༣. མི་ཙྪ་ཏྟ་ཝ་གྒོ

༡. མི་ཙྪ་ཏྟ་སུ་ཏྟཾ

༢༡. སཱ་ཝ་ཏྠི་ནི་དཱ་ནཾ. ‘‘མི་ཙྪ་ཏྟ་ཉྩ ཝོ, བྷི་ཀྑ་ཝེ, དེ་སེ་སྶཱ་མི, ས་མྨ་ཏྟ་ཉྩ. ཏཾ སུ་ཎཱ་ཐ. ཀ་ཏ་མ་ཉྩ, བྷི་ཀྑ་ཝེ, མི་ཙྪ་ཏྟཾ? སེ་ཡྻ་ཐི་དཾ – མི་ཙྪཱ་དི་ཊྛི…པེ… མི་ཙྪཱ་ས་མཱ་དྷི. ཨི་དཾ ཝུ་ཙྩ་ཏི, བྷི་ཀྑ་ཝེ, མི་ཙྪ་ཏྟཾ. ཀ་ཏ་མ་ཉྩ, བྷི་ཀྑ་ཝེ, ས་མྨ་ཏྟཾ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨི་དཾ ཝུ་ཙྩ་ཏི, བྷི་ཀྑ་ཝེ, ས་མྨ་ཏྟ’’ནྟི. པ་ཋ་མཾ.

༢. ཨ་ཀུ་ས་ལ་དྷ་མྨ་སུ་ཏྟཾ

༢༢. སཱ་ཝ་ཏྠི་ནི་དཱ་ནཾ. ‘‘ཨ་ཀུ་ས་ལེ ཙ ཁོ, བྷི་ཀྑ་ཝེ, དྷ་མྨེ དེ་སེ་སྶཱ་མི, ཀུ་ས་ལེ ཙ དྷ་མྨེ. ཏཾ སུ་ཎཱ་ཐ. ཀ་ཏ་མེ ཙ, བྷི་ཀྑ་ཝེ, ཨ་ཀུ་ས་ལཱ དྷ་མྨཱ? སེ་ཡྻ་ཐི་དཾ – མི་ཙྪཱ་དི་ཊྛི…པེ… མི་ཙྪཱ་ས་མཱ་དྷི. ཨི་མེ ཝུ་ཙྩ་ནྟི, བྷི་ཀྑ་ཝེ, ཨ་ཀུ་ས་ལཱ དྷ་མྨཱ. ཀ་ཏ་མེ ཙ, བྷི་ཀྑ་ཝེ, ཀུ་ས་ལཱ དྷ་མྨཱ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨི་མེ ཝུ་ཙྩ་ནྟི, བྷི་ཀྑ་ཝེ, ཀུ་ས་ལཱ དྷ་མྨཱ’’ཏི. དུ་ཏི་ཡཾ.

༣. པ་ཋ་མ་པ་ཊི་པ་དཱ་སུ་ཏྟཾ

༢༣. སཱ་ཝ་ཏྠི་ནི་དཱ་ནཾ. ‘‘མི་ཙྪཱ་པ་ཊི་པ་ད་ཉྩ ཝོ, བྷི་ཀྑ་ཝེ, དེ་སེ་སྶཱ་མི, ས་མྨཱ་པ་ཊི་པ་ད་ཉྩ. ཏཾ སུ་ཎཱ་ཐ. ཀ་ཏ་མཱ ཙ, བྷི་ཀྑ་ཝེ, མི་ཙྪཱ་པ་ཊི་པ་དཱ? སེ་ཡྻ་ཐི་དཾ – མི་ཙྪཱ་དི་ཊྛི…པེ… མི་ཙྪཱ་ས་མཱ་དྷི. ཨ་ཡཾ ཝུ་ཙྩ་ཏི, བྷི་ཀྑ་ཝེ, མི་ཙྪཱ་པ་ཊི་པ་དཱ. ཀ་ཏ་མཱ ཙ, བྷི་ཀྑ་ཝེ, ས་མྨཱ་པ་ཊི་པ་དཱ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ས་མྨཱ་པ་ཊི་པ་དཱ’’ཏི. ཏ་ཏི་ཡཾ.

༤. དུ་ཏི་ཡ་པ་ཊི་པ་དཱ་སུ་ཏྟཾ

༢༤. སཱ་ཝ་ཏྠི་ནི་དཱ་ནཾ. ‘‘གི་ཧི་ནོ ཝཱ་ཧཾ, བྷི་ཀྑ་ཝེ, པ་བྦ་ཛི་ཏ་སྶ ཝཱ མི་ཙྪཱ་པ་ཊི་པ་དཾ ན ཝ་ཎྞེ་མི. གི་ཧི ཝཱ, བྷི་ཀྑ་ཝེ, པ་བྦ་ཛི་ཏོ ཝཱ མི་ཙྪཱ་པ་ཊི་པ་ནྣོ མི་ཙྪཱ་པ་ཊི་པ་ཏྟཱ་དྷི་ཀ་ར་ཎ་ཧེ་ཏུ ནཱ་རཱ་དྷ་ཀོ ཧོ་ཏི ཉཱ་ཡཾ དྷ་མྨཾ ཀུ་ས་ལཾ’’.

‘‘ཀ་ཏ་མཱ ཙ, བྷི་ཀྑ་ཝེ, མི་ཙྪཱ་པ་ཊི་པ་དཱ? སེ་ཡྻ་ཐི་དཾ – མི་ཙྪཱ་དི་ཊྛི…པེ… མི་ཙྪཱ་ས་མཱ་དྷི. ཨ་ཡཾ ཝུ་ཙྩ་ཏི, བྷི་ཀྑ་ཝེ, མི་ཙྪཱ་པ་ཊི་པ་དཱ. གི་ཧི་ནོ ཝཱ་ཧཾ, བྷི་ཀྑ་ཝེ, པ་བྦ་ཛི་ཏ་སྶ ཝཱ མི་ཙྪཱ་པ་ཊི་པ་དཾ ན ཝ་ཎྞེ་མི. གི་ཧི ཝཱ, བྷི་ཀྑ་ཝེ, པ་བྦ་ཛི་ཏོ ཝཱ མི་ཙྪཱ་པ་ཊི་པ་ནྣོ མི་ཙྪཱ་པ་ཊི་པ་ཏྟཱ་དྷི་ཀ་ར་ཎ་ཧེ་ཏུ ནཱ་རཱ་དྷ་ཀོ ཧོ་ཏི ཉཱ་ཡཾ དྷ་མྨཾ ཀུ་ས་ལཾ.

‘‘གི་ཧི་ནོ ཝཱ་ཧཾ, བྷི་ཀྑ་ཝེ, པ་བྦ་ཛི་ཏ་སྶ ཝཱ ས་མྨཱ་པ་ཊི་པ་དཾ ཝ་ཎྞེ་མི. གི་ཧི ཝཱ, བྷི་ཀྑ་ཝེ, པ་བྦ་ཛི་ཏོ ཝཱ ས་མྨཱ་པ་ཊི་པ་ནྣོ ས་མྨཱ་པ་ཊི་པ་ཏྟཱ་དྷི་ཀ་ར་ཎ་ཧེ་ཏུ ཨཱ་རཱ་དྷ་ཀོ ཧོ་ཏི ཉཱ་ཡཾ དྷ་མྨཾ ཀུ་ས་ལཾ. ཀ་ཏ་མཱ ཙ, བྷི་ཀྑ་ཝེ, ས་མྨཱ་པ་ཊི་པ་དཱ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ས་མྨཱ་པ་ཊི་པ་དཱ. གི་ཧི་ནོ ཝཱ་ཧཾ, བྷི་ཀྑ་ཝེ, པ་བྦ་ཛི་ཏ་སྶ ཝཱ ས་མྨཱ་པ་ཊི་པ་དཾ ཝ་ཎྞེ་མི. གི་ཧི ཝཱ, བྷི་ཀྑ་ཝེ, པ་བྦ་ཛི་ཏོ ཝཱ ས་མྨཱ་པ་ཊི་པ་ནྣོ ས་མྨཱ་པ་ཊི་པ་ཏྟཱ་དྷི་ཀ་ར་ཎ་ཧེ་ཏུ ཨཱ་རཱ་དྷ་ཀོ ཧོ་ཏི ཉཱ་ཡཾ དྷ་མྨཾ ཀུ་ས་ལ’’ནྟི. ཙ་ཏུ་ཏྠཾ.

