༦. ས་གཱ་ཐཱ་སུ་ཏྟཾ

༡༠༠. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘དྷཱ་ཏུ་སོ་ཝ, བྷི་ཀྑ་ཝེ, ས་ཏྟཱ སཾ་ས་ནྡ་ནྟི ས་མེ་ནྟི. ཧཱི་ནཱ་དྷི་མུ་ཏྟི་ཀཱ ཧཱི་ནཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི. ཨ་ཏཱི་ཏ་མྤི ཁོ, བྷི་ཀྑ་ཝེ, ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡིཾ་སུ ས་མིཾ་སུ. ཧཱི་ནཱ་དྷི་མུ་ཏྟི་ཀཱ ཧཱི་ནཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡིཾ་སུ ས་མིཾ་སུ’’.

‘‘ཨ་ནཱ་ག་ཏ་མྤི ཁོ, བྷི་ཀྑ་ཝེ, ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡི་སྶ་ནྟི ས་མེ་སྶ་ནྟི. ཧཱི་ནཱ་དྷི་མུ་ཏྟི་ཀཱ ཧཱི་ནཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡི་སྶ་ནྟི ས་མེ་སྶ་ནྟི.

‘‘ཨེ་ཏ་ར་ཧི་པི ཁོ, བྷི་ཀྑ་ཝེ, པ་ཙྩུ་པྤ་ནྣཾ ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡ་ནྟི ས་མེ་ནྟི. ཧཱི་ནཱ་དྷི་མུ་ཏྟི་ཀཱ ཧཱི་ནཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི.

‘‘སེ་ཡྻ་ཐཱ་པི, བྷི་ཀྑ་ཝེ, གཱུ་ཐོ གཱུ་ཐེ་ན སཾ་ས་ནྡ་ཏི ས་མེ་ཏི; མུ་ཏྟཾ མུ་ཏྟེ་ན སཾ་ས་ནྡ་ཏི ས་མེ་ཏི; ཁེ་ལོ༹ ཁེ་ལེ༹་ན སཾ་ས་ནྡ་ཏི ས་མེ་ཏི; པུ་བྦོ པུ་བྦེ་ན སཾ་ས་ནྡ་ཏི ས་མེ་ཏི; ལོ་ཧི་ཏཾ ལོ་ཧི་ཏེ་ན སཾ་ས་ནྡ་ཏི ས་མེ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, དྷཱ་ཏུ་སོ་ཝ [ས་བྦ་ཏྠ་པི ཨེ་ཝ་མེ་ཝ དི་སྶ་ཏི] ས་ཏྟཱ སཾ་ས་ནྡ་ནྟི ས་མེ་ནྟི. ཧཱི་ནཱ་དྷི་མུ་ཏྟི་ཀཱ ཧཱི་ནཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི. ཨ་ཏཱི་ཏ་མྤི ཁོ ཨ་དྡྷཱ་ནཾ…པེ… ཨ་ནཱ་ག་ཏ་མྤི ཁོ ཨ་དྡྷཱ་ནཾ…པེ… ཨེ་ཏ་ར་ཧི་པི ཁོ པ་ཙྩུ་པྤ་ནྣཾ ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡ་ནྟི ས་མེ་ནྟི. ཧཱི་ནཱ་དྷི་མུ་ཏྟི་ཀཱ ཧཱི་ནཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི.

‘‘དྷཱ་ཏུ་སོ་ཝ བྷི་ཀྑ་ཝེ, ས་ཏྟཱ སཾ་ས་ནྡ་ནྟི ས་མེ་ནྟི. ཀ་ལྱཱ་ཎཱ་དྷི་མུ་ཏྟི་ཀཱ ཀ་ལྱཱ་ཎཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི. ཨ་ཏཱི་ཏ་མྤི ཁོ, བྷི་ཀྑ་ཝེ, ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡིཾ་སུ ས་མིཾ་སུ. ཀ་ལྱཱ་ཎཱ་དྷི་མུ་ཏྟི་ཀཱ ཀ་ལྱཱ་ཎཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡིཾ་སུ ས་མིཾ་སུ.

