༡༢༤. ས་ངྒྷ་པ་ཝཱ་ར་ཎཱ་དི་པྤ་བྷེ་དཱ
༢༡༥. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ པ་ཝཱ་ར་ཎཱ་ཡ པ་ཉྩ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ས་ངྒྷེ་ན པ་ཝཱ་རེ་ཏ་བྦ’ནྟི. མ་ཡ་ཉྩ་མྷཱ པ་ཉྩ ཛ་ནཱ. ཀ་ཐཾ ནུ ཁོ ཨ་མྷེ་ཧི པ་ཝཱ་རེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, པ་ཉྩ་ནྣཾ ས་ངྒྷེ པ་ཝཱ་རེ་ཏུ་ནྟི.
༢༡༦. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ པ་ཝཱ་ར་ཎཱ་ཡ ཙ་ཏྟཱ་རོ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ པ་ཉྩ་ནྣཾ ས་ངྒྷེ པ་ཝཱ་རེ་ཏུ་ནྟི. མ་ཡ་ཉྩ་མྷཱ ཙ་ཏྟཱ་རོ ཛ་ནཱ. ཀ་ཐཾ ནུ ཁོ ཨ་མྷེ་ཧི པ་ཝཱ་རེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཙ་ཏུ་ནྣཾ ཨ་ཉྙ་མ་ཉྙཾ པ་ཝཱ་རེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, པ་ཝཱ་རེ་ཏ་བྦཾ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ཏེ བྷི་ཀྑཱུ ཉཱ་པེ་ཏ་བྦཱ –
‘‘སུ་ཎ་ནྟུ མེ ཨཱ་ཡ་སྨ་ནྟོ. ཨ་ཛྫ པ་ཝཱ་ར་ཎཱ. ཡ་དཱ་ཡ་སྨ་ནྟཱ་ནཾ པ་ཏྟ་ཀ་ལླཾ, མ་ཡཾ ཨ་ཉྙ་མ་ཉྙཾ པ་ཝཱ་རེ་ཡྻཱ་མཱ’’ཏི.
ཐེ་རེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཏེ བྷི་ཀྑཱུ ཨེ་ཝ་མ་སྶུ ཝ་ཙ་ནཱི་ཡཱ – ‘‘ཨ་ཧཾ, ཨཱ་ཝུ་སོ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟོ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མི. དུ་ཏི་ཡ་མྤི…པེ… ཏ་ཏི་ཡ་མྤི ཨ་ཧཾ, ཨཱ་ཝུ་སོ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟོ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མཱི’’ཏི.
ན་ཝ་ཀེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཏེ བྷི་ཀྑཱུ ཨེ་ཝ་མ་སྶུ ཝ་ཙ་ནཱི་ཡཱ – ‘‘ཨ་ཧཾ, བྷ་ནྟེ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟོ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མི. དུ་ཏི་ཡ་མྤི…པེ… ཏ་ཏི་ཡ་མྤི ཨ་ཧཾ, བྷ་ནྟེ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟོ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མཱི’’ཏི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ པ་ཝཱ་ར་ཎཱ་ཡ ཏ་ཡོ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ པ་ཉྩ་ནྣཾ ས་ངྒྷེ པ་ཝཱ་རེ་ཏུཾ, ཙ་ཏུ་ནྣཾ ཨ་ཉྙ་མ་ཉྙཾ པ་ཝཱ་རེ་ཏུཾ. མ་ཡ་ཉྩ་མྷཱ ཏ་ཡོ ཛ་ནཱ. ཀ་ཐཾ ནུ ཁོ ཨ་མྷེ་ཧི པ་ཝཱ་རེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཏི་ཎྞཾ ཨ་ཉྙ་མ་ཉྙཾ པ་ཝཱ་རེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, པ་ཝཱ་རེ་ཏ་བྦཾ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ཏེ བྷི་ཀྑཱུ ཉཱ་པེ་ཏ་བྦཱ –
‘‘སུ་ཎ་ནྟུ མེ ཨཱ་ཡ་སྨ་ནྟཱ. ཨ་ཛྫ པ་ཝཱ་ར་ཎཱ. ཡ་དཱ་ཡ་སྨ་ནྟཱ་ནཾ པ་ཏྟ་ཀ་ལླཾ, མ་ཡཾ ཨ་ཉྙ་མ་ཉྙཾ པ་ཝཱ་རེ་ཡྻཱ་མཱ’’ཏི.
