༥. ཏ་ལ་ས་ཏྟི་ཀ་སི་ཀྑཱ་པ་དཾ
༤༥༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཀུ་པི་ཏཱ ཨ་ན་ཏྟ་མ་ནཱ ས་ཏྟ་ར་ས་ཝ་གྒི་ཡཱ་ནཾ བྷི་ཀྑཱུ་ནཾ ཏ་ལ་ས་ཏྟི་ཀཾ ཨུ་གྒི་ར་ནྟི. ཏེ པ་ཧཱ་ར་ས་མུ་ཙྩི་ཏཱ རོ་ད་ནྟི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, རོ་ད་ཐཱ’’ཏི? ‘‘ཨི་མེ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ཀུ་པི་ཏཱ ཨ་ན་ཏྟ་མ་ནཱ ཨ་མྷཱ་ཀཾ ཏ་ལ་ས་ཏྟི་ཀཾ ཨུ་གྒི་ར་ནྟཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཀུ་པི་ཏཱ ཨ་ན་ཏྟ་མ་ནཱ ས་ཏྟ་ར་ས་ཝ་གྒི་ཡཱ་ནཾ བྷི་ཀྑཱུ་ནཾ ཏ་ལ་ས་ཏྟི་ཀཾ ཨུ་གྒི་རི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཀུ་པི་ཏཱ ཨ་ན་ཏྟ་མ་ནཱ ས་ཏྟ་ར་ས་ཝ་གྒི་ཡཱ་ནཾ བྷི་ཀྑཱུ་ནཾ ཏ་ལ་ས་ཏྟི་ཀཾ ཨུ་གྒི་ར་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཀུ་པི་ཏཱ ཨ་ན་ཏྟ་མ་ནཱ ས་ཏྟ་ར་ས་ཝ་གྒི་ཡཱ་ནཾ བྷི་ཀྑཱུ་ནཾ ཏ་ལ་ས་ཏྟི་ཀཾ ཨུ་གྒི་རི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༥༥. ‘‘ཡོ པ་ན བྷི་ཀྑུ བྷི་ཀྑུ་སྶ ཀུ་པི་ཏོ ཨ་ན་ཏྟ་མ་ནོ ཏ་ལ་ས་ཏྟི་ཀཾ ཨུ་གྒི་རེ་ཡྻ, པཱ་ཙི་ཏྟི་ཡ’’ནྟི.
༤༥༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུ་སྶཱཏི ཨ་ཉྙ་སྶ བྷི་ཀྑུ་སྶ.
ཀུ་པི་ཏོ ཨ་ན་ཏྟ་མ་ནོཏི ཨ་ན་བྷི་ར་དྡྷོ ཨཱ་ཧ་ཏ་ཙི་ཏྟོ ཁི་ལ་ཛཱ་ཏོ.
ཏ་ལ་ས་ཏྟི་ཀཾ ཨུ་གྒི་རེ་ཡྻཱཏི ཀཱ་ཡཾ ཝཱ ཀཱ་ཡ་པ་ཊི་བ་དྡྷཾ ཝཱ ཨ་ནྟ་མ་སོ ཨུ་པྤ་ལ་པ་ཏྟ་མྤི ཨུ་ཙྩཱ་རེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༤༥༧. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཀུ་པི་ཏོ ཨ་ན་ཏྟ་མ་ནོ ཏ་ལ་ས་ཏྟི་ཀཾ ཨུ་གྒི་ར་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ ཀུ་པི་ཏོ ཨ་ན་ཏྟ་མ་ནོ ཏ་ལ་ས་ཏྟི་ཀཾ ཨུ་གྒི་ར་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཀུ་པི་ཏོ ཨ་ན་ཏྟ་མ་ནོ ཏ་ལ་ས་ཏྟི་ཀཾ ཨུ་གྒི་ར་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣ་སྶ ཀུ་པི་ཏོ ཨ་ན་ཏྟ་མ་ནོ ཏ་ལ་ས་ཏྟི་ཀཾ ཨུ་གྒི་ར་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༤༥༨. ཨ་ནཱ་པ་ཏྟི ཀེ་ན་ཙི ཝི་ཧེ་ཋཱི་ཡ་མཱ་ནོ མོ་ཀྑཱ་དྷི་པྤཱ་ཡོ ཏ་ལ་ས་ཏྟི་ཀཾ ཨུ་གྒི་ར་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཏ་ལ་ས་ཏྟི་ཀ་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.