༨. ས་བྦུ་པཱ་དཱ་ན་པ་རི་ཉྙཱ་སུ་ཏྟཾ

༦༠. ‘‘ས་བྦུ་པཱ་དཱ་ན་པ་རི་ཉྙཱ་ཡ ཝོ, བྷི་ཀྑ་ཝེ, དྷ་མྨཾ དེ་སེ་སྶཱ་མི. ཏཾ སུ་ཎཱ་ཐ. ཀ་ཏ་མོ ཙ, བྷི་ཀྑ་ཝེ, ས་བྦུ་པཱ་དཱ་ན་པ་རི་ཉྙཱ་ཡ དྷ་མྨོ? ཙ་ཀྑུ་ཉྩ པ་ཊི་ཙྩ རཱུ་པེ ཙ ཨུ་པྤ་ཛྫ་ཏི ཙ་ཀྑུ་ཝི་ཉྙཱ་ཎཾ. ཏི་ཎྞཾ ས་ངྒ་ཏི ཕ་སྶོ. ཕ་སྶ་པ་ཙྩ་ཡཱ ཝེ་ད་ནཱ. ཨེ་ཝཾ པ་སྶཾ, བྷི་ཀྑ་ཝེ, སུ་ཏ་ཝཱ ཨ་རི་ཡ་སཱ་ཝ་ཀོ ཙ་ཀྑུ་སྨི་མྤི ནི་བྦི་ནྡ་ཏི, རཱུ་པེ་སུ་པི ནི་བྦི་ནྡ་ཏི, ཙ་ཀྑུ་ཝི་ཉྙཱ་ཎེ་པི ནི་བྦི་ནྡ་ཏི, ཙ་ཀྑུ་ས་མྥ་སྶེ་པི ནི་བྦི་ནྡ་ཏི, ཝེ་ད་ནཱ་ཡ་པི ནི་བྦི་ནྡ་ཏི. ནི་བྦི་ནྡཾ ཝི་ར་ཛྫ་ཏི; ཝི་རཱ་གཱ ཝི་མུ་ཙྩ་ཏི; ཝི་མོ་ཀྑཱ [ཝི་མོ་ཀྑཾ (ཀ.), ཝི་མོ་ཀྑ (སྱཱ. ཀཾ.)] ‘པ་རི་ཉྙཱ་ཏཾ མེ ཨུ་པཱ་དཱ་ན’ནྟི པ་ཛཱ་ནཱ་ཏི. སོ་ཏ་ཉྩ པ་ཊི་ཙྩ ས་དྡེ ཙ ཨུ་པྤ་ཛྫ་ཏི… གྷཱ་ན་ཉྩ པ་ཊི་ཙྩ ག་ནྡྷེ ཙ… ཛི་ཝ྄ཧ་ཉྩ པ་ཊི་ཙྩ ར་སེ ཙ… ཀཱ་ཡ་ཉྩ པ་ཊི་ཙྩ ཕོ་ཊྛ་བྦེ ཙ… མ་ན་ཉྩ པ་ཊི་ཙྩ དྷ་མྨེ ཙ ཨུ་པྤ་ཛྫ་ཏི མ་ནོ་ཝི་ཉྙཱ་ཎཾ. ཏི་ཎྞཾ ས་ངྒ་ཏི ཕ་སྶོ. ཕ་སྶ་པ་ཙྩ་ཡཱ ཝེ་ད་ནཱ. ཨེ་ཝཾ པ་སྶཾ, བྷི་ཀྑ་ཝེ, སུ་ཏ་ཝཱ ཨ་རི་ཡ་སཱ་ཝ་ཀོ མ་ན་སྨི་མྤི ནི་བྦི་ནྡ་ཏི, དྷ་མྨེ་སུ་པི ནི་བྦི་ནྡ་ཏི, མ་ནོ་ཝི་ཉྙཱ་ཎེ་པི ནི་བྦི་ནྡ་ཏི, མ་ནོ་ས་མྥ་སྶེ་པི ནི་བྦི་ནྡ་ཏི, ཝེ་ད་ནཱ་ཡ་པི ནི་བྦི་ནྡ་ཏི. ནི་བྦི་ནྡཾ ཝི་ར་ཛྫ་ཏི; ཝི་རཱ་གཱ ཝི་མུ་ཙྩ་ཏི; ཝི་མོ་ཀྑཱ ‘པ་རི་ཉྙཱ་ཏཾ མེ ཨུ་པཱ་དཱ་ན’ནྟི པ་ཛཱ་ནཱ་ཏི. ཨ་ཡཾ ཁོ, བྷི་ཀྑ་ཝེ, ས་བྦུ་པཱ་དཱ་ན་པ་རི་ཉྙཱ་ཡ དྷ་མྨོ’’ཏི. ཨ་ཊྛ་མཾ.