༡༤༥. པ་ཝཱ་ར་ཎཱ་ས་ངྒ་ཧོ
༢༤༡. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ ས་ནྡི་ཊྛཱ ས་མྦྷ་ཏྟཱ བྷི་ཀྑཱུ ཀོ་ས་ལེ་སུ ཛ་ན་པ་དེ ཨ་ཉྙ་ཏ་ར་སྨིཾ ཨཱ་ཝཱ་སེ ཝ་སྶཾ ཨུ་པ་ག་ཙྪིཾ་སུ. ཏེ་སཾ ས་མ་གྒཱ་ནཾ ས་མྨོ་ད་མཱ་ནཱ་ནཾ ཨ་ཝི་ཝ་ད་མཱ་ནཱ་ནཾ ཝི་ཧ་ར་ཏཾ ཨ་ཉྙ་ཏ་རོ ཕཱ་སུ་ཝི་ཧཱ་རོ ཨ་དྷི་ག་ཏོ ཧོ་ཏི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཨ་མྷཱ་ཀཾ ཁོ ས་མ་གྒཱ་ནཾ ས་མྨོ་ད་མཱ་ནཱ་ནཾ ཨ་ཝི་ཝ་ད་མཱ་ནཱ་ནཾ ཝི་ཧ་ར་ཏཾ ཨ་ཉྙ་ཏ་རོ ཕཱ་སུ་ཝི་ཧཱ་རོ ཨ་དྷི་ག་ཏོ. ས་ཙེ མ་ཡཾ ཨི་དཱ་ནི པ་ཝཱ་རེ་སྶཱ་མ, སི་ཡཱ་པི བྷི་ཀྑཱུ པ་ཝཱ་རེ་ཏྭཱ ཙཱ་རི་ཀཾ པ་ཀྐ་མེ་ཡྻུཾ. ཨེ་ཝཾ མ་ཡཾ ཨི་མ་མྷཱ ཕཱ་སུ་ཝི་ཧཱ་རཱ པ་རི་བཱ་ཧི་རཱ བྷ་ཝི་སྶཱ་མ. ཀ་ཐཾ ནུ ཁོ ཨ་མྷེ་ཧི པ་ཊི་པ་ཛྫི་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨི་དྷ པ་ན, བྷི་ཀྑ་ཝེ, ས་མྦ་ཧུ་ལཱ ས་ནྡི་ཊྛཱ ས་མྦྷ་ཏྟཱ བྷི་ཀྑཱུ ཨ་ཉྙ་ཏ་ར་སྨིཾ ཨཱ་ཝཱ་སེ ཝ་སྶཾ ཨུ་པ་ག་ཙྪ་ནྟི. ཏེ་སཾ ས་མ་གྒཱ་ནཾ ས་མྨོ་ད་མཱ་ནཱ་ནཾ ཨ་ཝི་ཝ་ད་མཱ་ནཱ་ནཾ ཝི་ཧ་ར་ཏཾ ཨ་ཉྙ་ཏ་རོ ཕཱ་སུ་ཝི་ཧཱ་རོ ཨ་དྷི་ག་ཏོ ཧོ་ཏི. ཏ་ཏྲ ཙེ བྷི་ཀྑཱུ་ནཾ ཨེ་ཝཾ ཧོ་ཏི – ‘‘ཨ་མྷཱ་ཀཾ ཁོ ས་མ་གྒཱ་ནཾ ས་མྨོ་ད་མཱ་ནཱ་ནཾ ཨ་ཝི་ཝ་ད་མཱ་ནཱ་ནཾ ཝི་ཧ་ར་ཏཾ ཨ་ཉྙ་ཏ་རོ ཕཱ་སུ་ཝི་ཧཱ་རོ ཨ་དྷི་ག་ཏོ. ས་ཙེ མ་ཡཾ ཨི་དཱ་ནི པ་ཝཱ་རེ་སྶཱ་མ, སི་ཡཱ་པི བྷི་ཀྑཱུ པ་ཝཱ་རེ་ཏྭཱ ཙཱ་རི་ཀཾ པ་ཀྐ་མེ་ཡྻུཾ. ཨེ་ཝཾ མ་ཡཾ ཨི་མ་མྷཱ ཕཱ་སུ་ཝི་ཧཱ་རཱ པ་རི་བཱ་ཧི་རཱ བྷ་ཝི་སྶཱ་མཱ’’ཏི, ཨ་ནུ་ཛཱ་ནཱ་མི, བྷི་ཀྑ་ཝེ, ཏེ་ཧི བྷི་ཀྑཱུ་ཧི པ་ཝཱ་ར་ཎཱ་ས་ངྒ་ཧཾ ཀཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཀཱ་ཏ་བྦོ. ས་བྦེ་ཧེ་ཝ ཨེ་ཀ་ཛ྄ཛྷཾ ས་ནྣི་པ་ཏི་ཏ་བྦཾ – ས་ནྣི་པ་ཏི་ཏྭཱ བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་མྷཱ་ཀཾ ས་མ་གྒཱ་ནཾ ས་མྨོ་ད་མཱ་ནཱ་ནཾ ཨ་ཝི་ཝ་ད་མཱ་ནཱ་ནཾ ཝི་ཧ་ར་ཏཾ ཨ་ཉྙ་ཏ་རོ ཕཱ་སུ་ཝི་ཧཱ་རོ ཨ་དྷི་ག་ཏོ. ས་ཙེ མ་ཡཾ ཨི་དཱ་ནི པ་ཝཱ་རེ་སྶཱ་མ, སི་ཡཱ་པི བྷི་ཀྑཱུ པ་ཝཱ་རེ་ཏྭཱ ཙཱ་རི་ཀཾ པ་ཀྐ་མེ་ཡྻུཾ. ཨེ་ཝཾ མ་ཡཾ ཨི་མ་མྷཱ ཕཱ་སུ་ཝི་ཧཱ་རཱ པ་རི་བཱ་ཧི་རཱ བྷ་ཝི་སྶཱ་མ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ པ་ཝཱ་ར་ཎཱ་ས་ངྒ་ཧཾ ཀ་རེ་ཡྻ, ཨི་དཱ་ནི ཨུ་པོ་ས་ཐཾ ཀ་རེ་ཡྻ, པཱ་ཏི་མོ་ཀྑཾ ཨུ་དྡི་སེ་ཡྻ, ཨཱ་ག་མེ ཛུ་ཎྷེ ཀོ་མུ་དི་ཡཱ ཙཱ་ཏུ་མཱ་སི་ནི་ཡཱ པ་ཝཱ་རེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་མྷཱ་ཀཾ ས་མ་གྒཱ་ནཾ ས་མྨོ་ད་མཱ་ནཱ་ནཾ ཨ་ཝི་ཝ་ད་མཱ་ནཱ་ནཾ ཝི་ཧ་ར་ཏཾ ཨ་ཉྙ་ཏ་རོ ཕཱ་སུ་ཝི་ཧཱ་རོ ཨ་དྷི་ག་ཏོ. ས་ཙེ མ་ཡཾ ཨི་དཱ་ནི པ་ཝཱ་རེ་སྶཱ་མ, སི་ཡཱ་པི བྷི་ཀྑཱུ པ་ཝཱ་རེ་ཏྭཱ ཙཱ་རི་ཀཾ པ་ཀྐ་མེ་ཡྻུཾ. ཨེ་ཝཾ མ་ཡཾ ཨི་མ་མྷཱ ཕཱ་སུ་ཝི་ཧཱ་རཱ པ་རི་བཱ་ཧི་རཱ བྷ་ཝི་སྶཱ་མ. ས་ངྒྷོ པ་ཝཱ་ར་ཎཱ་ས་ངྒ་ཧཾ ཀ་རོ་ཏི, ཨི་དཱ་ནི ཨུ་པོ་ས་ཐཾ ཀ་རི་སྶ་ཏི, པཱ་ཏི་མོ་ཀྑཾ ཨུ་དྡི་སི་སྶ་ཏི, ཨཱ་ག་མེ ཛུ་ཎྷེ ཀོ་མུ་དི་ཡཱ ཙཱ་ཏུ་མཱ་སི་ནི་ཡཱ པ་ཝཱ་རེ་སྶ་ཏི. ཡ་སྶཱ་ཡ་སྨ་ཏོ ཁ་མ་ཏི པ་ཝཱ་ར་ཎཱ་ས་ངྒ་ཧ་སྶ ཀ་ར་ཎཾ, ཨི་དཱ་ནི ཨུ་པོ་ས་ཐཾ ཀ་རི་སྶ་ཏི, པཱ་ཏི་མོ་ཀྑཾ ཨུ་དྡི་སི་སྶ་ཏི, ཨཱ་ག་མེ ཛུ་ཎྷེ ཀོ་མུ་དི་ཡཱ ཙཱ་ཏུ་མཱ་སི་ནི་ཡཱ པ་ཝཱ་རེ་སྶ་ཏི, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘ཀ་ཏོ ས་ངྒྷེ་ན པ་ཝཱ་ར་ཎཱ་ས་ངྒ་ཧོ, ཨི་དཱ་ནི ཨུ་པོ་ས་ཐཾ ཀ་རི་སྶ་ཏི, པཱ་ཏི་མོ་ཀྑཾ ཨུ་དྡི་སི་སྶ་ཏི, ཨཱ་ག་མེ ཛུ་ཎྷེ ཀོ་མུ་དི་ཡཱ ཙཱ་ཏུ་མཱ་སི་ནི་ཡཱ པ་ཝཱ་རེ་སྶ་ཏི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཏེ་ཧི ཙེ, བྷི་ཀྑ་ཝེ, བྷི་ཀྑཱུ་ཧི ཀ་ཏེ པ་ཝཱ་ར་ཎཱ་ས་ངྒ་ཧེ ཨ་ཉྙ་ཏ་རོ བྷི་ཀྑུ ཨེ་ཝཾ ཝ་དེ་ཡྻ – ‘‘ཨི་ཙྪཱ་མ་ཧཾ, ཨཱ་ཝུ་སོ, ཛ་ན་པ་ད་ཙཱ་རི་ཀཾ པ་ཀྐ་མི་ཏུཾ; ཨ་ཏྠི མེ ཛ་ན་པ་དེ ཀ་ར་ཎཱི་ཡ’’ནྟི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘སཱ་དྷཱ་ཝུ་སོ, པ་ཝཱ་རེ་ཏྭཱ ག་ཙྪཱ་ཧཱི’’ཏི. སོ ཙེ, བྷི་ཀྑ་ཝེ, བྷི་ཀྑུ པ་ཝཱ་ར་ཡ་མཱ་ནོ ཨ་ཉྙ་ཏ་ར་སྶ བྷི་ཀྑུ་ནོ པ་ཝཱ་ར་ཎཾ ཋ་པེ་ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ནི་སྶ་རོ ཁོ མེ ཏྭཾ, ཨཱ་ཝུ་སོ, པ་ཝཱ་ར་ཎཱ་ཡ, ན ཏཱ་ཝཱ་ཧཾ པ་ཝཱ་རེ་སྶཱ་མཱི’’ཏི. ཏ་སྶ ཙེ, བྷི་ཀྑ་ཝེ, བྷི་ཀྑུ་ནོ པ་ཝཱ་ར་ཡ་མཱ་ན་སྶ ཨ་ཉྙ་ཏ་རོ བྷི་ཀྑུ ཏ་སྶ བྷི་ཀྑུ་ནོ པ་ཝཱ་ར་ཎཾ ཋ་པེ་ཏི, ཨུ་བྷོ ས་ངྒྷེ་ན ས་མ་ནུ་ཡུ་ཉྫི་ཏྭཱ ས་མ་ནུ་གཱ་ཧི་ཏྭཱ ཡ་ཐཱ་དྷ་མྨཾ ཀཱ་རཱ་པེ་ཏ་བྦཱ. སོ ཙེ, བྷི་ཀྑ་ཝེ, བྷི་ཀྑུ ཛ་ན་པ་དེ ཏཾ ཀ་ར་ཎཱི་ཡཾ ཏཱི་རེ་ཏྭཱ པུ་ན་དེ་ཝ ཨ་ནྟོ ཀོ་མུ་དི་ཡཱ ཙཱ་ཏུ་མཱ་སི་ནི་ཡཱ ཏཾ ཨཱ་ཝཱ་སཾ ཨཱ་ག་ཙྪ་ཏི, ཏེ་ཧི ཙེ, བྷི་ཀྑ་ཝེ, བྷི་ཀྑཱུ་ཧི པ་ཝཱ་རི་ཡ་མཱ་ནེ ཨ་ཉྙ་ཏ་རོ བྷི་ཀྑུ ཏ་སྶ བྷི་ཀྑུ་ནོ པ་ཝཱ་ར་ཎཾ ཋ་པེ་ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ནི་སྶ་རོ ཁོ མེ ཏྭཾ, ཨཱ་ཝུ་སོ, པ་ཝཱ་ར་ཎཱ་ཡ; པ་ཝཱ་རི་ཏོ ཨ་ཧ’’ནྟི. ཏེ་ཧི ཙེ, བྷི་ཀྑ་ཝེ, བྷི་ཀྑཱུ་ཧི པ་ཝཱ་རི་ཡ་མཱ་ནེ སོ བྷི་ཀྑུ ཨ་ཉྙ་ཏ་ར་སྶ བྷི་ཀྑུ་ནོ པ་ཝཱ་ར་ཎཾ ཋ་པེ་ཏི, ཨུ་བྷོ ས་ངྒྷེ་ན ས་མ་ནུ་ཡུ་ཉྫི་ཏྭཱ ས་མ་ནུ་གཱ་ཧི་ཏྭཱ ཡ་ཐཱ་དྷ་མྨཾ ཀཱ་རཱ་པེ་ཏྭཱ ས་ངྒྷེ་ན པ་ཝཱ་རེ་ཏ་བྦ་ནྟི.
པ་ཝཱ་ར་ཎཱ་ས་ངྒ་ཧོ ནི་ཊྛི་ཏོ.
པ་ཝཱ་ར་ཎཱ་ཀྑ་ནྡྷ་ཀོ ཙ་ཏུ་ཏྠོ.