༡༡༣. ཨ་ནྟ་རཱ་ཡེ ཨ་ནཱ་པ་ཏྟི་ཝ་སྶ་ཙྪེ་ད་ཝཱ་རོ
༢༠༠. ཏེ་ན ཁོ པ་ན ས་མ་ཡེ་ན ཀོ་ས་ལེ་སུ ཛ་ན་པ་དེ ཨ་ཉྙ་ཏ་ར་སྨིཾ ཨཱ་ཝཱ་སེ ཝ་སྶཱུ་པ་ག་ཏཱ བྷི་ཀྑཱུ ཝཱ་ལེ༹་ཧི ཨུ་བྦཱ་ལ༹ྷཱ ཧོ་ནྟི. ག་ཎྷིཾ་སུ་པི པ་རི་པཱ་ཏིཾ་སུ་པི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ཝཱ་ལེ༹་ཧི ཨུ་བྦཱ་ལ༹ྷཱ ཧོ་ནྟི. ག་ཎྷ་ནྟི་པི པ་རི་པཱ་ཏེ་ནྟི་པི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ས་རཱི་ས་པེ་ཧི ཨུ་བྦཱ་ལ༹ྷཱ ཧོ་ནྟི. ཌཾ་ས་ནྟི་པི པ་རི་པཱ་ཏེ་ནྟི་པི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ཙོ་རེ་ཧི ཨུ་བྦཱ་ལ༹ྷཱ ཧོ་ནྟི. ཝི་ལུ་མྤ་ནྟི་པི ཨཱ་ཀོ་ཊེ་ནྟི་པི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ པི་སཱ་ཙེ་ཧི ཨུ་བྦཱ་ལ༹ྷཱ ཧོ་ནྟི. ཨཱ་ཝི་ས་ནྟི་པི ཧ་ན་ནྟི་པི [ཨོ་ཛ་མྤི ཧ་ར་ནྟི (སཱི.), ཧ་ར་ནྟི་པི (སྱཱ.)]. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ་ནཾ བྷི་ཀྑཱུ་ནཾ གཱ་མོ ཨ་གྒི་ནཱ ད་ཌྜྷོ ཧོ་ཏི. བྷི་ཀྑཱུ པི་ཎྜ་ཀེ་ན ཀི་ལ་མ་ནྟི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ་ནཾ བྷི་ཀྑཱུ་ནཾ སེ་ནཱ་ས་ནཾ ཨ་གྒི་ནཱ ད་ཌྜྷཾ ཧོ་ཏི. བྷི་ཀྑཱུ སེ་ནཱ་ས་ནེ་ན ཀི་ལ་མ་ནྟི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ་ནཾ བྷི་ཀྑཱུ་ནཾ གཱ་མོ ཨུ་ད་ཀེ་ན ཝཱུ་ལ༹ྷོ ཧོ་ཏི. བྷི་ཀྑཱུ པི་ཎྜ་ཀེ་ན ཀི་ལ་མ་ནྟི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ་ནཾ བྷི་ཀྑཱུ་ནཾ སེ་ནཱ་ས་ནཾ ཨུ་ད་ཀེ་ན ཝཱུ་ལ༹ྷཾ ཧོ་ཏི. བྷི་ཀྑཱུ སེ་ནཱ་ས་ནེ་ན ཀི་ལ་མ་ནྟི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶཱ་ཏི.
༢༠༡. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཝ་སྶཱུ་པ་ག་ཏཱ་ནཾ བྷི་ཀྑཱུ་ནཾ གཱ་མོ ཙོ་རེ་ཧི ཝུ་ཊྛཱ་སི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཡེ་ན གཱ་མོ ཏེ་ན ག་ནྟུ་ནྟི.
གཱ་མོ དྭེ་དྷཱ བྷི་ཛྫི་ཏྠ. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཡེ་ན བ་ཧུ་ཏ་རཱ ཏེ་ན ག་ནྟུ་ནྟི.
བ་ཧུ་ཏ་རཱ ཨ་སྶ་དྡྷཱ ཧོ་ནྟི ཨ་པྤ་ས་ནྣཱ. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཡེ་ན ས་དྡྷཱ པ་ས་ནྣཱ ཏེ་ན ག་ནྟུ་ནྟི.
