ཝེ་ར་ཉྫ་ཀ་ཎྜཾ
༡. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཝེ་ར་ཉྫཱ་ཡཾ ཝི་ཧ་ར་ཏི ན་ལེ༹་རུ་པུ་ཙི་མ་ནྡ་མཱུ་ལེ མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ པ་ཉྩ་མ་ཏྟེ་ཧི བྷི་ཀྑུ་ས་ཏེ་ཧི. ཨ་སྶོ་སི ཁོ ཝེ་ར་ཉྫོ བྲཱ་ཧྨ་ཎོ – ‘‘ས་མ་ཎོ ཁ་ལུ, བྷོ, གོ་ཏ་མོ ས་ཀྱ་པུ་ཏྟོ ས་ཀྱ་ཀུ་ལཱ པ་བྦ་ཛི་ཏོ ཝེ་ར་ཉྫཱ་ཡཾ ཝི་ཧ་ར་ཏི ན་ལེ༹་རུ་པུ་ཙི་མ་ནྡ་མཱུ་ལེ མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ པ་ཉྩ་མ་ཏྟེ་ཧི བྷི་ཀྑུ་ས་ཏེ་ཧི. ཏཾ ཁོ པ་ན བྷ་ཝ་ནྟཾ གོ་ཏ་མཾ ཨེ་ཝཾ ཀ་ལྱཱ་ཎོ ཀི་ཏྟི་ས་དྡོ ཨ་བྦྷུ་གྒ་ཏོ – ‘ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ [བྷ་ག་ཝཱ་ཏི (སྱཱ.), དཱི. ནི. ༡.༡༥༧, ཨ་བྦྷུ་གྒ་ཏཱ་ཀཱ་རེ་ན པ་ན ས་མེ་ཏི]. སོ ཨི་མཾ ལོ་ཀཾ ས་དེ་ཝ་ཀཾ ས་མཱ་ར་ཀཾ ས་བྲ་ཧྨ་ཀཾ ས་སྶ་མ་ཎ་བྲཱ་ཧྨ་ཎིཾ པ་ཛཾ ས་དེ་ཝ་མ་ནུ་སྶཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ཏི. སོ དྷ་མྨཾ དེ་སེ་ཏི ཨཱ་དི་ཀ་ལྱཱ་ཎཾ མ་ཛ྄ཛྷེ་ཀ་ལྱཱ་ཎཾ པ་རི་ཡོ་སཱ་ན་ཀ་ལྱཱ་ཎཾ སཱ་ཏྠཾ ས་བྱ་ཉྫ་ནཾ; ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ པ་ཀཱ་སེ་ཏི; སཱ་དྷུ ཁོ པ་ན ཏ་ཐཱ་རཱུ་པཱ་ནཾ ཨ་ར་ཧ་ཏཾ ད་སྶ་ནཾ ཧོ་ཏཱི’’’ཏི.
༢. [ཨི་ཏོ པ་རཾ ཡཱ་ཝ པཱ་རཱ. ༡༥-༡༦ པ་ད་ཀྑི་ཎཾ ཀ་ཏྭཱ པ་ཀྐཱ་མཱི་ཏི པཱ་ཋོ ཨ. ནི. ༨.༡༡] ཨ་ཐ ཁོ ཝེ་ར་ཉྫོ བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཝེ་ར་ཉྫོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སུ་ཏཾ མེ་ཏཾ, བྷོ གོ་ཏ་མ – ‘ན ས་མ་ཎོ གོ་ཏ་མོ བྲཱ་ཧྨ་ཎེ ཛི་ཎྞེ ཝུ་ཌྜྷེ མ་ཧ་ལླ་ཀེ ཨ་དྡྷ་ག་ཏེ ཝ་ཡོ་ཨ་ནུ་པྤ་ཏྟེ ཨ་བྷི་ཝཱ་དེ་ཏི ཝཱ པ་ཙྩུ་ཊྛེ་ཏི ཝཱ ཨཱ་ས་ནེ་ན ཝཱ ནི་མ་ནྟེ་ཏཱི’ཏི. ཏ་ཡི་དཾ, བྷོ གོ་ཏ་མ, ཏ་ཐེ་ཝ? ན ཧི བྷ་ཝཾ གོ་ཏ་མོ བྲཱ་ཧྨ་ཎེ ཛི་ཎྞེ ཝུ་ཌྜྷེ མ་ཧ་ལླ་ཀེ ཨ་དྡྷ་ག་ཏེ ཝ་ཡོ་ཨ་ནུ་པྤ་ཏྟེ ཨ་བྷི་ཝཱ་དེ་ཏི ཝཱ པ་ཙྩུ་ཊྛེ་ཏི ཝཱ ཨཱ་ས་ནེ་ན ཝཱ ནི་མ་ནྟེ་ཏི? ཏ་ཡི་དཾ, བྷོ གོ་ཏ་མ, ན ས་མྤ་ནྣ་མེ་ཝཱ’’ཏི.
‘‘ནཱ་ཧཾ ཏཾ, བྲཱ་ཧྨ་ཎ, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཡ་མ་ཧཾ ཨ་བྷི་ཝཱ་དེ་ཡྻཾ ཝཱ པ་ཙྩུ་ཊྛེ་ཡྻཾ ཝཱ ཨཱ་ས་ནེ་ན ཝཱ ནི་མ་ནྟེ་ཡྻཾ. ཡ་ཉྷི, བྲཱ་ཧྨ་ཎ, ཏ་ཐཱ་ག་ཏོ ཨ་བྷི་ཝཱ་དེ་ཡྻ ཝཱ པ་ཙྩུ་ཊྛེ་ཡྻ ཝཱ ཨཱ་ས་ནེ་ན ཝཱ ནི་མ་ནྟེ་ཡྻ, མུ་དྡྷཱ་པི ཏ་སྶ ཝི་པ་ཏེ་ཡྻཱ’’ཏི.
༣. ‘‘ཨ་ར་ས་རཱུ་པོ བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨ་ར་ས་རཱུ་པོ ས་མ་ཎོ གོ་ཏ་མོ’ཏི. ཡེ ཏེ, བྲཱ་ཧྨ་ཎ, རཱུ་པ་ར་སཱ ས་དྡ་ར་སཱ ག་ནྡྷ་ར་སཱ ར་ས་ར་སཱ ཕོ་ཊྛ་བྦ་ར་སཱ ཏེ ཏ་ཐཱ་ག་ཏ་སྶ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ [ཨ་ན་བྷཱ་ཝ་ཀ་ཏཱ (སཱི.) ཨ་ན་བྷཱ་ཝཾ་ག་ཏཱ (སྱཱ.)] ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨ་ར་ས་རཱུ་པོ ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༤. ‘‘ནི་བྦྷོ་གོ བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ནི་བྦྷོ་གོ ས་མ་ཎོ གོ་ཏ་མོ’ཏི. ཡེ ཏེ, བྲཱ་ཧྨ་ཎ, རཱུ་པ་བྷོ་གཱ ས་དྡ་བྷོ་གཱ ག་ནྡྷ་བྷོ་གཱ ར་ས་བྷོ་གཱ ཕོ་ཊྛ་བྦ་བྷོ་གཱ ཏེ ཏ་ཐཱ་ག་ཏ་སྶ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ནི་བྦྷོ་གོ ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༥. ‘‘ཨ་ཀི་རི་ཡ་ཝཱ་དོ བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ’ཏི. ཨ་ཧ་ཉྷི, བྲཱ་ཧྨ་ཎ, ཨ་ཀི་རི་ཡཾ ཝ་དཱ་མི ཀཱ་ཡ་དུ་ཙྩ་རི་ཏ་སྶ ཝ་ཙཱི་དུ་ཙྩ་རི་ཏ་སྶ མ་ནོ་དུ་ཙྩ་རི་ཏ་སྶ. ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨ་ཀི་རི་ཡཾ ཝ་དཱ་མི. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༦. ‘‘ཨུ་ཙྪེ་ད་ཝཱ་དོ བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨུ་ཙྪེ་ད་ཝཱ་དོ ས་མ་ཎོ གོ་ཏ་མོ’ཏི. ཨ་ཧ་ཉྷི, བྲཱ་ཧྨ་ཎ, ཨུ་ཙྪེ་དཾ ཝ་དཱ་མི རཱ་ག་སྶ དོ་ས་སྶ མོ་ཧ་སྶ. ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨུ་ཙྪེ་དཾ ཝ་དཱ་མི. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨུ་ཙྪེ་ད་ཝཱ་དོ ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༧. ‘‘ཛེ་གུ་ཙྪཱི བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཛེ་གུ་ཙྪཱི ས་མ་ཎོ གོ་ཏ་མོ’ཏི. ཨ་ཧ་ཉྷི, བྲཱ་ཧྨ་ཎ, ཛི་གུ་ཙྪཱ་མི ཀཱ་ཡ་དུ་ཙྩ་རི་ཏེ་ན ཝ་ཙཱི་དུ་ཙྩ་རི་ཏེ་ན མ་ནོ་དུ་ཙྩ་རི་ཏེ་ན. ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ས་མཱ་པ་ཏྟི་ཡཱ ཛི་གུ་ཙྪཱ་མི. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཛེ་གུ་ཙྪཱི ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༨. ‘‘ཝེ་ན་ཡི་ཀོ བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཝེ་ན་ཡི་ཀོ ས་མ་ཎོ གོ་ཏ་མོ’ཏི. ཨ་ཧ་ཉྷི, བྲཱ་ཧྨ་ཎ, ཝི་ན་ཡཱ་ཡ དྷ་མྨཾ དེ་སེ་མི རཱ་ག་སྶ དོ་ས་སྶ མོ་ཧ་སྶ. ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཝི་ན་ཡཱ་ཡ དྷ་མྨཾ དེ་སེ་མི. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཝེ་ན་ཡི་ཀོ ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༩. ‘‘ཏ་པ་སྶཱི བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཏ་པ་སྶཱི ས་མ་ཎོ གོ་ཏ་མོ’ཏི. ཏ་པ་ནཱི་ཡཱ་ཧཾ, བྲཱ་ཧྨ་ཎ, པཱ་པ་ཀེ ཨ་ཀུ་ས་ལེ དྷ་མྨེ ཝ་དཱ་མི, ཀཱ་ཡ་དུ་ཙྩ་རི་ཏཾ ཝ་ཙཱི་དུ་ཙྩ་རི་ཏཾ མ་ནོ་དུ་ཙྩ་རི་ཏཾ. ཡ་སྶ ཁོ, བྲཱ་ཧྨ་ཎ, ཏ་པ་ནཱི་ཡཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ ཏ་མ་ཧཾ ཏ་པ་སྶཱི་ཏི ཝ་དཱ་མི. ཏ་ཐཱ་ག་ཏ་སྶ ཁོ, བྲཱ་ཧྨ་ཎ, ཏ་པ་ནཱི་ཡཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཏ་པ་སྶཱི ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སཱི’’ཏི.
