༦. པཱ་ཊི་དེ་ས་ནཱི་ཡ་ཀ་ཎྜཾ
༡. པ་ཋ་མ་པཱ་ཊི་དེ་ས་ནཱི་ཡ་སི་ཀྑཱ་པ་དཾ
ཨི་མེ ཁོ པ་ནཱ་ཡ་སྨ་ནྟོ ཙ་ཏྟཱ་རོ པཱ་ཊི་དེ་ས་ནཱི་ཡཱ
དྷ་མྨཱ ཨུ་དྡེ་སཾ ཨཱ་ག་ཙྪ་ནྟི.
༥༥༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏྭཱ པ་ཊི་ཀྐ་མ་ན་ཀཱ་ལེ ཨ་ཉྙ་ཏ་རཾ བྷི་ཀྑུཾ པ་སྶི་ཏྭཱ ཨེ་ཏ་ད་ཝོ་ཙ – ‘‘ཧ་ནྡཱ་ཡྻ, བྷི་ཀྑཾ པ་ཊི་གྒ་ཎྷཱ’’ཏི. ‘‘སུ་ཊྛུ, བྷ་གི་ནཱི’’ཏི ས་བྦེ་ཝ ཨ་གྒ་ཧེ་སི. སཱ ཨུ་པ་ཀ་ཊྛེ ཀཱ་ལེ ནཱ་ས་ཀྑི པི་ཎྜཱ་ཡ ཙ་རི་ཏུཾ, ཚི་ནྣ་བྷ་ཏྟཱ ཨ་ཧོ་སི. ཨ་ཐ ཁོ སཱ བྷི་ཀྑུ་ནཱི དུ་ཏི་ཡ་མྤི དི་ཝ་སཾ…པེ… ཏ་ཏི་ཡ་མྤི དི་ཝ་སཾ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏྭཱ པ་ཊི་ཀྐ་མ་ན་ཀཱ་ལེ ཏཾ བྷི་ཀྑུཾ པ་སྶི་ཏྭཱ ཨེ་ཏ་ད་ཝོ་ཙ – ‘‘ཧ་ནྡཱ་ཡྻ, བྷི་ཀྑཾ པ་ཊི་གྒ་ཎྷཱ’’ཏི. ‘‘སུ་ཊྛུ, བྷ་གི་ནཱི’’ཏི ས་བྦེ་ཝ ཨ་གྒ་ཧེ་སི. སཱ ཨུ་པ་ཀ་ཊྛེ ཀཱ་ལེ ནཱ་ས་ཀྑི པི་ཎྜཱ་ཡ ཙ་རི་ཏུཾ, ཚི་ནྣ་བྷ་ཏྟཱ ཨ་ཧོ་སི. ཨ་ཐ ཁོ སཱ བྷི་ཀྑུ་ནཱི ཙ་ཏུ་ཏྠེ དི་ཝ་སེ ར་ཐི་ཀཱ་ཡ པ་ཝེ་དྷེ་ནྟཱི ག་ཙྪ་ཏི. སེ་ཊྛི ག་ཧ་པ་ཏི ར་ཐེ་ན པ་ཊི་པ་ཐཾ ཨཱ་ག་ཙྪ་ནྟོ ཏཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ཨ་པེ་ཧཱ་ཡྻེ’’ཏི. སཱ ཝོ་ཀྐ་མ་ནྟཱི ཏ་ཏྠེ་ཝ པ་རི་པ་ཏི. སེ་ཊྛི ག་ཧ་པ་ཏི ཏཾ བྷི་ཀྑུ་ནིཾ ཁ་མཱ་པེ་སི – ‘‘ཁ་མཱ་ཧཱ་ཡྻེ, མ་ཡཱ་སི པཱ་ཏི་ཏཱ’’ཏི. ‘‘ནཱ་ཧཾ, ག་ཧ་པ་ཏི, ཏ་ཡཱ པཱ་ཏི་ཏཱ. ཨ་པི་ཙ, ཨ་ཧ་མེ་ཝ དུ་བྦ་ལཱ’’ཏི. ‘‘ཀི་སྶ པ་ན ཏྭཾ, ཨ་ཡྻེ, དུ་བྦ་ལཱ’’ཏི? ཨ་ཐ ཁོ སཱ བྷི་ཀྑུ་ནཱི སེ་ཊྛི་སྶ ག་ཧ་པ་ཏི་སྶ ཨེ་ཏ་མ་ཏྠཾ ཨཱ་རོ་ཙེ་སི. སེ་ཊྛི ག་ཧ་པ་ཏི ཏཾ བྷི་ཀྑུ་ནིཾ གྷ་རཾ ནེ་ཏྭཱ བྷོ་ཛེ་ཏྭཱ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷ་ད་ནྟཱ བྷི་ཀྑུ་ནི་ཡཱ ཧ་ཏྠ་ཏོ ཨཱ་མི་སཾ པ་ཊི་གྒ་ཧེ་སྶ་ནྟི! ཀི་ཙྪ་ལཱ་བྷོ མཱ་ཏུ་གཱ་མོ’’ཏི!
ཨ་སྶོ་སུཾ ཁོ བྷི་ཀྑཱུ ཏ་སྶ སེ་ཊྛི་སྶ ག་ཧ་པ་ཏི་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ བྷི་ཀྑུ་ནི་ཡཱ ཧ་ཏྠ་ཏོ ཨཱ་མི་སཾ པ་ཊི་གྒ་ཧེ་སྶ་ཏཱི’’ཏི …པེ… ས་ཙྩཾ ཀི་ར ཏྭཾ, བྷི་ཀྑུ, བྷི་ཀྑུ་ནི་ཡཱ ཧ་ཏྠ་ཏོ ཨཱ་མི་སཾ པ་ཊི་གྒ་ཧེ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ‘‘ཉཱ་ཏི་ཀཱ ཏེ, བྷི་ཀྑུ, ཨ་ཉྙཱ་ཏི་ཀཱ’’ཏི? ‘‘ཨ་ཉྙཱ་ཏི་ཀཱ, བྷ་ག་ཝཱ’’ཏི. ‘‘ཨ་ཉྙཱ་ཏ་ཀོ, མོ་གྷ་པུ་རི་ས, ཨ་ཉྙཱ་ཏི་ཀཱ་ཡ ན ཛཱ་ནཱ་ཏི པ་ཏི་རཱུ་པཾ ཝཱ ཨ་པྤ་ཏི་རཱུ་པཾ ཝཱ ས་ནྟཾ ཝཱ ཨ་ས་ནྟཾ ཝཱ. ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཧ་ཏྠ་ཏོ ཨཱ་མི་སཾ པ་ཊི་གྒ་ཧེ་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༥༣. ‘‘ཡོ པ་ན བྷི་ཀྑུ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཨ་ནྟ་ར་གྷ་རཾ པ་ཝི་ཊྛཱ་ཡ ཧ་ཏྠ་ཏོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པ་ཊི་དེ་སེ་ཏ་བྦཾ ཏེ་ན བྷི་ཀྑུ་ནཱ – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱི’’’ཏི.
