱ་ཡ་སྨ་ཏོ སཱ་རི་པུ་ཏྟ་སྶ དཱ་ཏུ་ཀཱ་མོ ཧོ་ཏི. ཨཱ་ཡ་སྨཱ ཙ སཱ་རི་པུ་ཏྟོ སཱ་ཀེ་ཏེ ཝི་ཧ་ར་ཏི. ཨ་ཐ ཁོ ཨཱ་ཡ་སྨ་ཏོ ཨཱ་ན་ནྡ་སྶ ཨེ་ཏ་ད་ཧོ་སི – ‘‘བྷ་ག་ཝ་ཏཱ སི་ཀྑཱ་པ་དཾ པ་ཉྙ་ཏྟཾ – ‘ན ཨ་ཏི་རེ་ཀ་པ་ཏྟོ དྷཱ་རེ་ཏ་བྦོ’ཏི. ཨ་ཡ་ཉྩ མེ ཨ་ཏི་རེ་ཀ་པ་ཏྟོ ཨུ་པྤ་ནྣོ. ཨ་ཧ་ཉྩི་མཾ པ་ཏྟཾ ཨཱ་ཡ་སྨ་ཏོ སཱ་རི་པུ་ཏྟ་སྶ དཱ་ཏུ་ཀཱ་མོ. ཨཱ་ཡ་སྨཱ ཙ སཱ་རི་པུ་ཏྟོ སཱ་ཀེ་ཏེ ཝི་ཧ་ར་ཏི. ཀ་ཐཾ ནུ ཁོ མ་ཡཱ པ་ཊི་པ་ཛྫི་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ‘‘ཀཱི་ཝ་ཙི་རཾ པ་ནཱ་ན་ནྡ, སཱ་རི་པུ་ཏྟོ ཨཱ་ག་ཙྪི་སྶ་ཏཱི’’ཏི? ‘‘ན་ཝ་མཾ ཝཱ, བྷ་ག་ཝཱ, དི་ཝ་སཾ ད་ས་མཾ ཝཱ’’ཏི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ད་སཱ་ཧ་པ་ར་མཾ ཨ་ཏི་རེ་ཀ་པ་ཏྟཾ དྷཱ་རེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༦༠༡. ‘‘ད་སཱ་ཧ་པ་ར་མཾ ཨ་ཏི་རེ་ཀ་པ་ཏྟོ དྷཱ་རེ་ཏ་བྦོ. ཏཾ ཨ་ཏི་ཀྐཱ་མ་ཡ་ཏོ ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༦༠༢. ད་སཱ་ཧ་པ་ར་མནྟི ད་སཱ་ཧ་པ་ར་མ་ཏཱ དྷཱ་རེ་ཏ་བྦོ.
ཨ་ཏི་རེ་ཀ་པ་ཏྟོ ནཱ་མ ཨ་ན་དྷི་ཊྛི་ཏོ ཨ་ཝི་ཀ་པྤི་ཏོ.
པ་ཏྟོ ནཱ་མ དྭེ པ་ཏྟཱ ཨ་ཡོ་པ་ཏྟོ མ་ཏྟི་ཀཱ་པ་ཏྟོ་ཏི.
ཏ་ཡོ པ་ཏྟ་སྶ ཝ་ཎྞཱ ཨུ་ཀྐ་ཊྛོ པ་ཏྟོ མ་ཛ྄ཛྷི་མོ པ་ཏྟོ ཨོ་མ་ཀོ པ་ཏྟོ. ཨུ་ཀྐ་ཊྛོ ནཱ་མ པ་ཏྟོ ཨ་ཌྜྷཱ་ལ༹ྷ་ཀོ་ད་ནཾ ག་ཎྷཱ་ཏི ཙ་ཏུ་བྷཱ་གཾ ཁཱ་ད་ནཾ ཏ་དུ་པི་ཡཾ བྱ་ཉྫ་ནཾ. མ་ཛ྄ཛྷི་མོ ནཱ་མ པ་ཏྟོ ནཱ་ལི༹་ཀོ་ད་ནཾ ག་ཎྷཱ་ཏི ཙ་ཏུ་བྷཱ་གཾ ཁཱ་ད་ནཾ ཏ་དུ་པི་ཡཾ བྱ་ཉྫ་ནཾ. ཨོ་མ་ཀོ ནཱ་མ པ་ཏྟོ པ་ཏྠོ་ད་ནཾ ག་ཎྷཱ་ཏི ཙ་ཏུ་བྷཱ་གཾ ཁཱ་ད་ནཾ ཏ་དུ་པི་ཡཾ བྱ་ཉྫ་ནཾ. ཏ་ཏོ ཨུ་ཀྐ་ཊྛོ ཨ་པ་ཏྟོ, ཨོ་མ་ཀོ ཨ་པ་ཏྟོ.