༡༠. ‘‘ཨ་པ་ག་བྦྷོ བྷ་ཝཾ གོ་ཏ་མོ’’ཏི? ‘‘ཨ་ཏྠི ཁྭེ་ས, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨ་པ་ག་བྦྷོ ས་མ་ཎོ གོ་ཏ་མོ’ཏི. ཡ་སྶ ཁོ, བྲཱ་ཧྨ་ཎ, ཨཱ་ཡ་ཏིཾ ག་བྦྷ་སེ་ཡྻཱ པུ་ན་བྦྷ་ཝཱ་བྷི་ནི་བྦ་ཏྟི པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ ཏ་མ་ཧཾ ཨ་པ་ག་བྦྷོ་ཏི ཝ་དཱ་མི. ཏ་ཐཱ་ག་ཏ་སྶ ཁོ, བྲཱ་ཧྨ་ཎ, ཨཱ་ཡ་ཏིཾ ག་བྦྷ་སེ་ཡྻཱ པུ་ན་བྦྷ་ཝཱ་བྷི་ནི་བྦ་ཏྟི པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨ་ཡཾ ཁོ, བྲཱ་ཧྨ་ཎ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ‘ཨ་པ་ག་བྦྷོ ས་མ་ཎོ གོ་ཏ་མོ’ཏི, ནོ ཙ ཁོ ཡཾ ཏྭཾ ས་ནྡྷཱ་ཡ ཝ་དེ་སི’’.
༡༡. ‘‘སེ་ཡྻ་ཐཱ་པི, བྲཱ་ཧྨ་ཎ, ཀུ་ཀྐུ་ཊི་ཡཱ ཨ་ཎྜཱ་ནི ཨ་ཊྛ ཝཱ ད་ས ཝཱ དྭཱ་ད་ས ཝཱ. ཏཱ་ན་སྶུ ཀུ་ཀྐུ་ཊི་ཡཱ ས་མྨཱ ཨ་དྷི་ས་ཡི་ཏཱ་ནི ས་མྨཱ པ་རི་སེ་དི་ཏཱ་ནི ས་མྨཱ པ་རི་བྷཱ་ཝི་ཏཱ་ནི. ཡོ ནུ ཁོ ཏེ་སཾ ཀུ་ཀྐུ་ཊ་ཙྪཱ་པ་ཀཱ་ནཾ པ་ཋ་མ་ཏ་རཾ པཱ་ད་ན་ཁ་སི་ཁཱ་ཡ ཝཱ མུ་ཁ་ཏུ་ཎྜ་ཀེ་ན ཝཱ ཨ་ཎྜ་ཀོ་སཾ པ་དཱ་ལེ་ཏྭཱ སོ་ཏྠི་ནཱ ཨ་བྷི་ནི་བྦྷི་ཛྫེ་ཡྻ, ཀི་ནྟི སྭཱ་སྶ ཝ་ཙ་ནཱི་ཡོ – ‘‘ཛེ་ཊྛོ ཝཱ ཀ་ནི་ཊྛོ ཝཱ’’ཏི? ‘‘ཛེ་ཊྛོ་ཏི་སྶ, བྷོ གོ་ཏ་མ, ཝ་ཙ་ནཱི་ཡོ. སོ ཧི ནེ་སཾ ཛེ་ཊྛོ ཧོ་ཏཱི’’ཏི. ‘‘ཨེ་ཝ་མེ་ཝ ཁོ ཨ་ཧཾ, བྲཱ་ཧྨ་ཎ, ཨ་ཝི་ཛྫཱ་ག་ཏཱ་ཡ པ་ཛཱ་ཡ ཨ་ཎྜ་བྷཱུ་ཏཱ་ཡ པ་རི་ཡོ་ན་དྡྷཱ་ཡ ཨ་ཝི་ཛྫ་ཎྜ་ཀོ་སཾ པ་དཱ་ལེ་ཏྭཱ ཨེ་ཀོ་ཝ ལོ་ཀེ ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ. སྭཱ་ཧཾ, བྲཱ་ཧྨ་ཎ, ཛེ་ཊྛོ སེ་ཊྛོ ལོ་ཀ་སྶ’’.
‘‘ཨཱ་ར་དྡྷཾ ཁོ པ་ན མེ, བྲཱ་ཧྨ་ཎ, ཝཱི་རི་ཡཾ [ཝི་རི་ཡཾ (སཱི. སྱཱ.)] ཨ་ཧོ་སི ཨ་ས་ལླཱི་ནཾ, ཨུ་པ་ཊྛི་ཏཱ ས་ཏི ཨ་ས་མྨུ་ཊྛཱ [ཨ་པྤ་མུ་ཊྛཱ (སཱི. སྱཱ.)], པ་སྶ་དྡྷོ ཀཱ་ཡོ ཨ་སཱ་ར་དྡྷོ, ས་མཱ་ཧི་ཏཾ ཙི་ཏྟཾ ཨེ་ཀ་གྒཾ. སོ ཁོ ཨ་ཧཾ, བྲཱ་ཧྨ་ཎ, ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ ཨ་ཛ྄ཛྷ་ཏྟཾ ས་མྤ་སཱ་ད་ནཾ ཙེ་ཏ་སོ ཨེ་ཀོ་དི་བྷཱ་ཝཾ ཨ་ཝི་ཏ་ཀྐཾ ཨ་ཝི་ཙཱ་རཾ ས་མཱ་དྷི་ཛཾ པཱི་ཏི་སུ་ཁཾ དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. པཱི་ཏི་ཡཱ ཙ ཝི་རཱ་གཱ ཨུ་པེ་ཀྑ་ཀོ ཙ ཝི་ཧཱ་སིཾ ས་ཏོ ཙ ས་མྤ་ཛཱ་ནོ, སུ་ཁ་ཉྩ ཀཱ་ཡེ་ན པ་ཊི་སཾ་ཝེ་དེ་སིཾ, ཡཾ ཏཾ ཨ་རི་ཡཱ ཨཱ་ཙི་ཀྑ་ནྟི – ‘ཨུ་པེ་ཀྑ་ཀོ ས་ཏི་མཱ སུ་ཁ་ཝི་ཧཱ་རཱི’ཏི ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ. སུ་ཁ་སྶ ཙ པ་ཧཱ་ནཱ དུ་ཀྑ་སྶ ཙ པ་ཧཱ་ནཱ པུ་བྦེ་ཝ སོ་མ་ན་སྶ་དོ་མ་ན་སྶཱ་ནཾ ཨ་ཏྠ་ངྒ་མཱ ཨ་དུ་ཀྑ་མ་སུ་ཁཾ ཨུ་པེ་ཀྑཱ་ས་ཏི་པཱ་རི་སུ་དྡྷིཾ ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧཱ་སིཾ.
