༥. ས་མཱ་དྷི་སུ་ཏྟཾ

༥. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ – ‘‘ས་མཱ་དྷིཾ, བྷི་ཀྑ་ཝེ, བྷཱ་ཝེ་ཐ; ས་མཱ་ཧི་ཏོ, བྷི་ཀྑ་ཝེ, བྷི་ཀྑུ ཡ་ཐཱ་བྷཱུ་ཏཾ པ་ཛཱ་ནཱ་ཏི. ཀི་ཉྩ ཡ་ཐཱ་བྷཱུ་ཏཾ པ་ཛཱ་ནཱ་ཏི? རཱུ་པ་སྶ ས་མུ་ད་ཡ་ཉྩ ཨ་ཏྠ་ངྒ་མ་ཉྩ, ཝེ་ད་ནཱ་ཡ ས་མུ་ད་ཡ་ཉྩ ཨ་ཏྠ་ངྒ་མ་ཉྩ, ས་ཉྙཱ་ཡ ས་མུ་ད་ཡ་ཉྩ ཨ་ཏྠ་ངྒ་མ་ཉྩ, ས་ངྑཱ་རཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ, ཝི་ཉྙཱ་ཎ་སྶ ས་མུ་ད་ཡ་ཉྩ ཨ་ཏྠ་ངྒ་མ་ཉྩ’’.

‘‘ཀོ ཙ, བྷི་ཀྑ་ཝེ, རཱུ་པ་སྶ ས་མུ་ད་ཡོ, ཀོ ཝེ་ད་ནཱ་ཡ ས་མུ་ད་ཡོ, ཀོ ས་ཉྙཱ་ཡ ས་མུ་ད་ཡོ, ཀོ ས་ངྑཱ་རཱ་ནཾ ས་མུ་ད་ཡོ, ཀོ ཝི་ཉྙཱ་ཎ་སྶ ས་མུ་ད་ཡོ? ཨི་དྷ, བྷི་ཀྑ་ཝེ, བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི.

‘‘ཀི་ཉྩ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི? རཱུ་པཾ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ རཱུ་པཾ ཨ་བྷི་ན་ནྡ་ཏོ ཨ་བྷི་ཝ་ད་ཏོ ཨ་ཛ྄ཛྷོ་སཱ་ཡ ཏི་ཊྛ་ཏོ ཨུ་པྤ་ཛྫ་ཏི ན་ནྡཱི. ཡཱ རཱུ་པེ ན་ནྡཱི ཏ་དུ་པཱ་དཱ་ནཾ. ཏ་སྶུ་པཱ་དཱ་ན་པ་ཙྩ་ཡཱ བྷ་ཝོ; བྷ་ཝ་པ་ཙྩ་ཡཱ ཛཱ་ཏི; ཛཱ་ཏི་པ་ཙྩ་ཡཱ ཛ་རཱ་མ་ར་ཎཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ ས་མྦྷ་ཝ་ནྟི. ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི.

‘‘ཝེ་ད་ནཾ ཨ་བྷི་ན་ནྡ་ཏི…པེ… ས་ཉྙཾ ཨ་བྷི་ན་ནྡ་ཏི… ས་ངྑཱ་རེ ཨ་བྷི་ན་ནྡ་ཏི… ཝི་ཉྙཱ་ཎཾ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཝི་ཉྙཱ་ཎཾ ཨ་བྷི་ན་ནྡ་ཏོ ཨ་བྷི་ཝ་ད་ཏོ ཨ་ཛ྄ཛྷོ་སཱ་ཡ ཏི་ཊྛ་ཏོ ཨུ་པྤ་ཛྫ་ཏི ན་ནྡཱི. ཡཱ ཝི་ཉྙཱ་ཎེ ན་ནྡཱི ཏ་དུ་པཱ་དཱ་ནཾ. ཏ་སྶུ་པཱ་དཱ་ན་པ་ཙྩ་ཡཱ བྷ་ཝོ; བྷ་ཝ་པ་ཙྩ་ཡཱ ཛཱ་ཏི; ཛཱ་ཏི་པ་ཙྩ་ཡཱ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི.