ཐེ་རེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཏེ བྷི་ཀྑཱུ ཨེ་ཝ་མ་སྶུ ཝ་ཙ་ནཱི་ཡཱ – ‘‘ཨ་ཧཾ, ཨཱ་ཝུ་སོ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མི. དུ་ཏི་ཡ་མྤི…པེ… ཏ་ཏི་ཡ་མྤི ཨ་ཧཾ, ཨཱ་ཝུ་སོ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མཱི’’ཏི.
ན་ཝ་ཀེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཏེ བྷི་ཀྑཱུ ཨེ་ཝ་མ་སྶུ ཝ་ཙ་ནཱི་ཡཱ – ‘‘ཨ་ཧཾ, བྷ་ནྟེ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མི. དུ་ཏི་ཡ་མྤི…པེ… ཏ་ཏི་ཡ་མྤི ཨ་ཧཾ, བྷ་ནྟེ, ཨཱ་ཡ་སྨ་ནྟེ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ནྟུ མཾ ཨཱ་ཡ་སྨ་ནྟཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མཱི’’ཏི.
༢༡༧. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ པ་ཝཱ་ར་ཎཱ་ཡ དྭེ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ པ་ཉྩ་ནྣཾ ས་ངྒྷེ པ་ཝཱ་རེ་ཏུཾ, ཙ་ཏུ་ནྣཾ ཨ་ཉྙ་མ་ཉྙཾ པ་ཝཱ་རེ་ཏུཾ, ཏི་ཎྞཾ ཨ་ཉྙ་མ་ཉྙཾ པ་ཝཱ་རེ་ཏུཾ. མ་ཡ་ཉྩ་མྷཱ དྭེ ཛ་ནཱ. ཀ་ཐཾ ནུ ཁོ ཨ་མྷེ་ཧི པ་ཝཱ་རེ་ཏ་བྦ’’ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, དྭི་ནྣཾ ཨ་ཉྙ་མ་ཉྙཾ པ་ཝཱ་རེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, པ་ཝཱ་རེ་ཏ་བྦཾ. ཐེ་རེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ན་ཝོ བྷི་ཀྑུ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཧཾ, ཨཱ་ཝུ་སོ, ཨཱ་ཡ་སྨ་ནྟཾ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ཏུ མཾ ཨཱ་ཡ་སྨཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མི. དུ་ཏི་ཡ་མྤི…པེ… ཏ་ཏི་ཡ་མྤི ཨ་ཧཾ, ཨཱ་ཝུ་སོ, ཨཱ་ཡ་སྨ་ནྟཾ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ཏུ མཾ ཨཱ་ཡ་སྨཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མཱི’’ཏི.
ན་ཝ་ཀེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཐེ་རོ བྷི་ཀྑུ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཧཾ, བྷ་ནྟེ, ཨཱ་ཡ་སྨ་ནྟཾ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ཏུ མཾ ཨཱ་ཡ་སྨཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མི. དུ་ཏི་ཡ་མྤི…པེ… ཏ་ཏི་ཡ་མྤི ཨ་ཧཾ, བྷ་ནྟེ, ཨཱ་ཡ་སྨ་ནྟཾ པ་ཝཱ་རེ་མི དི་ཊྛེ་ན ཝཱ སུ་ཏེ་ན ཝཱ པ་རི་ས་ངྐཱ་ཡ ཝཱ. ཝ་ད་ཏུ མཾ ཨཱ་ཡ་སྨཱ ཨ་ནུ་ཀ་མྤཾ ཨུ་པཱ་དཱ་ཡ. པ་སྶ་ནྟོ པ་ཊི་ཀ་རི་སྶཱ་མཱི’’ཏི.
