༡༣༤. དི་ཝ་ས་ནཱ་ན་ཏྟཾ

༢༢༨. ཨི་དྷ པ་ན, བྷི་ཀྑ་ཝེ, ཨཱ་ཝཱ་སི་ཀཱ་ནཾ བྷི་ཀྑཱུ་ནཾ ཙཱ་ཏུ་དྡ་སོ ཧོ་ཏི, ཨཱ་ག་ནྟུ་ཀཱ་ནཾ པ་ནྣ་ར་སོ. ས་ཙེ ཨཱ་ཝཱ་སི་ཀཱ བ་ཧུ་ཏ་རཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ ཨ་ནུ་ཝ་ཏྟི་ཏ་བྦཾ. ས་ཙེ ས་མ་ས་མཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ ཨ་ནུ་ཝ་ཏྟི་ཏ་བྦཾ. ས་ཙེ ཨཱ་ག་ནྟུ་ཀཱ བ་ཧུ་ཏ་རཱ ཧོ་ནྟི, ཨཱ་ཝཱ་སི་ཀེ་ཧི ཨཱ་ག་ནྟུ་ཀཱ་ནཾ ཨ་ནུ་ཝ་ཏྟི་ཏ་བྦཾ.

ཨི་དྷ པ་ན, བྷི་ཀྑ་ཝེ, ཨཱ་ཝཱ་སི་ཀཱ་ནཾ བྷི་ཀྑཱུ་ནཾ པ་ནྣ་ར་སོ ཧོ་ཏི, ཨཱ་ག་ནྟུ་ཀཱ་ནཾ ཙཱ་ཏུ་དྡ་སོ. ས་ཙེ ཨཱ་ཝཱ་སི་ཀཱ བ་ཧུ་ཏ་རཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ ཨ་ནུ་ཝ་ཏྟི་ཏ་བྦཾ. ས་ཙེ ས་མ་ས་མཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ ཨ་ནུ་ཝ་ཏྟི་ཏ་བྦཾ. ས་ཙེ ཨཱ་ག་ནྟུ་ཀཱ བ་ཧུ་ཏ་རཱ ཧོ་ནྟི, ཨཱ་ཝཱ་སི་ཀེ་ཧི ཨཱ་ག་ནྟུ་ཀཱ་ནཾ ཨ་ནུ་ཝ་ཏྟི་ཏ་བྦཾ.

ཨི་དྷ པ་ན, བྷི་ཀྑ་ཝེ, ཨཱ་ཝཱ་སི་ཀཱ་ནཾ བྷི་ཀྑཱུ་ནཾ པཱ་ཊི་པ་དོ ཧོ་ཏི, ཨཱ་ག་ནྟུ་ཀཱ་ནཾ པ་ནྣ་ར་སོ. ས་ཙེ ཨཱ་ཝཱ་སི་ཀཱ བ་ཧུ་ཏ་རཱ ཧོ་ནྟི, ཨཱ་ཝཱ་སི་ཀེ་ཧི ཨཱ་ག་ནྟུ་ཀཱ་ནཾ ནཱ་ཀཱ་མཱ དཱ་ཏ་བྦཱ སཱ་མ་གྒཱི; ཨཱ་ག་ནྟུ་ཀེ་ཧི ནི་སྶཱི་མཾ ག་ནྟྭཱ པ་ཝཱ་རེ་ཏ་བྦཾ. ས་ཙེ ས་མ་ས་མཱ ཧོ་ནྟི, ཨཱ་ཝཱ་སི་ཀེ་ཧི ཨཱ་ག་ནྟུ་ཀཱ་ནཾ ནཱ་ཀཱ་མཱ དཱ་ཏ་བྦཱ སཱ་མ་གྒཱི; ཨཱ་ག་ནྟུ་ཀེ་ཧི ནི་སྶཱི་མཾ ག་ནྟྭཱ པ་ཝཱ་རེ་ཏ་བྦཾ. ས་ཙེ ཨཱ་ག་ནྟུ་ཀཱ བ་ཧུ་ཏ་རཱ ཧོ་ནྟི, ཨཱ་ཝཱ་སི་ཀེ་ཧི ཨཱ་ག་ནྟུ་ཀཱ་ནཾ སཱ་མ་གྒཱི ཝཱ དཱ་ཏ་བྦཱ, ནི་སྶཱི་མཾ ཝཱ ག་ནྟ་བྦཾ.

ཨི་དྷ པ་ན, བྷི་ཀྑ་ཝེ, ཨཱ་ཝཱ་སི་ཀཱ་ནཾ བྷི་ཀྑཱུ་ནཾ པ་ནྣ་ར་སོ ཧོ་ཏི, ཨཱ་ག་ནྟུ་ཀཱ་ནཾ པཱ་ཊི་པ་དོ. ས་ཙེ ཨཱ་ཝཱ་སི་ཀཱ བ་ཧུ་ཏ་རཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ སཱ་མ་གྒཱི ཝཱ དཱ་ཏ་བྦཱ, ནི་སྶཱི་མཾ ཝཱ ག་ནྟ་བྦཾ. ས་ཙེ ས་མ་ས་མཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ སཱ་མ་གྒཱི ཝཱ དཱ་ཏ་བྦཱ, ནི་སྶཱི་མཾ ཝཱ ག་ནྟ་བྦཾ. ས་ཙེ ཨཱ་ག་ནྟུ་ཀཱ བ་ཧུ་ཏ་རཱ ཧོ་ནྟི, ཨཱ་ག་ནྟུ་ཀེ་ཧི ཨཱ་ཝཱ་སི་ཀཱ་ནཾ ནཱ་ཀཱ་མཱ དཱ་ཏ་བྦཱ སཱ་མ་གྒཱི; ཨཱ་ཝཱ་སི་ཀེ་ཧི ནི་སྶཱི་མཾ ག་ནྟྭཱ པ་ཝཱ་རེ་ཏ་བྦཾ.

དི་ཝ་ས་ནཱ་ན་ཏྟཾ ནི་ཊྛི་ཏཾ.