༢༣༤. ཀ་སྶ་པ་གོ་ཏྟ་བྷི་ཀྑུ་ཝ་ཏྠུ
༣༨༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཙ་མྤཱ་ཡཾ ཝི་ཧ་ར་ཏི ག་གྒ་རཱ་ཡ པོ་ཀྑ་ར་ཎི་ཡཱ ཏཱི་རེ. ཏེ་ན ཁོ པ་ན ས་མ་ཡེ་ན ཀཱ་སཱི་སུ ཛ་ན་པ་དེ ཝཱ་ས་བྷ་གཱ་མོ ནཱ་མ ཧོ་ཏི. ཏ་ཏྠ ཀ་སྶ་པ་གོ་ཏྟོ ནཱ་མ བྷི་ཀྑུ ཨཱ་ཝཱ་སི་ཀོ ཧོ་ཏི ཏ་ནྟི་བ་དྡྷོ ཨུ་སྶུ་ཀྐཾ ཨཱ་པ་ནྣོ – ཀི་ནྟི ཨ་ནཱ་ག་ཏཱ ཙ པེ་ས་ལཱ བྷི་ཀྑཱུ ཨཱ་ག་ཙྪེ་ཡྻུཾ, ཨཱ་ག་ཏཱ ཙ པེ་ས་ལཱ བྷི་ཀྑཱུ ཕཱ་སུ ཝི་ཧ་རེ་ཡྻུཾ, ཨ་ཡ་ཉྩ ཨཱ་ཝཱ་སོ ཝུ་དྡྷིཾ ཝི་རུ་ལ༹ྷིཾ ཝེ་པུ་ལླཾ ཨཱ་པ་ཛྫེ་ཡྻཱ་ཏི. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ ཀཱ་སཱི་སུ ཙཱ་རི་ཀཾ ཙ་ར་མཱ་ནཱ ཡེ་ན ཝཱ་ས་བྷ་གཱ་མོ ཏ་ད་ཝ་ས་རུཾ. ཨ་དྡ་སཱ ཁོ ཀ་སྶ་པ་གོ་ཏྟོ བྷི་ཀྑུ ཏེ བྷི་ཀྑཱུ དཱུ་ར་ཏོ་ཝ ཨཱ་ག་ཙྪ་ནྟེ, དི་སྭཱ་ན ཨཱ་ས་ནཾ པ་ཉྙ་པེ་སི, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་སི, པཱ་ནཱི་ཡེ་ན ཨཱ་པུ་ཙྪི, ན་ཧཱ་ནེ ཨུ་སྶུ་ཀྐཾ ཨ་ཀཱ་སི, ཨུ་སྶུ་ཀྐ་མྤི ཨ་ཀཱ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཨ་ཐ ཁོ ཏེ་སཾ ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་དྡ་ཀོ ཁོ ཨ་ཡཾ, ཨཱ་ཝུ་སོ, ཨཱ་ཝཱ་སི་ཀོ བྷི་ཀྑུ ན་ཧཱ་ནེ ཨུ་སྶུ་ཀྐཾ ཀ་རོ་ཏི, ཨུ་སྶུ་ཀྐ་མྤི ཀ་རོ་ཏི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཧ་ནྡ, མ་ཡཾ, ཨཱ་ཝུ་སོ, ཨི་དྷེ་ཝ ཝཱ་ས་བྷ་གཱ་མེ ནི་ཝཱ་སཾ ཀ་པྤེ་མཱ’’ཏི. ཨ་ཐ ཁོ ཏེ ཨཱ་ག་ནྟུ་ཀཱ བྷི་ཀྑཱུ ཏ་ཏྠེ་ཝ ཝཱ་ས་བྷ་གཱ་མེ ནི་ཝཱ་སཾ ཀ་པྤེ་སུཾ.
