༥. ཨུ་པྤ་ལ་ཝ་ཎྞཱ་སུ་ཏྟཾ

༡༦༦. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ…པེ… ཨ་ཉྙ་ཏ་ར་སྨིཾ སུ་པུ་པྥི་ཏ་སཱ་ལ་རུ་ཀྑ་མཱུ་ལེ ཨ་ཊྛཱ་སི. ཨ་ཐ ཁོ མཱ་རོ པཱ་པི་མཱ ཨུ་པྤ་ལ་ཝ་ཎྞཱ་ཡ བྷི་ཀྑུ་ནི་ཡཱ བྷ་ཡཾ ཚ་མྦྷི་ཏ་ཏྟཾ ལོ་མ་ཧཾ་སཾ ཨུ་པྤཱ་དེ་ཏུ་ཀཱ་མོ ས་མཱ་དྷི་མྷཱ ཙཱ་ཝེ་ཏུ་ཀཱ་མོ ཡེ་ན ཨུ་པྤ་ལ་ཝ་ཎྞཱ བྷི་ཀྑུ་ནཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨུ་པྤ་ལ་ཝ་ཎྞཾ བྷི་ཀྑུ་ནིཾ གཱ་ཐཱ་ཡ ཨ་ཛ྄ཛྷ་བྷཱ་སི –

‘‘སུ་པུ་པྥི་ཏ་གྒཾ ཨུ་པ་ག་མྨ བྷི་ཀྑུ་ནི,

ཨེ་ཀཱ ཏུ་ཝཾ ཏི་ཊྛ་སི སཱ་ལ་མཱུ་ལེ;

ན ཙ་ཏྠི ཏེ དུ་ཏི་ཡཱ ཝ་ཎྞ་དྷཱ་ཏུ,

བཱ་ལེ ན ཏྭཾ བྷཱ་ཡ་སི དྷུ་ཏྟ་ཀཱ་ན’’ནྟི.

ཨ་ཐ ཁོ ཨུ་པྤ་ལ་ཝ་ཎྞཱ་ཡ བྷི་ཀྑུ་ནི་ཡཱ ཨེ་ཏ་ད་ཧོ་སི – ‘‘ཀོ ནུ ཁྭཱ་ཡཾ མ་ནུ་སྶོ ཝཱ ཨ་མ་ནུ་སྶོ ཝཱ གཱ་ཐཾ བྷཱ་ས་ཏཱི’’ཏི? ཨ་ཐ ཁོ ཨུ་པྤ་ལ་ཝ་ཎྞཱ་ཡ བྷི་ཀྑུ་ནི་ཡཱ ཨེ་ཏ་ད་ཧོ་སི – ‘‘མཱ་རོ ཁོ ཨ་ཡཾ པཱ་པི་མཱ མ་མ བྷ་ཡཾ ཚ་མྦྷི་ཏ་ཏྟཾ ལོ་མ་ཧཾ་སཾ ཨུ་པྤཱ་དེ་ཏུ་ཀཱ་མོ ས་མཱ་དྷི་མྷཱ ཙཱ་ཝེ་ཏུ་ཀཱ་མོ གཱ་ཐཾ བྷཱ་ས་ཏཱི’’ཏི. ཨ་ཐ ཁོ ཨུ་པྤ་ལ་ཝ་ཎྞཱ བྷི་ཀྑུ་ནཱི ‘‘མཱ་རོ ཨ་ཡཾ པཱ་པི་མཱ’’ ཨི་ཏི ཝི་དི་ཏྭཱ མཱ་རཾ པཱ་པི་མ་ནྟཾ གཱ་ཐཱ་ཧི པ་ཙྩ་བྷཱ་སི –

‘‘ས་ཏཾ ས་ཧ་སྶཱ་ནི་པི དྷུ་ཏྟ་ཀཱ་ནཾ,

ཨི་དྷཱ་ག་ཏཱ ཏཱ་དི་ས་ཀཱ བྷ་ཝེ་ཡྻུཾ;

ལོ་མཾ ན ཨི་ཉྫཱ་མི ན ས་ནྟ་སཱ་མི,

ན མཱ་ར བྷཱ་ཡཱ་མི ཏ་མེ་ཀི་ཀཱ་པི.

‘‘ཨེ་སཱ ཨ་ནྟ་ར་དྷཱ་ཡཱ་མི, ཀུ་ཙྪིཾ ཝཱ པ་ཝི་སཱ་མི ཏེ;

པ་ཁུ་མ་ནྟ་རི་ཀཱ་ཡ་མྤི, ཏི་ཊྛ་ནྟིཾ མཾ ན ད་ཀྑ་སི.

‘‘ཙི་ཏྟ་སྨིཾ ཝ་སཱི་བྷཱུ་ཏཱ་མྷི, ཨི་དྡྷི་པཱ་དཱ སུ་བྷཱ་ཝི་ཏཱ;

ས་བྦ་བ་ནྡྷ་ན་མུ་ཏྟཱ་མྷི, ན ཏཾ བྷཱ་ཡཱ་མི ཨཱ་ཝུ་སོ’’ཏི.

ཨ་ཐ ཁོ མཱ་རོ པཱ་པི་མཱ ‘‘ཛཱ་ནཱ་ཏི མཾ ཨུ་པྤ་ལ་ཝ་ཎྞཱ བྷི་ཀྑུ་ནཱི’’ཏི དུ་ཀྑཱི དུ་མྨ་ནོ ཏ་ཏྠེ་ཝ་ནྟ་ར་དྷཱ་ཡཱི་ཏི.