༥༥༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨ་ཉྙཱ་ཏི་ཀཱ ནཱ་མ མཱ་ཏི་ཏོ ཝཱ. པི་ཏི་ཏོ ཝཱ ཡཱ་ཝ ས་ཏྟ་མཱ པི་ཏཱ་མ་ཧ་ཡུ་གཱ ཨ་ས་མྦ་དྡྷཱ.
བྷི་ཀྑུ་ནཱི ནཱ་མ ཨུ་བྷ་ཏོ་ས་ངྒྷེ ཨུ་པ་ས་མྤ་ནྣཱ.
ཨ་ནྟ་ར་གྷ་རཾ ནཱ་མ ར་ཐི་ཀཱ བྱཱུ་ཧཾ སི་ངྒྷཱ་ཊ་ཀཾ གྷ་རཾ.
ཁཱ་ད་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཋ་པེ་ཏྭཱ ཨ་ཝ་སེ་སཾ ཁཱ་ད་ནཱི་ཡཾ ནཱ་མ.
བྷོ་ཛ་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨོ་ད་ནོ, ཀུ་མྨཱ་སོ, ས་ཏྟུ, མ་ཙྪོ, མཾ་སཾ. ‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
༥༥༥. ཨ་ཉྙཱ་ཏི་ཀཱ་ཡ ཨ་ཉྙཱ་ཏི་ཀ་ས་ཉྙཱི ཨ་ནྟ་ར་གྷ་རཾ པ་ཝི་ཊྛཱ་ཡ ཧ་ཏྠ་ཏོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨ་ཉྙཱ་ཏི་ཀཱ་ཡ ཝེ་མ་ཏི་ཀོ ཨ་ནྟ་ར་གྷ་རཾ པ་ཝི་ཊྛཱ་ཡ ཧ་ཏྠ་ཏོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨ་ཉྙཱ་ཏི་ཀཱ་ཡ ཉཱ་ཏི་ཀ་ས་ཉྙཱི ཨ་ནྟ་ར་གྷ་རཾ པ་ཝི་ཊྛཱ་ཡ ཧ་ཏྠ་ཏོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཨཱ་ཧཱ་ར་ཏྠཱ་ཡ པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི དུ་ཀྐ་ཊ་སྶ. ཨེ་ཀ་ཏོ་ཨུ་པ་ས་མྤ་ནྣཱ་ཡ ཧ་ཏྠ་ཏོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ – ‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི དུ་ཀྐ་ཊ་སྶ. ཉཱ་ཏི་ཀཱ་ཡ ཨ་ཉྙཱ་ཏི་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཉཱ་ཏི་ཀཱ་ཡ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཉཱ་ཏི་ཀཱ་ཡ ཉཱ་ཏི་ཀ་ས་ཉྙཱི, ཨ་ནཱ་པ་ཏྟི.
༥༥༦. ཨ་ནཱ་པ་ཏྟི ཉཱ་ཏི་ཀཱ་ཡ, དཱ་པེ་ཏི ན དེ་ཏི, ཨུ་པ་ནི་ཀྑི་པི་ཏྭཱ དེ་ཏི ཨ་ནྟ་རཱ་རཱ་མེ, བྷི་ཀྑུ་ནུ་པ་སྶ་ཡེ, ཏི་ཏྠི་ཡ་སེ་ཡྻཱ་ཡ, པ་ཊི་ཀྐ་མ་ནེ, གཱ་མ་ཏོ ནཱི་ཧ་རི་ཏྭཱ དེ་ཏི, ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ‘‘ས་ཏི པ་ཙྩ་ཡེ པ་རི་བྷུ་ཉྫཱ’’ཏི དེ་ཏི, སི་ཀྑ་མཱ་ནཱ་ཡ, སཱ་མ་ཎེ་རི་ཡཱ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
པ་ཋ་མ་པཱ་ཊི་དེ་ས་ནཱི་ཡ་སི་ཀྑཱ་པ་དཾ ནི་ཊྛི་ཏཾ.