ཨ་ཐ ཁོ ཀ་སྶ་པ་གོ་ཏྟ་སྶ བྷི་ཀྑུ་ནོ ཨེ་ཏ་ད་ཧོ་སི – ‘‘ཡོ ཁོ ཨི་མེ་སཾ ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨཱ་ག་ནྟུ་ཀ་ཀི་ལ་མ་ཐོ སོ པ་ཊི་པྤ་སྶ་དྡྷོ. ཡེ་པི་མེ གོ་ཙ་རེ ཨ་པྤ་ཀ་ཏ་ཉྙུ་ནོ ཏེ་དཱ་ནི་མེ གོ་ཙ་རེ པ་ཀ་ཏ་ཉྙུ་ནོ. དུ་ཀྐ་རཾ ཁོ པ་ན པ་ར་ཀུ་ལེ་སུ ཡཱ་ཝ་ཛཱི་ཝཾ ཨུ་སྶུ་ཀྐཾ ཀཱ་ཏུཾ, ཝི་ཉྙ་ཏྟི ཙ མ་ནུ་སྶཱ་ནཾ ཨ་མ་ནཱ་པཱ. ཡཾ་ནཱུ་ནཱ་ཧཾ ན ཨུ་སྶུ་ཀྐཾ ཀ་རེ་ཡྻཾ ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨི’’ནྟི. སོ ན ཨུ་སྶུ་ཀྐཾ ཨ་ཀཱ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཨ་ཐ ཁོ ཏེ་སཾ ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘པུ་བྦེ ཁྭཱ་ཡཾ, ཨཱ་ཝུ་སོ, ཨཱ་ཝཱ་སི་ཀོ བྷི་ཀྑུ ན་ཧཱ་ནེ ཨུ་སྶུ་ཀྐཾ ཨ་ཀཱ་སི, ཨུ་སྶུ་ཀྐ་མྤི ཨ་ཀཱ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. སོ་དཱ་ནཱ་ཡཾ ན ཨུ་སྶུ་ཀྐཾ ཀ་རོ་ཏི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. དུ་ཊྛོ་དཱ་ནཱ་ཡཾ, ཨཱ་ཝུ་སོ, ཨཱ་ཝཱ་སི་ཀོ བྷི་ཀྑུ. ཧ་ནྡ, མ་ཡཾ, ཨཱ་ཝུ་སོ, ཨཱ་ཝཱ་སི་ཀཾ [ཨི་མཾ ཨཱ་ཝཱ་སི་ཀཾ (སྱཱ.)] བྷི་ཀྑུཾ ཨུ་ཀྑི་པཱ་མཱ’’ཏི. ཨ་ཐ ཁོ ཏེ ཨཱ་ག་ནྟུ་ཀཱ བྷི་ཀྑཱུ ས་ནྣི་པ་ཏི་ཏྭཱ ཀ་སྶ་པ་གོ་ཏྟཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘པུ་བྦེ ཁོ ཏྭཾ, ཨཱ་ཝུ་སོ, ན་ཧཱ་ནེ ཨུ་སྶུ་ཀྐཾ ཀ་རོ་སི, ཨུ་སྶུ་ཀྐ་མྤི ཀ་རོ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. སོ་དཱ་ནི ཏྭཾ ན ཨུ་སྶུ་ཀྐཾ ཀ་རོ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཨཱ་པ་ཏྟིཾ ཏྭཾ, ཨཱ་ཝུ་སོ, ཨཱ་པ་ནྣོ. པ་སྶ་སེ་ཏཾ ཨཱ་པ་ཏྟི’’ནྟི? ‘‘ན་ཏྠི མེ, ཨཱ་ཝུ་སོ, ཨཱ་པ་ཏྟི, ཡ་མ་ཧཾ པ་སྶེ་ཡྻ’’ནྟི. ཨ་ཐ ཁོ ཏེ ཨཱ་ག་ནྟུ་ཀཱ བྷི་ཀྑཱུ ཀ་སྶ་པ་གོ་ཏྟཾ བྷི་ཀྑུཾ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པིཾ་སུ.