༥. པ་ཋ་མ་ཨ་ས་པྤུ་རི་ས་སུ་ཏྟཾ

༢༥. སཱ་ཝ་ཏྠི་ནི་དཱ་ནཾ. ‘‘ཨ་ས་པྤུ་རི་ས་ཉྩ ཝོ, བྷི་ཀྑ་ཝེ, དེ་སེ་སྶཱ་མི, ས་པྤུ་རི་ས་ཉྩ. ཏཾ སུ་ཎཱ་ཐ. ཀ་ཏ་མོ ཙ, བྷི་ཀྑ་ཝེ, ཨ་ས་པྤུ་རི་སོ? ཨི་དྷ, བྷི་ཀྑ་ཝེ, ཨེ་ཀ་ཙྩོ མི་ཙྪཱ་དི་ཊྛི་ཀོ ཧོ་ཏི, མི་ཙྪཱ་ས་ངྐ་པྤོ, མི་ཙྪཱ་ཝཱ་ཙོ, མི་ཙྪཱ་ཀ་མྨ་ནྟོ, མི་ཙྪཱ་ཨཱ་ཛཱི་ཝོ, མི་ཙྪཱ་ཝཱ་ཡཱ་མོ, མི་ཙྪཱ་ས་ཏི, མི་ཙྪཱ་ས་མཱ་དྷི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་ས་པྤུ་རི་སོ’’.

‘‘ཀ་ཏ་མོ ཙ, བྷི་ཀྑ་ཝེ, ས་པྤུ་རི་སོ? ཨི་དྷ, བྷི་ཀྑ་ཝེ, ཨེ་ཀ་ཙྩོ ས་མྨཱ་དི་ཊྛི་ཀོ ཧོ་ཏི, ས་མྨཱ་ས་ངྐ་པྤོ, ས་མྨཱ་ཝཱ་ཙོ, ས་མྨཱ་ཀ་མྨ་ནྟོ, ས་མྨཱ་ཨཱ་ཛཱི་ཝོ, ས་མྨཱ་ཝཱ་ཡཱ་མོ, ས་མྨཱ་ས་ཏི, ས་མྨཱ་ས་མཱ་དྷི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ས་པྤུ་རི་སོ’’ཏི. པ་ཉྩ་མཾ.

༦. དུ་ཏི་ཡ་ཨ་ས་པྤུ་རི་ས་སུ་ཏྟཾ

༢༦. སཱ་ཝ་ཏྠི་ནི་དཱ་ནཾ. ‘‘ཨ་ས་པྤུ་རི་ས་ཉྩ ཝོ, བྷི་ཀྑ་ཝེ, དེ་སེ་སྶཱ་མི, ཨ་ས་པྤུ་རི་སེ་ན ཨ་ས་པྤུ་རི་ས་ཏ་ར་ཉྩ. ས་པྤུ་རི་ས་ཉྩ ཝོ, བྷི་ཀྑ་ཝེ, དེ་སེ་སྶཱ་མི ས་པྤུ་རི་སེ་ན ས་པྤུ་རི་ས་ཏ་ར་ཉྩ. ཏཾ སུ་ཎཱ་ཐ. ཀ་ཏ་མོ ཙ, བྷི་ཀྑ་ཝེ, ཨ་ས་པྤུ་རི་སོ? ཨི་དྷ, བྷི་ཀྑ་ཝེ, ཨེ་ཀ་ཙྩོ མི་ཙྪཱ་དི་ཊྛི་ཀོ ཧོ་ཏི…པེ… མི་ཙྪཱ་ས་མཱ་དྷི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་ས་པྤུ་རི་སོ’’.