༢. དུ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་དཾ
༥༥༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཀུ་ལེ་སུ ནི་མ་ནྟི་ཏཱ བྷུ་ཉྫ་ནྟི. ཚ་བྦ་གྒི་ཡཱ བྷི་ཀྑུ་ནི་ཡོ ཚ་བྦ་གྒི་ཡཱ་ནཾ བྷི་ཀྑཱུ་ནཾ ཝོ་སཱ་ས་ནྟི་ཡོ ཋི་ཏཱ ཧོ་ནྟི – ‘‘ཨི་དྷ སཱུ་པཾ དེ་ཐ, ཨི་དྷ ཨོ་ད་ནཾ དེ་ཐཱ’’ཏི. ཚ་བྦ་གྒི་ཡཱ བྷི་ཀྑཱུ ཡཱ་ཝ་ད་ཏྠཾ བྷུ་ཉྫ་ནྟི. ཨ་ཉྙེ བྷི་ཀྑཱུ ན ཙི་ཏྟ་རཱུ་པཾ བྷུ་ཉྫ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ བྷི་ཀྑུ་ནི་ཡོ ཝོ་སཱ་ས་ནྟི་ཡོ ན ནི་ཝཱ་རེ་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, བྷི་ཀྑུ་ནི་ཡོ ཝོ་སཱ་ས་ནྟི་ཡོ ན ནི་ཝཱ་རེ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ …པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, བྷི་ཀྑུ་ནི་ཡོ ཝོ་སཱ་ས་ནྟི་ཡོ ན ནི་ཝཱ་རེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༥༨. ‘‘བྷི་ཀྑཱུ པ་ནེ་ཝ ཀུ་ལེ་སུ ནི་མ་ནྟི་ཏཱ བྷུ་ཉྫ་ནྟི, ཏ་ཏྲ ཙེ སཱ [ཏ་ཏྲ ཙེ (སྱཱ.)] བྷི་ཀྑུ་ནཱི ཝོ་སཱ་ས་མཱ་ན་རཱུ་པཱ ཋི་ཏཱ ཧོ་ཏི – ‘ཨི་དྷ སཱུ་པཾ དེ་ཐ, ཨི་དྷ ཨོ་ད་ནཾ དེ་ཐཱ’ཏི, ཏེ་ཧི བྷི་ཀྑཱུ་ཧི སཱ བྷི་ཀྑུ་ནཱི ཨ་པ་སཱ་དེ་ཏ་བྦཱ – ‘ཨ་པ་ས་ཀྐ ཏཱ་ཝ, བྷ་གི་ནི, ཡཱ་ཝ བྷི་ཀྑཱུ བྷུ་ཉྫ་ནྟཱི’ཏི. ཨེ་ཀ་སྶ ཙེ་པི [ཨེ་ཀ་སྶ་པི ཙེ (སཱི. སྱཱ.)] བྷི་ཀྑུ་ནོ ན པ་ཊི་བྷཱ་སེ་ཡྻ ཏཾ བྷི་ཀྑུ་ནིཾ ཨ་པ་སཱ་དེ་ཏུཾ – ‘ཨ་པ་ས་ཀྐ ཏཱ་ཝ, བྷ་གི་ནི, ཡཱ་ཝ བྷི་ཀྑཱུ བྷུ་ཉྫ་ནྟཱི’ཏི པ་ཊི་དེ་སེ་ཏ་བྦཾ ཏེ་ཧི བྷི་ཀྑཱུ་ཧི – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫི་མྷཱ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱ’’’ཏི.
༥༥༩. བྷི་ཀྑཱུ པ་ནེ་ཝ ཀུ་ལེ་སུ ནི་མ་ནྟི་ཏཱ བྷུ་ཉྫ་ནྟཱིཏི ཀུ་ལཾ ནཱ་མ ཙ་ཏྟཱ་རི ཀུ་ལཱ་ནི – ཁ་ཏྟི་ཡ་ཀུ་ལཾ, བྲཱ་ཧྨ་ཎ་ཀུ་ལཾ, ཝེ་སྶ་ཀུ་ལཾ, སུ་དྡ་ཀུ་ལཾ.
ནི་མ་ནྟི་ཏཱ བྷུ་ཉྫ་ནྟཱིཏི པ་ཉྩ་ནྣཾ བྷོ་ཛ་ནཱ་ནཾ ཨ་ཉྙ་ཏ་རེ་ན བྷོ་ཛ་ནེ་ན ནི་མ་ནྟི་ཏཱ བྷུ་ཉྫ་ནྟི.
བྷི་ཀྑུ་ནཱི ནཱ་མ ཨུ་བྷ་ཏོ་ས་ངྒྷེ ཨུ་པ་ས་མྤ་ནྣཱ.
ཝོ་སཱ་ས་ནྟཱི ནཱ་མ ཡ་ཐཱ་མི་ཏྟ་ཏཱ ཡ་ཐཱ་ས་ནྡི་ཊྛ་ཏཱ ཡ་ཐཱ་ས་མྦྷ་ཏྟ་ཏཱ ཡ་ཐཱ་ས་མཱ་ནུ་པ་ཛ྄ཛྷཱ་ཡ་ཀ་ཏཱ ཡ་ཐཱ་ས་མཱ་ནཱ་ཙ་རི་ཡ་ཀ་ཏཱ – ‘‘ཨི་དྷ སཱུ་པཾ དེ་ཐ, ཨི་དྷ ཨོ་ད་ནཾ དེ་ཐཱ’’ཏི. ཨེ་སཱ ཝོ་སཱ་ས་ནྟཱི ནཱ་མ.
ཏེ་ཧི བྷི་ཀྑཱུ་ཧཱིཏི བྷུ་ཉྫ་མཱ་ནེ་ཧི བྷི་ཀྑཱུ་ཧི.
སཱ བྷི་ཀྑུ་ནཱིཏི ཡཱ སཱ ཝོ་སཱ་ས་ནྟཱི བྷི་ཀྑུ་ནཱི.
ཏེ་ཧི བྷི་ཀྑཱུ་ཧི སཱ བྷི་ཀྑུ་ནཱི ཨ་པ་སཱ་དེ་ཏ་བྦཱ – ‘‘ཨ་པ་ས་ཀྐ ཏཱ་ཝ, བྷ་གི་ནི, ཡཱ་ཝ བྷི་ཀྑཱུ བྷུ་ཉྫ་ནྟཱི’’ཏི. ཨེ་ཀ་སྶ ཙེ་པི [ཨེ་ཀ་སྶ་པི ཙེ (སཱི. སྱཱ.)] བྷི་ཀྑུ་ནོ ཨ་ན་པ་སཱ་དི་ཏོ [ཨ་ན་པ་སཱ་དི་ཏེ (སཱི. སྱཱ.)] – ‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
༥༦༠. ཨུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱི ཝོ་སཱ་ས་ནྟི་ཡཱ ན ནི་ཝཱ་རེ་ཏི, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨུ་པ་ས་མྤ་ནྣཱ་ཡ ཝེ་མ་ཏི་ཀོ ཝོ་སཱ་ས་ནྟི་ཡཱ ན ནི་ཝཱ་རེ་ཏི, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱི ཝོ་སཱ་ས་ནྟི་ཡཱ ན ནི་ཝཱ་རེ་ཏི, ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
ཨེ་ཀ་ཏོ་ཨུ་པ་ས་མྤ་ནྣཱ་ཡ ཝོ་སཱ་ས་ནྟི་ཡཱ ན ནི་ཝཱ་རེ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱི, ཨ་ནཱ་པ་ཏྟི.