‘‘ཨ་ཡཾ, བྷི་ཀྑ་ཝེ, རཱུ་པ་སྶ ས་མུ་ད་ཡོ; ཨ་ཡཾ ཝེ་ད་ནཱ་ཡ ས་མུ་ད་ཡོ; ཨ་ཡཾ ས་ཉྙཱ་ཡ ས་མུ་ད་ཡོ; ཨ་ཡཾ ས་ངྑཱ་རཱ་ནཾ ས་མུ་ད་ཡོ; ཨ་ཡཾ ཝི་ཉྙཱ་ཎ་སྶ ས་མུ་ད་ཡོ.

‘‘ཀོ ཙ, བྷི་ཀྑ་ཝེ, རཱུ་པ་སྶ ཨ་ཏྠ་ངྒ་མོ, ཀོ ཝེ་ད་ནཱ་ཡ… ཀོ ས་ཉྙཱ་ཡ… ཀོ ས་ངྑཱ་རཱ་ནཾ… ཀོ ཝི་ཉྙཱ་ཎ་སྶ ཨ་ཏྠ་ངྒ་མོ?

ཨི་དྷ, བྷི་ཀྑ་ཝེ, ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི.

‘‘ཀི་ཉྩ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི? རཱུ་པཾ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ རཱུ་པཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ཡཱ རཱུ་པེ ན་ནྡཱི སཱ ནི་རུ་ཛ྄ཛྷ་ཏི. ཏ་སྶ ན་ནྡཱི་ནི་རོ་དྷཱ ཨུ་པཱ་དཱ་ན་ནི་རོ་དྷོ; ཨུ་པཱ་དཱ་ན་ནི་རོ་དྷཱ བྷ་ཝ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི.

‘‘ཝེ་ད་ནཾ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཝེ་ད་ནཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ ཏི་ཊྛ་ཏོ ཡཱ ཝེ་ད་ནཱ་ཡ ན་ནྡཱི སཱ ནི་རུ་ཛ྄ཛྷ་ཏི. ཏ་སྶ ན་ནྡཱི་ནི་རོ་དྷཱ ཨུ་པཱ་དཱ་ན་ནི་རོ་དྷོ; ཨུ་པཱ་དཱ་ན་ནི་རོ་དྷཱ བྷ་ཝ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི.

‘‘ས་ཉྙཾ ནཱ་བྷི་ན་ནྡ་ཏི…པེ… ས་ངྑཱ་རེ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ས་ངྑཱ་རེ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ཡཱ ས་ངྑཱ་རེ་སུ ན་ནྡཱི སཱ ནི་རུ་ཛ྄ཛྷ་ཏི. ཏ་སྶ ན་ནྡཱི་ནི་རོ་དྷཱ ཨུ་པཱ་དཱ་ན་ནི་རོ་དྷོ; ཨུ་པཱ་དཱ་ན་ནི་རོ་དྷཱ བྷ་ཝ་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི.

‘‘ཝི་ཉྙཱ་ཎཾ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཝི་ཉྙཱ་ཎཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ཡཱ ཝི་ཉྙཱ་ཎེ ན་ནྡཱི སཱ ནི་རུ་ཛ྄ཛྷ་ཏི. ཏ་སྶ ན་ནྡཱི་ནི་རོ་དྷཱ ཨུ་པཱ་དཱ་ན་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི.

‘‘ཨ་ཡཾ, བྷི་ཀྑ་ཝེ, རཱུ་པ་སྶ ཨ་ཏྠ་ངྒ་མོ, ཨ་ཡཾ ཝེ་ད་ནཱ་ཡ ཨ་ཏྠ་ངྒ་མོ, ཨ་ཡཾ ས་ཉྙཱ་ཡ ཨ་ཏྠ་ངྒ་མོ, ཨ་ཡཾ ས་ངྑཱ་རཱ་ནཾ ཨ་ཏྠ་ངྒ་མོ, ཨ་ཡཾ ཝི་ཉྙཱ་ཎ་སྶ ཨ་ཏྠ་ངྒ་མོ’’ཏི. པ་ཉྩ་མཾ.