‘‘ཀ་ཏ་མོ ཙ, བྷི་ཀྑ་ཝེ, ཨ་ས་པྤུ་རི་སེ་ན ཨ་ས་པྤུ་རི་ས་ཏ་རོ? ཨི་དྷ, བྷི་ཀྑ་ཝེ, ཨེ་ཀ་ཙྩོ མི་ཙྪཱ་དི་ཊྛི་ཀོ ཧོ་ཏི…པེ… མི་ཙྪཱ་ས་མཱ་དྷི, མི་ཙྪཱ་ཉཱ་ཎཱི, མི་ཙྪཱ་ཝི་མུ་ཏྟི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་ས་པྤུ་རི་སེ་ན ཨ་ས་པྤུ་རི་ས་ཏ་རོ.

‘‘ཀ་ཏ་མོ ཙ, བྷི་ཀྑ་ཝེ, ས་པྤུ་རི་སོ? ཨི་དྷ, བྷི་ཀྑ་ཝེ, ཨེ་ཀ་ཙྩོ ས་མྨཱ་དི་ཊྛི་ཀོ ཧོ་ཏི…པེ… ས་མྨཱ་ས་མཱ་དྷི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ས་པྤུ་རི་སོ.

‘‘ཀ་ཏ་མོ ཙ, བྷི་ཀྑ་ཝེ, ས་པྤུ་རི་སེ་ན ས་པྤུ་རི་ས་ཏ་རོ? ཨི་དྷ, བྷི་ཀྑ་ཝེ, ཨེ་ཀ་ཙྩོ ས་མྨཱ་དི་ཊྛི་ཀོ ཧོ་ཏི…པེ… ས་མྨཱ་ས་མཱ་དྷི, ས་མྨཱ་ཉཱ་ཎཱི, ས་མྨཱ་ཝི་མུ་ཏྟི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ས་པྤུ་རི་སེ་ན ས་པྤུ་རི་ས་ཏ་རོ’’ཏི. ཚ་ཊྛཾ.

༧. ཀུ་མྦྷ་སུ་ཏྟཾ

༢༧. སཱ་ཝ་ཏྠི་ནི་དཱ་ནཾ. ‘‘སེ་ཡྻ་ཐཱ་པི, བྷི་ཀྑ་ཝེ, ཀུ་མྦྷོ ཨ་ནཱ་དྷཱ་རོ སུ་པྤ་ཝ་ཏྟི་ཡོ ཧོ་ཏི, སཱ་དྷཱ་རོ དུ་པྤ་ཝ་ཏྟི་ཡོ ཧོ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཙི་ཏྟཾ ཨ་ནཱ་དྷཱ་རཾ སུ་པྤ་ཝ་ཏྟི་ཡཾ ཧོ་ཏི, སཱ་དྷཱ་རཾ དུ་པྤ་ཝ་ཏྟི་ཡཾ ཧོ་ཏི. ཀོ ཙ, བྷི་ཀྑ་ཝེ, ཙི་ཏྟ་སྶ ཨཱ་དྷཱ་རོ? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨ་ཡཾ ཙི་ཏྟ་སྶ ཨཱ་དྷཱ་རོ. སེ་ཡྻ་ཐཱ་པི, བྷི་ཀྑ་ཝེ, ཀུ་མྦྷོ ཨ་ནཱ་དྷཱ་རོ སུ་པྤ་ཝ་ཏྟི་ཡོ ཧོ་ཏི, སཱ་དྷཱ་རོ དུ་པྤ་ཝ་ཏྟི་ཡོ ཧོ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཙི་ཏྟཾ ཨ་ནཱ་དྷཱ་རཾ སུ་པྤ་ཝ་ཏྟི་ཡཾ ཧོ་ཏི, སཱ་དྷཱ་རཾ དུ་པྤ་ཝ་ཏྟི་ཡཾ ཧོ་ཏཱི’’ཏི. ས་ཏྟ་མཾ.

