༤. ཨ་ཏྟ་ཀཱ་མ་པཱ་རི་ཙ་རི་ཡ་སི་ཀྑཱ་པ་དཾ
༢༩༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་དཱ་ཡཱི སཱ་ཝ་ཏྠི་ཡཾ ཀུ་ལཱུ་པ་ཀོ ཧོ་ཏི, བ་ཧུ་ཀཱ་ནི ཀུ་ལཱ་ནི ཨུ་པ་ས་ངྐ་མ་ཏི. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཨི་ཏྠཱི མ་ཏ་པ་ཏི་ཀཱ ཨ་བྷི་རཱུ་པཱ ཧོ་ཏི ད་སྶ་ནཱི་ཡཱ པཱ་སཱ་དི་ཀཱ. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཏ་སྶཱ ཨི་ཏྠི་ཡཱ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ སཱ ཨི་ཏྠཱི ཡེ་ནཱ་ཡ་སྨཱ ཨུ་དཱ་ཡཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨུ་དཱ་ཡིཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཏཾ ཨི་ཏྠིཾ ཨཱ་ཡ་སྨཱ ཨུ་དཱ་ཡཱི དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ སཱ ཨི་ཏྠཱི ཨཱ་ཡ་སྨ་ཏཱ ཨུ་དཱ་ཡི་ནཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏཱ ས་མཱ་ད་པི་ཏཱ ས་མུ་ཏྟེ་ཛི་ཏཱ ས་མྤ་ཧཾ་སི་ཏཱ ཨཱ་ཡ་སྨ་ནྟཾ ཨུ་དཱ་ཡིཾ ཨེ་ཏ་ད་ཝོ་ཙ – ‘‘ཝ་དེ་ཡྻཱ་ཐ, བྷ་ནྟེ, ཡེ་ན ཨ་ཏྠོ. པ་ཊི་བ་ལཱ མ་ཡཾ ཨ་ཡྻ་སྶ དཱ་ཏུཾ ཡ་དི་དཾ ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་ར’’ནྟི.
‘‘ན ཁོ ཏེ, བྷ་གི་ནི, ཨ་མྷཱ་ཀཾ དུ་ལླ་བྷཱ ཡ་དི་དཾ ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཱ. ཨ་པི་ཙ, ཡོ ཨ་མྷཱ་ཀཾ དུ་ལླ་བྷོ ཏཾ དེ་ཧཱི’’ཏི. ‘‘ཀིཾ, བྷ་ནྟེ’’ཏི? ‘‘མེ་ཐུ་ན་དྷ་མྨ’’ནྟི. ‘‘ཨ་ཏྠོ, བྷ་ནྟེ’’ཏི? ‘‘ཨ་ཏྠོ, བྷ་གི་ནཱི’’ཏི. ‘‘ཨེ་ཧི, བྷ་ནྟེ’’ཏི, ཨོ་ཝ་ར་ཀཾ པ་ཝི་སི་ཏྭཱ སཱ་ཊ་ཀཾ ནི་ཀྑི་པི་ཏྭཱ མ་ཉྩ་ཀེ ཨུ་ཏྟཱ་ནཱ ནི་པ་ཛྫི. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི ཡེ་ན སཱ ཨི་ཏྠཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ – ‘‘ཀོ ཨི་མཾ ཝ་ས་ལཾ དུ་གྒ་ནྡྷཾ ཨཱ་མ་སི་སྶ་ཏཱི’’ཏི, ནི་ཊྛུ་ཧི་ཏྭཱ པ་ཀྐཱ་མི. ཨ་ཐ ཁོ སཱ ཨི་ཏྠཱི ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཨ་ལ་ཛྫི་ནོ ཨི་མེ ས་མ་ཎཱ ས་ཀྱ་པུ་ཏྟི་ཡཱ དུ་སྶཱི་ལཱ མུ་སཱ་ཝཱ་དི་ནོ. ཨི་མེ ཧི ནཱ་མ དྷ་མྨ་ཙཱ་རི་ནོ ས་མ་ཙཱ་རི་ནོ བྲ་ཧྨ་ཙཱ་རི་ནོ ས་ཙྩ་ཝཱ་དི་ནོ སཱི་ལ་ཝ་ནྟོ ཀ་ལྱཱ་ཎ་དྷ་མྨཱ པ་ཊི་ཛཱ་ནི་སྶ་ནྟི! ན་ཏྠི ཨི་མེ་སཾ སཱ་མ་ཉྙཾ ན་ཏྠི ཨི་མེ་སཾ བྲ་ཧྨ་ཉྙཾ, ན་ཊྛཾ ཨི་མེ་སཾ སཱ་མ་ཉྙཾ ན་ཊྛཾ ཨི་མེ་སཾ བྲ་ཧྨ་ཉྙཾ, ཀུ་ཏོ ཨི་མེ་སཾ སཱ་མ་ཉྙཾ ཀུ་ཏོ ཨི་མེ་སཾ བྲ་ཧྨ་ཉྙཾ, ཨ་པ་ག་ཏཱ ཨི་མེ སཱ་མ་ཉྙཱ ཨ་པ་ག་ཏཱ ཨི་མེ བྲ་ཧྨ་ཉྙཱ. ཀ་ཐ་ཉྷི ནཱ་མ ས་མ་ཎོ ཨུ་དཱ་ཡཱི མཾ སཱ་མཾ མེ་ཐུ་ན་དྷ་མྨཾ ཡཱ་ཙི་ཏྭཱ, ‘ཀོ ཨི་མཾ ཝ་ས་ལཾ དུ་གྒ་ནྡྷཾ ཨཱ་མ་སི་སྶ་ཏཱི’’ཏི ནི་ཊྛུ་ཧི་ཏྭཱ པ་ཀྐ་མི་སྶ་ཏི! ཀིཾ མེ པཱ་པ་ཀཾ ཀིཾ མེ དུ་གྒ་ནྡྷཾ, ཀ་སྶཱ་ཧཾ ཀེ་ན ཧཱ་ཡཱ་མཱི’’ཏི? ཨ་ཉྙཱ་པི ཨི་ཏྠི་ཡོ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཨ་ལ་ཛྫི་ནོ ཨི་མེ ས་མ་ཎཱ ས་ཀྱ་པུ་ཏྟི་ཡཱ དུ་སྶཱི་ལཱ མུ་སཱ་ཝཱ་དི་ནོ…པེ… ཀ་ཐ་ཉྷི ནཱ་མ ས་མ་ཎོ ཨུ་དཱ་ཡཱི ཨི་མི་སྶཱ སཱ་མཾ མེ་ཐུ་ན་དྷ་མྨཾ ཡཱ་ཙི་ཏྭཱ, ‘ཀོ ཨི་མཾ ཝ་ས་ལཾ དུ་གྒ་ནྡྷཾ ཨཱ་མ་སི་སྶ་ཏཱི’ཏི ནི་ཊྛུ་ཧི་ཏྭཱ པ་ཀྐ་མི་སྶ་ཏི! ཀིཾ ཨི་མི་སྶཱ པཱ་པ་ཀཾ ཀིཾ ཨི་མི་སྶཱ དུ་གྒ་ནྡྷཾ, ཀ་སྶཱ་ཡཾ ཀེ་ན ཧཱ་ཡ་ཏཱི’’ཏི? ཨ་སྶོ་སུཾ ཁོ བྷི་ཀྑཱུ ཏཱ་སཾ ཨི་ཏྠཱི་ནཾ ཨུ་ཛ྄ཛྷཱ་ཡ་ནྟཱི་ནཾ ཁི་ཡྻ་ནྟཱི་ནཾ ཝི་པཱ་ཙེ་ནྟཱི་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་དཱ་ཡཱི མཱ་ཏུ་གཱ་མ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་སི་སྶ་ཏཱི’’ཏི!