༡༢. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རཱ་མི, སེ་ཡྻ་ཐི་དཾ – ཨེ་ཀ་མྤི ཛཱ་ཏིཾ དྭེ་པི ཛཱ་ཏི་ཡོ ཏི་སྶོ་པི ཛཱ་ཏི་ཡོ ཙ་ཏ་སྶོ་པི ཛཱ་ཏི་ཡོ པ་ཉྩ་པི ཛཱ་ཏི་ཡོ ད་ས་པི ཛཱ་ཏི་ཡོ ཝཱི་ས་མྤི ཛཱ་ཏི་ཡོ ཏིཾ་ས་མྤི ཛཱ་ཏི་ཡོ ཙ་ཏྟཱ་ལཱི་ས་མྤི ཛཱ་ཏི་ཡོ པ་ཉྙཱ་ས་མྤི ཛཱ་ཏི་ཡོ ཛཱ་ཏི་ས་ཏ་མྤི, ཛཱ་ཏི་ས་ཧ་སྶ་མྤི ཛཱ་ཏི་ས་ཏ་ས་ཧ་སྶ་མྤི, ཨ་ནེ་ཀེ་པི སཾ་ཝ་ཊྚ་ཀ་པྤེ ཨ་ནེ་ཀེ་པི ཝི་ཝ་ཊྚ་ཀ་པྤེ ཨ་ནེ་ཀེ་པི སཾ་ཝ་ཊྚ་ཝི་ཝ་ཊྚ་ཀ་པྤེ – ‘ཨ་མུ་ཏྲཱ་སིཾ ཨེ་ཝཾ་ནཱ་མོ ཨེ་ཝཾ་གོ་ཏྟོ ཨེ་ཝཾ་ཝ་ཎྞོ ཨེ་ཝ་མཱ་ཧཱ་རོ ཨེ་ཝཾ་སུ་ཁ་དུ་ཀྑ་པྤ་ཊི་སཾ་ཝེ་དཱི ཨེ་ཝ་མཱ་ཡུ་པ་རི་ཡ་ནྟོ; སོ ཏ་ཏོ ཙུ་ཏོ ཨ་མུ་ཏྲ ཨུ་ད་པཱ་དིཾ; ཏ་ཏྲཱ་པཱ་སིཾ ཨེ་ཝཾ་ནཱ་མོ ཨེ་ཝཾ་གོ་ཏྟོ ཨེ་ཝཾ་ཝ་ཎྞོ ཨེ་ཝ་མཱ་ཧཱ་རོ ཨེ་ཝཾ་སུ་ཁ་དུ་ཀྑ་པྤ་ཊི་སཾ་ཝེ་དཱི ཨེ་ཝ་མཱ་ཡུ་པ་རི་ཡ་ནྟོ; སོ ཏ་ཏོ ཙུ་ཏོ ཨི་དྷཱུ་པ་པ་ནྣོ་ཏི. ཨི་ཏི སཱ་ཀཱ་རཾ ས་ཨུ་དྡེ་སཾ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རཱ་མི. ཨ་ཡཾ ཁོ མེ, བྲཱ་ཧྨ་ཎ, ར་ཏྟི་ཡཱ པ་ཋ་མེ ཡཱ་མེ པ་ཋ་མཱ ཝི་ཛྫཱ ཨ་དྷི་ག་ཏཱ, ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ, ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ – ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ. ཨ་ཡཾ ཁོ མེ, བྲཱ་ཧྨ་ཎ, པ་ཋ་མཱ་བྷི་ནི་བྦྷི་དཱ ཨ་ཧོ་སི ཀུ་ཀྐུ་ཊ་ཙྪཱ་པ་ཀ་སྶེ་ཝ ཨ་ཎྜ་ཀོ་ས་མྷཱ.
༡༣. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ས་ཏྟཱ་ནཾ ཙུ་ཏཱུ་པ་པཱ་ཏ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན [ཨ་ཏི་ཀྐ་ནྟ་མཱ་ནུ་སྶ་ཀེ་ན (ཀ.)] ས་ཏྟེ པ་སྶཱ་མི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ. སུ་ག་ཏེ དུ་གྒ་ཏེ ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་མི – ‘ཨི་མེ ཝ་ཏ བྷོ་ནྟོ ས་ཏྟཱ ཀཱ་ཡ་དུ་ཙྩ་རི་ཏེ་ན ས་མ་ནྣཱ་ག་ཏཱ ཝ་ཙཱི་དུ་ཙྩ་རི་ཏེ་ན ས་མ་ནྣཱ་ག་ཏཱ མ་ནོ་དུ་ཙྩ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨུ་པ་ཝཱ་ད་ཀཱ མི་ཙྪཱ་དི་ཊྛི་ཀཱ མི་ཙྪཱ་དི་ཊྛི་ཀ་མྨ་ས་མཱ་དཱ་ནཱ; ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཱ. ཨི་མེ ཝཱ པ་ན བྷོ་ནྟོ ས་ཏྟཱ ཀཱ་ཡ་སུ་ཙ་རི་ཏེ་ན ས་མ་ནྣཱ་ག་ཏཱ ཝ་ཙཱི་སུ་ཙ་རི་ཏེ་ན ས་མ་ནྣཱ་ག་ཏཱ མ་ནོ་སུ་ཙ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨ་ནུ་པ་ཝཱ་ད་ཀཱ ས་མྨཱ་དི་ཊྛི་ཀཱ ས་མྨཱ་དི་ཊྛི་ཀ་མྨ་ས་མཱ་དཱ་ནཱ; ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ’ཏི. ཨི་ཏི དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶཱ་མི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ. སུ་ག་ཏེ དུ་གྒ་ཏེ ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་མི. ཨ་ཡཾ ཁོ མེ, བྲཱ་ཧྨ་ཎ, ར་ཏྟི་ཡཱ མ་ཛ྄ཛྷི་མེ ཡཱ་མེ དུ་ཏི་ཡཱ ཝི་ཛྫཱ ཨ་དྷི་ག་ཏཱ, ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ, ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ – ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ. ཨ་ཡཾ ཁོ མེ, བྲཱ་ཧྨ་ཎ, དུ་ཏི་ཡཱ་བྷི་ནི་བྦྷི་དཱ ཨ་ཧོ་སི ཀུ་ཀྐུ་ཊ་ཙྪཱ་པ་ཀ་སྶེ་ཝ ཨ་ཎྜ་ཀོ་ས་མྷཱ.
༡༤. ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ཨཱ་ས་ཝཱ་ནཾ ཁ་ཡ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་སིཾ. སོ ‘ཨི་དཾ དུ་ཀྑ’ནྟི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ས་མུ་ད་ཡོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ནི་རོ་དྷོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ; ‘ཨི་མེ ཨཱ་ས་ཝཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ས་མུ་ད་ཡོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ནི་རོ་དྷོ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ, ‘ཨ་ཡཾ ཨཱ་ས་ཝ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ ཨ་བྦྷ་ཉྙཱ་སིཾ. ཏ་སྶ མེ ཨེ་ཝཾ ཛཱ་ན་ཏོ ཨེ་ཝཾ པ་སྶ་ཏོ ཀཱ་མཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ བྷ་ཝཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ ཨ་ཝི་ཛྫཱ་ས་ཝཱ་པི ཙི་ཏྟཾ ཝི་མུ་ཙྩི་ཏྠ. ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཨ་ཧོ་སི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི ཨ་བྦྷ་ཉྙཱ་སིཾ. ཨ་ཡཾ ཁོ མེ, བྲཱ་ཧྨ་ཎ, ར་ཏྟི་ཡཱ པ་ཙྪི་མེ ཡཱ་མེ ཏ་ཏི་ཡཱ ཝི་ཛྫཱ ཨ་དྷི་ག་ཏཱ, ཨ་ཝི་ཛྫཱ ཝི་ཧ་ཏཱ, ཝི་ཛྫཱ ཨུ་པྤ་ནྣཱ, ཏ་མོ ཝི་ཧ་ཏོ, ཨཱ་ལོ་ཀོ ཨུ་པྤ་ནྣོ – ཡ་ཐཱ ཏཾ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ. ཨ་ཡཾ ཁོ མེ, བྲཱ་ཧྨ་ཎ, ཏ་ཏི་ཡཱ་བྷི་ནི་བྦྷི་དཱ ཨ་ཧོ་སི – ཀུ་ཀྐུ་ཊ་ཙྪཱ་པ་ཀ་སྶེ་ཝ ཨ་ཎྜ་ཀོ་ས་མྷཱ’’ཏི.