༨. ས་མཱ་དྷི་སུ་ཏྟཾ

༢༨. སཱ་ཝ་ཏྠི་ནི་དཱ་ནཾ. ‘‘ཨ་རི་ཡཾ ཝོ, བྷི་ཀྑ་ཝེ, ས་མྨཱ་ས་མཱ་དྷིཾ དེ་སེ་སྶཱ་མི ས་ཨུ་པ་ནི་སཾ ས་པ་རི་ཀྑཱ་རཾ. ཏཾ སུ་ཎཱ་ཐ. ཀ་ཏ་མོ ཙ, བྷི་ཀྑ་ཝེ, ཨ་རི་ཡོ ས་མྨཱ་ས་མཱ་དྷི ས་ཨུ་པ་ནི་སོ ས་པ་རི་ཀྑཱ་རོ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་ཏི [ས་མྨཱ་ས་མཱ་དྷི (སཱི. སྱཱ. ཀཾ. ཀ.)]. ཡཱ ཁོ, བྷི་ཀྑ་ཝེ, ཨི་མེ་ཧི ས་ཏྟ་ཧ་ངྒེ་ཧི ཙི་ཏྟ་སྶ ཨེ་ཀ་གྒ་ཏཱ ས་པ་རི་ཀྑཱ་ར་ཏཱ [ས་པ་རི་ཀྑ་ཏཱ (སཱི. པཱི.)] – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་རི་ཡོ ས་མྨཱ་ས་མཱ་དྷི ས་ཨུ་པ་ནི་སོ ཨི་ཏི་པི ས་པ་རི་ཀྑཱ་རོ ཨི་ཏི་པཱི’’ཏི. ཨ་ཊྛ་མཾ.

༩. ཝེ་ད་ནཱ་སུ་ཏྟཾ

༢༩. སཱ་ཝ་ཏྠི་ནི་དཱ་ནཾ. ‘‘ཏི་སྶོ ཨི་མཱ, བྷི་ཀྑ་ཝེ, ཝེ་ད་ནཱ. ཀ་ཏ་མཱ ཏི་སྶོ? སུ་ཁཱ ཝེ་ད་ནཱ, དུ་ཀྑཱ ཝེ་ད་ནཱ, ཨ་དུ་ཀྑ་མ་སུ་ཁཱ ཝེ་ད་ནཱ – ཨི་མཱ ཁོ, བྷི་ཀྑ་ཝེ, ཏི་སྶོ ཝེ་ད་ནཱ. ཨི་མཱ་སཾ ཁོ, བྷི་ཀྑ་ཝེ, ཏི་སྶ་ནྣཾ ཝེ་ད་ནཱ་ནཾ པ་རི་ཉྙཱ་ཡ ཨ་རི་ཡོ ཨ་ཊྛ་ངྒི་ཀོ མ་གྒོ བྷཱ་ཝེ་ཏ་བྦོ. ཀ་ཏ་མོ ཨ་རི་ཡོ ཨ་ཊྛ་ངྒི་ཀོ མ་གྒོ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨི་མཱ་སཾ ཁོ, བྷི་ཀྑ་ཝེ, ཏི་སྶ་ནྣཾ ཝེ་ད་ནཱ་ནཾ པ་རི་ཉྙཱ་ཡ ཨ་རི་ཡོ ཨ་ཊྛ་ངྒི་ཀོ མ་གྒོ བྷཱ་ཝེ་ཏ་བྦོ’’ཏི. ན་ཝ་མཾ.

