༡༢༦. ཨཱ་པ་ཏྟི་ཨཱ་ཝི་ཀ་ར་ཎ་ཝི་དྷི

༢༢༠. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ པ་ཝཱ་ར་ཡ་མཱ་ནོ ཨཱ་པ་ཏྟིཾ ས་ར་ཏི. ཨ་ཐ ཁོ ཏ་སྶ བྷི་ཀྑུ་ནོ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ན སཱ་པ་ཏྟི་ཀེ་ན པ་ཝཱ་རེ་ཏ་བྦ’ནྟི. ཨ་ཧ་ཉྩ་མྷི ཨཱ་པ་ཏྟིཾ ཨཱ་པ་ནྣོ. ཀ་ཐཾ ནུ ཁོ མ་ཡཱ པ་ཊི་པ་ཛྫི་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.

ཨི་དྷ པ་ན, བྷི་ཀྑ་ཝེ, བྷི་ཀྑུ པ་ཝཱ་ར་ཡ་མཱ་ནོ ཨཱ་པ་ཏྟིཾ ས་ར་ཏི. ཏེ་ན, བྷི་ཀྑ་ཝེ, བྷི་ཀྑུ་ནཱ སཱ་མ་ནྟོ བྷི་ཀྑུ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཧཾ, ཨཱ་ཝུ་སོ, ཨི་ཏྠ་ནྣཱ་མཾ ཨཱ་པ་ཏྟིཾ ཨཱ་པ་ནྣོ. ཨི་ཏོ ཝུ་ཊྛ་ཧི་ཏྭཱ ཏཾ ཨཱ་པ་ཏྟིཾ པ་ཊི་ཀ་རི་སྶཱ་མཱི’’ཏི ཝ་ཏྭཱ པ་ཝཱ་རེ་ཏ་བྦཾ; ན ཏྭེ་ཝ ཏ་པྤ་ཙྩ་ཡཱ པ་ཝཱ་ར་ཎཱ་ཡ ཨ་ནྟ་རཱ་ཡོ ཀཱ་ཏ་བྦོ.

ཨི་དྷ པ་ན, བྷི་ཀྑ་ཝེ, བྷི་ཀྑུ པ་ཝཱ་ར་ཡ་མཱ་ནོ ཨཱ་པ་ཏྟི་ཡཱ ཝེ་མ་ཏི་ཀོ ཧོ་ཏི. ཏེ་ན, བྷི་ཀྑ་ཝེ,

བྷི་ཀྑུ་ནཱ སཱ་མ་ནྟོ བྷི་ཀྑུ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཧཾ, ཨཱ་ཝུ་སོ, ཨི་ཏྠ་ནྣཱ་མཱ་ཡ ཨཱ་པ་ཏྟི་ཡཱ ཝེ་མ་ཏི་ཀོ; ཡ་དཱ ནི་བྦེ་མ་ཏི་ཀོ བྷ་ཝི་སྶཱ་མི ཏ་དཱ ཏཾ ཨཱ་པ་ཏྟིཾ པ་ཊི་ཀ་རི་སྶཱ་མཱི’’ཏི ཝ་ཏྭཱ པ་ཝཱ་རེ་ཏ་བྦཾ; ན ཏྭེ་ཝ ཏ་པྤ་ཙྩ་ཡཱ པ་ཝཱ་ར་ཎཱ་ཡ ཨ་ནྟ་རཱ་ཡོ ཀཱ་ཏ་བྦོ་ཏི.

ཨཱ་པ་ཏྟི ཨཱ་ཝི་ཀ་ར་ཎ་ཝི་དྷི ནི་ཊྛི་ཏཱ.