༡༥. ཨེ་ཝཾ ཝུ་ཏྟེ, ཝེ་ར་ཉྫོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཛེ་ཊྛོ བྷ་ཝཾ གོ་ཏ་མོ, སེ་ཊྛོ བྷ་ཝཾ གོ་ཏ་མོ! ཨ་བྷི་ཀྐ་ནྟཾ, བྷོ གོ་ཏ་མ, ཨ་བྷི་ཀྐ་ནྟཾ, བྷོ གོ་ཏ་མ!! སེ་ཡྻ་ཐཱ་པི, བྷོ གོ་ཏ་མ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ – ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི, ཨེ་ཝ་མེ་ཝཾ བྷོ་ཏཱ གོ་ཏ་མེ་ན ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ བྷ་ཝ་ནྟཾ གོ་ཏ་མཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏཾ. ཨ་དྷི་ཝཱ་སེ་ཏུ ཙ མེ བྷ་ཝཾ གོ་ཏ་མོ ཝེ་ར་ཉྫཱ་ཡཾ ཝ་སྶཱ་ཝཱ་སཾ ས་དྡྷིཾ བྷི་ཀྑུ་ས་ངྒྷེ་ནཱ’’ཏི. ཨ་དྷི་ཝཱ་སེ་སི བྷ་ག་ཝཱ ཏུ་ཎྷཱི་བྷཱ་ཝེ་ན. ཨ་ཐ ཁོ ཝེ་ར་ཉྫོ བྲཱ་ཧྨ་ཎོ བྷ་ག་ཝ་ཏོ ཨ་དྷི་ཝཱ་ས་ནཾ ཝི་དི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི.
༡༦. ཏེ་ན ཁོ པ་ན ས་མ་ཡེ་ན ཝེ་ར་ཉྫཱ དུ་བྦྷི་ཀྑཱ ཧོ་ཏི དྭཱི་ཧི་ཏི་ཀཱ སེ་ཏ་ཊྛི་ཀཱ ས་ལཱ་ཀཱ་ཝུ་ཏྟཱ ན སུ་ཀ་རཱ ཨུ་ཉྪེ་ན པ་གྒ་ཧེ་ན ཡཱ་པེ་ཏུཾ. ཏེ་ན ཁོ པ་ན ས་མ་ཡེ་ན ཨུ་ཏྟ་རཱ་པ་ཐ་ཀཱ [ཨུ་ཏྟ་རཱ་ཧ་ཀཱ (སཱི.)] ཨ་སྶ་ཝཱ་ཎི་ཛཱ [ཨ་སྶ་ཝ་ཎི་ཛཱ (ཀ.)] པ་ཉྩ་མ་ཏྟེ་ཧི ཨ་སྶ་ས་ཏེ་ཧི ཝེ་ར་ཉྫཾ ཝ་སྶཱ་ཝཱ་སཾ ཨུ་པ་ག་ཏཱ ཧོ་ནྟི. ཏེ་ཧི ཨ་སྶ་མ་ཎྜ་ལི་ཀཱ་སུ བྷི་ཀྑཱུ་ནཾ པ་ཏྠ་པ་ཏྠ་པུ་ལ་ཀཾ [པ་ཏྠ་པ་ཏྠ་མཱུ་ལ་ཀཾ (ཀ.)] པ་ཉྙ་ཏྟཾ ཧོ་ཏི. བྷི་ཀྑཱུ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཝེ་ར་ཉྫཾ པི་ཎྜཱ་ཡ པ་ཝི་སི་ཏྭཱ པི་ཎྜཾ ཨ་ལ་བྷ་མཱ་ནཱ ཨ་སྶ་མ་ཎྜ་ལི་ཀཱ་སུ པི་ཎྜཱ་ཡ ཙ་རི་ཏྭཱ པ་ཏྠ་པ་ཏྠ་པུ་ལ་ཀཾ ཨཱ་རཱ་མཾ ཨཱ་ཧ་རི་ཏྭཱ ཨུ་དུ་ཀྑ་ལེ ཀོ་ཊྚེ་ཏྭཱ ཀོ་ཊྚེ་ཏྭཱ པ་རི་བྷུ་ཉྫ་ནྟི. ཨཱ་ཡ་སྨཱ པ་ནཱ་ན་ནྡོ པ་ཏྠ་པུ་ལ་ཀཾ སི་ལཱ་ཡཾ པི་སི་ཏྭཱ བྷ་ག་ཝ་ཏོ ཨུ་པ་ནཱ་མེ་ཏི. ཏཾ བྷ་ག་ཝཱ པ་རི་བྷུ་ཉྫ་ཏི.
ཨ་སྶོ་སི ཁོ བྷ་ག་ཝཱ ཨུ་དུ་ཀྑ་ལ་ས་དྡཾ. ཛཱ་ན་ནྟཱ་པི ཏ་ཐཱ་ག་ཏཱ པུ་ཙྪ་ནྟི, ཛཱ་ན་ནྟཱ་པི ན པུ་ཙྪ་ནྟི; ཀཱ་ལཾ ཝི་དི་ཏྭཱ པུ་ཙྪ་ནྟི, ཀཱ་ལཾ ཝི་དི་ཏྭཱ ན པུ་ཙྪ་ནྟི; ཨ་ཏྠ་སཾ་ཧི་ཏཾ ཏ་ཐཱ་ག་ཏཱ པུ་ཙྪ་ནྟི, ནོ ཨ་ན་ཏྠ་སཾ་ཧི་ཏཾ. ཨ་ན་ཏྠ་སཾ་ཧི་ཏེ སེ་ཏུ་གྷཱ་ཏོ ཏ་ཐཱ་ག་ཏཱ་ནཾ. དྭཱི་ཧི ཨཱ་ཀཱ་རེ་ཧི བུ་དྡྷཱ བྷ་ག་ཝ་ནྟོ བྷི་ཀྑཱུ པ་ཊི་པུ་ཙྪ་ནྟི – དྷ་མྨཾ ཝཱ དེ་སེ་སྶཱ་མ, སཱ་ཝ་ཀཱ་ནཾ ཝཱ སི་ཀྑཱ་པ་དཾ པ་ཉྙ་པེ་སྶཱ་མཱ་ཏི [པ་ཉྙཱ་པེ་སྶཱ་མཱ་ཏི (སཱི. སྱཱ.)]. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨཱ་ན་ནྡཾ ཨཱ་མ་ནྟེ་སི – ‘‘ཀིཾ ནུ ཁོ སོ, ཨཱ་ན་ནྡ, ཨུ་དུ་ཀྑ་ལ་ས་དྡོ’’ཏི? ཨ་ཐ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ‘‘སཱ་དྷུ སཱ་དྷུ, ཨཱ་ན་ནྡ! ཏུ་མྷེ་ཧི, ཨཱ་ན་ནྡ ས་པྤུ་རི་སེ་ཧི ཝི་ཛི་ཏཾ. པ་ཙྪི་མཱ ཛ་ན་ཏཱ སཱ་ལི་མཾ་སོ་ད་ནཾ ཨ་ཏི་མ་ཉྙི་སྶ་ཏཱི’’ཏི.
༡༧. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ [མ་ཧཱ་མོ་གྒ་ལཱ་ནོ (ཀ.)] ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨེ་ཏ་ར་ཧི, བྷ་ནྟེ, ཝེ་ར་ཉྫཱ དུ་བྦྷི་ཀྑཱ དྭཱི་ཧི་ཏི་ཀཱ སེ་ཏ་ཊྛི་ཀཱ ས་ལཱ་ཀཱ་ཝུ་ཏྟཱ. ན སུ་ཀ་རཱ ཨུ་ཉྪེ་ན པ་གྒ་ཧེ་ན ཡཱ་པེ་ཏུཾ. ཨི་མི་སྶཱ, བྷ་ནྟེ, མ་ཧཱ་པ་ཐ་ཝི་ཡཱ ཧེ་ཊྛི་མ་ཏ་ལཾ ས་མྤ་ནྣཾ – སེ་ཡྻ་ཐཱ་པི ཁུ་དྡ་མ་དྷུཾ ཨ་ནཱི་ལ་ཀཾ ཨེ་ཝ་མ་སྶཱ་དཾ. སཱ་དྷཱ་ཧཾ, བྷ་ནྟེ, པ་ཐ་ཝིཾ པ་རི་ཝ་ཏྟེ་ཡྻཾ. བྷི་ཀྑཱུ པ་པྤ་ཊ་ཀོ་ཛཾ པ་རི་བྷུ་ཉྫི་སྶ་ནྟཱི’’ཏི. ‘‘ཡེ པ་ན ཏེ, མོ་གྒ་ལླཱ་ན, པ་ཐ་ཝི་ནི་སྶི་ཏཱ པཱ་ཎཱ ཏེ ཀ་ཐཾ ཀ་རི་སྶ་སཱི’’ཏི? ‘‘ཨེ་ཀཱ་ཧཾ, བྷ་ནྟེ, པཱ་ཎིཾ ཨ་བྷི་ནི་མྨི་ནི་སྶཱ་མི – སེ་ཡྻ་ཐཱ་པི མ་ཧཱ་པ་ཐ་ཝཱི. ཡེ པ་ཐ་ཝི་ནི་སྶི་ཏཱ པཱ་ཎཱ ཏེ ཏ་ཏྠ ས་ངྐཱ་མེ་སྶཱ་མི. ཨེ་ཀེ་ན ཧ་ཏྠེ་ན པ་ཐ་ཝིཾ པ་རི་ཝ་ཏྟེ་སྶཱ་མཱི’’ཏི. ‘‘ཨ་ལཾ, མོ་གྒ་ལླཱ་ན, མཱ ཏེ རུ་ཙྩི པ་ཐ་ཝིཾ པ་རི་ཝ་ཏྟེ་ཏུཾ. ཝི་པ་ལླཱ་ས་མྤི ས་ཏྟཱ པ་ཊི་ལ་བྷེ་ཡྻུ’’ནྟི. ‘‘སཱ་དྷུ, བྷ་ནྟེ, ས་བྦོ བྷི་ཀྑུ་ས་ངྒྷོ ཨུ་ཏྟ་ར་ཀུ་རུཾ པི་ཎྜཱ་ཡ ག་ཙྪེ་ཡྻཱ’’ཏི. ‘‘ཨ་ལཾ, མོ་གྒ་ལླཱ་ན, མཱ ཏེ རུ་ཙྩི ས་བྦ་སྶ བྷི་ཀྑུ་ས་ངྒྷ་སྶ ཨུ་ཏྟ་ར་ཀུ་རུཾ པི་ཎྜཱ་ཡ ག་མ་ན’’ནྟི.
༡༨. ཨ་ཐ ཁོ ཨཱ་ཡ་སྨ་ཏོ སཱ་རི་པུ་ཏྟ་སྶ ར་ཧོ་ག་ཏ་སྶ པ་ཊི་ས་ལླཱི་ན་སྶ ཨེ་ཝཾ ཙེ་ཏ་སོ པ་རི་ཝི་ཏ་ཀྐོ ཨུ་ད་པཱ་དི – ‘‘ཀ་ཏ་མེ་སཱ་ནཾ ཁོ བུ་དྡྷཱ་ནཾ བྷ་ག་ཝ་ནྟཱ་ནཾ བྲ་ཧྨ་ཙ་རི་ཡཾ ན ཙི་ར་ཊྛི་ཏི་ཀཾ ཨ་ཧོ་སི; ཀ་ཏ་མེ་སཱ་ནཾ བུ་དྡྷཱ་ནཾ བྷ་ག་ཝ་ནྟཱ་ནཾ བྲ་ཧྨ་ཙ་རི་ཡཾ ཙི་ར་ཊྛི་ཏི་ཀཾ ཨ་ཧོ་སཱི’’ཏི? ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ སཱ་ཡ་ནྷ་ས་མ་ཡཾ [སཱ་ཡ་ཎྷ་ས་མ་ཡཾ (སཱི.)] པ་ཊི་ས་ལླཱ་ནཱ ཝུ་ཊྛི་ཏོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་དྷ མ་ཡ྄ཧཾ, བྷ་ནྟེ, ར་ཧོ་ག་ཏ་སྶ པ་ཊི་ས་ལླཱི་ན་སྶ ཨེ་ཝཾ ཙེ་ཏ་སོ པ་རི་ཝི་ཏ་ཀྐོ ཨུ་ད་པཱ་དི – ‘ཀ་ཏ་མེ་སཱ་ནཾ ཁོ བུ་དྡྷཱ་ནཾ བྷ་ག་ཝ་ནྟཱ་ནཾ བྲ་ཧྨ་ཙ་རི་ཡཾ ན ཙི་ར་ཊྛི་ཏི་ཀཾ ཨ་ཧོ་སི, ཀ་ཏ་མེ་སཱ་ནཾ བུ་དྡྷཱ་ནཾ བྷ་ག་ཝ་ནྟཱ་ནཾ བྲ་ཧྨ་ཙ་རི་ཡཾ ཙི་ར་ཊྛི་ཏི་ཀཾ ཨ་ཧོ་སཱི’ཏི. ‘ཀ་ཏ་མེ་སཱ་ནཾ ནུ ཁོ, བྷ་ནྟེ, བུ་དྡྷཱ་ནཾ བྷ་ག་ཝ་ནྟཱ་ནཾ བྲ་ཧྨ་ཙ་རི་ཡཾ ན ཙི་ར་ཊྛི་ཏི་ཀཾ ཨ་ཧོ་སི, ཀ་ཏ་མེ་སཱ་ནཾ བུ་དྡྷཱ་ནཾ བྷ་ག་ཝ་ནྟཱ་ནཾ བྲ་ཧྨ་ཙ་རི་ཡཾ ཙི་ར་ཊྛི་ཏི་ཀཾ ཨ་ཧོ་སཱི’’’ཏི?
‘‘བྷ་ག་ཝ་ཏོ ཙ, སཱ་རི་པུ་ཏྟ, ཝི་པ་སྶི་སྶ བྷ་ག་ཝ་ཏོ ཙ སི་ཁི་སྶ བྷ་ག་ཝ་ཏོ ཙ ཝེ་སྶ་བྷུ་སྶ བྲ་ཧྨ་ཙ་རི་ཡཾ ན ཙི་ར་ཊྛི་ཏི་ཀཾ ཨ་ཧོ་སི. བྷ་ག་ཝ་ཏོ ཙ, སཱ་རི་པུ་ཏྟ, ཀ་ཀུ་ས་ནྡྷ་སྶ བྷ་ག་ཝ་ཏོ ཙ ཀོ་ཎཱ་ག་མ་ན་སྶ བྷ་ག་ཝ་ཏོ ཙ ཀ་སྶ་པ་སྶ བྲ་ཧྨ་ཙ་རི་ཡཾ ཙི་ར་ཊྛི་ཏི་ཀཾ ཨ་ཧོ་སཱི’’ཏི.
