༤. ཨོ་ཀྐ་ནྟ་སཾ་ཡུ་ཏྟཾ

༡. ཙ་ཀྑུ་སུ་ཏྟཾ

༣༠༢. སཱ་ཝ་ཏྠི་ནི་དཱ་ནཾ. ‘‘ཙ་ཀྑུཾ, བྷི་ཀྑ་ཝེ, ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི; སོ་ཏཾ ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི; གྷཱ་ནཾ ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི; ཛི་ཝ྄ཧཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི [ཝི་པ་རི་ཎཱ་མི་ནཱི ཨ་ཉྙ་ཐཱ་བྷཱ་ཝི་ནཱི (?)]; ཀཱ་ཡོ ཨ་ནི་ཙྩོ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; མ་ནོ ཨ་ནི་ཙྩོ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི – ཨ་ཡཾ ཝུ་ཙྩ་ཏི ས་དྡྷཱ་ནུ་སཱ་རཱི, ཨོ་ཀྐ་ནྟོ ས་མྨ་ཏྟ་ནི་ཡཱ་མཾ, ས་པྤུ་རི་ས་བྷཱུ་མིཾ ཨོ་ཀྐ་ནྟོ, ཝཱི་ཏི་ཝ་ཏྟོ པུ་ཐུ་ཛྫ་ན་བྷཱུ་མིཾ; ཨ་བྷ་བྦོ ཏཾ ཀ་མྨཾ ཀཱ་ཏུཾ, ཡཾ ཀ་མྨཾ ཀ་ཏྭཱ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ པེ་ཏྟི་ཝི་ས་ཡཾ ཝཱ ཨུ་པ་པ་ཛྫེ་ཡྻ; ཨ་བྷ་བྦོ ཙ [ཨ་བྷ་བྦོ་ཝ (སཱི. སྱཱ. ཀཾ.)] ཏཱ་ཝ ཀཱ་ལཾ ཀཱ་ཏུཾ ཡཱ་ཝ ན སོ་ཏཱ་པ་ཏྟི་ཕ་ལཾ ས་ཙྪི་ཀ་རོ་ཏི’’.

‘‘ཡ་སྶ ཁོ, བྷི་ཀྑ་ཝེ, ཨི་མེ དྷ་མྨཱ ཨེ་ཝཾ པ་ཉྙཱ་ཡ མ་ཏྟ་སོ ནི་ཛ྄ཛྷཱ་ནཾ ཁ་མ་ནྟི, ཨ་ཡཾ ཝུ་ཙྩ་ཏི – ‘དྷ་མྨཱ་ནུ་སཱ་རཱི, ཨོ་ཀྐ་ནྟོ ས་མྨ་ཏྟ་ནི་ཡཱ་མཾ, ས་པྤུ་རི་ས་བྷཱུ་མིཾ ཨོ་ཀྐ་ནྟོ, ཝཱི་ཏི་ཝ་ཏྟོ པུ་ཐུ་ཛྫ་ན་བྷཱུ་མིཾ; ཨ་བྷ་བྦོ ཏཾ ཀ་མྨཾ ཀཱ་ཏུཾ, ཡཾ ཀ་མྨཾ ཀ་ཏྭཱ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ པེ་ཏྟི་ཝི་ས་ཡཾ ཝཱ ཨུ་པ་པ་ཛྫེ་ཡྻ; ཨ་བྷ་བྦོ ཙ ཏཱ་ཝ ཀཱ་ལཾ ཀཱ་ཏུཾ ཡཱ་ཝ ན སོ་ཏཱ་པ་ཏྟི་ཕ་ལཾ ས་ཙྪི་ཀ་རོ་ཏི’. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ པ་ཛཱ་ནཱ་ཏི ཨེ་ཝཾ པ་སྶ་ཏི, ཨ་ཡཾ ཝུ་ཙྩ་ཏི – ‘སོ་ཏཱ་པ་ནྣོ ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ནོ’’’ཏི. པ་ཋ་མཾ.

༢. རཱུ་པ་སུ་ཏྟཾ

༣༠༣. སཱ་ཝ་ཏྠི་ནི་དཱ་ནཾ. ‘‘རཱུ་པཱ, བྷི་ཀྑ་ཝེ, ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ; ས་དྡཱ ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ; ག་ནྡྷཱ ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ; ར་སཱ ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ; ཕོ་ཊྛ་བྦཱ ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ; དྷ་མྨཱ ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ས་དྡྷཱ་ནུ་སཱ་རཱི, ཨོ་ཀྐ་ནྟོ ས་མྨ་ཏྟ་ནི་ཡཱ་མཾ, ས་པྤུ་རི་ས་བྷཱུ་མིཾ ཨོ་ཀྐ་ནྟོ, ཝཱི་ཏི་ཝ་ཏྟོ པུ་ཐུ་ཛྫ་ན་བྷཱུ་མིཾ; ཨ་བྷ་བྦོ ཏཾ ཀ་མྨཾ ཀཱ་ཏུཾ, ཡཾ ཀ་མྨཾ ཀ་ཏྭཱ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ པེ་ཏྟི་ཝི་ས་ཡཾ ཝཱ ཨུ་པ་པ་ཛྫེ་ཡྻ; ཨ་བྷ་བྦོ ཙ ཏཱ་ཝ ཀཱ་ལཾ ཀཱ་ཏུཾ ཡཱ་ཝ ན སོ་ཏཱ་པ་ཏྟི་ཕ་ལཾ ས་ཙྪི་ཀ་རོ་ཏི’’.

༣. ཝི་ཉྙཱ་ཎ་སུ་ཏྟཾ

༣༠༤. སཱ་ཝ་ཏྠི་ནི་དཱ་ནཾ. ‘‘ཙ་ཀྑུ་ཝི་ཉྙཱ་ཎཾ, བྷི་ཀྑ་ཝེ, ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི; སོ་ཏ་ཝི་ཉྙཱ་ཎཾ… གྷཱ་ན་ཝི་ཉྙཱ་ཎཾ… ཛི་ཝ྄ཧཱ་ཝི་ཉྙཱ་ཎཾ… ཀཱ་ཡ་ཝི་ཉྙཱ་ཎཾ… མ་ནོ་ཝི་ཉྙཱ་ཎཾ ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི. ཡོ བྷི་ཀྑ་ཝེ…པེ… ས་མྦོ་དྷི་པ་རཱ་ཡ་ནོ’’ཏི. ཏ་ཏི་ཡཾ.

༤. ས་མྥ་སྶ་སུ་ཏྟཾ

༣༠༥. སཱ་ཝ་ཏྠི་ནི་དཱ་ནཾ. ‘‘ཙ་ཀྑུ་ས་མྥ་སྶོ, བྷི་ཀྑ་ཝེ, ཨ་ནི་ཙྩོ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; སོ་ཏ་ས་མྥ་སྶོ… གྷཱ་ན་ས་མྥ་སྶོ… ཛི་ཝ྄ཧཱ་ས་མྥ་སྶོ… ཀཱ་ཡ་ས་མྥ་སྶོ… མ་ནོ་ས་མྥ་སྶོ ཨ་ནི་ཙྩོ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ‘ས་དྡྷཱ་ནུ་སཱ་རཱི…པེ… ས་མྦོ་དྷི་པ་རཱ་ཡ་ནོ’’’ཏི. ཙ་ཏུ་ཏྠཾ.

༥. ས་མྥ་སྶ་ཛཱ་སུ་ཏྟཾ

༣༠༦. སཱ་ཝ་ཏྠི་ནི་དཱ་ནཾ. ‘‘ཙ་ཀྑུ་ས་མྥ་སྶ་ཛཱ, བྷི་ཀྑ་ཝེ, ཝེ་ད་ནཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; སོ་ཏ་ས་མྥ་སྶ་ཛཱ ཝེ་ད་ནཱ…པེ… གྷཱ་ན་ས་མྥ་སྶ་ཛཱ ཝེ་ད་ནཱ…པེ… ཛི་ཝ྄ཧཱ་ས་མྥ་སྶ་ཛཱ ཝེ་ད་ནཱ…པེ… ཀཱ་ཡ་ས་མྥ་སྶ་ཛཱ ཝེ་ད་ནཱ…པེ… མ་ནོ་ས་མྥ་སྶ་ཛཱ ཝེ་ད་ནཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ‘ས་དྡྷཱ་ནུ་སཱ་རཱི…པེ… ས་མྦོ་དྷི་པ་རཱ་ཡ་ནོ’’’ཏི. པ་ཉྩ་མཾ.

༦. རཱུ་པ་ས་ཉྙཱ་སུ་ཏྟཾ

༣༠༧. སཱ་ཝ་ཏྠི་ནི་དཱ་ནཾ. ‘‘རཱུ་པ་ས་ཉྙཱ, བྷི་ཀྑ་ཝེ, ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; ས་དྡ་ས་ཉྙཱ… ག་ནྡྷ་ས་ཉྙཱ… ར་ས་ས་ཉྙཱ… ཕོ་ཊྛ་བྦ་ས་ཉྙཱ… དྷ་མྨ་ས་ཉྙཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ‘ས་དྡྷཱ་ནུ་སཱ་རཱི…པེ… ས་མྦོ་དྷི་པ་རཱ་ཡ་ནོ’’’ཏི. ཚ་ཊྛཾ.