ཨ་ཐ ཁོ ཀ་སྶ་པ་གོ་ཏྟ་སྶ བྷི་ཀྑུ་ནོ ཨེ་ཏ་ད་ཧོ་སི – ‘‘ཨ་ཧཾ ཁོ ཨེ་ཏཾ ན ཛཱ་ནཱ་མི ‘ཨཱ་པ་ཏྟི ཝཱ ཨེ་སཱ ཨ་ནཱ་པ་ཏྟི ཝཱ, ཨཱ་པ་ནྣོ ཙ་མྷི [ཝ་མྷི (?)] ཨ་ནཱ་པ་ནྣོ ཝཱ, ཨུ་ཀྑི་ཏྟོ ཙ་མྷི ཨ་ནུ་ཀྑི་ཏྟོ ཝཱ, དྷ་མྨི་ཀེ་ན ཝཱ ཨ་དྷ་མྨི་ཀེ་ན ཝཱ, ཀུ་པྤེ་ན ཝཱ ཨ་ཀུ་པྤེ་ན ཝཱ, ཋཱ་ནཱ་ར་ཧེ་ན ཝཱ ཨ་ཊྛཱ་ནཱ་ར་ཧེ་ན ཝཱ’. ཡཾ་ནཱུ་ནཱ་ཧཾ ཙ་མྤཾ ག་ནྟྭཱ བྷ་ག་ཝ་ནྟཾ ཨེ་ཏ་མ་ཏྠཾ པུ་ཙྪེ་ཡྻ’’ནྟི. ཨ་ཐ ཁོ ཀ་སྶ་པ་གོ་ཏྟོ བྷི་ཀྑུ སེ་ནཱ་ས་ནཾ སཾ་སཱ་མེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཙ་མྤཱ ཏེ་ན པ་ཀྐཱ་མི. ཨ་ནུ་པུ་བྦེ་ན ཡེ་ན ཙ་མྤཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨཱ་ཙི་ཎྞཾ ཁོ པ་ནེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་དྡྷིཾ པ་ཊི་ས་མྨོ་དི་ཏུཾ. ཨ་ཐ ཁོ བྷ་ག་ཝཱ ཀ་སྶ་པ་གོ་ཏྟཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཙྩི, བྷི་ཀྑུ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡཾ, ཀ་ཙྩི ཨ་པྤ་ཀི་ལ་མ་ཐེ་ན ཨ་དྡྷཱ་ནཾ ཨཱ་ག་ཏོ, ཀུ་ཏོ ཙ ཏྭཾ, བྷི་ཀྑུ, ཨཱ་ག་ཙྪ་སཱི’’ཏི? ‘‘ཁ་མ་ནཱི་ཡཾ, བྷ་ག་ཝཱ; ཡཱ་པ་ནཱི་ཡཾ, བྷ་ག་ཝཱ; ཨ་པྤ་ཀི་ལ་མ་ཐེ་ན ཙཱ་ཧཾ, བྷ་ནྟེ, ཨ་དྡྷཱ་ནཾ ཨཱ་ག་ཏོ. ཨ་ཏྠི, བྷ་ནྟེ, ཀཱ་སཱི་སུ ཛ་ན་པ་དེ ཝཱ་ས་བྷ་གཱ་མོ ནཱ་མ. ཏ་ཏྠཱ་ཧཾ, བྷ་ག་ཝཱ, ཨཱ་ཝཱ་སི་ཀོ ཏ་ནྟི་བ་དྡྷོ ཨུ་སྶུ་ཀྐཾ ཨཱ་པ་ནྣོ – ‘ཀི་ནྟི ཨ་ནཱ་ག་ཏཱ ཙ པེ་ས་ལཱ བྷི་ཀྑཱུ ཨཱ་ག་ཙྪེ་ཡྻུཾ, ཨཱ་ག་ཏཱ ཙ པེ་ས་ལཱ བྷི་ཀྑཱུ ཕཱ་སུ ཝི་ཧ་རེ་ཡྻུཾ, ཨ་ཡ་ཉྩ ཨཱ་ཝཱ་སོ ཝུ་དྡྷིཾ ཝི་རུ་ལ༹ྷིཾ ཝེ་པུ་ལླཾ ཨཱ་པ་ཛྫེ་ཡྻཱ’ཏི. ཨ་ཐ ཁོ, བྷ་ནྟེ, ས་མྦ་ཧུ་ལཱ བྷི་ཀྑཱུ ཀཱ་སཱི་སུ ཙཱ་རི་ཀཾ ཙ་ར་མཱ་ནཱ ཡེ་ན ཝཱ་ས་བྷ་གཱ་མོ ཏ་ད་ཝ་ས་རུཾ. ཨ་དྡ་སཾ ཁོ ཨ་ཧཾ, བྷ་ནྟེ, ཏེ བྷི་ཀྑཱུ དཱུ་ར་ཏོ་ཝ ཨཱ་ག་ཙྪ་ནྟེ, དི་སྭཱ་ན