ཨ་ཐ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨུ་དཱ་ཡིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ ཨཱ་ཡ་སྨ་ནྟཾ ཨུ་དཱ་ཡིཾ པ་ཊི་པུ་ཙྪི – ‘‘ས་ཙྩཾ ཀི་ར ཏྭཾ, ཨུ་དཱ་ཡི, མཱ་ཏུ་གཱ་མ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་སཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, མོ་གྷ་པུ་རི་ས, ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, མཱ་ཏུ་གཱ་མ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་སི་སྶ་སི! ན་ནུ མ་ཡཱ, མོ་གྷ་པུ་རི་ས, ཨ་ནེ་ཀ་པ་རི་ཡཱ་ཡེ་ན ཝི་རཱ་གཱ་ཡ དྷ་མྨོ དེ་སི་ཏོ ནོ ས་རཱ་གཱ་ཡ…པེ… ཀཱ་མ་པ་རི་ལཱ༹་ཧཱ་ནཾ ཝཱུ་པ་ས་མོ ཨ་ཀྑཱ་ཏོ? ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༢༩༡. ‘‘ཡོ པ་ན བྷི་ཀྑུ ཨོ་ཏི་ཎྞོ ཝི་པ་རི་ཎ་ཏེ་ན ཙི་ཏྟེ་ན མཱ་ཏུ་གཱ་མ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་སེ་ཡྻ – ‘ཨེ་ཏ་ད་གྒཾ, བྷ་གི་ནི, པཱ་རི་ཙ་རི་ཡཱ་ནཾ ཡཱ མཱ་དི་སཾ སཱི་ལ་ཝ་ནྟཾ ཀ་ལྱཱ་ཎ་དྷ་མྨཾ བྲ་ཧྨ་ཙཱ་རིཾ ཨེ་ཏེ་ན དྷ་མྨེ་ན པ་རི་ཙ་རེ་ཡྻཱ་ཏི མེ་ཐུ་ནུ་པ་སཾ་ཧི་ཏེ་ན’, ས་ངྒྷཱ་དི་སེ་སོ’’ཏི.
༢༩༢. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨོ་ཏི་ཎྞོ ནཱ་མ སཱ་ར་ཏྟོ ཨ་པེ་ཀྑ་ཝཱ པ་ཊི་བ་དྡྷ་ཙི་ཏྟོ.
ཝི་པ་རི་ཎ་ཏནྟི ར་ཏྟ་མྤི ཙི་ཏྟཾ ཝི་པ་རི་ཎ་ཏྟཾ, དུ་ཊྛ་མྤི ཙི་ཏྟཾ ཝི་པ་རི་ཎ་ཏཾ, མཱུ་ལ༹ྷ་མྤི ཙི་ཏྟཾ ཝི་པ་རི་ཎ་ཏཾ. ཨ་པི་ཙ, ར་ཏྟཾ ཙི་ཏྟཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཾ ཝི་པ་རི་ཎ་ཏ་ནྟི.
མཱ་ཏུ་གཱ་མོ ནཱ་མ མ་ནུ་སྶི་ཏྠཱི, ན ཡ་ཀྑཱི, ན པེ་ཏཱི, ན ཏི་ར་ཙྪཱ་ན་ག་ཏཱ. ཝི་ཉྙཱུ པ་ཊི་བ་ལཱ སུ་བྷཱ་སི་ཏ་དུ་བྦྷཱ་སི་ཏཾ དུ་ཊྛ་ལླཱ་དུ་ཊྛུ་ལླཾ ཨཱ་ཛཱ་ནི་ཏུཾ.
མཱ་ཏུ་གཱ་མ་སྶ ས་ནྟི་ཀེཏི མཱ་ཏུ་གཱ་མ་སྶ སཱ་མ་ནྟཱ, མཱ་ཏུ་གཱ་མ་སྶ ཨ་ཝི་དཱུ་རེ.
ཨ་ཏྟ་ཀཱ་མནྟི ཨ་ཏྟ་ནོ ཀཱ་མཾ ཨ་ཏྟ་ནོ ཧེ་ཏུཾ ཨ་ཏྟ་ནོ ཨ་དྷི་པྤཱ་ཡཾ ཨ་ཏྟ་ནོ པཱ་རི་ཙ་རི་ཡཾ.
ཨེ་ཏ་ད་གྒནྟི ཨེ་ཏཾ ཨ་གྒཾ ཨེ་ཏཾ སེ་ཊྛཾ ཨེ་ཏཾ མོ་ཀྑཾ ཨེ་ཏཾ ཨུ་ཏྟ་མཾ ཨེ་ཏཾ པ་ཝ་རཾ.
ཡཱཏི ཁ་ཏྟི་ཡཱི [ཁ་ཏྟི་ཡཱ (སྱཱ.)] ཝཱ བྲཱ་ཧྨ་ཎཱི ཝཱ ཝེ་སྶཱི ཝཱ སུ་དྡཱི ཝཱ.
མཱ་དི་སནྟི ཁ་ཏྟི་ཡཾ ཝཱ བྲཱ་ཧྨ་ཎཾ ཝཱ ཝེ་སྶཾ ཝཱ སུ་དྡཾ ཝཱ.