༢༡༨. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ པ་ཝཱ་ར་ཎཱ་ཡ ཨེ་ཀོ བྷི་ཀྑུ ཝི་ཧ་ར་ཏི. ཨ་ཐ ཁོ ཏ་སྶ བྷི་ཀྑུ་ནོ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ པ་ཉྩ་ནྣཾ ས་ངྒྷེ པ་ཝཱ་རེ་ཏུཾ, ཙ་ཏུ་ནྣཾ ཨ་ཉྙ་མ་ཉྙཾ པ་ཝཱ་རེ་ཏུཾ, ཏི་ཎྞཾ ཨ་ཉྙ་མ་ཉྙཾ པ་ཝཱ་རེ་ཏུཾ, དྭི་ནྣཾ ཨ་ཉྙ་མ་ཉྙཾ པ་ཝཱ་རེ་ཏུཾ. ཨ་ཧ་ཉྩ་མྷི ཨེ་ཀ་ཀོ. ཀ་ཐཾ ནུ ཁོ མ་ཡཱ པ་ཝཱ་རེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ པ་ཝཱ་ར་ཎཱ་ཡ ཨེ་ཀོ བྷི་ཀྑུ ཝི་ཧ་ར་ཏི. ཏེ་ན, བྷི་ཀྑ་ཝེ, བྷི་ཀྑུ་ནཱ ཡ་ཏྠ བྷི་ཀྑཱུ པ་ཊི་ཀྐ་མ་ནྟི ཨུ་པ་ཊྛཱ་ན་སཱ་ལཱ་ཡ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ, སོ དེ་སོ ས་མྨ་ཛྫི་ཏྭཱ པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏྭཱ ཨཱ་ས་ནཾ པ་ཉྙ་པེ་ཏྭཱ པ་དཱི་པཾ ཀ་ཏྭཱ ནི་སཱི་དི་ཏ་བྦཾ. ས་ཙེ ཨ་ཉྙེ བྷི་ཀྑཱུ ཨཱ་ག་ཙྪ་ནྟི, ཏེ་ཧི ས་དྡྷིཾ པ་ཝཱ་རེ་ཏ་བྦཾ; ནོ ཙེ ཨཱ་ག་ཙྪ་ནྟི, ‘ཨ་ཛྫ མེ པ་ཝཱ་ར་ཎཱ’ཏི ཨ་དྷི་ཊྛཱ་ཏ་བྦཾ. ནོ ཙེ ཨ་དྷི་ཊྛེ་ཡྻ, ཨཱ་པ་ཏྟི དུ་ཀྐ་ཊ་སྶ.
ཏ་ཏྲ, བྷི་ཀྑ་ཝེ, ཡ་ཏྠ པ་ཉྩ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པ་ཝཱ་ར་ཎཾ ཨཱ་ཧ་རི་ཏྭཱ
ཙ་ཏཱུ་ཧི ས་ངྒྷེ པ་ཝཱ་རེ་ཏ་བྦཾ. པ་ཝཱ་རེ་ཡྻུཾ ཙེ, ཨཱ་པ་ཏྟི དུ་ཀྐ་ཊ་སྶ. ཏ་ཏྲ, བྷི་ཀྑ་ཝེ, ཡ་ཏྠ ཙ་ཏྟཱ་རོ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པ་ཝཱ་ར་ཎཾ ཨཱ་ཧ་རི་ཏྭཱ ཏཱི་ཧི ཨ་ཉྙ་མ་ཉྙཾ པ་ཝཱ་རེ་ཏ་བྦཾ. པ་ཝཱ་རེ་ཡྻུཾ ཙེ, ཨཱ་པ་ཏྟི དུ་ཀྐ་ཊ་སྶ. ཏ་ཏྲ, བྷི་ཀྑ་ཝེ, ཡ་ཏྠ ཏ་ཡོ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པ་ཝཱ་ར་ཎཾ ཨཱ་ཧ་རི་ཏྭཱ དྭཱི་ཧི ཨ་ཉྙ་མ་ཉྙཾ པ་ཝཱ་རེ་ཏ་བྦཾ. པ་ཝཱ་རེ་ཡྻུཾ ཙེ, ཨཱ་པ་ཏྟི དུ་ཀྐ་ཊ་སྶ. ཏ་ཏྲ, བྷི་ཀྑ་ཝེ, ཡ་ཏྠ དྭེ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པ་ཝཱ་ར་ཎཾ ཨཱ་ཧ་རི་ཏྭཱ ཨེ་ཀེ་ན ཨ་དྷི་ཊྛཱ་ཏ་བྦཾ. ཨ་དྷི་ཊྛེ་ཡྻ ཙེ, ཨཱ་པ་ཏྟི དུ་ཀྐ་ཊ་སྶཱ་ཏི.
ས་ངྒྷ་པ་ཝཱ་ར་ཎཱ་དི་པྤ་བྷེ་དཱ ནི་ཊྛི་ཏཱ.