ཨཱ་ས་ནཾ པ་ཉྙ་པེ་སིཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པིཾ, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་སིཾ, པཱ་ནཱི་ཡེ་ན ཨ་པུ་ཙྪིཾ, ན་ཧཱ་ནེ ཨུ་སྶུ་ཀྐཾ ཨ་ཀཱ་སིཾ, ཨུ་སྶུ་ཀྐ་མྤི ཨ་ཀཱ་སིཾ ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཨ་ཐ ཁོ ཏེ་སཾ, བྷ་ནྟེ, ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘བྷ་དྡ་ཀོ ཁོ ཨ་ཡཾ ཨཱ་ཝུ་སོ ཨཱ་ཝཱ་སི་ཀོ བྷི་ཀྑུ ན་ཧཱ་ནེ ཨུ་སྶུ་ཀྐཾ ཀ་རོ་ཏི, ཨུ་སྶུ་ཀྐ་མྤི ཀ་རོ་ཏི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཧ་ནྡ, མ་ཡཾ, ཨཱ་ཝུ་སོ, ཨི་དྷེ་ཝ ཝཱ་ས་བྷ་གཱ་མེ ནི་ཝཱ་སཾ ཀ་པྤེ་མཱ’ཏི. ཨ་ཐ ཁོ ཏེ, བྷ་ནྟེ, ཨཱ་ག་ནྟུ་ཀཱ བྷི་ཀྑཱུ ཏ་ཏྠེ་ཝ ཝཱ་ས་བྷ་གཱ་མེ ནི་ཝཱ་སཾ ཀ་པྤེ་སུཾ. ཏ་སྶ མ་ཡ྄ཧཾ, བྷ་ནྟེ, ཨེ་ཏ་ད་ཧོ་སི – ‘ཡོ ཁོ ཨི་མེ་སཾ ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨཱ་ག་ནྟུ་ཀ་ཀི་ལ་མ་ཐོ སོ པ་ཊི་པྤ་སྶ་དྡྷོ. ཡེ་པི་མེ གོ་ཙ་རེ ཨ་པྤ་ཀ་ཏ་ཉྙུ་ནོ ཏེ་དཱ་ནི་མེ གོ་ཙ་རེ པ་ཀ་ཏ་ཉྙུ་ནོ. དུ་ཀྐ་རཾ ཁོ པ་ན པ་ར་ཀུ་ལེ་སུ ཡཱ་ཝ་ཛཱི་ཝཾ ཨུ་སྶུ་ཀྐཾ ཀཱ་ཏུཾ, ཝི་ཉྙ་ཏྟི ཙ མ་ནུ་སྶཱ་ནཾ ཨ་མ་ནཱ་པཱ. ཡཾ་ནཱུ་ནཱ་ཧཾ ན ཨུ་སྶུ་ཀྐཾ ཀ་རེ་ཡྻཾ ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨི’ནྟི. སོ ཁོ ཨ་ཧཾ, བྷ་ནྟེ, ན ཨུ་སྶུ་ཀྐཾ ཨ་ཀཱ་སིཾ ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཨ་ཐ ཁོ ཏེ་སཾ, བྷ་ནྟེ, ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨེ་ཏ་ད་ཧོ་སི – ‘པུ་བྦེ ཁྭཱ་ཡཾ, ཨཱ་ཝུ་སོ, ཨཱ་ཝཱ་སི་ཀོ བྷི་ཀྑུ ན་ཧཱ་ནེ ཨུ་སྶུ་ཀྐཾ ཀ་རོ་ཏི, ཨུ་སྶུ་ཀྐ་མྤི ཀ་རོ་ཏི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. སོ་དཱ་ནཱ་ཡཾ ན ཨུ་སྶུ་ཀྐཾ ཀ་རོ་ཏི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. དུ་ཊྛོ་དཱ་ནཱ་ཡཾ, ཨཱ་ཝུ་སོ, ཨཱ་ཝཱ་སི་ཀོ བྷི་ཀྑུ. ཧ་ནྡ, མ་ཡཾ, ཨཱ་ཝུ་སོ, ཨཱ་ཝཱ་སི་ཀཾ བྷི་ཀྑུཾ ཨུ་ཀྑི་པཱ་མཱ’ཏི. ཨ་ཐ ཁོ ཏེ, བྷ་ནྟེ, ཨཱ་ག་ནྟུ་ཀཱ བྷི་ཀྑཱུ ས་ནྣི་པ་ཏི་ཏྭཱ མཾ ཨེ་ཏ་ད་ཝོ་ཙུཾ – ‘པུ་བྦེ ཁོ ཏྭཾ, ཨཱ་ཝུ་སོ, ན་ཧཱ་ནེ ཨུ་སྶུ་ཀྐཾ ཀ་རོ་སི, ཨུ་སྶུ་ཀྐ་མྤི ཀ་རོ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. སོ་དཱ་ནི ཏྭཾ ན ཨུ་སྶུ་ཀྐཾ ཀ་རོ་སི ཡཱ་གུ་ཡཱ ཁཱ་ད་ནཱི་ཡེ བྷ་ཏྟ་སྨིཾ. ཨཱ་པ་ཏྟིཾ ཏྭཾ, ཨཱ་ཝུ་སོ, ཨཱ་པ་ནྣོ. པ་སྶ་སེ་ཏཾ ཨཱ་པ་ཏྟི’ནྟི? ‘ན་ཏྠི མེ, ཨཱ་ཝུ་སོ, ཨཱ་པ་ཏྟི ཡ་མ་ཧཾ པ་སྶེ་ཡྻ’ནྟི. ཨ་ཐ ཁོ ཏེ, བྷ་ནྟེ, ཨཱ་ག་ནྟུ་ཀཱ བྷི་ཀྑཱུ མཾ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པིཾ་སུ. ཏ་སྶ མ་ཡ྄ཧཾ, བྷ་ནྟེ, ཨེ་ཏ་ད་ཧོ་སི – ‘ཨ་ཧཾ ཁོ ཨེ་ཏཾ ན ཛཱ་ནཱ་མི ‘ཨཱ་པ་ཏྟི ཝཱ ཨེ་སཱ ཨ་ནཱ་པ་ཏྟི ཝཱ, ཨཱ་པ་ནྣོ ཙ་མྷི ཨ་ནཱ་པ་ནྣོ ཝཱ, ཨུ་ཀྑི་ཏྟོ ཙ་མྷི ཨ་ནུ་ཀྑི་ཏྟོ ཝཱ, དྷ་མྨི་ཀེ་ན ཝཱ ཨ་དྷ་མྨི་ཀེ་ན ཝཱ, ཀུ་པྤེ་ན ཝཱ ཨ་ཀུ་པྤེ་ན ཝཱ, ཋཱ་ནཱ་ར་ཧེ་ན ཝཱ ཨ་ཊྛཱ་ནཱ་ར་ཧེ་ན ཝཱ’. ཡཾ་ནཱུ་ནཱ་ཧཾ ཙ་མྤཾ ག་ནྟྭཱ བྷ་ག་ཝ་ནྟཾ ཨེ་ཏ་མ་ཏྠཾ པུ་ཙྪེ་ཡྻ’ནྟི. ཏ་ཏོ ཨ་ཧཾ, བྷ་ག་ཝཱ, ཨཱ་ག་ཙྪཱ་མཱི’’ཏི. ‘‘ཨ་ནཱ་པ་ཏྟི ཨེ་སཱ, བྷི་ཀྑུ, ནེ་སཱ ཨཱ་པ་ཏྟི. ཨ་ནཱ་པ་ནྣོ་སི, ན་སི ཨཱ་པ་ནྣོ. ཨ་ནུ་ཀྑི་ཏྟོ་སི, ན་སི ཨུ་ཀྑི་ཏྟོ. ཨ་དྷ་མྨི་ཀེ་ནཱ་སི ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ན. ག་ཙྪ ཏྭཾ, བྷི་ཀྑུ, ཏ་ཏྠེ་ཝ ཝཱ་ས་བྷ་གཱ་མེ ནི་ཝཱ་སཾ ཀ་པྤེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ཀ་སྶ་པ་གོ་ཏྟོ བྷི་ཀྑུ བྷ་ག་ཝ་ཏོ པ་ཊི་སྶུ་ཎི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ ཡེ་ན ཝཱ་ས་བྷ་གཱ་མོ ཏེ་ན པ་ཀྐཱ་མི.