༥༦༡. ཨ་ནཱ་པ་ཏྟི ཨ་ཏྟ་ནོ བྷ་ཏྟཾ དཱ་པེ་ཏི ན དེ་ཏི, ཨ་ཉྙེ་སཾ བྷ་ཏྟཾ དེ་ཏི ན དཱ་པེ་ཏི, ཡཾ ན དི་ནྣཾ ཏཾ དཱ་པེ་ཏི, ཡ་ཏྠ ན དི་ནྣཾ ཏ་ཏྠ དཱ་པེ་ཏི, ས་བྦེ་སཾ ས་མ་ཀཾ དཱ་པེ་ཏི, སི་ཀྑ་མཱ་ནཱ ཝོ་སཱ་ས་ཏི, སཱ་མ་ཎེ་རཱི ཝོ་སཱ་ས་ཏི, པ་ཉྩ བྷོ་ཛ་ནཱ་ནི ཋ་པེ་ཏྭཱ ས་བྦ་ཏྠ, ཨ་ནཱ་པ་ཏྟི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
དུ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་དཾ ནི་ཊྛི་ཏཾ.
༣. ཏ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་དཾ
༥༦༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཾ ཨ་ཉྙ་ཏ་རཾ ཀུ་ལཾ ཨུ་བྷ་ཏོ་པ་ས་ནྣཾ ཧོ་ཏི. ས་དྡྷཱ་ཡ ཝ་ཌྜྷ་ཏི, བྷོ་གེ་ན ཧཱ་ཡ་ཏི, ཡཾ ཏ་སྨིཾ ཀུ་ལེ ཨུ་པྤ་ཛྫ་ཏི པུ་རེ་བྷ་ཏྟཾ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཏཾ ས་བྦཾ བྷི་ཀྑཱུ་ནཾ ཝི་སྶ་ཛྫེ་ཏྭཱ ཨ་པྤེ་ཀ་དཱ ཨ་ན་སི་ཏཱ ཨ་ཙྪ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ན མ་ཏྟཾ ཛཱ་ནི་ཏྭཱ པ་ཊི་གྒ་ཧེ་སྶ་ནྟི! ཨི་མེ ཨི་མེ་སཾ ད་ཏྭཱ ཨ་པྤེ་ཀ་དཱ ཨ་ན་སི་ཏཱ ཨ་ཙྪ་ནྟཱི’’ཏི!! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཡཾ ཀུ་ལཾ ས་དྡྷཱ་ཡ ཝ་ཌྜྷ་ཏི, བྷོ་གེ་ན ཧཱ་ཡ་ཏི ཨེ་ཝ་རཱུ་པ་སྶ ཀུ་ལ་སྶ ཉ་ཏྟི་དུ་ཏི་ཡེ་ན ཀ་མྨེ་ན སེ་ཀྑ་ས་མྨུ་ཏིཾ དཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, དཱ་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
༥༦༣. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མཾ ཀུ་ལཾ ས་དྡྷཱ་ཡ ཝ་ཌྜྷ་ཏི, བྷོ་གེ་ན ཧཱ་ཡ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མ་སྶ ཀུ་ལ་སྶ སེ་ཀྑ་ས་མྨུ་ཏིཾ ད་དེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མཾ ཀུ་ལཾ ས་དྡྷཱ་ཡ ཝ་ཌྜྷ་ཏི, བྷོ་གེ་ན ཧཱ་ཡ་ཏི. ས་ངྒྷོ ཨི་ཏྠ་ནྣཱ་མ་སྶ ཀུ་ལ་སྶ སེ་ཀྑ་ས་མྨུ་ཏིཾ དེ་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ ཀུ་ལ་སྶ སེ་ཀྑ་ས་མྨུ་ཏི་ཡཱ དཱ་ནཾ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དི་ནྣཱ ས་ངྒྷེ་ན ཨི་ཏྠ་ནྣཱ་མ་སྶ ཀུ་ལ་སྶ སེ་ཀྑ་ས་མྨུ་ཏི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡཱ་ནི ཁོ པ་ན ཏཱ་ནི སེ་ཀྑ་ས་མྨ་ཏཱ་ནི ཀུ་ལཱ་ནི, ཡོ པ་ན བྷི་ཀྑུ ཏ་ཐཱ་རཱུ་པེ་སུ སེ་ཀྑ་ས་མྨ་ཏེ་སུ ཀུ་ལེ་སུ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པ་ཊི་དེ་སེ་ཏ་བྦཾ ཏེ་ན བྷི་ཀྑུ་ནཱ – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ ཏཾ པ་ཊི་དེ་སེ་མཱི’’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༥༦༤. ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཾ ཨུ་སྶ་ཝོ ཧོ་ཏི. མ་ནུ་སྶཱ བྷི་ཀྑཱུ ནི་མ་ནྟེ་ཏྭཱ བྷོ་ཛེ་ནྟི. ཏ་མྤི ཁོ ཀུ་ལཾ བྷི་ཀྑཱུ ནི་མ་ནྟེ་སི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ནཱ་དྷི་ཝཱ་སེ་ནྟི – ‘‘པ་ཊི་ཀྑི་ཏྟཾ བྷ་ག་ཝ་ཏཱ སེ་ཀྑ་ས་མྨ་ཏེ་སུ ཀུ་ལེ་སུ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དི་ཏུཾ བྷུ་ཉྫི་ཏུ’’ནྟི. ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀིཾ ནུ ཁོ ནཱ་མ ཨ་མྷཱ་ཀཾ ཛཱི་ཝི་ཏེ་ན ཡཾ ཨ་ཡྻཱ ཨ་མྷཱ་ཀཾ ན པ་ཊི་གྒ་ཎྷ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ནི་མ་ནྟི་ཏེ་ན སེ་ཀྑ་ས་མྨ་ཏེ་སུ ཀུ་ལེ་སུ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དི་ཏུཾ བྷུ་ཉྫི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡཱ་ནི ཁོ པ་ན ཏཱ་ནི སེ་ཀྑ་ས་མྨ་ཏཱ་ནི ཀུ་ལཱ་ནི, ཡོ པ་ན བྷི་ཀྑུ ཏ་ཐཱ་རཱུ་པེ་སུ སེ་ཀྑ་ས་མྨ་ཏེ་སུ ཀུ་ལེ་སུ པུ་བྦེ ཨ་ནི་མ་ནྟི་ཏོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པ་ཊི་དེ་སེ་ཏ་བྦཾ ཏེ་ན བྷི་ཀྑུ་ནཱ – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱི’’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༥༦༥. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཏ་སྶ ཀུ་ལ་སྶ ཀུ་ལཱུ་པ་ཀོ ཧོ་ཏི. ཨ་ཐ ཁོ སོ བྷི་ཀྑུ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཏཾ ཀུ་ལཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཏེ་ན ཁོ པ་ན ས་མ་ཡེ་ན སོ བྷི་ཀྑུ གི་ལཱ་ནོ ཧོ་ཏི. ཨ་ཐ ཁོ ཏེ མ་ནུ་སྶཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘བྷུ་ཉྫ་ཐ, བྷ་ནྟེ’’ཏི. ཨ་ཐ ཁོ སོ བྷི་ཀྑུ – ‘‘བྷ་ག་ཝ་ཏཱ པ་ཊི་ཀྑི་ཏྟཾ ཨ་ནི་མ་ནྟི་ཏེ་ན སེ་ཀྑ་ས་མྨ་ཏེ་སུ ཀུ་ལེ་སུ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དི་ཏུཾ བྷུ་ཉྫི་ཏུ’’ནྟི ཀུ་ཀྐུ་ཙྩཱ་ཡ་ནྟོ ན པ་ཊི་གྒ་ཧེ་སི; ནཱ་ས་ཀྑི པི་ཎྜཱ་ཡ ཙ་རི་ཏུཾ; ཚི་ནྣ་བྷ་ཏྟོ ཨ་ཧོ་སི. ཨ་ཐ ཁོ སོ བྷི་ཀྑུ ཨཱ་རཱ་མཾ ག་ནྟྭཱ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནེ་ན བྷི་ཀྑུ་ནཱ སེ་ཀྑ་ས་མྨ་ཏེ་སུ ཀུ་ལེ་སུ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དི་ཏུཾ བྷུ་ཉྫི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༦༦. ‘‘ཡཱ་ནི ཁོ པ་ན ཏཱ་ནི སེ་ཀྑ་ས་མྨ་ཏཱ་ནི ཀུ་ལཱ་ནི, ཡོ པ་ན བྷི་ཀྑུ ཏ་ཐཱ་རཱུ་པེ་སུ སེ་ཀྑ་ས་མྨ་ཏེ་སུ ཀུ་ལེ་སུ པུ་བྦེ ཨ་ནི་མ་ནྟི་ཏོ ཨ་གི་ལཱ་ནོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པ་ཊི་དེ་སེ་ཏ་བྦཾ ཏེ་ན བྷི་ཀྑུ་ནཱ – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱི’’ཏི.
༥༦༧. ཡཱ་ནི ཁོ པ་ན ཏཱ་ནི སེ་ཀྑ་ས་མྨ་ཏཱ་ནི ཀུ་ལཱ་ནཱིཏི སེ་ཀྑ་ས་མྨ་ཏཾ ནཱ་མ ཀུ་ལཾ ཡཾ ཀུ་ལཾ ས་དྡྷཱ་ཡ ཝ་ཌྜྷ་ཏི, བྷོ་གེ་ན ཧཱ་ཡ་ཏི. ཨེ་ཝ་རཱུ་པ་སྶ ཀུ་ལ་སྶ ཉ་ཏྟི་དུ་ཏི་ཡེ་ན ཀ་མྨེ་ན སེ་ཀྑ་ས་མྨུ་ཏི དི་ནྣཱ ཧོ་ཏི.
ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཏ་ཐཱ་རཱུ་པེ་སུ སེ་ཀྑ་ས་མྨ་ཏེ་སུ ཀུ་ལེ་སཱུཏི ཨེ་ཝ་རཱུ་པེ་སུ སེ་ཀྑ་ས་མྨ་ཏེ་སུ ཀུ་ལེ་སུ.
ཨ་ནི་མ་ནྟི་ཏོ ནཱ་མ ཨ་ཛྫ་ཏ་ནཱ་ཡ ཝཱ སྭཱ་ཏ་ནཱ་ཡ ཝཱ ཨ་ནི་མ་ནྟི་ཏོ, གྷ་རཱུ་པ་ཙཱ་རཾ ཨོ་ཀྐ་མ་ནྟེ ནི་མ་ནྟེ་ཏི, ཨེ་སོ ཨ་ནི་མ་ནྟི་ཏོ ནཱ་མ.
ནི་མ་ནྟི་ཏོ ནཱ་མ ཨ་ཛྫ་ཏ་ནཱ་ཡ ཝཱ སྭཱ་ཏ་ནཱ་ཡ ཝཱ ནི་མ་ནྟི་ཏོ, གྷ་རཱུ་པ་ཙཱ་རཾ ཨ་ནོ་ཀྐ་མ་ནྟེ ནི་མ་ནྟེ་ཏི, ཨེ་སོ ནི་མ་ནྟི་ཏོ ནཱ་མ.
ཨ་གི་ལཱ་ནོ ནཱ་མ ས་ཀྐོ་ཏི པི་ཎྜཱ་ཡ ཙ་རི་ཏུཾ.
གི་ལཱ་ནོ ནཱ་མ ན ས་ཀྐོ་ཏི པི་ཎྜཱ་ཡ ཙ་རི་ཏུཾ.
ཁཱ་ད་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཋ་པེ་ཏྭཱ ཨ་ཝ་སེ་སཾ ཁཱ་ད་ནཱི་ཡཾ ནཱ་མ.
བྷོ་ཛ་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨོ་ད་ནོ, ཀུ་མྨཱ་སོ, ས་ཏྟུ, མ་ཙྪོ, མཾ་སཾ.
ཨ་ནི་མ་ནྟི་ཏོ ཨ་གི་ལཱ་ནོ ‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
༥༦༨. སེ་ཀྑ་ས་མྨ་ཏེ སེ་ཀྑ་ས་མྨ་ཏ་ས་ཉྙཱི ཨ་ནི་མ་ནྟི་ཏོ ཨ་གི་ལཱ་ནོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ་ཝ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. སེ་ཀྑ་ས་མྨ་ཏེ ཝེ་མ་ཏི་ཀོ…པེ… སེ་ཀྑ་ས་མྨ་ཏེ ཨ་སེ་ཀྑ་ས་མྨ་ཏ་ས་ཉྙཱི ཨ་ནི་མ་ནྟི་ཏོ ཨ་གི་ལཱ་ནོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཨཱ་ཧཱ་ར་ཏྠཱ་ཡ པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི དུ་ཀྐ་ཊ་སྶ. ཨ་སེ་ཀྑ་ས་མྨ་ཏེ སེ་ཀྑ་ས་མྨ་ཏ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་སེ་ཀྑ་ས་མྨ་ཏེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་སེ་ཀྑ་ས་མྨ་ཏེ ཨ་སེ་ཀྑ་ས་མྨ་ཏ་ས་ཉྙཱི, ཨ་ནཱ་པ་ཏྟི.