༡༠. ཨུ་ཏྟི་ཡ་སུ་ཏྟཾ

༣༠. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ ཨུ་ཏྟི་ཡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི…པེ… ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་ཏྟི་ཡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་དྷ མ་ཡ྄ཧཾ, བྷ་ནྟེ, ར་ཧོ་ག་ཏ་སྶ པ་ཊི་ས་ལླཱི་ན་སྶ ཨེ་ཝཾ ཙེ་ཏ་སོ པ་རི་ཝི་ཏ་ཀྐོ ཨུ་ད་པཱ་དི – ‘པ་ཉྩ ཀཱ་མ་གུ་ཎཱ ཝུ་ཏྟཱ བྷ་ག་ཝ་ཏཱ. ཀ་ཏ་མེ ནུ ཁོ པ་ཉྩ ཀཱ་མ་གུ་ཎཱ ཝུ་ཏྟཱ བྷ་ག་ཝ་ཏཱ’’’ཏི? ‘‘སཱ་དྷུ སཱ་དྷུ, ཨུ་ཏྟི་ཡ! པ་ཉྩི་མེ ཁོ, ཨུ་ཏྟི་ཡ, ཀཱ་མ་གུ་ཎཱ ཝུ་ཏྟཱ མ་ཡཱ. ཀ་ཏ་མེ པ་ཉྩ? ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ, སོ་ཏ་ཝི་ཉྙེ་ཡྻཱ ས་དྡཱ…པེ… གྷཱ་ན་ཝི་ཉྙེ་ཡྻཱ ག་ནྡྷཱ… ཛི་ཝ྄ཧཱ་ཝི་ཉྙེ་ཡྻཱ ར་སཱ… ཀཱ་ཡ་ཝི་ཉྙེ་ཡྻཱ ཕོ་ཊྛ་བྦཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ – ཨི་མེ ཁོ, ཨུ་ཏྟི་ཡ, པ་ཉྩ ཀཱ་མ་གུ་ཎཱ ཝུ་ཏྟཱ མ་ཡཱ. ཨི་མེ་སཾ ཁོ, ཨུ་ཏྟི་ཡ, པ་ཉྩ་ནྣཾ ཀཱ་མ་གུ་ཎཱ་ནཾ པ་ཧཱ་ནཱ་ཡ ཨ་རི་ཡོ ཨ་ཊྛ་ངྒི་ཀོ མ་གྒོ བྷཱ་ཝེ་ཏ་བྦོ. ཀ་ཏ་མོ ཨ་རི་ཡོ ཨ་ཊྛ་ངྒི་ཀོ མ་གྒོ? སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨི་མེ་སཾ ཁོ, ཨུ་ཏྟི་ཡ, པ་ཉྩ་ནྣཾ ཀཱ་མ་གུ་ཎཱ་ནཾ པ་ཧཱ་ནཱ་ཡ ཨ་ཡཾ ཨ་རི་ཡོ ཨ་ཊྛ་ངྒི་ཀོ མ་གྒོ བྷཱ་ཝེ་ཏ་བྦོ’’ཏི. ད་ས་མཾ.

མི་ཙྪ་ཏྟ་ཝ་གྒོ ཏ་ཏི་ཡོ.

ཏ་སྶུ་དྡཱ་ནཾ –

མི་ཙྪ་ཏྟཾ ཨ་ཀུ་ས་ལཾ དྷ་མྨཾ, དུ་ཝེ པ་ཊི་པ་དཱ་པི ཙ;

ཨ་ས་པྤུ་རི་སེ་ན དྭེ ཀུ་མྦྷོ, ས་མཱ་དྷི ཝེ་ད་ནུ་ཏྟི་ཡེ་ནཱ་ཏི.