༣༨༡. ཨ་ཐ ཁོ ཏེ་སཾ ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཨ་ཧུ་དེ་ཝ ཀུ་ཀྐུ་ཙྩཾ, ཨ་ཧུ ཝི་པྤ་ཊི་སཱ་རོ – ‘‘ཨ་ལཱ་བྷཱ ཝ་ཏ ནོ, ན ཝ་ཏ ནོ ལཱ་བྷཱ, དུ་ལླ་དྡྷཾ ཝ་ཏ ནོ, ན ཝ་ཏ ནོ སུ་ལ་དྡྷཾ, ཡེ མ་ཡཾ སུ་དྡྷཾ བྷི་ཀྑུཾ ཨ་ནཱ་པ་ཏྟི་ཀཾ ཨ་ཝ་ཏྠུ་སྨིཾ ཨ་ཀཱ་ར་ཎེ ཨུ་ཀྑི་པི་མྷཱ. ཧ་ནྡ, མ་ཡཾ, ཨཱ་ཝུ་སོ, ཙ་མྤཾ ག་ནྟྭཱ བྷ་ག་ཝ་ཏོ ས་ནྟི་ཀེ ཨ་ཙྩ་ཡཾ ཨ་ཙྩ་ཡ་ཏོ དེ་སེ་མཱ’’ཏི. ཨ་ཐ ཁོ ཏེ ཨཱ་ག་ནྟུ་ཀཱ བྷི་ཀྑཱུ སེ་ནཱ་ས་ནཾ སཾ་སཱ་མེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཙ་མྤཱ ཏེ་ན པ་ཀྐ་མིཾ་སུ. ཨ་ནུ་པུ་བྦེ་ན ཡེ་ན ཙ་མྤཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨཱ་ཙི་ཎྞཾ ཁོ པ་ནེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་དྡྷིཾ པ་ཊི་ས་མྨོ་དི་ཏུཾ. ཨ་ཐ ཁོ བྷ་ག་ཝཱ ཏེ བྷི་ཀྑཱུ ཨེ་ཏ་ད་ཝོ་ཙ – ‘‘ཀ་ཙྩི, བྷི་ཀྑ་ཝེ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡཾ, ཀ་ཙྩི་ཏྠ ཨ་པྤ་ཀི་ལ་མ་ཐེ་ན ཨ་དྡྷཱ་ནཾ ཨཱ་ག་ཏཱ, ཀུ་ཏོ ཙ ཏུ་མྷེ, བྷི་ཀྑ་ཝེ, ཨཱ་ག་ཙྪ་ཐཱ’’ཏི? ‘‘ཁ་མ་ནཱི་ཡཾ, བྷ་ག་ཝཱ; ཡཱ་པ་ནཱི་ཡཾ, བྷ་ག་ཝཱ; ཨ་པྤ་ཀི་ལ་མ་ཐེ་ན ཙ མ་ཡཾ, བྷ་ནྟེ, ཨ་དྡྷཱ་ནཾ ཨཱ་ག་ཏཱ. ཨ་ཏྠི, བྷ་ནྟེ, ཀཱ་སཱི་སུ ཛ་ན་པ་དེ ཝཱ་ས་བྷ་གཱ་མོ ནཱ་མ. ཏ་ཏོ མ་ཡཾ, བྷ་ག་ཝཱ, ཨཱ་ག་ཙྪཱ་མཱ’’ཏི. ‘‘ཏུ་མྷེ, བྷི་ཀྑ་ཝེ, ཨཱ་ཝཱ་སི་ཀཾ བྷི་ཀྑུཾ ཨུ་ཀྑི་པི་ཏྠཱ’’ཏི? ‘‘ཨེ་ཝཾ, བྷ་ནྟེ’’ཏི. ‘‘ཀི་སྨིཾ, བྷི་ཀྑ་ཝེ, ཝ་ཏྠུ་སྨིཾ ཀཱ་ར་ཎེ’’ཏི? ‘‘ཨ་ཝ་ཏྠུ་སྨིཾ, བྷ་ག་ཝཱ, ཨ་ཀཱ་ར་ཎེ’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, མོ་གྷ་པུ་རི་སཱ, ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, སུ་དྡྷཾ བྷི་ཀྑུཾ ཨ་ནཱ་པ་ཏྟི་ཀཾ ཨ་ཝ་ཏྠུ་སྨིཾ ཨ་ཀཱ་ར་ཎེ ཨུ་ཀྑི་པི་སྶ་ཐ. ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ…’’ ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, སུ་དྡྷོ བྷི་ཀྑུ ཨ་ནཱ་པ་ཏྟི་ཀོ ཨ་ཝ་ཏྠུ་སྨིཾ ཨ་ཀཱ་ར་ཎེ ཨུ་ཀྑི་པི་ཏ་བྦོ. ཡོ ཨུ་ཀྑི་པེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི.