༥༦༩. ཨ་ནཱ་པ་ཏྟི ནི་མ་ནྟི་ཏ་སྶ, གི་ལཱ་ན་སྶ, ནི་མ་ནྟི་ཏ་སྶ ཝཱ གི་ལཱ་ན་སྶ ཝཱ སེ་ས་ཀཾ བྷུ་ཉྫ་ཏི, ཨ་ཉྙེ་སཾ བྷི་ཀྑཱ ཏ་ཏྠ པ་ཉྙ་ཏྟཱ ཧོ་ཏི, གྷ་ར་ཏོ ནཱི་ཧ་རི་ཏྭཱ དེ་ནྟི, ནི་ཙྩ་བྷ་ཏྟེ, ས་ལཱ་ཀ་བྷ་ཏྟེ, པ་ཀྑི་ཀེ, ཨུ་པོ་ས་ཐི་ཀེ, པཱ་ཊི་པ་དི་ཀེ, ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ – ‘‘ས་ཏི པ་ཙྩ་ཡེ པ་རི་བྷུ་ཉྫཱ’’ཏི དེ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཏ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་དཾ ནི་ཊྛི་ཏཾ.
༤. ཙ་ཏུ་ཏྠ་པཱ་ཊི་དེ་ས་ནཱི་ཡ་སི་ཀྑཱ་པ་དཾ
༥༧༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཏེ་ན ཁོ པ་ན ས་མ་ཡེ་ན སཱ་ཀི་ཡ་དཱ་ས་ཀཱ ཨ་ཝ་རུ་དྡྷཱ ཧོ་ནྟི. སཱ་ཀི་ཡཱ་ནི་ཡོ ཨི་ཙྪ་ནྟི ཨཱ་ར་ཉྙ་ཀེ་སུ སེ་ནཱ་ས་ནེ་སུ བྷ་ཏྟཾ ཀཱ་ཏུཾ. ཨ་སྶོ་སུཾ ཁོ སཱ་ཀི་ཡ་དཱ་ས་ཀཱ – ‘‘སཱ་ཀི་ཡཱ་ནི་ཡོ ཀི་ར ཨཱ་ར་ཉྙ་ཀེ་སུ སེ་ནཱ་ས་ནེ་སུ བྷ་ཏྟཾ ཀ་ཏྟུ་ཀཱ་མཱ’’ཏི. ཏེ མ་གྒེ པ་རི་ཡུ་ཊྛིཾ་སུ. སཱ་ཀི་ཡཱ་ནི་ཡོ པ་ཎཱི་ཏཾ ཁཱ་ད་ནཱི་ཡཾ བྷོ་ཛ་ནཱི་ཡཾ ཨཱ་དཱ་ཡ ཨཱ་ར་ཉྙ་ཀཾ སེ་ནཱ་ས་ནཾ ཨ་ག་མཾ་སུ. སཱ་ཀི་ཡ་དཱ་ས་ཀཱ ནི་ཀྑ་མི་ཏྭཱ སཱ་ཀི་ཡཱ་ནི་ཡོ ཨ་ཙྪི་ནྡིཾ་སུ ཙ དཱུ་སེ་སུ་ཉྩ. སཱ་ཀི་ཡཱ ནི་ཀྑ་མི་ཏྭཱ ཏེ ཙོ་རེ ས་བྷ་ཎྜེ [ས་ཧ བྷ་ཎྜེ་ན (ཀ.)] ག་ཧེ་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷ་ད་ནྟཱ ཨཱ་རཱ་མེ ཙོ་རེ པ་ཊི་ཝ་ས་ནྟེ ནཱ་རོ་ཙེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ སཱ་ཀི་ཡཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑཱུ་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནི སེ་ནཱ་ས་ནཱ་ནི སཱ་ས་ངྐ་ས་མྨ་ཏཱ་ནི ས་པྤ་ཊི་བྷ་ཡཱ་ནི, ཡོ པ་ན བྷི་ཀྑུ ཏ་ཐཱ་རཱུ་པེ་སུ སེ་ནཱ་ས་ནེ་སུ [སེ་ནཱ་ས་ནེ་སུ ཝི་ཧ་ར་ནྟོ (སཱི. སྱཱ.)] པུ་བྦེ ཨ་པྤ་ཊི་སཾ་ཝི་དི་ཏཾ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨ་ཛ྄ཛྷཱ་རཱ་མེ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པ་ཊི་དེ་སེ་ཏ་བྦཾ ཏེ་ན བྷི་ཀྑུ་ནཱ – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ ཏཾ པ་ཊི་དེ་སེ་མཱི’’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༥༧༡. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཨཱ་ར་ཉྙ་ཀེ་སུ སེ་ནཱ་ས་ནེ་སུ གི་ལཱ་ནོ ཧོ་ཏི. མ་ནུ་སྶཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་དཱ་ཡ ཨཱ་ར་ཉྙ་ཀཾ སེ་ནཱ་ས་ནཾ ཨ་ག་མཾ་སུ. ཨ་ཐ ཁོ ཏེ མ་ནུ་སྶཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘བྷུ་ཉྫ་ཐ, བྷ་ནྟེ’’ཏི. ཨ་ཐ ཁོ སོ བྷི་ཀྑུ – ‘‘བྷ་ག་ཝ་ཏཱ པ་ཊི་ཀྑི་ཏྟཾ ཨཱ་ར་ཉྙ་ཀེ་སུ སེ་ནཱ་ས་ནེ་སུ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དི་ཏུཾ བྷུ་ཉྫི་ཏུ’’ནྟི ཀུ་ཀྐུ་ཙྩཱ་ཡ་ནྟོ ན པ་ཊི་གྒ་ཧེ་སི, ནཱ་ས་ཀྑི པི་ཎྜཱ་ཡ ཙ་རི་ཏུཾ [པ་ཝི་སི་ཏུཾ (ཀ.)], ཚི་ནྣ་བྷ་ཏྟོ ཨ་ཧོ་སི. ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནེ་ན བྷི་ཀྑུ་ནཱ ཨཱ་ར་ཉྙ་ཀེ་སུ སེ་ནཱ་ས་ནེ་སུ པུ་བྦེ ཨ་པྤ་ཊི་སཾ་ཝི་དི་ཏཾ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ས་ཧ་ཏྠཱ པ་ཊི་གྒ་ཧེ་ཏྭཱ ཁཱ་དི་ཏུཾ བྷུ་ཉྫི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༥༧༢. ‘‘ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནི སེ་ནཱ་ས་ནཱ་ནི སཱ་ས་ངྐ་ས་མྨ་ཏཱ་ནི ས་པྤ་ཊི་བྷ་ཡཱ་ནི, ཡོ པ་ན བྷི་ཀྑུ ཏ་ཐཱ་རཱུ་པེ་སུ སེ་ནཱ་ས་ནེ་སུ པུ་བྦེ ཨ་པྤ་ཊི་སཾ་ཝི་དི་ཏཾ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨ་ཛ྄ཛྷཱ་རཱ་མེ ས་ཧ་ཏྠཱ པ་ཊི་གྒ་ཧེ་ཏྭཱ ཨ་གི་ལཱ་ནོ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པ་ཊི་དེ་སེ་ཏ་བྦཾ ཏེ་ན བྷི་ཀྑུ་ནཱ – ‘གཱ་ར་ཡ྄ཧཾ, ཨཱ་ཝུ་སོ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱི’’’ཏི.