༡༩. ‘‘ཀོ ནུ ཁོ, བྷ་ནྟེ, ཧེ་ཏུ ཀོ པ་ཙྩ་ཡོ, ཡེ་ན བྷ་ག་ཝ་ཏོ ཙ ཝི་པ་སྶི་སྶ བྷ་ག་ཝ་ཏོ ཙ སི་ཁི་སྶ བྷ་ག་ཝ་ཏོ ཙ ཝེ་སྶ་བྷུ་སྶ བྲ་ཧྨ་ཙ་རི་ཡཾ ན ཙི་ར་ཊྛི་ཏི་ཀཾ ཨ་ཧོ་སཱི’’ཏི? ‘‘བྷ་ག་ཝཱ ཙ, སཱ་རི་པུ་ཏྟ, ཝི་པ་སྶཱི བྷ་ག་ཝཱ ཙ སི་ཁཱི བྷ་ག་ཝཱ ཙ ཝེ་སྶ་བྷཱུ ཀི་ལཱ་སུ་ནོ ཨ་ཧེ་སུཾ སཱ་ཝ་ཀཱ་ནཾ ཝི་ཏྠཱ་རེ་ན དྷ་མྨཾ དེ་སེ་ཏུཾ. ཨ་པྤ་ཀ་ཉྩ ནེ་སཾ ཨ་ཧོ་སི སུ་ཏྟཾ གེ་ཡྻཾ ཝེ་ཡྻཱ་ཀ་ར་ཎཾ གཱ་ཐཱ ཨུ་དཱ་ནཾ ཨི་ཏི་ཝུ་ཏྟ་ཀཾ ཛཱ་ཏ་ཀཾ ཨ་བྦྷུ་ཏ་དྷ་མྨཾ ཝེ་ད་ལླཾ. ཨ་པ་ཉྙ་ཏྟཾ སཱ་ཝ་ཀཱ་ནཾ སི་ཀྑཱ་པ་དཾ. ཨ་ནུ་དྡི་ཊྛཾ པཱ་ཏི་མོ་ཀྑཾ. ཏེ་སཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨ་ནྟ་ར་དྷཱ་ནེ་ན བུ་དྡྷཱ་ནུ་བུ་དྡྷཱ་ནཾ སཱ་ཝ་ཀཱ་ནཾ ཨ་ནྟ་ར་དྷཱ་ནེ་ན ཡེ ཏེ པ་ཙྪི་མཱ སཱ་ཝ་ཀཱ ནཱ་ནཱ་ནཱ་མཱ ནཱ་ནཱ་གོ་ཏྟཱ ནཱ་ནཱ་ཛ་ཙྩཱ ནཱ་ནཱ་ཀུ་ལཱ པ་བྦ་ཛི་ཏཱ ཏེ ཏཾ བྲ་ཧྨ་ཙ་རི་ཡཾ ཁི་པྤ་ཉྙེ་ཝ ཨ་ནྟ་ར་དྷཱ་པེ་སུཾ. སེ་ཡྻ་ཐཱ་པི, སཱ་རི་པུ་ཏྟ, ནཱ་ནཱ་པུ་པྥཱ་ནི ཕ་ལ་ཀེ ནི་ཀྑི་ཏྟཱ་ནི སུ་ཏྟེ་ན ཨ་ས་ངྒ་ཧི་ཏཱ་ནི ཏཱ་ནི ཝཱ་ཏོ ཝི་ཀི་ར་ཏི ཝི་དྷ་མ་ཏི ཝི་དྡྷཾ་སེ་ཏི. ཏཾ ཀི་སྶ ཧེ་ཏུ? ཡ་ཐཱ ཏཾ སུ་ཏྟེ་ན ཨ་ས་ངྒ་ཧི་ཏ་ཏྟཱ. ཨེ་ཝ་མེ་ཝ ཁོ, སཱ་རི་པུ་ཏྟ, ཏེ་སཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨ་ནྟ་ར་དྷཱ་ནེ་ན བུ་དྡྷཱ་ནུ་བུ་དྡྷཱ་ནཾ སཱ་ཝ་ཀཱ་ནཾ ཨ་ནྟ་ར་དྷཱ་ནེ་ན ཡེ ཏེ པ་ཙྪི་མཱ སཱ་ཝ་ཀཱ ནཱ་ནཱ་ནཱ་མཱ ནཱ་ནཱ་གོ་ཏྟཱ ནཱ་ནཱ་ཛ་ཙྩཱ ནཱ་ནཱ་ཀུ་ལཱ པ་བྦ་ཛི་ཏཱ ཏེ ཏཾ བྲ་ཧྨ་ཙ་རི་ཡཾ ཁི་པྤ་ཉྙེ་ཝ ཨ་ནྟ་ར་དྷཱ་པེ་སུཾ.
‘‘ཨ་ཀི་ལཱ་སུ་ནོ ཙ ཏེ བྷ་ག་ཝ་ནྟོ ཨ་ཧེ་སུཾ སཱ་ཝ་ཀེ ཙེ་ཏ་སཱ ཙེ་ཏོ པ་རི་ཙྩ ཨོ་ཝ་དི་ཏུཾ. བྷཱུ་ཏ་པུ་བྦཾ, སཱ་རི་པུ་ཏྟ, ཝེ་སྶ་བྷཱུ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཨ་ཉྙ་ཏ་ར་སྨིཾ བྷིཾ་ས་ན་ཀེ [བྷཱི་ས་ན་ཀེ (ཀ.)] ཝ་ན་ས་ཎྜེ ས་ཧ་སྶཾ བྷི་ཀྑུ་ས་ངྒྷཾ ཙེ་ཏ་སཱ ཙེ་ཏོ པ་རི་ཙྩ ཨོ་ཝ་ད་ཏི ཨ་ནུ་སཱ་ས་ཏི – ‘ཨེ་ཝཾ ཝི་ཏ་ཀྐེ་ཐ, མཱ ཨེ་ཝཾ ཝི་ཏ་ཀྐ་ཡི་ཏྠ; ཨེ་ཝཾ མ་ན་སི་ཀ་རོ་ཐ, མཱ ཨེ་ཝཾ མ་ན་སཱ་ཀ་ཏྠ [མ་ན་སཱ་ཀ་རི་ཏྠ (ཀ.)]; ཨི་དཾ པ་ཛ་ཧ་ཐ, ཨི་དཾ ཨུ་པ་ས་མྤ་ཛྫ ཝི་ཧ་ར་ཐཱ’ཏི. ཨ་ཐ ཁོ, སཱ་རི་པུ་ཏྟ, ཏ་སྶ བྷི་ཀྑུ་ས་ཧ་སྶ་སྶ ཝེ་སྶ་བྷུ་ནཱ བྷ་ག་ཝ་ཏཱ ཨ་ར་ཧ་ཏཱ ས་མྨཱ་ས་མྦུ་དྡྷེ་ན ཨེ་ཝཾ ཨོ་ཝ་དི་ཡ་མཱ་ནཱ་ནཾ ཨེ་ཝཾ ཨ་ནུ་སཱ་སི་ཡ་མཱ་ནཱ་ནཾ ཨ་ནུ་པཱ་དཱ་ཡ ཨཱ་ས་ཝེ་ཧི ཙི་ཏྟཱ་ནི ཝི་མུ་ཙྩིཾ་སུ. ཏ་ཏྲ སུ་དཾ, སཱ་རི་པུ་ཏྟ, བྷིཾ་ས་ན་ཀ་སྶ ཝ་ན་ས་ཎྜ་སྶ བྷིཾ་ས་ན་ཀ་ཏ་སྨིཾ ཧོ་ཏི – ཡོ ཀོ་ཙི ཨ་ཝཱི་ཏ་རཱ་གོ ཏཾ ཝ་ན་ས་ཎྜཾ པ་ཝི་ས་ཏི, ཡེ་བྷུ་ཡྻེ་ན ལོ་མཱ་ནི ཧཾ་ས་ནྟི. ཨ་ཡཾ ཁོ, སཱ་རི་པུ་ཏྟ, ཧེ་ཏུ ཨ་ཡཾ པ་ཙྩ་ཡོ ཡེ་ན བྷ་ག་ཝ་ཏོ ཙ ཝི་པ་སྶི་སྶ བྷ་ག་ཝ་ཏོ ཙ སི་ཁི་སྶ བྷ་ག་ཝ་ཏོ ཙ ཝེ་སྶ་བྷུ་སྶ བྲ་ཧྨ་ཙ་རི་ཡཾ ན ཙི་ར་ཊྛི་ཏི་ཀཾ ཨ་ཧོ་སཱི’’ཏི.