༧. རཱུ་པ་ས་ཉྩེ་ཏ་ནཱ་སུ་ཏྟཾ

༣༠༨. སཱ་ཝ་ཏྠི་ནི་དཱ་ནཾ. ‘‘རཱུ་པ་ས་ཉྩེ་ཏ་ནཱ, བྷི་ཀྑ་ཝེ, ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; ས་དྡ་ས་ཉྩེ་ཏ་ནཱ… ག་ནྡྷ་ས་ཉྩེ་ཏ་ནཱ… ར་ས་ས་ཉྩེ་ཏ་ནཱ… ཕོ་ཊྛ་བྦ་ས་ཉྩེ་ཏ་ནཱ… དྷ་མྨ་ས་ཉྩེ་ཏ་ནཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ‘ས་དྡྷཱ་ནུ་སཱ་རཱི…པེ… ས་མྦོ་དྷི་པ་རཱ་ཡ་ནོ’’’ཏི. ས་ཏྟ་མཾ.

༨. རཱུ་པ་ཏ་ཎྷཱ་སུ་ཏྟཾ

༣༠༩. སཱ་ཝ་ཏྠི་ནི་དཱ་ནཾ. ‘‘རཱུ་པ་ཏ་ཎྷཱ, བྷི་ཀྑ་ཝེ, ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; ས་དྡ་ཏ་ཎྷཱ… ག་ནྡྷ་ཏ་ཎྷཱ… ར་ས་ཏ་ཎྷཱ… ཕོ་ཊྛ་བྦ་ཏ་ཎྷཱ… དྷ་མྨ་ཏ་ཎྷཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ‘ས་དྡྷཱ་ནུ་སཱ་རཱི…པེ… ས་མྦོ་དྷི་པ་རཱ་ཡ་ནོ’’’ཏི. ཨ་ཊྛ་མཾ.

༩. པ་ཐ་ཝཱི་དྷཱ་ཏུ་སུ་ཏྟཾ

༣༡༠. སཱ་ཝ་ཏྠི་ནི་དཱ་ནཾ. ‘‘པ་ཐ་ཝཱི་དྷཱ་ཏུ, བྷི་ཀྑ་ཝེ, ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; ཨཱ་པོ་དྷཱ་ཏུ… ཏེ་ཛོ་དྷཱ་ཏུ… ཝཱ་ཡོ་དྷཱ་ཏུ… ཨཱ་ཀཱ་ས་དྷཱ་ཏུ… ཝི་ཉྙཱ་ཎ་དྷཱ་ཏུ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ‘ས་དྡྷཱ་ནུ་སཱ་རཱི…པེ… ས་མྦོ་དྷི་པ་རཱ་ཡ་ནོ’’’ཏི. ན་ཝ་མཾ.

༡༠. ཁ་ནྡྷ་སུ་ཏྟཾ

༣༡༡. སཱ་ཝ་ཏྠི་ནི་དཱ་ནཾ. ‘‘རཱུ་པཾ, བྷི་ཀྑ་ཝེ, ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི; ཝེ་ད་ནཱ ཨ་ནི་ཙྩཱ ཝི་པ་རི་ཎཱ་མཱི ཨ་ཉྙ་ཐཱ་བྷཱ་ཝཱི; ས་ཉྙཱ… ས་ངྑཱ་རཱ ཨ་ནི་ཙྩཱ ཝི་པ་རི་ཎཱ་མི་ནོ ཨ་ཉྙ་ཐཱ་བྷཱ་ཝི་ནོ; ཝི་ཉྙཱ་ཎཾ ཨ་ནི་ཙྩཾ ཝི་པ་རི་ཎཱ་མི ཨ་ཉྙ་ཐཱ་བྷཱ་ཝི. ཡོ, བྷི་ཀྑ་ཝེ, ཨི་མེ དྷ་མྨེ ཨེ་ཝཾ ས་དྡ་ཧ་ཏི ཨ་དྷི་མུ་ཙྩ་ཏི, ཨ་ཡཾ ཝུ་ཙྩ་ཏི ས་དྡྷཱ་ནུ་སཱ་རཱི, ཨོ་ཀྐ་ནྟོ ས་མྨ་ཏྟ་ནི་ཡཱ་མཾ, ས་པྤུ་རི་ས་བྷཱུ་མིཾ ཨོ་ཀྐ་ནྟོ, ཝཱི་ཏི་ཝ་ཏྟོ པུ་ཐུ་ཛྫ་ན་བྷཱུ་མིཾ; ཨ་བྷ་བྦོ ཏཾ ཀ་མྨཾ ཀཱ་ཏུཾ, ཡཾ ཀ་མྨཾ ཀ་ཏྭཱ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ པེ་ཏྟི་ཝི་ས་ཡཾ ཝཱ ཨུ་པ་པ་ཛྫེ་ཡྻ; ཨ་བྷ་བྦོ ཙ ཏཱ་ཝ ཀཱ་ལཾ ཀཱ་ཏུཾ ཡཱ་ཝ ན སོ་ཏཱ་པ་ཏྟི་ཕ་ལཾ ས་ཙྪི་ཀ་རོ་ཏི’’.

ཨོ་ཀྐ་ནྟ་སཾ་ཡུ་ཏྟཾ [ཨོ་ཀྐ་ནྟི་ཀ་སཾ་ཡུ་ཏྟཾ (པཱི. ཀ.)] ས་མ་ཏྟཾ.