༥༧༣. ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནི སེ་ནཱ་ས་ནཱ་ནཱིཏི ཨཱ་ར་ཉྙ་ཀཾ ནཱ་མ སེ་ནཱ་ས་ནཾ པ་ཉྩ་དྷ་ནུ་ས་ཏི་ཀཾ པ་ཙྪི་མཾ.
སཱ་ས་ངྐཾ ནཱ་མ ཨཱ་རཱ་མེ ཨཱ་རཱ་མཱུ་པ་ཙཱ་རེ ཙོ་རཱ་ནཾ ནི་ཝི་ཊྛོ་ཀཱ་སོ དི་སྶ་ཏི, བྷུ་ཏྟོ་ཀཱ་སོ དི་སྶ་ཏི, ཋི་ཏོ་ཀཱ་སོ དི་སྶ་ཏི, ནི་སི་ནྣོ་ཀཱ་སོ དི་སྶ་ཏི, ནི་པ་ནྣོ་ཀཱ་སོ དི་སྶ་ཏི.
ས་པྤ་ཊི་བྷ་ཡཾ ནཱ་མ ཨཱ་རཱ་མེ ཨཱ་རཱ་མཱུ་པ་ཙཱ་རེ ཙོ་རེ་ཧི མ་ནུ་སྶཱ ཧ་ཏཱ དི་སྶ་ནྟི, ཝི་ལུ་ཏྟཱ དི་སྶ་ནྟི, ཨཱ་ཀོ་ཊི་ཏཱ དི་སྶ་ནྟི.
ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཏ་ཐཱ་རཱུ་པེ་སུ སེ་ནཱ་ས་ནེ་སཱུཏི ཨེ་ཝ་རཱུ་པེ་སུ སེ་ནཱ་ས་ནེ་སུ.
ཨ་པྤ་ཊི་སཾ་ཝི་དི་ཏཾ ནཱ་མ པ་ཉྩ་ནྣཾ པ་ཊི་སཾ་ཝི་དི་ཏཾ, ཨེ་ཏཾ ཨ་པྤ་ཊི་སཾ་ཝི་དི་ཏཾ ནཱ་མ. ཨཱ་རཱ་མཾ ཨཱ་རཱ་མཱུ་པ་ཙཱ་རཾ ཋ་པེ་ཏྭཱ པ་ཊི་སཾ་ཝི་དི་ཏཾ, ཨེ་ཏཾ [ཨེ་ཏ་མྤི (སཱི.)] ཨ་པྤ་ཊི་སཾ་ཝི་དི་ཏཾ ནཱ་མ.
པ་ཊི་སཾ་ཝི་དི་ཏཾ ནཱ་མ ཡོ ཀོ་ཙི ཨི་ཏྠཱི ཝཱ པུ་རི་སོ ཝཱ ཨཱ་རཱ་མཾ ཨཱ་རཱ་མཱུ་པ་ཙཱ་རཾ ཨཱ་ག་ནྟྭཱ ཨཱ་རོ་ཙེ་ཏི – ‘‘ཨི་ཏྠ་ནྣཱ་མ་སྶ, བྷ་ནྟེ, ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་ཧ་རི་སྶ་ནྟཱི’’ཏི. ས་ཙེ སཱ་ས་ངྐཾ ཧོ་ཏི, སཱ་ས་ངྐ་ནྟི ཨཱ་ཙི་ཀྑི་ཏ་བྦཾ; ས་ཙེ ས་པྤ་ཊི་བྷ་ཡཾ ཧོ་ཏི, ས་པྤ་ཊི་བྷ་ཡ་ནྟི ཨཱ་ཙི་ཀྑི་ཏ་བྦཾ; ས་ཙེ – ‘‘ཧོ་ཏུ, བྷ་ནྟེ, ཨཱ་ཧ་རི་ཡི་སྶ་ཏཱི’’ཏི བྷ་ཎ་ཏི, ཙོ་རཱ ཝ་ཏྟ་བྦཱ – ‘‘མ་ནུ་སྶཱ ཨི་དྷཱུ་པ་ཙ་ར་ནྟི ཨ་པ་ས་ཀྐ་ཐཱ’’ཏི. ཡཱ་གུ་ཡཱ པ་ཊི་སཾ་ཝི་དི་ཏེ ཏ་སྶཱ པ་རི་ཝཱ་རོ ཨཱ་ཧ་རི་ཡྻ་ཏི, ཨེ་ཏཾ པ་ཊི་སཾ་ཝི་དི་ཏཾ ནཱ་མ. བྷ་ཏྟེ་ན པ་ཊི་སཾ་ཝི་དི་ཏེ ཏ་སྶ པ་རི་ཝཱ་རོ ཨཱ་ཧ་རི་ཡྻ་ཏི, ཨེ་ཏཾ པ་ཊི་སཾ་ཝི་དི་ཏཾ ནཱ་མ. ཁཱ་ད་ནཱི་ཡེ་ན པ་ཊི་སཾ་ཝི་དི་ཏེ ཏ་སྶ པ་རི་ཝཱ་རོ ཨཱ་ཧ་རི་ཡྻ་ཏི, ཨེ་ཏཾ པ་ཊི་སཾ་ཝི་དི་ཏཾ ནཱ་མ. ཀུ་ལེ་ན པ་ཊི་སཾ་ཝི་དི་ཏེ ཡོ ཏ་སྨིཾ ཀུ་ལེ མ་ནུ་སྶོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་ཧ་ར་ཏི, ཨེ་ཏཾ པ་ཊི་སཾ་ཝི་དི་ཏཾ ནཱ་མ. གཱ་མེ་ན པ་ཊི་སཾ་ཝི་དི་ཏེ ཡོ ཏ་སྨིཾ གཱ་མེ མ་ནུ་སྶོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་ཧ་ར་ཏི, ཨེ་ཏཾ པ་ཊི་སཾ་ཝི་དི་ཏཾ ནཱ་མ. པཱུ་གེ་ན པ་ཊི་སཾ་ཝི་དི་ཏེ ཡོ ཏ་སྨིཾ པཱུ་གེ མ་ནུ་སྶོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་ཧ་ར་ཏི, ཨེ་ཏཾ པ་ཊི་སཾ་ཝི་དི་ཏཾ ནཱ་མ.