༢༠. ‘‘ཀོ པ་ན, བྷ་ནྟེ, ཧེ་ཏུ ཀོ པ་ཙྩ་ཡོ ཡེ་ན བྷ་ག་ཝ་ཏོ ཙ ཀ་ཀུ་ས་ནྡྷ་སྶ བྷ་ག་ཝ་ཏོ ཙ ཀོ་ཎཱ་ག་མ་ན་སྶ བྷ་ག་ཝ་ཏོ ཙ ཀ་སྶ་པ་སྶ བྲ་ཧྨ་ཙ་རི་ཡཾ ཙི་ར་ཊྛི་ཏི་ཀཾ ཨ་ཧོ་སཱི’’ཏི? ‘‘བྷ་ག་ཝཱ ཙ, སཱ་རི་པུ་ཏྟ, ཀ་ཀུ་ས་ནྡྷོ བྷ་ག་ཝཱ ཙ ཀོ་ཎཱ་ག་མ་ནོ བྷ་ག་ཝཱ ཙ ཀ་སྶ་པོ ཨ་ཀི་ལཱ་སུ་ནོ ཨ་ཧེ་སུཾ སཱ་ཝ་ཀཱ་ནཾ ཝི་ཏྠཱ་རེ་ན དྷ་མྨཾ དེ་སེ་ཏུཾ. བ་ཧུ་ཉྩ ནེ་སཾ ཨ་ཧོ་སི སུ་ཏྟཾ གེ་ཡྻཾ ཝེ་ཡྻཱ་ཀ་ར་ཎཾ གཱ་ཐཱ ཨུ་དཱ་ནཾ ཨི་ཏི་ཝུ་ཏྟ་ཀཾ ཛཱ་ཏ་ཀཾ ཨ་བྦྷུ་ཏ་དྷ་མྨཾ ཝེ་ད་ལླཾ, པ་ཉྙ་ཏྟཾ སཱ་ཝ་ཀཱ་ནཾ སི་ཀྑཱ་པ་དཾ, ཨུ་དྡི་ཊྛཾ པཱ་ཏི་མོ་ཀྑཾ. ཏེ་སཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨ་ནྟ་ར་དྷཱ་ནེ་ན བུ་དྡྷཱ་ནུ་བུ་དྡྷཱ་ནཾ སཱ་ཝ་ཀཱ་ནཾ ཨ་ནྟ་ར་དྷཱ་ནེ་ན ཡེ ཏེ པ་ཙྪི་མཱ སཱ་ཝ་ཀཱ ནཱ་ནཱ་ནཱ་མཱ ནཱ་ནཱ་གོ་ཏྟཱ ནཱ་ནཱ་ཛ་ཙྩཱ ནཱ་ནཱ་ཀུ་ལཱ པ་བྦ་ཛི་ཏཱ ཏེ ཏཾ བྲ་ཧྨ་ཙ་རི་ཡཾ ཙི་རཾ དཱི་གྷ་མ་དྡྷཱ་ནཾ ཋ་པེ་སུཾ. སེ་ཡྻ་ཐཱ་པི, སཱ་རི་པུ་ཏྟ, ནཱ་ནཱ་པུ་པྥཱ་ནི ཕ་ལ་ཀེ ནི་ཀྑི་ཏྟཱ་ནི སུ་ཏྟེ་ན སུ་ས་ངྒ་ཧི་ཏཱ་ནི ཏཱ་ནི ཝཱ་ཏོ ན ཝི་ཀི་ར་ཏི ན ཝི་དྷ་མ་ཏི ན ཝི་དྡྷཾ་སེ་ཏི. ཏཾ ཀི་སྶ ཧེ་ཏུ? ཡ་ཐཱ ཏཾ སུ་ཏྟེ་ན སུ་ས་ངྒ་ཧི་ཏ་ཏྟཱ. ཨེ་ཝ་མེ་ཝ ཁོ, སཱ་རི་པུ་ཏྟ, ཏེ་སཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨ་ནྟ་ར་དྷཱ་ནེ་ན བུ་དྡྷཱ་ནུ་བུ་དྡྷཱ་ནཾ སཱ་ཝ་ཀཱ་ནཾ ཨ་ནྟ་ར་དྷཱ་ནེ་ན ཡེ ཏེ པ་ཙྪི་མཱ སཱ་ཝ་ཀཱ ནཱ་ནཱ་ནཱ་མཱ ནཱ་ནཱ་གོ་ཏྟཱ ནཱ་ནཱ་ཛ་ཙྩཱ ནཱ་ནཱ་ཀུ་ལཱ པ་བྦ་ཛི་ཏཱ ཏེ ཏཾ བྲ་ཧྨ་ཙ་རི་ཡཾ ཙི་རཾ དཱི་གྷ་མ་དྡྷཱ་ནཾ ཋ་པེ་སུཾ. ཨ་ཡཾ ཁོ, སཱ་རི་པུ་ཏྟ, ཧེ་ཏུ ཨ་ཡཾ པ་ཙྩ་ཡོ ཡེ་ན བྷ་ག་ཝ་ཏོ ཙ ཀ་ཀུ་ས་ནྡྷ་སྶ བྷ་ག་ཝ་ཏོ ཙ ཀོ་ཎཱ་ག་མ་ན་སྶ བྷ་ག་ཝ་ཏོ ཙ ཀ་སྶ་པ་སྶ བྲ་ཧྨ་ཙ་རི་ཡཾ ཙི་ར་ཊྛི་ཏི་ཀཾ ཨ་ཧོ་སཱི’’ཏི.
༢༡. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ ཨུ་ཊྛཱ་ཡཱ་ས་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨེ་ཏ་སྶ, བྷ་ག་ཝཱ, ཀཱ་ལོ! ཨེ་ཏ་སྶ, སུ་ག་ཏ, ཀཱ་ལོ! ཡཾ བྷ་ག་ཝཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཡྻ [པ་ཉྙཱ་པེ་ཡྻ (སཱི. སྱཱ.)], ཨུ་དྡི་སེ་ཡྻ པཱ་ཏི་མོ་ཀྑཾ, ཡ་ཐ་ཡི་དཾ བྲ་ཧྨ་ཙ་རི་ཡཾ ཨ་དྡྷ་ནི་ཡཾ ཨ་སྶ ཙི་ར་ཊྛི་ཏི་ཀ’’ནྟི. ‘‘ཨཱ་ག་མེ་ཧི ཏྭཾ, སཱ་རི་པུ་ཏྟ! ཨཱ་ག་མེ་ཧི ཏྭཾ, སཱ་རི་པུ་ཏྟ! ཏ་ཐཱ་ག་ཏོ་ཝ ཏ་ཏྠ ཀཱ་ལཾ ཛཱ་ནི་སྶ་ཏི. ན ཏཱ་ཝ, སཱ་རི་པུ་ཏྟ, ས་ཏྠཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཏི ཨུ་དྡི་ས་ཏི [ན ཨུ་དྡི་ས་ཏི (སཱི.)] པཱ་ཏི་མོ་ཀྑཾ ཡཱ་ཝ ན ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི. ཡ་ཏོ ཙ ཁོ, སཱ་རི་པུ་ཏྟ, ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཨ་ཐ ས་ཏྠཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཏི ཨུ་དྡི་སྶ་ཏི པཱ་ཏི་མོ་ཀྑཾ ཏེ་སཾ་ཡེ་ཝ ཨཱ་ས་ཝ་ཊྛཱ་ནཱི་ཡཱ་ནཾ དྷ་མྨཱ་ནཾ པ་ཊི་གྷཱ་ཏཱ་ཡ. ན ཏཱ་ཝ, སཱ་རི་པུ་ཏྟ, ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི ཡཱ་ཝ ན ས་ངྒྷོ ར་ཏྟ་ཉྙུ་མ་ཧ་ཏྟཾ པ་ཏྟོ ཧོ་ཏི. ཡ་ཏོ ཙ ཁོ, སཱ་རི་པུ་ཏྟ, ས་ངྒྷོ ར་ཏྟ་ཉྙུ་མ་ཧ་ཏྟཾ པ་ཏྟོ ཧོ་ཏི ཨ་ཐ ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཨ་ཐ, ས་ཏྠཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཏི ཨུ་དྡི་ས་ཏི པཱ་ཏི་མོ་ཀྑཾ ཏེ་སཾ་ཡེ་ཝ ཨཱ་ས་ཝ་ཊྛཱ་ནཱི་ཡཱ་ནཾ དྷ་མྨཱ་ནཾ པ་ཊི་གྷཱ་ཏཱ་ཡ. ན ཏཱ་ཝ, སཱ་རི་པུ་ཏྟ, ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཡཱ་ཝ ན ས་ངྒྷོ ཝེ་པུ་ལླ་མ་ཧ་ཏྟཾ པ་ཏྟོ ཧོ་ཏི. ཡ་ཏོ ཙ ཁོ, སཱ་རི་པུ་ཏྟ, ས་ངྒྷོ ཝེ་པུ་ལླ་མ་ཧ་ཏྟཾ པ་ཏྟོ ཧོ་ཏི, ཨ་ཐ ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཨ་ཐ ས་ཏྠཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཏི ཨུ་དྡི་ས་ཏི པཱ་ཏི་མོ་ཀྑཾ ཏེ་སཾ་ཡེ་ཝ ཨཱ་ས་ཝ་ཊྛཱ་ནཱི་ཡཱ་ནཾ དྷ་མྨཱ་ནཾ པ་ཊི་གྷཱ་ཏཱ་ཡ. ན ཏཱ་ཝ, སཱ་རི་པུ་ཏྟ, ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཡཱ་ཝ ན ས་ངྒྷོ ལཱ་བྷ་གྒ་མ་ཧ་ཏྟཾ པ་ཏྟོ ཧོ་ཏི. ཡ་ཏོ ཙ ཁོ, སཱ་རི་པུ་ཏྟ, ས་ངྒྷོ ལཱ་བྷ་གྒ་མ་ཧ་ཏྟཾ པ་ཏྟོ ཧོ་ཏི, ཨ་ཐ ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཨ་ཐ ས་ཏྠཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཏི ཨུ་དྡི་ས་ཏི པཱ་ཏི་མོ་ཀྑཾ ཏེ་སཾ་ཡེ་ཝ ཨཱ་ས་ཝ་ཊྛཱ་ནཱི་ཡཱ་ནཾ དྷ་མྨཱ་ནཾ པ་ཊི་གྷཱ་ཏཱ་ཡ. ན ཏཱ་ཝ, སཱ་རི་པུ་ཏྟ, ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཡཱ་ཝ ན ས་ངྒྷོ བཱ་ཧུ་ས་ཙྩ་མ་ཧ་ཏྟཾ པ་ཏྟོ ཧོ་ཏི. ཡ་ཏོ ཙ ཁོ, སཱ་རི་པུ་ཏྟ, ས་ངྒྷོ བཱ་ཧུ་ས་ཙྩ་མ་ཧ་ཏྟཾ པ་ཏྟོ ཧོ་ཏི, ཨ་ཐ ཨི་དྷེ་ཀ་ཙྩེ ཨཱ་ས་ཝ་ཊྛཱ་ནཱི་ཡཱ དྷ་མྨཱ ས་ངྒྷེ པཱ་ཏུ་བྷ་ཝ་ནྟི, ཨ་ཐ ས་ཏྠཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་པེ་ཏི ཨུ་དྡི་ས་ཏི པཱ་ཏི་མོ་ཀྑཾ ཏེ་སཾ་ཡེ་ཝ ཨཱ་ས་ཝ་ཊྛཱ་ནཱི་ཡཱ་ནཾ དྷ་མྨཱ་ནཾ པ་ཊི་གྷཱ་ཏཱ་ཡ. ནི་ར་བྦུ་དོ ཧི, སཱ་རི་པུ་ཏྟ, བྷི་ཀྑུ་ས་ངྒྷོ ནི་རཱ་དཱི་ན་ཝོ ཨ་པ་ག་ཏ་ཀཱ་ལ༹་ཀོ སུ་དྡྷོ སཱ་རེ པ་ཏི་ཊྛི་ཏོ. ཨི་མེ་ས་ཉྷི, སཱ་རི་པུ་ཏྟ, པ་ཉྩ་ནྣཾ བྷི་ཀྑུ་ས་ཏཱ་ནཾ ཡོ པ་ཙྪི་མ་ཀོ བྷི་ཀྑུ སོ སོ་ཏཱ་པ་ནྣོ ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ཎོ’’ཏི.