སཱི་ལ་ཝ་ནྟནྟི པཱ་ཎཱ་ཏི་པཱ་ཏཱ པ་ཊི་ཝི་ར་ཏཾ, ཨ་དི་ནྣཱ་དཱ་ནཱ པ་ཊི་ཝི་ར་ཏཾ, མུ་སཱ་ཝཱ་དཱ པ་ཊི་ཝི་ར་ཏཾ.
བྲ་ཧྨ་ཙཱ་རིནྟི མེ་ཐུ་ན་དྷ་མྨཱ པ་ཊི་ཝི་ར་ཏཾ.
ཀ་ལྱཱ་ཎ་དྷ་མྨོ ནཱ་མ ཏེ་ན ཙ སཱི་ལེ་ན ཏེ་ན ཙ བྲ་ཧྨ་ཙ་རི་ཡེ་ན ཀ་ལྱཱ་ཎ་དྷ་མྨོ ཧོ་ཏི.
ཨེ་ཏེ་ན དྷ་མྨེ་ནཱཏི མེ་ཐུ་ན་དྷ་མྨེ་ན.
པ་རི་ཙ་རེ་ཡྻཱཏི ཨ་བྷི་ར་མེ་ཡྻ.
མེ་ཐུ་ནུ་པ་སཾ་ཧི་ཏེ་ནཱཏི མེ་ཐུ་ན་དྷ་མྨ་པྤ་ཊི་སཾ་ཡུ་ཏྟེ་ན.
ས་ངྒྷཱ་དི་སེ་སོཏི…པེ… ཏེ་ན་པི ཝུ་ཙྩ་ཏི ས་ངྒྷཱ་དི་སེ་སོ་ཏི.
༢༩༣. ཨི་ཏྠཱི ཙ ཧོ་ཏི ཨི་ཏྠི་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ ཨི་ཏྠི་ཡཱ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི ས་ངྒྷཱ་དི་སེ་ས་སྶ.
ཨི་ཏྠཱི ཙ ཧོ་ཏི ཝེ་མ་ཏི་ཀོ…པེ… པ་ཎྜ་ཀ་ས་ཉྙཱི… པུ་རི་ས་ས་ཉྙཱི… ཏི་ར་ཙྪཱ་ན་ག་ཏ་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ ཨི་ཏྠི་ཡཱ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
པ་ཎྜ་ཀོ ཙ ཧོ་ཏི པ་ཎྜ་ཀ་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ པ་ཎྜ་ཀ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
པ་ཎྜ་ཀོ ཙ ཧོ་ཏི ཝེ་མ་ཏི་ཀོ…པེ… པུ་རི་ས་ས་ཉྙཱི… ཏི་ར་ཙྪཱ་ན་ག་ཏ་ས་ཉྙཱི… ཨི་ཏྠི་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ པ་ཎྜ་ཀ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི དུ་ཀྐ་ཊ་སྶ.
པུ་རི་སོ ཙ ཧོ་ཏི…པེ… ཏི་ར་ཙྪཱ་ན་ག་ཏོ ཙ ཧོ་ཏི ཏི་ར་ཙྪཱ་ན་ག་ཏ་ས་ཉྙཱི…པེ… ཝེ་མ་ཏི་ཀོ ཨི་ཏྠི་ས་ཉྙཱི… པ་ཎྜ་ཀ་ས་ཉྙཱི… པུ་རི་ས་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ ཏི་ར་ཙྪཱ་ན་ག་ཏ་སྶ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི དུ་ཀྐ་ཊ་སྶ.
དྭེ ཨི་ཏྠི་ཡོ དྭི་ནྣཾ ཨི་ཏྠཱི་ནཾ ཨི་ཏྠི་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ དྭི་ནྣཾ ཨི་ཏྠཱི་ནཾ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི དྭི་ནྣཾ ས་ངྒྷཱ་དི་སེ་སཱ་ནཾ…པེ….
ཨི་ཏྠཱི ཙ པ་ཎྜ་ཀོ ཙ ཨུ་བྷི་ནྣཾ ཨི་ཏྠི་ས་ཉྙཱི སཱ་ར་ཏྟོ ཙ. བྷི་ཀྑུ ཙ ནཾ ཨུ་བྷི་ནྣཾ ས་ནྟི་ཀེ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷཱ་ས་ཏི, ཨཱ་པ་ཏྟི ས་ངྒྷཱ་དི་སེ་སེ་ན དུ་ཀྐ་ཊ་སྶ…པེ….
