༢. སུ་དྡྷ་ཀཱ་ལ༹་ཀ་སི་ཀྑཱ་པ་དཾ
༥༤༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པེ་ནྟི. མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པེ་སྶ་ནྟི, སེ་ཡྻ་ཐཱ་པི གི་ཧཱི ཀཱ་མ་བྷོ་གི་ནོ’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏུ་མྷེ, བྷི་ཀྑ་ཝེ, སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༤༨. ‘‘ཡོ པ་ན བྷི་ཀྑུ སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པེ་ཡྻ, ནི་སྶ་གྒི་ཡཾ པཱ་ཙི་ཏྟི་ཡ’’ནྟི.
༥༤༩. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཀཱ་ལ༹་ཀཾ ནཱ་མ དྭེ ཀཱ་ལ༹་ཀཱ་ནི – ཛཱ་ཏི་ཡཱ ཀཱ་ལ༹་ཀཾ ཝཱ ར་ཛ་ན་ཀཱ་ལ༹་ཀཾ ཝཱ.
ས་ནྠ་ཏཾ ནཱ་མ ས་ནྠ་རི་ཏྭཱ ཀ་ཏཾ ཧོ་ཏི ཨ་ཝཱ་ཡི་མཾ.
ཀཱ་རཱ་པེ་ཡྻཱཏི ཀ་རོ་ཏི ཝཱ ཀཱ་རཱ་པེ་ཏི ཝཱ, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ནི་སྶ་གྒི་ཡཾ ཧོ་ཏི. ནི་སྶ་ཛྫི་ཏ་བྦཾ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ནི་སྶ་ཛྫི་ཏ་བྦཾ …པེ… ཨི་དཾ མེ, བྷ་ནྟེ, སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པི་ཏཾ ནི་སྶ་གྒི་ཡཾ. ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི…པེ… ད་དེ་ཡྻཱ་ཏི…པེ… ད་དེ་ཡྻུ་ནྟི…པེ… ཨཱ་ཡ་སྨ་ཏོ ད་མྨཱི་ཏི.
༥༥༠. ཨ་ཏྟ་ནཱ ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. ཨ་ཏྟ་ནཱ ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. པ་རེ་ཧི ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ. པ་རེ་ཧི ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ནི་སྶ་གྒི་ཡཾ པཱ་ཙི་ཏྟི་ཡཾ.
ཨ་ཉྙ་སྶ་ཏྠཱ་ཡ ཀ་རོ་ཏི ཝཱ ཀཱ་རཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ཉྙེ་ན ཀ་ཏཾ པ་ཊི་ལ་བྷི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ.
༥༥༡. ཨ་ནཱ་པ་ཏྟི ཝི་ཏཱ་ནཾ ཝཱ བྷཱུ་མ་ཏྠ་ར་ཎཾ ཝཱ སཱ་ཎི་པཱ་ཀཱ་རཾ ཝཱ བྷི་སིཾ ཝཱ བི་བྦོ་ཧ་ནཾ ཝཱ ཀ་རོ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
སུ་དྡྷ་ཀཱ་ལ༹་ཀ་སི་ཀྑཱ་པ་དཾ ནི་ཊྛི་ཏཾ དུ་ཏི་ཡཾ.