ཏཾ ཨ་ཏི་ཀྐཱ་མ་ཡ་ཏོ ནི་སྶ་གྒི་ཡོ ཧོ་ཏཱིཏི ཨེ་ཀཱ་ད་སེ ཨ་རུ་ཎུ་གྒ་མ་ནེ ནི་སྶ་གྒི་ཡོ ཧོ་ཏི. ནི་སྶ་ཛྫི་ཏ་བྦོ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦོ. ཏེ་ན བྷི་ཀྑུ་ནཱ ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཝུ་ཌྜྷཱ་ནཾ བྷི་ཀྑཱུ་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཡཾ མེ, བྷ་ནྟེ, པ་ཏྟོ ད་སཱ་ཧཱ་ཏི་ཀྐ་ནྟོ ནི་སྶ་གྒི་ཡོ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི’’ཏི. ནི་སྶ་ཛྫི་ཏྭཱ ཨཱ་པ་ཏྟི དེ་སེ་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ཨཱ་པ་ཏྟི པ་ཊི་གྒ་ཧེ་ཏ་བྦཱ, ནི་སྶ་ཊྛ་པ་ཏྟོ དཱ་ཏ་བྦོ.
༦༠༣. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ པ་ཏྟོ ཨི་ཏྠ་ནྣཱ་མ་སྶ བྷི་ཀྑུ་ནོ ནི་སྶ་གྒི་ཡོ ས་ངྒྷ་སྶ ནི་སྶ་ཊྛོ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་མཾ པ་ཏྟཾ ཨི་ཏྠ་ནྣཱ་མ་སྶ བྷི་ཀྑུ་ནོ ད་དེ་ཡྻཱ’’ཏི.
༦༠༤. ཏེ་ན བྷི་ཀྑུ་ནཱ ས་མྦ་ཧུ་ལེ བྷི་ཀྑཱུ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཝུ་ཌྜྷཱ་ནཾ བྷི་ཀྑཱུ་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶུ ཝ་ཙ་ནཱི་ཡཱ – ‘‘ཨ་ཡཾ མེ, བྷ་ནྟེ, པ་ཏྟོ ད་སཱ་ཧཱ་ཏི་ཀྐ་ནྟོ ནི་སྶ་གྒི་ཡོ. ཨི་མཱ་ཧཾ ཨཱ་ཡ་སྨ་ནྟཱ་ནཾ ནི་སྶ་ཛྫཱ་མཱི’’ཏི. ནི་སྶ་ཛྫི་ཏྭཱ ཨཱ་པ་ཏྟི དེ་སེ་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ཨཱ་པ་ཏྟི པ་ཊི་གྒ་ཧེ་ཏ་བྦཱ, ནི་སྶ་ཊྛ་པ་ཏྟོ དཱ་ཏ་བྦོ.
༦༠༥. ‘‘སུ་ཎ་ནྟུ མེ ཨཱ་ཡ་སྨ་ནྟཱ. ཨ་ཡཾ པ་ཏྟོ ཨི་ཏྠ་ནྣཱ་མ་སྶ བྷི་ཀྑུ་ནོ ནི་སྶ་གྒི་ཡོ ཨཱ་ཡ་སྨ་ནྟཱ་ནཾ ནི་སྶ་ཊྛོ. ཡ་དཱ་ཡ་སྨ་ནྟཱ་ནཾ པ་ཏྟ་ཀ་ལླཾ, ཨཱ་ཡ་སྨ་ནྟཱ ཨི་མཾ པ་ཏྟཾ ཨི་ཏྠ་ནྣཱ་མ་སྶ བྷི་ཀྑུ་ནོ ད་དེ་ཡྻུ’’ནྟི.