‘‘ཨ་ནཱ་ག་ཏ་མྤི ཁོ, བྷི་ཀྑ་ཝེ, ཨ་དྡྷཱ་ནཾ…པེ… ཨེ་ཏ་ར་ཧི་པི ཁོ, བྷི་ཀྑ་ཝེ, པ་ཙྩུ་པྤ་ནྣཾ ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡ་ནྟི ས་མེ་ནྟི. ཀ་ལྱཱ་ཎཱ་དྷི་མུ་ཏྟི་ཀཱ ཀ་ལྱཱ་ཎཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི.

‘‘སེ་ཡྻ་ཐཱ་པི, བྷི་ཀྑ་ཝེ, ཁཱི་རཾ ཁཱི་རེ་ན སཾ་ས་ནྡ་ཏི ས་མེ་ཏི; ཏེ་ལཾ ཏེ་ལེ་ན སཾ་ས་ནྡ་ཏི ས་མེ་ཏི; ས་པྤི ས་པྤི་ནཱ སཾ་ས་ནྡ་ཏི ས་མེ་ཏི; མ་དྷུ མ་དྷུ་ནཱ སཾ་ས་ནྡ་ཏི ས་མེ་ཏི; ཕཱ་ཎི་ཏཾ ཕཱ་ཎི་ཏེ་ན སཾ་ས་ནྡ་ཏི ས་མེ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, དྷཱ་ཏུ་སོ་ཝ ས་ཏྟཱ སཾ་ས་ནྡ་ནྟི ས་མེ་ནྟི. ཀ་ལྱཱ་ཎཱ་དྷི་མུ་ཏྟི་ཀཱ ཀ་ལྱཱ་ཎཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟི. ཨ་ཏཱི་ཏ་མྤི ཁོ ཨ་དྡྷཱ་ནཾ… ཨ་ནཱ་ག་ཏ་མྤི ཁོ ཨ་དྡྷཱ་ནཾ… ཨེ་ཏ་ར་ཧི་པི ཁོ པ་ཙྩུ་པྤ་ནྣཾ ཨ་དྡྷཱ་ནཾ དྷཱ་ཏུ་སོ་ཝ ས་ཏྟཱ སཾ་ས་ནྡ་ནྟི ས་མེ་ནྟི. ཀ་ལྱཱ་ཎཱ་དྷི་མུ་ཏྟི་ཀཱ ཀ་ལྱཱ་ཎཱ་དྷི་མུ་ཏྟི་ཀེ་ཧི ས་དྡྷིཾ སཾ་ས་ནྡ་ནྟི ས་མེ་ནྟཱི’’ཏི.

ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ་ན སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –

‘‘སཾ་ས་གྒཱ ཝ་ན་ཐོ ཛཱ་ཏོ, ཨ་སཾ་ས་གྒེ་ན ཚི་ཛྫ་ཏི;

པ་རི་ཏྟཾ དཱ་རུ་མཱ་རུ་ཡ྄ཧ, ཡ་ཐཱ སཱི་དེ མ་ཧ་ཎྞ་ཝེ.

‘‘ཨེ་ཝཾ ཀུ་སཱི་ཏ་མཱ་ག་མྨ, སཱ་དྷུ་ཛཱི་ཝི་པི སཱི་ད་ཏི;

ཏ་སྨཱ ཏཾ པ་རི་ཝ་ཛྫེ་ཡྻ, ཀུ་སཱི་ཏཾ ཧཱི་ན་ཝཱི་རི་ཡཾ.

‘‘པ་ཝི་ཝི་ཏྟེ་ཧི ཨ་རི་ཡེ་ཧི, པ་ཧི་ཏ་ཏྟེ་ཧི ཛྷཱ་ཡཱི་ཧི [ཛྷཱ་ཡི་ཧི (སཱི.), ཛྷཱ་ཡི་བྷི (སྱཱ. ཀཾ.)];

ནི་ཙྩཾ ཨཱ་ར་དྡྷ་ཝཱི་རི་ཡེ་ཧི, པ་ཎྜི་ཏེ་ཧི ས་ཧཱ་ཝ་སེ’’ཏི.