ཨ་ཐ ཁོ ཏེ བྷི་ཀྑཱུ ཨུ་ཊྛཱ་ཡཱ་ས་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ བྷ་ག་ཝ་ཏོ པཱ་དེ་སུ སི་ར་སཱ ནི་པ་ཏི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨ་ཙྩ་ཡོ ནོ, བྷ་ནྟེ, ཨ་ཙྩ་ག་མཱ ཡ་ཐཱ་བཱ་ལེ ཡ་ཐཱ་མཱུ་ལ༹ྷེ ཡ་ཐཱ་ཨ་ཀུ་ས་ལེ, ཡེ མ་ཡཾ སུ་དྡྷཾ བྷི་ཀྑུཾ ཨ་ནཱ་པ་ཏྟི་ཀཾ ཨ་ཝ་ཏྠུ་སྨིཾ ཨ་ཀཱ་ར་ཎེ ཨུ་ཀྑི་པི་མྷཱ. ཏེ་སཾ ནོ, བྷ་ནྟེ, བྷ་ག་ཝཱ ཨ་ཙྩ་ཡཾ ཨ་ཙྩ་ཡ་ཏོ པ་ཊི་གྒ་ཎྷཱ་ཏུ ཨཱ་ཡ་ཏིཾ སཾ་ཝ་རཱ་ཡཱ’’ཏི. ‘‘ཏ་གྒྷ, ཏུ་མྷེ, བྷི་ཀྑ་ཝེ, ཨ་ཙྩ་ཡོ ཨ་ཙྩ་ག་མཱ ཡ་ཐཱ་བཱ་ལེ ཡ་ཐཱ་མཱུ་ལ༹ྷེ ཡ་ཐཱ་ཨ་ཀུ་ས་ལེ, ཡེ ཏུ་མྷེ སུ་དྡྷཾ བྷི་ཀྑུཾ ཨ་ནཱ་པ་ཏྟི་ཀཾ ཨ་ཝ་ཏྠུ་སྨིཾ ཨ་ཀཱ་ར་ཎེ ཨུ་ཀྑི་པི་ཏྠ. ཡ་ཏོ ཙ ཁོ ཏུ་མྷེ, བྷི་ཀྑ་ཝེ, ཨ་ཙྩ་ཡཾ ཨ་ཙྩ་ཡ་ཏོ དི་སྭཱ ཡ་ཐཱ་དྷ་མྨཾ པ་ཊི་ཀ་རོ་ཐ, ཏཾ ཝོ མ་ཡཾ པ་ཊི་གྒ་ཎྷཱ་མ. ཝུ་དྡྷི་ཧེ་སཱ, བྷི་ཀྑ་ཝེ, ཨ་རི་ཡ་སྶ ཝི་ན་ཡེ ཡོ ཨ་ཙྩ་ཡཾ ཨ་ཙྩ་ཡ་ཏོ དི་སྭཱ ཡ་ཐཱ་དྷ་མྨཾ པ་ཊི་ཀ་རོ་ཏི, ཨཱ་ཡ་ཏིཾ [ཨཱ་ཡ་ཏིཾ ཙ (སཱི.)] སཾ་ཝ་རཾ ཨཱ་པ་ཛྫ་ཏཱི’’ཏི.
ཀ་སྶ་པ་གོ་ཏྟ་བྷི་ཀྑུ་ཝ་ཏྠུ ནི་ཊྛི་ཏཾ.