༢༩༤. ཨ་ནཱ་པ་ཏྟི ‘‘ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རེ་ན ཨུ་པ་ཊྛ་ཧཱ’’ཏི བྷ་ཎ་ཏི, ཨུ་མྨ་ཏྟ་ཀ་སྶ ཨཱ་དི་ཀ་མྨི་ཀ་སྶཱ་ཏི.
ཝི་ནཱི་ཏ་ཝ་ཏྠུ་ཨུ་དྡཱ་ན་གཱ་ཐཱ
ཀ་ཐཾ ཝ་ཉྫྷཱ ལ་བྷེ པུ་ཏྟཾ, པི་ཡཱ ཙ སུ་བྷ་གཱ སི་ཡཾ;
ཀིཾ ད་ཛྫཾ ཀེ་ནུ་པ་ཊྛེ་ཡྻཾ, ཀ་ཐཾ ག་ཙྪེ་ཡྻཾ སུ་གྒ་ཏི་ནྟི.
ཝི་ནཱི་ཏ་ཝ་ཏྠུ
༢༩༥. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཝ་ཉྫྷཱ ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཐཱ་ཧཾ, བྷ་ནྟེ, ཝི་ཛཱ་ཡེ་ཡྻ’’ནྟི? ‘‘ཏེ་ན ཧི, བྷ་གི་ནི, ཨ་གྒ་དཱ་ནཾ དེ་ཧཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཝི་ཛཱ་ཡི་ནཱི ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཐཱ་ཧཾ, བྷ་ནྟེ, པུ་ཏྟཾ ལ་བྷེ་ཡྻ’’ནྟི? ‘‘ཏེ་ན ཧི, བྷ་གི་ནི, ཨ་གྒ་དཱ་ནཾ དེ་ཧཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཐཱ་ཧཾ, བྷ་ནྟེ, སཱ་མི་ཀ་སྶ པི་ཡཱ ཨ་སྶ’’ནྟི? ‘‘ཏེ་ན ཧི, བྷ་གི་ནི, ཨ་གྒ་དཱ་ནཾ དེ་ཧཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཐཱ་ཧཾ, བྷ་ནྟེ, སུ་བྷ་གཱ ཨ་སྶ’’ནྟི? ‘‘ཏེ་ན ཧི, བྷ་གི་ནི, ཨ་གྒ་དཱ་ནཾ དེ་ཧཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀྱཱ་ཧཾ, བྷ་ནྟེ, ཨ་ཡྻ་སྶ ད་ཛྫཱ་མཱི’’ཏི? ‘‘ཨ་གྒ་དཱ་ནཾ, བྷ་གི་ནཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀེ་ནཱ་ཧཾ, བྷ་ནྟེ, ཨ་ཡྻཾ ཨུ་པ་ཊྛེ་མཱི’’ཏི? ‘‘ཨ་གྒ་དཱ་ནེ་ན, བྷ་གི་ནཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ ཨི་ཏྠཱི ཀུ་ལཱུ་པ་ཀཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཐཱ་ཧཾ,
བྷ་ནྟེ, སུ་ག་ཏིཾ ག་ཙྪེ་ཡྻ’’ནྟི? ‘‘ཏེ་ན ཧི, བྷ་གི་ནི, ཨ་གྒ་དཱ་ནཾ དེ་ཧཱི’’ཏི. ‘‘ཀིཾ, བྷ་ནྟེ, ཨ་གྒ་དཱ་ན’’ནྟི? ‘‘མེ་ཐུ་ན་དྷ་མྨ’’ནྟི. ཏ་སྶ ཀུ་ཀྐུ་ཙྩཾ ཨ་ཧོ་སི…པེ… ‘‘ཨཱ་པ་ཏྟིཾ ཏྭཾ, བྷི་ཀྑུ, ཨཱ་པ་ནྣོ ས་ངྒྷཱ་དི་སེ་ས’’ནྟི.
ཨ་ཏྟ་ཀཱ་མ་པཱ་རི་ཙ་རི་ཡ་སི་ཀྑཱ་པ་དཾ ནི་ཊྛི་ཏཾ ཙ་ཏུ་ཏྠཾ.