༦༠༦. ཏེ་ན བྷི་ཀྑུ་ནཱ ཨེ་ཀཾ བྷི་ཀྑུཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཡཾ མེ, ཨཱ་ཝུ་སོ, པ་ཏྟོ ད་སཱ་ཧཱ་ཏི་ཀྐ་ནྟོ ནི་སྶ་གྒི་ཡོ. ཨི་མཱ་ཧཾ ཨཱ་ཡ་སྨ་ཏོ ནི་སྶ་ཛྫཱ་མཱི’’ཏི. ནི་སྶ་ཛྫི་ཏྭཱ ཨཱ་པ་ཏྟི དེ་སེ་ཏ་བྦཱ. ཏེ་ན བྷི་ཀྑུ་ནཱ ཨཱ་པ་ཏྟི པ་ཊི་གྒ་ཧེ་ཏ་བྦཱ, ནི་སྶ་ཊྛ་པ་ཏྟོ དཱ་ཏ་བྦོ – ‘‘ཨི་མཾ པ་ཏྟཾ ཨཱ་ཡ་སྨ་ཏོ ད་མྨཱི’’ཏི.
༦༠༧. ད་སཱ་ཧཱ་ཏི་ཀྐ་ནྟེ ཨ་ཏི་ཀྐ་ནྟ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ད་སཱ་ཧཱ་ཏི་ཀྐ་ནྟེ ཝེ་མ་ཏི་ཀོ, ནི་སྶ་གྒི་ཡཾ པཱ་ཙི་ཏྟི་ཡཾ. ད་སཱ་ཧཱ་ཏི་ཀྐ་ནྟེ ཨ་ན་ཏི་ཀྐ་ནྟ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ན་དྷི་ཊྛི་ཏེ ཨ་དྷི་ཊྛི་ཏ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཝི་ཀ་པྤི་ཏེ ཝི་ཀ་པྤི་ཏ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཝི་སྶ་ཛྫི་ཏེ ཝི་སྶ་ཛྫི་ཏ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ན་ཊྛེ ན་ཊྛ་ས་ཉྙཱི ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཝི་ན་ཊྛེ ཝི་ན་ཊྛ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་བྷི་ནྣེ བྷི་ནྣ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཝི་ལུ་ཏྟེ ཝི་ལུ་ཏྟ་ས་ཉྙཱི, ནི་སྶ་གྒི་ཡཾ པཱ་ཙི་ཏྟི་ཡཾ.
ནི་སྶ་གྒི་ཡཾ པ་ཏྟཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ. ད་སཱ་ཧཱ་ན་ཏི་ཀྐ་ནྟེ ཨ་ཏི་ཀྐ་ནྟ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ད་སཱ་ཧཱ་ན་ཏི་ཀྐ་ནྟེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ད་སཱ་ཧཱ་ན་ཏི་ཀྐ་ནྟེ ཨ་ན་ཏི་ཀྐ་ནྟ་ས་ཉྙཱི, ཨ་ནཱ་པ་ཏྟི.
༦༠༨. ཨ་ནཱ་པ་ཏྟི ཨ་ནྟོ་ད་སཱ་ཧཾ ཨ་དྷི་ཊྛེ་ཏི, ཝི་ཀ་པྤེ་ཏི, ཝི་སྶ་ཛྫེ་ཏི, ན་སྶ་ཏི, ཝི་ན་སྶ་ཏི, བྷི་ཛྫ་ཏི, ཨ་ཙྪི་ནྡི་ཏྭཱ ག་ཎྷ་ནྟི, ཝི་སྶཱ་སཾ ག་ཎྷ་ནྟི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ནི་སྶ་ཊྛ་པ་ཏྟཾ ན དེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ‘‘ན, བྷི་ཀྑ་ཝེ, ནི་སྶ་ཊྛ་པ་ཏྟོ ན དཱ་ཏ་བྦོ. ཡོ ན ད་དེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི.
པ་ཏྟ་སི་ཀྑཱ་པ་དཾ ནི་ཊྛི་ཏཾ པ་ཋ་མཾ.