༢༢. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨཱ་ན་ནྡཾ ཨཱ་མ་ནྟེ་སི – ‘‘ཨཱ་ཙི་ཎྞཾ ཁོ པ་ནེ་ཏཾ, ཨཱ་ན་ནྡ, ཏ་ཐཱ་ག་ཏཱ་ནཾ ཡེ་ཧི ནི་མ་ནྟི་ཏཱ ཝ་སྶཾ ཝ་ས་ནྟི, ན ཏེ ཨ་ན་པ་ལོ་ཀེ་ཏྭཱ ཛ་ན་པ་ད་ཙཱ་རི་ཀཾ པ་ཀྐ་མ་ནྟི. ཨཱ་ཡཱ་མཱ་ན་ནྡ, ཝེ་ར་ཉྫཾ བྲཱ་ཧྨ་ཎཾ ཨ་པ་ལོ་ཀེ་སྶཱ་མཱ’’ཏི. ‘‘ཨེ་ཝཾ བྷ་ནྟེ’’ཏི ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ པ་ཙྩ་སྶོ་སི. ཨ་ཐ ཁོ བྷ་ག་ཝཱ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཨཱ་ཡ་སྨ་ཏཱ ཨཱ་ན་ནྡེ་ན པ་ཙྪཱ་ས་མ་ཎེ་ན ཡེ་ན ཝེ་ར་ཉྫ་སྶ བྲཱ་ཧྨ་ཎ་སྶ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ ཝེ་ར་ཉྫོ བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཝེ་ར་ཉྫཾ བྲཱ་ཧྨ་ཎཾ བྷ་ག་ཝཱ ཨེ་ཏ་ད་ཝོ་ཙ – ‘‘ནི་མ་ནྟི་ཏ་མྷ ཏ་ཡཱ, བྲཱ་ཧྨ་ཎ, ཝ་སྶཾ་ཝུ་ཊྛཱ [ཝ་སྶཾ་ཝུ་ཏྠཱ (སཱི. སྱཱ. ཀ.)], ཨ་པ་ལོ་ཀེ་མ ཏཾ, ཨི་ཙྪཱ་མ མ་ཡཾ ཛ་ན་པ་ད་ཙཱ་རི་ཀཾ པ་ཀྐ་མི་ཏུ’’ནྟི. ‘‘ས་ཙྩཾ, བྷོ གོ་ཏ་མ, ནི་མ་ནྟི་ཏ་ཏྠ མ་ཡཱ ཝ་སྶཾ་ཝུ་ཊྛཱ; ཨ་པི ཙ, ཡོ དེ་ཡྻ་དྷ་མྨོ སོ ན དི་ནྣོ. ཏ་ཉྩ ཁོ ནོ ཨ་ས་ནྟཾ, ནོ་པི ཨ་དཱ་ཏུ་ཀ་མྱ་ཏཱ, ཏཾ ཀུ་ཏེ་ཏྠ ལ་བྦྷཱ བ་ཧུ་ཀི་ཙྩཱ གྷ་རཱ་ཝཱ་སཱ བ་ཧུ་ཀ་ར་ཎཱི་ཡཱ. ཨ་དྷི་ཝཱ་སེ་ཏུ མེ བྷ་ཝཾ གོ་ཏ་མོ སྭཱ་ཏ་ནཱ་ཡ བྷ་ཏྟཾ ས་དྡྷིཾ བྷི་ཀྑུ་ས་ངྒྷེ་ནཱ’’ཏི. ཨ་དྷི་ཝཱ་སེ་སི བྷ་ག་ཝཱ ཏུ་ཎྷཱི་བྷཱ་ཝེ་ན. ཨ་ཐ ཁོ བྷ་ག་ཝཱ ཝེ་ར་ཉྫཾ བྲཱ་ཧྨ་ཎཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ ཝེ་ར་ཉྫོ བྲཱ་ཧྨ་ཎོ ཏ་སྶཱ ར་ཏྟི་ཡཱ ཨ་ཙྩ་ཡེ་ན ས་ཀེ ནི་ཝེ་ས་ནེ པ་ཎཱི་ཏཾ ཁཱ་ད་ནཱི་ཡཾ བྷོ་ཛ་ནཱི་ཡཾ པ་ཊི་ཡཱ་དཱ་པེ་ཏྭཱ བྷ་ག་ཝ་ཏོ ཀཱ་ལཾ ཨཱ་རོ་ཙཱ་པེ་སི – ‘‘ཀཱ་ལོ, བྷོ གོ་ཏ་མ, ནི་ཊྛི་ཏཾ བྷ་ཏྟ’’ནྟི.
༢༣. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཝེ་ར་ཉྫ་སྶ བྲཱ་ཧྨ་ཎ་སྶ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི ས་དྡྷིཾ བྷི་ཀྑུ་ས་ངྒྷེ་ན. ཨ་ཐ ཁོ ཝེ་ར་ཉྫོ བྲཱ་ཧྨ་ཎོ བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་ཏྭཱ ས་མྤ་ཝཱ་རེ་ཏྭཱ བྷ་ག་ཝ་ནྟཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ [ཨོ་ཎཱི་ཏ་པ་ཏྟ་པཱ་ཎིཾ (ཀ.)] ཏི་ཙཱི་ཝ་རེ་ན ཨ་ཙྪཱ་དེ་སི, ཨེ་ཀ་མེ་ཀ་ཉྩ བྷི་ཀྑུཾ ཨེ་ཀ་མེ་ཀེ་ན དུ་སྶ་ཡུ་གེ་ན ཨ་ཙྪཱ་དེ་སི. ཨ་ཐ ཁོ བྷ་ག་ཝཱ ཝེ་ར་ཉྫཾ བྲཱ་ཧྨ་ཎཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ བྷ་ག་ཝཱ ཝེ་ར་ཉྫཱ་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཨ་ནུ་པ་ག་མྨ སོ་རེ་ཡྻཾ ས་ངྐ་སྶཾ ཀ་ཎྞ་ཀུ་ཛྫཾ ཡེ་ན པ་ཡཱ་ག་པ་ཏི་ཊྛཱ་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཡཱ་ག་པ་ཏི་ཊྛཱ་ནེ ག་ངྒཾ ན་དིཾ ཨུ་ཏྟ་རི་ཏྭཱ ཡེ་ན བཱ་རཱ་ཎ་སཱི ཏ་ད་ཝ་ས་རི. ཨ་ཐ ཁོ བྷ་ག་ཝཱ བཱ་རཱ་ཎ་སི་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན ཝེ་སཱ་ལཱི ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཝེ་སཱ་ལཱི ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡ་ནྟི.
ཝེ་ར་ཉྫ་བྷཱ་ཎ་ཝཱ་རོ ནི་ཊྛི་ཏོ.