༢. དུ་སྶཱི་ལ་སུ་ཏྟཾ

༡༠༨. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དྷཱ་ཏུ་སོ་ཝ, བྷི་ཀྑ་ཝེ, ས་ཏྟཱ སཾ་ས་ནྡ་ནྟི ས་མེ་ནྟི. ཨ་སྶ་དྡྷཱ ཨ་སྶ་དྡྷེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི; ཨ་ཧི་རི་ཀཱ ཨ་ཧི་རི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི; ཨ་ནོ་ཏྟ་པྤི་ནོ ཨ་ནོ་ཏྟ་པྤཱི་ཧི ས་དྡྷིཾ སཾ་ས་ནྡ་ནྟི ས་མེ་ནྟི; དུ་སྶཱི་ལཱ དུ་སྶཱི་ལེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི; དུ་པྤ་ཉྙཱ དུ་པྤ་ཉྙེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི’’.

‘‘ས་དྡྷཱ ས་དྡྷེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི; ཧི་རི་མ་ནཱ ཧི་རི་མ་ནེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི; ཨོ་ཏྟ་པྤི་ནོ ཨོ་ཏྟ་པྤཱི་ཧི ས་དྡྷིཾ སཾ་ས་ནྡ་ནྟི ས་མེ་ནྟི; སཱི་ལ་ཝ་ནྟོ སཱི་ལ་ཝ་ནྟེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི; པ་ཉྙ་ཝ་ནྟོ པ་ཉྙ་ཝ་ནྟེ་ཧི ས་དྡྷིཾ སཾ་ས་ནྡ་ནྟི ས་མེ་ནྟཱི’’ཏི. དུ་ཏི་ཡཾ.