ཏེ་ན ཁོ པ་ན ས་མ་ཡེ་ན ཀོ་ས་ལེ་སུ ཛ་ན་པ་དེ ཨ་ཉྙ་ཏ་ར་སྨིཾ ཨཱ་ཝཱ་སེ ཝ་སྶཱུ་པ་ག་ཏཱ བྷི་ཀྑཱུ ན ལ་བྷིཾ་སུ ལཱུ་ཁ་སྶ ཝཱ པ་ཎཱི་ཏ་སྶ ཝཱ བྷོ་ཛ་ན་སྶ ཡཱ་ཝ་ད་ཏྠཾ པཱ་རི་པཱུ་རིཾ. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ན ལ་བྷ་ནྟི ལཱུ་ཁ་སྶ ཝཱ པ་ཎཱི་ཏ་སྶ ཝཱ བྷོ་ཛ་ན་སྶ ཡཱ་ཝ་ད་ཏྠཾ པཱ་རི་པཱུ་རིཾ. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ལ་བྷ་ནྟི ལཱུ་ཁ་སྶ ཝཱ པ་ཎཱི་ཏ་སྶ ཝཱ བྷོ་ཛ་ན་སྶ ཡཱ་ཝ་ད་ཏྠཾ པཱ་རི་པཱུ་རིཾ, ན ལ་བྷ་ནྟི ས་པྤཱ་ཡཱ་ནི བྷོ་ཛ་ནཱ་ནི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ལ་བྷ་ནྟི ལཱུ་ཁ་སྶ ཝཱ པ་ཎཱི་ཏ་སྶ ཝཱ བྷོ་ཛ་ན་སྶ ཡཱ་ཝ་ད་ཏྠཾ པཱ་རི་པཱུ་རིཾ, ལ་བྷ་ནྟི ས་པྤཱ་ཡཱ་ནི བྷོ་ཛ་ནཱ་ནི, ན ལ་བྷ་ནྟི ས་པྤཱ་ཡཱ་ནི བྷེ་ས་ཛྫཱ་ནི. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཱ བྷི་ཀྑཱུ ལ་བྷ་ནྟི ལཱུ་ཁ་སྶ ཝཱ པ་ཎཱི་ཏ་སྶ ཝཱ བྷོ་ཛ་ན་སྶ ཡཱ་ཝ་ད་ཏྠཾ པཱ་རི་པཱུ་རིཾ, ལ་བྷ་ནྟི ས་པྤཱ་ཡཱ་ནི བྷོ་ཛ་ནཱ་ནི, ལ་བྷ་ནྟི ས་པྤཱ་ཡཱ་ནི བྷེ་ས་ཛྫཱ་ནི, ན ལ་བྷ་ནྟི པ་ཏི་རཱུ་པཾ ཨུ་པ་ཊྛཱ་ཀཾ. ཨེ་སེ་ཝ ཨ་ནྟ་རཱ་ཡོ་ཏི པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཾ བྷི་ཀྑུཾ ཨི་ཏྠཱི ནི་མ་ནྟེ་ཏི – ‘‘ཨེ་ཧི, བྷ་ནྟེ, ཧི་ར་ཉྙཾ ཝཱ ཏེ དེ་མི, སུ་ཝ་ཎྞཾ ཝཱ ཏེ དེ་མི, ཁེ་ཏྟཾ ཝཱ ཏེ དེ་མི, ཝ་ཏྠུཾ ཝཱ ཏེ དེ་མི, གཱ་ཝུཾ ཝཱ ཏེ དེ་མི, གཱ་ཝིཾ ཝཱ ཏེ དེ་མི, དཱ་སཾ ཝཱ ཏེ དེ་མི, དཱ་སིཾ ཝཱ ཏེ དེ་མི, དྷཱི་ཏ་རཾ ཝཱ ཏེ དེ་མི བྷ་རི་ཡ་ཏྠཱ་ཡ, ཨ་ཧཾ ཝཱ ཏེ བྷ་རི་ཡཱ ཧོ་མི, ཨ་ཉྙཾ ཝཱ ཏེ བྷ་རི་ཡཾ ཨཱ་ནེ་མཱི’’ཏི. ཏ་ཏྲ ཙེ བྷི་ཀྑུ་ནོ ཨེ་ཝཾ ཧོ་ཏི, ‘ལ་ཧུ་པ་རི་ཝ་ཏྟཾ ཁོ ཙི་ཏྟཾ ཝུ་ཏྟཾ བྷ་ག་ཝ་ཏཱ, སི་ཡཱ་པི མེ བྲ་ཧྨ་ཙ་རི་ཡ་སྶ ཨ་ནྟ་རཱ་ཡོ’ཏི, པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏཾ བྷི་ཀྑུཾ ཝེ་སཱི ནི་མ་ནྟེ་ཏི…པེ… ཐུ་ལླ་ཀུ་མཱ་རཱི ནི་མ་ནྟེ་ཏི… པ་ཎྜ་ཀོ ནི་མ་ནྟེ་ཏི… ཉཱ་ཏ་ཀཱ ནི་མ་ནྟེ་ནྟི… རཱ་ཛཱ་ནོ ནི་མ་ནྟེ་ནྟི… ཙོ་རཱ ནི་མ་ནྟེ་ནྟི… དྷུ་ཏྟཱ ནི་མ་ནྟེ་ནྟི – ‘‘ཨེ་ཧི, བྷ་ནྟེ, ཧི་ར་ཉྙཾ ཝཱ ཏེ དེ་མ, སུ་ཝ་ཎྞཾ ཝཱ ཏེ དེ་མ, ཁེ་ཏྟཾ ཝཱ ཏེ དེ་མ, ཝ་ཏྠུཾ ཝཱ ཏེ དེ་མ, གཱ་ཝུཾ ཝཱ ཏེ དེ་མ, གཱ་ཝིཾ ཝཱ ཏེ དེ་མ, དཱ་སཾ ཝཱ ཏེ དེ་མ, དཱ་སིཾ ཝཱ ཏེ དེ་མ, དྷཱི་ཏ་རཾ ཝཱ ཏེ དེ་མ བྷ་རི་ཡ་ཏྠཱ་ཡ, ཨ་ཉྙཾ ཝཱ ཏེ བྷ་རི་ཡཾ ཨཱ་ནེ་མཱ’’ཏི. ཏ་ཏྲ ཙེ བྷི་ཀྑུ་ནོ ཨེ་ཝཾ ཧོ་ཏི, ‘ལ་ཧུ་པ་རི་ཝ་ཏྟཾ ཁོ ཙི་ཏྟཾ ཝུ་ཏྟཾ བྷ་ག་ཝ་ཏཱ, སི་ཡཱ་པི མེ བྲ་ཧྨ་ཙ་རི་ཡ་སྶ ཨ་ནྟ་རཱ་ཡོ’ཏི, པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨི་དྷ པ་ན, བྷི་ཀྑ་ཝེ, ཝ་སྶཱུ་པ་ག་ཏོ བྷི་ཀྑུ ཨ་སྶཱ་མི་ཀཾ ནི་དྷིཾ པ་སྶ་ཏི. ཏ་ཏྲ ཙེ བྷི་ཀྑུ་ནོ ཨེ་ཝཾ ཧོ་ཏི, ‘ལ་ཧུ་པ་རི་ཝ་ཏྟཾ ཁོ ཙི་ཏྟཾ ཝུ་ཏྟཾ བྷ་ག་ཝ་ཏཱ, སི་ཡཱ་པི མེ བྲ་ཧྨ་ཙ་རི་ཡ་སྶ ཨ་ནྟ་རཱ་ཡོ’ཏི, པ་ཀྐ་མི་ཏ་བྦཾ. ཨ་ནཱ་པ་ཏྟི ཝ་སྶ་ཙྪེ་ད་སྶ.
ཨ་ནྟ་རཱ་ཡེ ཨ་ནཱ་པ་ཏྟི་ཝ་སྶ་ཙྪེ་ད་ཝཱ་རོ ནི་ཊྛི་ཏོ.