ཁཱ་ད་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཋ་པེ་ཏྭཱ ཨ་ཝ་སེ་སཾ ཁཱ་ད་ནཱི་ཡཾ ནཱ་མ.
བྷོ་ཛ་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨོ་ད་ནོ, ཀུ་མྨཱ་སོ, ས་ཏྟུ, མ་ཙྪོ, མཾ་སཾ.
ཨ་ཛ྄ཛྷཱ་རཱ་མོ ནཱ་མ པ་རི་ཀྑི་ཏྟ་སྶ ཨཱ་རཱ་མ་སྶ ཨ་ནྟོ་ཨཱ་རཱ་མོ. ཨ་པ་རི་ཀྑི་ཏྟ་སྶ ཨུ་པ་ཙཱ་རོ.
ཨ་གི་ལཱ་ནོ ནཱ་མ ས་ཀྐོ་ཏི པི་ཎྜཱ་ཡ ཙ་རི་ཏུཾ [ག་ནྟུཾ (ཀ.)].
གི་ལཱ་ནོ ནཱ་མ ན ས་ཀྐོ་ཏི པི་ཎྜཱ་ཡ ཙ་རི་ཏུཾ [ག་ནྟུཾ (ཀ.)].
ཨ་པྤ་ཊི་སཾ་ཝི་དི་ཏཾ ཨ་གི་ལཱ་ནོ ‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
༥༧༤. ཨ་པྤ་ཊི་སཾ་ཝི་དི་ཏེ ཨ་པྤ་ཊི་སཾ་ཝི་དི་ཏ་ས་ཉྙཱི ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨ་ཛ྄ཛྷཱ་རཱ་མེ ས་ཧ་ཏྠཱ པ་ཊི་གྒ་ཧེ་ཏྭཱ ཨ་གི་ལཱ་ནོ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨ་པྤ་ཊི་སཾ་ཝི་དི་ཏེ ཝེ་མ་ཏི་ཀོ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨ་ཛ྄ཛྷཱ་རཱ་མེ ས་ཧ་ཏྠཱ པ་ཊི་གྒ་ཧེ་ཏྭཱ ཨ་གི་ལཱ་ནོ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨ་པྤ་ཊི་སཾ་ཝི་དི་ཏེ པ་ཊི་སཾ་ཝི་དི་ཏ་ས་ཉྙཱི ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨ་ཛ྄ཛྷཱ་རཱ་མེ ས་ཧ་ཏྠཱ པ་ཊི་གྒ་ཧེ་ཏྭཱ ཨ་གི་ལཱ་ནོ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཨཱ་ཧཱ་ར་ཏྠཱ་ཡ པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི དུ་ཀྐ་ཊ་སྶ. པ་ཊི་སཾ་ཝི་དི་ཏེ ཨ་པྤ་ཊི་སཾ་ཝི་དི་ཏ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པ་ཊི་སཾ་ཝི་དི་ཏེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པ་ཊི་སཾ་ཝི་དི་ཏེ པ་ཊི་སཾ་ཝི་དི་ཏ་ས་ཉྙཱི, ཨ་ནཱ་པ་ཏྟི.
༥༧༥. ཨ་ནཱ་པ་ཏྟི པ་ཊི་སཾ་ཝི་དི་ཏེ, གི་ལཱ་ན་སྶ, པ་ཊི་སཾ་ཝི་དི་ཏེ ཝཱ གི་ལཱ་ན་སྶ ཝཱ སེ་ས་ཀཾ བྷུ་ཉྫ་ཏི, བ་ཧཱ་རཱ་མེ པ་ཊི་གྒ་ཧེ་ཏྭཱ ཨ་ནྟོ་ཨཱ་རཱ་མེ བྷུ་ཉྫ་ཏི, ཏ་ཏྠ ཛཱ་ཏ་ཀཾ མཱུ་ལཾ ཝཱ ཏ་ཙཾ ཝཱ པ་ཏྟཾ ཝཱ པུ་པྥཾ ཝཱ ཕ་ལཾ ཝཱ བྷུ་ཉྫ་ཏི, ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ས་ཏི པ་ཙྩ་ཡེ པ་རི་བྷུ་ཉྫ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཙ་ཏུ་ཏྠ་པཱ་ཊི་དེ་ས་ནཱི་ཡ་སི་ཀྑཱ་པ་དཾ ནི་ཊྛི་ཏཾ.
ཨུ་དྡི་ཊྛཱ ཁོ, ཨཱ་ཡ་སྨ་ནྟོ, ཙ་ཏྟཱ་རོ པཱ་ཊི་དེ་ས་ནཱི་ཡཱ དྷ་མྨཱ. ཏ་ཏྠཱ་ཡ་སྨ་ནྟེ པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? དུ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? ཏ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? པ་རི་སུ་དྡྷེ་ཏྠཱ་ཡ་སྨ་ནྟོ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི་ཏི.
པཱ་ཊི་དེ་ས་ནཱི་ཡ་ཀ་ཎྜཾ ནི་ཊྛི་ཏཾ.